1-2. Ndeci ca pita la Lote ovitangi vipi Akristão va siata oku liyaka lavio koloneke vilo?

 ECI tu mola ndomo ekalo lia vĩha pokati komanu koloneke vilo, tu liyeva ndukuesunga Lote. Eye “wa sakalaisiwile lumbondo womanu va tomba ovihandeleko,” momo eye wa kũlĩhĩle okuti Isietu wokilu wa suvuka ovilinga vĩvi. (2 Pet. 2:7, 8) Esumbilo kuenda ocisola a kuatelele Suku, vio vetiya oku yuvula ovituwa ka via sungulukile viomanu vo kotembo yaye. Koloneke vilo, tua ñualiwavo lomanu ka vakuetele esumbilo olonumbi via Yehova via tiamẽla kovituwa. Pole, ndaño ndoco, tu pondola oku amamako oku li yelisa nda tua sola Suku loku u kuatela esumbilo liocili.—Olosap. 14:2.

² Yehova o tu kuatisa oku ci linga pocakati cevetiyo tu sanga kelivulu Liolosapo. Akristão vosi, alume, lakãi, amalẽhe kuenda akulu, va kuatisiwa lelungulo liolondunge vi sangiwamo.

3. Ndomo ca lekisiwa Kolosapo 17:3 esunga lipi tu kuete lioku teyuila utima wetu? (Talavo ociluvialuvia.)

³ Esunga lia velapo lioku lava utima wetu wocindekaise lieli liokuti, Yehova o kũlĩhĩsa utima wetu. Eci ci lomboloka okuti eye o lete ovina vakuetu ka va pondola oku mola kuenda o lete eci tua tuwa vutima. (Tanga Olosapo 17:3.) Yehova o ka tu sola nda tua yukisa ovisimĩlo vietu lolondunge vi tu kuatisa oku kuata omuenyo ka u pui. (Yoa. 4:14) Kuenje lalimue etekete tu ka yapuisiwa lovilinga vĩvi kuenda ovohembi a Satana, loluali luaye. (1 Yoa. 5:18, 19) Osimbu tu amamako oku pamisa  ukamba wetu la Yehova, ocisola cetu kuenda esumbilo tu u kuetele, ci li vokiya. Omo okuti ka tu yongola oku sumuisa Isietu wokilu, tu ka suvuka ovisimĩlo vioku linga ekandu. Eci o setekiwa oku linga eci cĩvi, lipula ndoco: ‘Ndi sumuisa hẽ omunu umue okuti wa ndekisa ocisola calua?’—1 Yoa. 4:9, 10.

4. Oku sumbila Yehova ca teyuila ndati manji umue ukãi, koseteko yimue?

⁴ Marta manji umue ukãi woko Kroasia okuti wa setekiwa oku linga evĩho liukahonga wa soneha ndoco: “Ka ca lelukile kokuange oku sokolola lutate kuenda oku yuvula onjongole yoku linga eci ka ca sungulukile. Pole, oku sumbila Yehova ca neyuila.” b Oku sumbila Suku ci teyuila ndati? Manji Marta hati, nda sokolola kovitangi vi tunda koku nõla onjila ka ya sungulukile. Tu pondola oku linga cimuamue. Momo ocitangi cinene ceci okuti, tu sumuisa Yehova kuenda ka tu ka tiamẽla kulala wa vana va fendela Yehova otembo ka yi pui.—Efet. 6:5, 6.

5. Nye tu lilongisila kulandu wa manji Leo?

⁵ Eci tu sumbila Yehova ka tu lingi ukamba la vana va sole ovina ka via sungulukile. Manji Leo o kasi ko Kongu, wa limbuka esilivilo liaco. Noke lianyamo akuãla tunde eci a papatisiwa, wa fetika oku livala ukamba la vana va kuata ovituwa ka via sungulukile. Omo okuti ka kaile oku linga ovina viaco vĩvi, wa simĩle okuti ka kasi oku lueyela Yehova. Vokuenda kuotembo ukamba waco, wo yapuisila kuholua kuenda kevĩho liukahonga. Noke wa fetika oku sokolola kolonjali viaye Akristão ovina vo longisile kuenda esanju a pumbile omo lioku siapo oku vumba Yehova. Onima yipi yeyililako? Eye wa fetika vali oku linga ovina via sunguluka. Lekuatiso liakulu vekongelo, eye wa tiuka vali ku Yehova. Cilo, o  kuete esanju omo lioku kala ukulu wekongelo kuenda ukundi o likasi.

