1. Momo lie Yesu a pingila ku Yehova oco a lave olondonge viaye?

 OSIMBU Yesu ka file, vuteke waco wa linga epingilo limue ku Isiaye wo kilu. Eye wa pinga ku Yehova oco a lave olondonge viaye. (Yoa. 17:15, 20) Ocili okuti Yehova olonjanja viosi wa siata oku lavulula, oku tata, loku teyuila afendeli vaye. Pole, Yesu wa kũlĩhĩle okuti Satana wa ponduile oku lambalala olondonge viaye. Yesu wa kũlĩhĩlevo okuti oco ovo va tẽle oku pandikisa ka lambalalo Eliapu, va sukilile ekuatiso lia Yehova.

2. Ndomo ca tangiwa Kolosamo 33:18-20, momo lie ka tu sukilila oku kuata usumba eci tu liyaka lovitangi?

² Oluali lulo lua vialiwa la Satana, lua siata oku kokela ovitangi vialua Kakristão vocili koloneke vilo. Tua siata oku liyaka lovitangi vi tu kokela esumuo kuenda oku seteka ekolelo lietu ku Yehova. Pole, ndomo tu ka ci konomuisa vocipama cilo, ka tu sukila oku kuata usamba. Yehova o kasi oku tu lava, eye o lete ovitangi viosi tu kasi oku liyaka lavio kuenda wa li kapelako oku tu kuatisa oco tu tẽle oku pandikisa kovitangi viaco. Tu kũlĩhĩsa ovolandu avali Embimbiliya, a ka tu lekisa ndomo Yehova a siata oku ‘lavulula vosi vana vo sumbila.’—Tanga Olosamo 33:18-20.

3. Vapuluvi api tu pondola oku liyeva ulika?

³ Ndaño tu panga onepa kepata limue linene voluali luosi, pole, olonjanja vimue tu liyeva ulika. Ndeci, umalẽhe umue pamue o liyeva ulika eci a kala kovaso a vakuavo kosikola oku lombolola eci catiamẽla kekolelo liaye, ale pamue ceci a sondolokela vekongelo likuavo. Vamue pokati ketu tu sumua loku sima okuti, tu sukila oku liyaka lovitangi viaco lika lietu. Pamue tu kuata ohele yoku sapuilako vakuetu ndomo tu liyevite, momo pamue tu sima okuti, ka va kuata elomboloko liekalo  lietu. Kuenje pamue tu lipula nda okuti kuli umue wa tukapako muẽle. Oku liyeva okuti tu kasi ulika kovina viosi, ci tu kokela oku kuata ovisimĩlo viokuti, ka tu kuete u o tu teyuila kuenda ci tu nenela esakalalo lialua. Yehova ka yongola okuti, tu liyeva ndoco. Momo lie tu ci popela?

4. Momo lie uprofeto Eliya a popela hati: “Ame lika nda supapo”?

⁴ Tu konomuisi ulandu wulume umue ukuekolelo o tukuiwa okuti Eliya. Omo lia Isevele wa yonguile oku u ponda, eye wa linga ungende umue u soka 40 koloneke, oco a popele omuenyo waye. (1 Olos. 19:1-9) Kuenje likawaye veleva wa sapuila Yehova hati: “Ame lika [nduprofeto] nda supapo.” (1 Olos. 19:10) Pole, kua kala ovaprofeto vakuavo vofeka; Ovadiya wa popelele eci ci soka 100 kovaprofeto peka lia Isevele. (1 Olos. 18:7, 13) Momo lie Eliya a liyevela ulika? Anga hẽ wa simĩle okuti ovaprofeto vana Ovadiya a popelele veya oku fa vosi? Ale wa simĩle okuti o kasi lika waye, omo okuti lomue wa likongelele kokuaye koku vumba Yehova noke lia Yehova oku lisitulula okuti, eye Suku yocili Komunda Karimele? Wa simĩle hẽ okuti lomue wa kũlĩhĩle okuti ovanyãli vaye va yonguile oku u ponda kuenda lomue wo kapeleko? Ulandu owu ka u situlula cosi ndomo Eliya a liyeva. Pole, eci tua kũlĩha ceci okuti, Yehova wa kuatele elomboloko liesunga lieci Eliya a liyevela ulika kuenda eye wa kũlĩhĩle ciwa ndomo a ponduile oku u kuatisa.

