1. Momo lie afendeli vamue va Yehova olonjanja vimue va li yevela ulika?

VALUA pokati ketu, olonjanja vimue tu liyeva ulika. Ku vamue ulika waco ka wamamako otembo yalua. Ku vakuavo ci kala otembo yalua. Pamue tu liyeva okuti tu kasi ulika ndaño tua ñualiwa lomanu valua. Kuenje ku vamue ci tĩla calua oku linga akamba vokaliye vekongelo. Vamue va tiamẽlele kepata lina okuti va lingaile ovina vialua kumosi, pole, ovo va liyeva ulika eci va ilukila kocitumãlo cimue ocipãla lepata. Handi vali, vakuavo va yeva ongeva yoku pita otembo la vana va sole. Akristão vamue ca piãla enene vana va fetika oku lilongisa ndopo ocili, va liyeva okuti va kasi ulika eci va pembuiwa, ale ceci va lambalaliwa lepata kuenda akamba okuti ka va vumbi Yehova.

2. Apulilo api tu konomuisa?

² Yehova wa kũlĩha kuenda o kuete elomboloko liovina viosi viatiamẽla kokuetu. Eci tu liyeva ulika, Yehova wa kũlĩha ndomo tu kala kuenje o yongola oku tu kuatisa oku yula ocitangi caco. Ndamupi Yehova a tu kuatisa? Nye tu sukila oku linga oco tu kuatisiwe? Tu kuatisa ndati vamanji vakuavo vekongelo, va kasi oku liyaka locitangi culika? Tu komonuisi atambululo apulilo a-a.

3. Yehova wa lekisa ndati okuti wa kapeleko Eliya?

³ Yehova o yongola okuti afendeli vaye vosi va kuata esanju. Eye o kasi ocipepi lomunu lomunu pokati ketu kuenda eye o limbuka eci tu kasi lesumuo. (Osa. 145:18, 19) Tu konomuisi  ndomo Yehova a kapeleko uprofeto waye Eliya. Eye wa kala ulume umue ukuekolelo okuti wa liyaka lovitangi vialua kotembo yaco ko Isareli. Afendeli va Yehova va enda oku lambalaliwa calua kuenda vana ka va fendalaile Yehova va yonguile calua oku ponda Eliya. (1 Olos. 19:1, 2) Citava okuti eci oco ca kokela Eliya oku sima okuti eye lika uprofeto wa supilepo ufendeli wa Yehova. (1 Olos. 19:10) Suku lonjanga yalua wa linga cimue oco a kuatise Eliya. Yehova wa tuma ungelo umue oco a lekise kuprofeto waye okuti ka kaile ulika handi kua kala va Isareli valua vakuekolelo va vumbile Yehova.—1 Olos. 19:5, 18.

4. Elivulu lia Marko 10:29, 30, li lekisa ndati esakalalo Yehova a kuetele afendeli vaye vana okuti va suvukiwa lapata kuenda lakamba?

⁴ Yehova wa kũlĩha okuti eci tu nõlapo oku u vumba, vamue pokati ketu va siata oku linga alikolisilo alua. Vimue pokati kovina viaco, pamue oku pumba ekuatiso liepata kuenda liakamba vana ka va vumbi Yehova. Citava okuti upostolo Petulu omo liesakalalo, wa pula ku Yesu hati: “Tua sia ovina viosi kuenje tua ku kuama; oco hẽ nye tu ka tambula?” (Mat. 19:27) Yesu locisola wa sapuila olondonge viaye okuti, via ponduile oku sanga epata lialua konepa yespiritu. (Tanga Marko 10:29, 30.) Kuenje Yehova Isietu wo Kilu wa likuminya okuti wa laikele oku kuatisa vana vo vumba. (Osa. 9:10) Konomuisa ovina vimue o sukila oku linga oco o tambule ekuatiso lia Yehova eci o liyaka locitangi culika.

5. Momo lie ci kuetele esilivilo oku sokolola konjila ndomo Yehova a ku kuatisa?

⁵ Sokolola ndomo Yehova a siata oku ku kuatisa. (Osa. 55:22) Eci ci ku kuatisa oku limbuka okuti ku kasi ulika. Manji umue ufeko o tukuiwa Carol, * okuti epata liaye ka li lilongisa ocili, wa popia hati: “Eci ndi sokolola ndomo Yehova a ñuatisa oku pandikisa poku liyaka lovitangi, ci ñuatisa oku limbuka okuti si kasi ulika. Eci ci nyĩha ekolelo liokuti Yehova olonjanja viosi o ka ñuatisa.”