6. Akãi vapi vavali vocindekaise tu konomuisa cilo?

⁶ Tu konomuisi Olosapo ocipama 9, kuna ku tukula akãi vavali, umue o lomboloka olondunge kuenda ukuavo o lomboloka uveke. (Sokisa Va Roma. 5:14; Va Galatia. 4:24.) Poku ci linga, tu kũlĩhĩsi okuti oluali lua Satana lua tiamisila utima kevĩho liukahonga kuenda kumbondo. (Va Efe. 4:19) Omo liaco, ci kuete esilivilo oku amamako oku sumbila Suku loku tinduka kũvi. (Olosap. 16:6) Kuenje, vosi yetu ci kaile alume lakãi tu pondola oku kuatisiwa locipama eci. Omunu lomunu pokati kakãi vaco va tukuiwa, va situluiwa okuti va kasi oku eca elaleko limue kuava “va kamba olondunge okuti aveke.” Omunu lomunu, ci kasi ndu a popia hati, ‘enju konjo yange kuenda ndolie.’ (Olosap. 9:1, 5, 6, 13, 16, 17) Pole, kuli oku litepa konima yi tunda kelaleko lelako liaco.

7. Ndomo ca lekisiwa Kolosapo 9:13-18, nye ci pita la vana va tava kelaleko liukãi eveke? (Talavo ociluvialuvia.)

⁷ Kũlĩhĩsa elaleko “liukãi eveke.” (Tanga Olosapo 9:13-18.) Eye o vilikiya vana va kamba olondunge hati “enjui kulo” tu lingi ocipito. Nye ci pita la vana va tava? “Onjo yukaĩ waco yeyuka lava va fa.” Citava okuti ivaluka olondaka viupopi wocindekaise via tukuiwa ale Kolosapo. Tua lunguiwa eci catiamẽla “kukãi ukuovasi” kuenda “ukuevĩho.” Li tu sapuilavo okuti: “Konjo yaye ca lisoka loku enda koku fa.” (Olosap. 2:11-19) Kolosapo 5:3-10, tu sangako elungulo likuavo liatiamẽla ‘kukãi ukuavo ukuovasi’ una okuti, “olomãi viaye vi lokila koku fa.”

8. Onjila yipi tu sukila oku nõla?

⁸ Vana va yevelela ‘kukãi eveke’ va pondola oku nõla nda va tava kelaleko liaye, ale sio. Letuvo tu pondolavo oku nõla onjila yimue. Nye tu ka linga nda umue o tu seteka oku tu yapuisila kevĩho liukahonga, ale vocipikipiki tu mola ovina viumbondo?

9-10. Asunga api tu kuete lieci tu yuvuila ocituwa cevĩho liukahonga?

⁹ Kuli asunga alua oku yuvula ocituwa cevĩho liukahonga. “Ukãi eveke” o situluiwa okuti: “Ovava anyaniwa asõsa.” Nye ci lomboloka “ovava anyaniwa”? Embimbiliya li sokisa oku lipekela kulume lukãi vakuẽle, ndo kunyua ovava atalala. (Olosap. 5:15-18) Ulume lukãi vakuẽle, ovo lika vakuete elianjo lioku sanjukila eliangiliyo liaco lioku lipekele. Eci ca litepa ‘lovava anyaniwa.’ Momo, oku lipekela kuaco ku pisiwa, hakuo kuavĩha. Elinga liaco li lingiwa vuyombeki, ndeci ocimunu ca siata oku nyana vuyombeki. Omanu va siata  oku linga evĩho liukahonga, va tenda elinga liaco ‘ndovava asõsa’ ca piãla enene nda va sima okuti lomue o ka limbuka elinga liavo. Pole, ocisimĩlo caco cesanda! Momo Yehova o lete cosi. Ka kuli ocina cilula vali nda hakupumbako ohenda ya Suku, omo liaco kakuli ‘cisõsa’ ci tunda kelinga liaco lĩvi. (1 Va Kor. 6:9, 10) Pole, kuli vali cikuavo.