5. Yehova wa kuatisa ndati Eliya oku limbuka okuti eye ka kaile likawaye?

⁵ Yehova wa kuatisa Eliya volonjila vialua. Eye wa lembeleka Eliya poku sapela laye. Yehova wo pula olonjanja vivali hati: “Nye o kasi oku linga kulo?” (1 Olos. 19:9, 13) Yehova wa enda oku yevelela lutate Eliya, poku ecelela okuti o situlula ovina via kala vutima waye. Yehova wa sapuila Eliya hati, o kasi laye poku u situluila unene waye. Handi Yehova wa lembeleka Eliya poku u sapuila hati, kua kala afendeli valua vaye. (1 Olos. 19:11, 12, 18) Ocili okuti Eliya wa yeva ekavuluko noke lioku situluila Yehova ovina via kala  vutima waye loku yevelela atambululo a tunda ku Yehova. Noke Yehova wa eca ovikele vimue vi likasi ku Eliya. Yehova wa pinga ku Eliya oco a waveke Hasahele oku linga osoma yo Suria, Yehu oku linga osoma ya va Isareli kuenda Elisia nduprofeto. (1 Olos. 19:15, 16) Yehova poku eca ku Eliya ovikele viaco, eye wo kuatisa oku tiamisila utima kovina via sunguluka. Suku wa ecavo ku Eliya ekamba limue liwa okuti Elisia. O kuatisiwa ndati la Yehova eci o liyeva ulika?

6. Ovina vipi tu sukila oku situlula vohutililo eci tu liyeva ulika? (Olosamo 62:8)

⁶ Yehova oku laleka oku likutilila kokuaye. Eye o lete ovitangi o kasi oku liya lavio kuenda eye oku sapuila okuti olonjanja viosi o likutilila kokuaye, eye oku yeva. (1 Va Tes. 5:17) Eye o sanjukila oku yevelela afendeli vaye. (Olosap. 15:8) Ovina vipi o sukila oku tukula vohutililo eci o liyeva ulika? Sapuila Yehova ndomo o liyevite, ndeci ca linga Eliya. (Tanga Olosamo 62:8.) U sapuila asakalalo ove kuenda eci o-o a kasi oku ku kokela. Pinga ku Yehova oco a ku kuatise ndomo o pandikisa eci o liyeva ulika. Ndeci, nda o liyeva ulika, ale o kasi lusumba poku eca uvangi kosikola, pinga ku Yehova oco a ku ĩhe utõi o sukila. Pinga olondunge kokuaye oco vi ku kuatise oku lombolola eci catiamẽla kekolelo liove. (Luka 21:14, 15) Nda o kasi lovisimĩlo ka via sungulukile, pinga ku Yehova oco a ku kuatise oku sapela lamanji umue wa pama kespiritu catiamẽla kocitangi caco. O pondolavo oku pinga ku Yehova oco a ku kuatise oku sanga manji umue oku yevelela loku kuata elomboloko liovitangi viove. Situlula ovina viosi vi kasi vutima wove ku Yehova loku limbuka ndomo eye a tambulula olohutililo viove; kuenda tava ekuatiso li tunda ku vakuẽne poku ci linga ku ka liyeva ulika.