6. Ndamupi ukanda wa 1 Petulu 5:9, 10, u kuatisa vana va liyaka locitangi culika?

 ⁶ Sokolola ndomo Yehova a kasi oku kuatisa vamanji vana va liyeva ulika. (Tanga 1 Petulu 5:9, 10.) Manji Hiroshi okuti vokuenda kuanyamo alua eye lika wa kala Ombangi ya Yehova vepata, wa popia hati: “Vekongelo ci leluka oku limbuka okuti vosi va kuete ovitangi. Oku kũlĩha okuti vosi yetu tu kasi oku likolisilako oku vumba Yehova, ci kuatisa vana va kasi lika wavo vocili.”

7. Ohutililo yi ku kuatisa ndati?

⁷ Olonjanja viosi likutilila, tanga Embimbiliya kuenda endaenda kolohongele. Omu mua kongela oku vangula la Yehova lutima wosi, oku situlula ovisimĩlo viove. (1 Pet. 5:7) Manji umue ukãi o tukuiwa Massiel wa popia hati: “Ocina cimue ca velapo okuti oco ca ñuatisa oku yula ocitangi culika oku likutilila olonjanja viosi ku Yehova. Eci manji yaco a nõlapo oku vumba Yehova, wa yeva ulika momo epata liaye ka lia kaile Olombangi Via Yehova. Yehova Isia umue kokuange kuenda ndi likutilila kokuaye ateke osi, olonjanja vialua veteke ndu sapuila ndomo ndi liyevite.”

8. Oku tanga Ondaka ya Suku loku sokolola kokuavio ci ku kuatisa ndati?

⁸ Tanga Ondaka ya Suku olonjanja viosi, sokolola kovolandu ana a situlula ocisola ca Yehova kokuove. Bianca manji umue wa siata oku liyaka lolombangulo ka via sungulukile vepata liaye, wa popia hati: “Oku tanga loku sokolola kovolandu a vamanji va siata oku liyaka lovitangi ndevi viange, ci ñuatisa calua.” Vamanji vamue va siata oku patekela ovisonehua vimue vi lembeleka ndeci, Osamo 27:10 kuenda Isaya 41:10. Vakuavo va siata oku yevelela ovipama via ngalavaliwa eci va pongiya olohongele, ale poku tanga Embimbiliya kuenje va lombolola okuti eci ca siata oku va kuatisa calua oku yula ocitangi culika.

9. Oku endaenda kolohongele ci ku kuatisa ndati?

⁹ Likolisilako oku endaenda kolohongele. O ka pamisiwa lovipama vi ka lingiwa kuenda oku kũlĩha vamanji. (Va Hev. 10:24, 25) Manji Massiel, wa tukuiwa ale wa popia hati: “Ndaño okuti nda kala ukuasõi, nda nõlapo oku endaenda kolohongele viosi kuenda oku eca atambululo. Eci ca ñuatisa oku kuata ukamba wa pama la vamanji.”

10. Momo lie ci kuetele esilivilo oku linga ukamba la vamanji?

¹⁰ Pamisa ukamba wove la vamanji. Sanda akamba vekongelo vana okuti o pondola oku lilongisila kokuavo, ndaño muẽle vana wa litepi kutunga, ale vakuavituwa via litepa.  Embimbiliya li tu sapuila hati, olondunge ‘vi sangiwa pokati kakulu.’ (Yovi 12:12) Vana okuti akulu, va lilongisilavo kamalẽhe vakuekolelo. Daviti wa li kambelele anyamo alua la Yonatão, pole eci ka ca va tatekele oku kala akamba. (1 Sam. 18:1) Daviti la Yonatão va likuatisa pokati oku vumba Yehova poku liyaka lovitangi. (1 Sam. 23:16-18) Manji umue o tukuiwa Irina okuti eye lika Ombangi ya Yehova vepata liaye wa popia hati: “Vamanji va pondola oku linga olonjali, ale vamanjetu kespiritu. Yehova o pondola oku va vetiya oco va kale epata kolonepa viosi.”