¹⁰ Evĩho liukahonga li pondolavo oku koka osõi, oku kuata ocisimĩlo cokuti ku silivila, oku minisiwa kuenda oku tepa apata. Ocili okuti, onjila yolondunge yi kuatisa oku yuvula elaleko liukãi eveke. Omanu va litumbika kelinga liaco, ka va fi lika konepa yespiritu, va kuatiwavo luvei u va kokela olofa konepa yetimba. (Olosap. 7:23, 26) Kocinimbu 18 yocipama 9, ku malusula ndoco: “Vana ukãi a laleka, va kasi valondo Onjembo.” Momo lie valua va tavela kelaleko liaye li yapuisa, halio li tuala kenyõleho?—Olosap. 9:13-18.

11. Momo lie ka ca sungulukilile oku tala ovina viumbondo?

¹¹ Onjanjo yimue ya siata calua, oku tala ovina viumbondo. Vamue va sima okuti oku tala ovina viaco hacĩviko. Pole, ovina viumbondo vi nyõla omanu, ci koka okuti ovo muẽle ka va li sumbila, ka va sumbilavo vakuavo kuenda ca tĩla oku siapo ocituwa caco. Oviluvialuvia vievĩho vi kuete unene walua, ka ca lelukile oku ivalako. Ovina viumbondo ka vi kuatisa omanu oku siapo olonjongole ka via sungulukile, pole, vi vokiya olonjongole viaco. (Va Kol. 3:5; Tia. 1:14, 15) Ocili okuti, omanu vana va siata oku tala ovina viaco viumbondo, va fetikavo oku linga ovina viaco via vĩha.

12. Tu lekisa ondati okuti tua likapelako oku yuvula oviluvialuvia vi lekisa ovina vi vetiya ukahonga?

¹² Etu Tuakristão nye tu sukila oku linga nda vocimalẽho cetu mu molẽha ovina vi lekisa umbondo? Lonjanga yalua tu sukila oku nyõla ociluvialuvia caco. Tu pondola oku kuatisiwa poku nõla onjila yaco, nda tua ivaluka okuti ocina ca velapo kokuetu, ukamba wetu la Yehova. Ocili okuti, pamue oviluvialuvia vimue ka vi lekisa umbondo, pole, vi pondola oku tu vetiya oku kuata oloñei viukahonga. Momo lie tu sukilila oku vi yuvula? Momo ka tu yongola oku eca enanga limue ndaño litito lioku linga ukahokolo vutima wetu. (Mat. 5:28, 29) Ukulu umue wekongele wo ko Tailandia o tukuiwa David wa popia hati: “Nda siata oku lipula ndoco: ‘Ndaño okuti oviluvialuvia viaco ka vi lekisa ovina viumbondo, Yehova o ka ndi sanjukila hẽ nda ndamamako oku vi tala?’ Oku sokolola ndoco, ci ñuatisa oku nõla onjila yolondunge.”

13. Nye ci tu kuatisa oku linga ovina lolondunge?

¹³ Oku kuata usumba woku linga cimue ci sumuisa Yehova, ci kuatisa oku nõla onjila yolondunge. Oku sumbila Suku oco “efetikilo” ale ono “yolondunge.” (Olosap. 9:10) Eci ca lekisiwa ciwa konepa yatete yelivulu Liolosapo ocipama 9, kuna tua tanga catiamẽla kukãi ukuavo wocindekaise wa situluiwa okuti, “olondunge viocili.”

14. Elaleko lipi lia litepa li sangiwa Kolosapo 9:1-6?

¹⁴ Tanga Olosapo 9:10. Tua tanga eci catiamẽla kelaleko li tunda ku Yehova Ululiki wetu kuenda Ono yolondunge viocili. (Olosap. 2:6; Va Rom. 16:27) Tua tanga eci catiamẽla konjo yimue yinene ya tungiwa lolongunji epanduvali. Eci ci lekisa okuti, Yehova ukuacali kuenda o tava vosi va yongola oku kapako olondunge viaye komuenyo wavo.