7. Nye wa lilongisa kulandu wa manji Mauricio?

⁷ Vosi yetu Yehova wa tu ĩha ocikele cimue tu sukila oku tẽlisa. Kolela okuti, eye o lete kuenda o sanjukila alikolisilo osi o linga, oco o tẽlise ocikele cove vekongelo kuenda kupange woku ku kunda. (Osa. 110:3) Oku litumbika kovopange aco ci ku kuatisa ndati eci o liyeva ulika? Kũlĩhĩsa ulandu wumalẽhe umue o tukuiwa hati, Mauricio. * Eci manji Mauricio a papatisiwa, okuti pa pita lika otembo yimue yitito, ekamba lina eye a kolelele lia fetika oku siapo ocili. Manji Mauricio wa popia hati: “Eci nda mola okuti ekamba liange lia siapo oku vumba Yehova, ndeya oku sumua calua. Nda lipula nda nda ponduile oku amamako lohuminyo yange yoku vumba Yehova, loku amamako oku panga onepa kepata lia Yehova. Nda liyeva ulika kuenda nda simĩle okuti lomue o kuete elomboloko liovisimĩlo viange.” Nye ca kuatisa manji Mauricio? Eye wa popia  hati, “oku litumbika vali calua kupange woku kunda. Eci ca ñuatisa oku liwekapo oku lisokolola lika ame muẽle kuenda oku yuvula ovisimĩlo ka via sungulukile. Nda tumbulula esanju liange kuenda sia yevele vali ulika omo lioku talavaya la vamanji kupange woku kunda.” Omo liaco, ndaño okuti ka tu pondola oku kunda la vamanjetu polo lapolo, tu lipamisa pocakati coku soneha ovikanda loku eca uvangi votelefone. Nye vali ca kuatisa manji Mauricio? Eye wamisako hati: “Nda siatavo oku likolisilako oku kuatisa ekongelo. Ame ndi likolisilako oku pongiya onepa yondonge nda siata oku kuata kolohongele kuenda oku yi tẽlisa. Ovikele viaco vi ñuatisa oku limbuka okuti, ñuete esilivilo ku Yehova kuenda ku vamanji.”

8. Tu liyeva ndati eci tu liyaka lovitangi vialua?

⁸ Koloneke vilo via sulako, tu pondola oku liyaka lovitangi. (2 Tim. 3:1) Pamue ovitangi vimue viya vepuluvi lina okuti, ka tua kapeleleko. Pamue tu pondola oku liyaka locitangi cekambo lilombongo, uvei umue ka tua lavokaile, ale oku fisa umue tu sole. Kuenje vepuluvi liaco, tu liyeva ndu okuti ka tu kuete vali ongusu yoku pandikisa ca piãla enene nda ovitangi viaco vi li kuãi calua, ale viya vonjanja yimosi. Pole, tu ivaluki okuti Yehova o kasi oku tu lavulula kuenda lekuatiso liaye tu pondola oku pandikisa kovitangi viosi lekolelo.

9. Lombolola ovitangi vimue Yovi a liyaka lavio.

⁹ Kũlĩhĩsa ndomo Yehova a kuatisa ulume umue ukuekolelo otukuiwa okuti Yovi. Vokatembo katito eye wa liyaka lovitangi vialua. Veteke limosi, Yovi vo sapuila okuti ovinyama viaye, apika vaye kuenda omãla vaye vana a solele vosi va fa. (Yovi 1:13-19) Noke, osimbu Yovi a kala oku liyaka lesumuo, weya oku kuatiwa luvei umue. Yovi omo liovitangi evi viosi a pita lavio, co kokela oku popia hati: “Nda suvuka omuenyo wange; si yongola vali oku kala lomuenyo.”—Yovi 7:16.