11. Nye o sukila oku linga oco o pamise ukamba?

¹¹ Oku linga akamba vokaliye pamue ka ci leluka, ca piãla enene nda ove ukuasõi. Manji Ratna okuti wa kuata osõi yalua okuti wa lilongisa ocili ndaño lelambalalo, wa popia hati: “Ame nda sukilile oku limbuka okuti ndi sukila ekuatiso liepata liange kespiritu.” Pamue ci tĩla oku sapuilako vakuetu ndomo tu liyevite, pole, nda tu ci linga omunu waco o kala ekamba lietu liocili. Akamba vove va yongola oku ku pamisa loku ku kuatisa, pole, ovo va sukila okuti o va sapuila ovina vi ku sakalaisa oco va ku kuatise.

12. Upange woku kunda u ku kuatisa ndati oku linga akamba vawa?

¹² Onjila yimue yoku linga akamba, oku talavaya la vamanji vakuavo kupange woku kunda. Manji Carol wa tukuiwa ale, wa popia hati: “Ame nda siata oku sanga akamba valua vawa poku talavayela kumosi la vamanji kupange woku kunda kuenda koku linga ovopange akuavo a Yehova. Vokuenda kuanyamo alua Yehova wa siata oku ñuatisa calua pocakati cakamba vaco.” Oku linga ukamba la vamanji vakuekolelo ciwa calua. Yehova oku kuatisa pocakati cakamba vaco oco o yule ocitangi culika.—Olosap. 17:17.

13. Ocikele cipi vosi yetu tu kuete vekongelo?

¹³ Vosi vekongelo va kuete ocikele coku vetiya ocisola kuenda ombembua yina okuti lomue vali o liyeva ulika. (Yoa. 13:35) Ovina tu linga kuenda tu popia, vi pondola oku pamisa calua vakuetu! Kũlĩhĩsa eci manji umue ukãi a popia, eye hati: “Eci nda fetika oku lilongisa ocili, ekongelo lia linga epata liange. Ame nda linga lika Ombangi ya Yehova, lekuatiso lia vamanji.” Nye o sukila oku linga oco o kuatise vana okuti epata ka li lilongisa ocili, oco va liyeve okuti va soliwe la vamanji vekongelo?

14. Nye o sukila oku linga oco o kale ekamba a vana va fetika oku lilongisa ndopo ocili?

¹⁴ Lieca olumue poku linga ukamba lomunu umue. Tu pondola oku fetika poku yolela locisola omunu umue wokaliye vekongelo. (Va Rom. 15:7) Pole, tu sukila vali cikuavo okuti oku va yolela lika ci sule. Tu yongola oku pamisa ukamba waco vokuenda kuotembo yosi. Kala ukuahenda kuenda lekisa okuti wa kapako vana veya ndopo vocili. Ku ka linge apulilo ana o kutisa osõi, pole, seteka oku kuata elomboloko liovitangi ovo va kasi oku liyaka lavio. Citava okuti ku vamue ci tĩla calua oku lombolola ndomo va liyevite, omo liaco kuata utate oco ku ka va kisike oku vangula. Kuenje locisola lekisa utate poku va linga apulilo kuenda lepandi yevelela atambululo avo. Ndeci, o pondola oku va pula ndomo va kũlĩha ocili.

15. Akristão vana va pama kekolelo va pondola oku kuatisa ndati vakuavo vekongelo?

¹⁵ Ekolelo lia vosi vekongelo li ka pama nda tua lekisa okuti tua li kapako omunu  lukuavo. Ca piãla enene eci akulu vekongelo kuenda vamanji vakuavo va kuete ekolelo liapama, va ci linga. Manji Melissa okuti wa lilongisa ocili la inaye wa popia hati: “Ndi pandula calua vamanji alume omo lioku kala nda va isiange, poku pesela otembo yavo lame loku ndi kapako vokuenda kuanyamo alua. Olonjanja viosi ndi sukila oku sapela, ñuete umue o ndi yevelela.” Manji umue umalẽhe o tukuiwa Mauricio, wa sumuile calua loku li yeva ulika eci una wo longasaile Embimbiliya a siapo ocili. Eye wa popia hati: “Akulu vekongelo va lekisa okuti va ndi kapako kuenda ca ñuatisa calua. Ovo olonjanja viosi va enda oku sapela lame. Va enda oku talavaya lame kupange woku kunda, va enda oku ndi sapuilako ovokuasi va enda oku sanga kelilongiso liavo liopokolika kuenda oku likutilila lame.” Ci kale manji Melissa kuenda Mauricio va kasi kupange ulikasi.