15. Suku o tu laleka oku linga nye?

¹⁵ Yehova ukuacali, haiye eca ovina vialua  viwa. Ovituwa evi ‘violondunge viocili,’ via situluiwa ciwa Kolosapo 9 ndukukãi umue. Ulandu u lekisa okuti, ukãi waco wocindekaise wa pongiya ositu, wa tenga ovinyo yavio kuenda wa pongiya omesa konjo yaye. (Olosap. 9:2, etosi.) Ndomo ca tukuiwa kocinimbu 4 kuenda 5: “Eye [ okuti olomboloka olondunge viocili] o sapuila omunu eveke hati: ‘Enju, lia ombolo nda pongiya.’” Momo lie tu sukilila oku tava kelaleko lioku enda konjo yolonduge viocili kuenda oku lia ovina eye a pongiya? Yehova o yongola okuti omãla vaye va kuata olondunge kuenda oku kolapo. Eye ka yongola okuti tu lueya kuenda tu livela omo lieci tua linga. Eli olio esunga liokuti, “eye o selekela olondunge ku wa suñama.” (Olosap. 2:7) Eci tu kuatela Yehova usumba wa sunguluka, tu vetiyiwa oku u sanjuisa. Kuenda tu yevelela alungulo aye olondunge, loku sanjukila oku a kapako.—Tia. 1:25.

16. Oku sumbila Suku ca kuatisa ndati manji Alain oco a nõle onjila ya sunguluka kuenda onima yipi yeyililako?

¹⁶ Kũlĩhĩsa ndomo oku sumbila Suku ca kuatisa manji Alain oku nõla onjila yimue ya sunguluka. Ukulu waco wekongelo haeye ulongisi wo kosikola wa popia hati: “Valua pokati komanu ndi talavaya lavo, va tenda olofilme vi lekisa ovina viumbondo ndepindiso lioku lipekela.” Pole, manji Alain wa kũlĩhĩle okuti haciliko. Eye wa popia ndoco, “omo liocisola kuenda esumbilo ñuetele Yehova” si tava oku tala olofilme viaco. “Kuenda nda va lumboluilavo esunga liaco kuava tu talavayela kumosi.” Eye wa kala oku kapako elungulo liolondunge viocili vioku “amamako oku endela vonjila yelomboloko.” (Olosap. 9:6) Manji Alain omo lioku lekisa utõi woku likala ovina viumbondo, vamue pokati ka vana va longisila kumosi, cilo va kasi oku lilongisa Embimbiliya loku endaeda kolohongele.

17-18. Vana va tava kelaleko ‘liolondunge viocili’ asumũlũho api va kuete kuenda nye va lavoka? (Talavo ociluvialuvia.)

¹⁷ Yehova wa tukula ocindekaise cakãi ava vavali, oco a lekise kokuetu ndomo tu kuata ekalo liwa. Vana va tava kelaleko liukãi eveke, va tiamisila utima koku sanda esanju kevĩho liukahonga. Ovo ka va limbuka okuti eci va kasi oku linga ci ka va kokela ovitangi kovaso yoloneke. Ovilinga viavo, vi va tuala “valondo onjembo.”—Olosap. 9:13, 17, 18.

¹⁸ Eci ca litepa lomanu va tava kelaleko ‘liolondunge viocili!’ Ovo va sanjuka momo va kuete ovina viosi va sukila oco vamameko oku kuata ukamba la Yehova. (Isa. 65:13) Pocakati cuprofeto Isaya Yehova wa popia hati: “Njeveleli lutate kuenda li eci ciwa, kuenje  ene vu ka sanjukila ovikulia viwa.” (Isa. 55:1, 2) Tua siata oku lilongisa eci Yehova a sole kuenda oku suvuka eci eye anyale. (Osa. 97:10) Kuenje tu kuete esanju lioku laleka vakuetu oco va kuatisiwevo “lolondunge viocili.” Ci kasi ndu okuti tu kasi oku ‘kalukila vovitumãlo via lepa vio volupale vati: “Wosi wa kamba olondunge, eye kulo.’” Ekuatiso liaco kokuetu kuenda ku vana va tava, ka likala lika cilo. Pole, li kala otembo ka yi pui kuenda li tu ecelela oku kala ‘komuenyo’ loku “amamako oku endela vonjila yelomboloko.”—Olosap. 9:3, 4, 6.

19. Ndomo ca lekisiwa Kukundi 12:13, 14, nye tu sukila oku nõlapo oku linga? (Talavo o kakasia “ Oku Sumbila Suku ci tu Kuatisa.”)

¹⁹ Tanga Ukundi 12:13, 14. Oku kuatela Yehova esumbilo liocili, ci teyuila utima wetu kuenda ci tu kuatisa oku amamako oku kuata ovituwa via yela, vokuenda kuoloneke vilo via sulako haivio via vĩha. Esumbilo liaco liocili, li tu vetiya oku amamako oku laleka etendelo lialua liomanu oku sanda “olondunge viocili” kuenda oku kuatisiwa lavio.