10. Yehova wa kuatisa ndati Yovi oku pandikisa kovitangi viaye? (Tala ociluvialuvia koñoño.)

¹⁰ Yehova wa kala oku lavulula Yovi. Omo okuti Yehova wa solele Yovi, Eye wo kuatisa oku pandikisa, loku amamako lekolelo kovitangi a kala oku liyaka lavio. Yehova wa sapuila Yovi poku wivaluisa olondunge Viaye ka vi pui kuenda ndomo a kapako oviluvu Viaye. Yehova wo sapuila eci catiamẽla kovinyama vialua vi komõhisa. (Yovi 38:1, 2; 39:9, 13, 19, 27; 40:15; 41:1, 2) Eye wa vetiyavo umalẽhe umue ukuekolelo otukuiwa Elihu, oco a pamise loku lembeleka Yovi. Elihu wa sapuila Yovi okuti Yehova olonjanja viosi o sumũlũisa afendeli vaye omo lioku pandikisa. Pole, Yehova wa vetiyavo Elihu oco a ece elungulo limue ku Yovi. Elihu wa kuatisa Yovi oku liwekapo oku lisokolola lika eye muẽle poku wivaluisa okuti etu tu sule oku ci sokisa la Yehova ululiki woluali luosi. (Yovi 37:14) Yehova wa ecelevo ocikele cimue ku Yovi okuti coku likutilililako akamba vaye vatatu volueyela. (Yovi 42:8-10) Yehova o tu kuatisa ndati koloneke vilo, eci tu liyaka lovitangi?

11. Elembeleko lipi Embimbiliya li tu ĩha eci tu liyaka lovitangi?

¹¹ Yehova ka vangula letu ndeci a linga la Yovi, pole, ovangula letu pocakati Condaka yaye Embimbiliya. (Va Rom. 15:4) Eye o tu lembeleka poku tu ĩha elavoko limue liwa kovaso yoloneke. Tu konomuisa ovinimbu vimue Viembimbiliya vi tu kuatisa eci tu liyaka lovitangi. Vembimbiliya Yehova o tu sapuila okuti lacimue “ci ka tẽla oku tu tepa kocisola  [caye,]” ndaño lovitangi vialua. (Va Rom. 8:38, 39) Eye o tu sapuilavo okuti, “o kasi ocipepi la vosi vana vo vilikiya” vohutililo. (Osa. 145:18) Handi vali, Yehova o tu sapuila okuti, nda tua kolela kokuaye tu ka tẽla oku pandikisa kovitangi viosi loku kuata esanju ndaño ceci tu pita lohali yalua. (1 Va Kor. 10:13; Tia. 1:2, 12) Ondaka ya Suku yi tu ivaluisavo okuti ovitangi tu kasi oku liyaka lavio, viokatembo kamue ño oku ci sokisa lasumũlũho ka a pui eye a ka tu ĩha. (2 Va Kor. 4:16-18) Yehova o tu ĩha elavoko liokuti, eye o ka kundula una o kasi oku koka ovitangi viosi okuti Satana Eliapu kuenda vana vakuãi ovilinga viaye. (Osa. 37:10) Wa siata hẽ oku patekela ovinimbu vimue Viembimbiliya, vi pondola oku ku kuatisa oku pandikisa kovitangi vio kovaso yoloneke?

12. Nye Yehova a lavoka kokuetu nda tu yongola oku kuatisiwa Londaka yaye?

¹² Yehova o yongola okuti tu likolisilako oku tanga Embimbililya eteke leteke kuenda oku sokolola kovina tu tanga. Eci tu kapako ovina tua tanga, ekolelo lietu li li vokiya kuenda tu kuata ukamba uwa la Isietu wokilu. Nda tua ci linga tu ka tẽla oku pandikisa poku liyaka lovitangi. Yehova ecavo espiritu sandu liaye, ku vana va kolela Kondaka yaye. Kuenje espiritu liaco, li tu ĩha “unene wa piãla,” una u tu kuatisa oku liyaka lovitangi viosi.—2 Va Kor. 4:7-10.

13. Okulia kuespiritu kua siata oku sandekiwa lukuenje wa kolelua haiye wa lunguka, ku tu kuatisa ndati oku pandikisa kovitangi?