16-17. Volonjila vipi tu pondola oku kuatisa vakuetu?

¹⁶ Kuatisa lovina o kuete. (Va Gal. 6:10) Manji Leo, o kasi kupange wumisionaliu ocipãla lepata liaye wa popia hati: “Olonjanja vimue cosi ove o sukila ocina cimue citito ci moleha votembo kua lavokaile. Ndi ivaluka eteke limue nda li pita locitangi cimue coku litusula lekãlu. Eci nda pitila konjo nda sumuile calua. Kuenje ohueli yimue ya ndi laleka konjo yavo okulia lavo. Si ivaluka eci tualia, pole ndivaluka okuti locisola calua va ndi yevelela. Noke nda liyeva ciwa!”

¹⁷ Vosi yetu tu sanjukila oku kala kolohongele ndeci, olohongele vimbo levi viofeka, momo vi tu ĩha epuluvi lioku sapela la vamanji, catiamẽla kolohundo tua yeva. Manji Carol, wa tukuiwa ale, wa popia hati: “Ca piãla enene kolohongele vimbo kuenda viofeka, ndi liyeva calua ulika.” Momo lie? Eye hati, “Ndaño okuti nda ñualiwa la vamanji valua ndi mola okuti ovo va tumala kumue lapata avo. Eci ndi va mola, ndi yeva vali ulika walua.” Vakuavo va kuata ocitangi coku enda kohongele yofeka, ale yimbo eci va fisa ohueli yavo. Wa kũlĩha hẽ umue o kasi oku liyaka locitangi caco? Momo lie ku u lalekela kohongele yikuavo oco o tumale laye kumosi lepata liove?

18. Tu kapako ndati olondaka vi sangiwa 2 Va Korindo 6:11-13, eci tu lekisa ocituwa coku yekisa?

 ¹⁸ Piti kumosi otembo. Kolomapalo viosi o linga laleka vamanji va li tepa, ca piãla enene vana va liyeva ulika. Tu yongola oku ‘sanjavalisa apito ovitima vietu’ ca piãla enene ku vana va liyeva ulika. (Tanga 2 Va Korindo 6:11-13.) Manji Melissa wa tukuiwa ale, wa popia hati, “Tu sanjuka calua eci vamanji va tu laleka kolonjo viavo loku pita lavo otembo.” Vekongelo o kasi, muli hẽ umue o pondola oku u yekisa?

19. Eci tu pita otembo la vamanjetu, ci kuatisa hẽ?

¹⁹ Ci sanjuisa calua eci tu pita otembo la vamanjetu. Momo ku vamue ci tĩla calua omo okuti va ñualiwa la vana okuti Halombangiko Via Yehova haivo

va linga ovipito viowusa. Vakuavo pamue, va yeva esumuo lialua keteke lioku ivaluka olofa via umue ngandiaye a solele calua. Eci tu pita otembo la vamanji va siata oku liyaka lovitangi evi, tu lekisa kokuavo okuti tua va kapako.—Va Fil. 2:20.

20. Olondaka via Yesu vi sangiwa ku Mateo 12:48-50, vi tu kuatisa ndati eci tu liyeva ulika?

²⁰ Kuli ovina vialua vi lekisa esunga lieci Akristão valua olonjanja vimue va yevela ulika. Pole, tu sukila oku ivaluka okuti Yehova o kuete elomboloko liwa liekalo liaco. Eye o tu ĩha ovina tu sukila, olonjanja vialua o ci linga pocakati ca vamanji. (Tanga Mateo 12:48-50.) Tu lekisa ku Yehova okuti tua sanjukila eliangiliyo liaye eci tu likolisilako oku linga cosi citava oco tu kuatise vamanjetu. Ndaño okuti olonjanja vimue tu liyeva ulika, lalimue eteke tu kasi ulika, momo Yehova olonjanja viosi o kasi konele yetu.