¹³ “Ukuenje wa kolelua haeye wa lunguka,” lekuatiso lia Yehova wa siata oku panga alivulu alua, olovideo kuenda ovisikilo vina vi tu kuatisa oku pamisa ekolelo lietu loku amamako oku lavulula konepa yespiritu. (Mat. 24:45) Tu sukila oku sanjukila ovina viosi Yehova a siata oku tu ĩha. Manji umue ukãi ko Estadus Unidus, wa eca olopandu kovina viosi via siata oku sandekiwa locisoko ca Yehova. Eye o lombolola ndoco: “Vokuenda kueci ci soka 40 kanyamo tunde eci ñasi oku vumba Yehova, ekolelo liange lia siata oku setekiwa olonjanja vialua.” Eye wa liyaka lovitangi vialua eci ulume waye a fa, omo a lunduluiwa loholua yimue ya kala oku endisa ekãlu, olonjali viaye via vela calua kuenje via fa kuenda eye muẽle wa kuatiwa lo canser olonjanja vivali. Nye co kuatisa oku pandikisa? Eye o lombolola hati: “Yehova olonjanja viosi wa ñuatisa. Okulia kuespiritu Yehova a siata oku eca pocakati  cukuenje wa kolelua haeye wa lunguka, kua siata oku ñuatisa oku pandikisa. Ndaño lovitangi viaco, ame nda popia olondaka vimuamue ndevi via Yovi viokuti: ‘Toke eci ndi fa, si liwekapo kekolelo liange!’”—Yovi 27:5. 

14. Yehova o vetiya ndati vamanji oku tu kuatisa eci tu liyaka lovitangi? (1 Va Tesalonike 4:9)

¹⁴ Yehova wa siata oku pindisa afendeli vaye oku li sola loku lilembeleka pokati vokuenda kuotembo yovitangi. (2 Va Kor. 1:3, 4; tanga 1 Va Tesalonike 4:9.) Poku setukula Elihu, vamanjetu va tu kuatisa oku amamako lekolelo eci tu liyaka lovitangi. Ndeci, kũlĩhĩsa ndomo ekongelo lia kuatisa manji Diane oku amamako lekolelo eci ulume waye a kala oku liyaka locitangi cuhayele. Eye hati: “Ka ca lelukile. Pole, nda limbuka eka liapama lia Yehova vokuenda kuolosãi viaco viovitangi. Ekongelo lia tu kuatisa kovina vialua. Tua enda oku tambula akombe, vamanji va enda oku tu telefonalela kuenda ovo va linga cosi ci tava oco va ndi kuatise oku pandikisa. Omo okuti sia ponduile oku endisa, vamanji va enda oku tu pilila oco tu ende kohongele kuenda kupange woku kunda eci cecelela.” Esumũlũho linene oku kuata vamanji vakuacisola vekongelo!

15. Momo lie tu kolelela okuti tu ka tẽla oku pandikisa kovitangi?

¹⁵ Vosi yetu tu pondola oku liyaka lovitangi viñi viñi. Pole, ndomo tua siata oku ci lilongisa, ka tu kasi lika wetu eci tu liyaka lovitangi. Yehova o kasi nda isia umue ukuacisola okuti olonjanja viosi o tu lavulula. Eye o kasi konele yetu, wa likapelako oku yevelela olohutililo vietu viekuatiso, loku tu kuatisa. (Isa. 43:2) Tu pondola oku kolela okuti ndaño lovitangi, Yehova o tu ĩha ovina viosi tu sukila, oco tu pandikise kovitangi viaco. Eye wa tu ĩha ombanjaile yohutililo, Embimbiliya, okulia kuespiritu kuenda vamanji vakuacisola oco va tu kuatise kotembo yovitangi.

16. Yehova o ka amamako ndati oku tu tata?

¹⁶ Tu kuete esanju lialua omo lioku kuata isia umue wokilu o tu lavulula! “Ovitima vietu vi sanjukila kokuaye.” (Osa. 33:21) Tu lekisa okuti tua sanjukila ocisola Yehova a tu kuetele, poku velisapo ovina viosi a tu ĩha oco a tu kuatise. Pole, tu sukilavo oku linga onepa yetu oco Suku amameko oku tu tata. Handi vali volondaka vikuavo, nda tua likolisilako oku pokola ku Yehova loku linga eci ciwa kovaso aye, eye o ka tu lavulula otembo ka yi pui.—1 Pet. 3:12.