1. Ndomo ca tangiwa ku 1 Petulu 5:2, ocikele cipi akulu vekongelo va kuete?

 AKULU vekongelo, va tambula ocikele coku tata olomeme via Yehova. Alume vaco vakuambili, va sanjukila esumũlũho va kuete lioku kuatisa vamanji kuenda oku likolisilako oku kala ‘angombo vana . . . va lava.’ (Yer. 23:4; tanga 1 Petulu 5:2.) Tu eca olopandu omo lioku kuata alume vaco, vakongelo etu!

2. Ovitangi vipi pamue akulu vekongelo va liyaka lavio?

² Akulu vekongelo poku tẽlisa ovikele viavo, va siata oku liyaka lovitangi vialua. Cimue pokati kovitangi viaco ceci okuti, voku songuila ekongelo limue, mua kongela upange walua. Manji Tony okuti ukulu umue wekongelo wo ko Estadus Unidus, wa sukilile oku lilongisa oku lekisa esunguluko koku tava ovopange amue. Eye wa lombolola ndoco: “Kefetikilo liefengi lio COVID-19, nda kuata upange walua woku sokiya olohongele kuenda upange woku kunda. Pole, ndaño nda likolisilileko oku tẽlisa upange waco, olonjanja viosi kua enda oku molẽha upange ukuavo. Kuenje nda limbuka okuti omo liupange walua, sia kuatele vali otembo yoku tanga Embimbiliya oku lilongisa pokolika kuenda oku likutilila.” Manji Ilir, ukulu umue wekongelo wo ko Kosovo, wa liyaka locitangi ca litepa. Eci a kala kocitumãlo cimue kuli uyaki, ka ca lelukile kokuaye oku kuama olonumbi viocisoko. Eye hati: “Utõi wange wa setekiwa eci o filiale ya nyĩha ocikele coku kuatisa vamanji kocitumãlo caco cohele. Nda kuata usumba walua kuenda onumbi ya molẽhele ndu okuti ka yiwako.” Manji Tim, okuti omisionaliu yimue ko Asia, ka ca lelukile kokuaye oku tẽlisa ovina a sukilile oku linga oloneke viosi. Eye hati: “Olonjanja vimue nda enda oku yeva ekavo lialua, omo lioku kuatisa vamanji.” Nye ci pondola oku kuatisa akulu vekongelo va kasi oku liyakavo lovitangi viaco?

3. Vosi yetu tu kuatisiwa ndati poku kuama ongangu yonganji Gideone?

 ³ Akulu vekongelo va pondola oku lilongisila kongangu yonganji Gideone. (Va Hev. 6:12; 11:32) Eye wa enda oku teyuila loku lava afendeli va Suku. (Olong. 2:16; 1 Asa. 17:6) Ndeci Gideone, akulu vekongelo va nõliwa, oco va tate afendeli va Suku vokuenda kuotembo yovitangi. (Ovil. 20:28; 2 Tim. 3:1) Tu pondola oku lilongisila kesunguluko, kumbombe kuenda kepokolo lia Gideone. Epandi liaye lia setekiwa osimbu a kala oku tẽlisa ocikele caye. Ci kale okuti tuakulu vekongelo ale sio, tu sukila oku vokiya olopandu vietu kakulu vetu vekongelo. Tu sukilavo oku kuatisa vamanji vaco va talavaya calua, momo va siata oku tata ekongelo.—Va Hev. 13:17.

4. Gideone wa lekisa ndati esunguluko kuenda umbombe?

⁴ Gideone wa kala ulume umue ukuesunguluko kuenda embombe. b Eci ungelo wa Yehova a sapuila Gideone okuti, wa laikele oku nõliwa oco a yovole va Isareli peka lia va Midiane, ulume waco embombe wa tambulula hati: “Ocikoti cange oco ci sulepovali ku Manase kuenda ame ndi sule vonjo ya isiange.” (Olong. 6:15) Eye wa litendele okuti, ka ponduile oku tẽlisa ocikele caco, pole, Yehova wa kũlĩhĩle okuti wa laikele oku ci tẽlisa. Lekuatiso lia Yehova, Gideone wa tẽla oku tẽlisa ciwa ocikele caye.

5. Esunguluko kuenda umbombe wukulu umue wekongelo, vi setekiwa ndati?

⁵ Akulu vekongelo va siata oku likolisilako oku lekisa esunguluko kuenda umbombe kovina viosi. (Mika 6:8; Ovil. 20:18, 19) Ovo ka va lipandi omo liovoloño avo; ale ceci va siata oku linga kuenda ka va litendi okuti ka va kuete esilivilo omo liakulueya avo. Pole, olonjanja vimue ca tĩla ukulu umue wekongelo oku lekisa umbombe kuenda esunguluko. Ndeci, pamue eye o tava ovikele vialua kuenje ci tĩla kokuaye oku vi tẽlisa viosi. Ale pamue ceci vo pisa omo lionjila ndomo a tẽlisa ovikele, ale ceci omanu vamue vo pandiya poku tẽlisa ocikele cimue. Nye akulu vekongelo va lilongisila ku Gideone oco va kuatisiwe kolonepa viaco?

6. Nye akulu vekongelo va pondola oku lilongisila kesunguluko lia Gideone? (Talavo ociluvialuvia.)

⁶ Pinga ekuatiso. Omunu una okuti ukuesunguluko, wa kũlĩha okuti ka tẽla oku linga  ovina viosi. Gideone wa lekisa okuti ukuesunguluko, poku pinga ekuatiso ku vakuavo. (Olong. 6:27, 35; 7:24) Akulu vekongelo vakualondunge va linga cimuamue. Manji Tony wa tukuiwa ale kefetikilo, wa lombolola ndoco: “Onjila ndomo nda pindisiwa tunde vutila ca ñisika oku tava ovopange osi ana okuti sia tẽlele oku a tẽlisa. Kuenje nda nõlapo oku kongela osapi yesunguluko kefendelo lietu liepata kuenda nda pinga kukãi wange ocisimĩlo caye catiamẽla kosapi eyi. Nda pitululavo ovideo yi sangiwa vo jw.org, losapi hati, Pindisa, Kolela, Kuenda Eca Ovikele ku Vakuene Ndeci Yesu a Linga.” Manji Tony wa fetika oku pinga ku vakuavo, oco vo kuatise oku tẽlisa ocikele caye. Onima yipi yeyililako? Manji Tony hati: “Upange wekongelo u kasi oku tẽlisiwa ciwa kuenda ndi kuete otembo yoku li pamisa konepa yespiritu.”

7. Akulu vekongelo va setukula ndati Gideone eci va pisiwa? (Tiago 3:13)

⁷ Ku ka teme nda umue wa ku pisa. Oseteko yikuavo akulu vekongelo va pondola oku pita layo, ceci ovo va pisiwa. Yimue vali onjanja, ulandu wa Gideone u pondola oku kuatisa. Eye poku kũlĩha okuti ka lipuile, wa tambulula lumbombe eci va Efarimi vo pisa. (Olong. 8:1-3) Gideone ka tambuluile lonyeño. Eye wa lekisa okuti embombe poku yevelela asakalo avo, loku vangula lavo locisola kuenje ca va tulumuisa. Akulu vekongelo vakualondunge va setukula Gideone poku yevelela lutate kuenda oku tambulula lumbombe eci va pisiwa. (Tanga Tiago 3:13.) Poku ci linga, ovo va kuatisa koku koka ombembua vekongelo.

8. Akulu vekongelo va tenda ndati epandiyo va tambula? Tukula ulandu umue.

⁸ Eca esivayo liosi ku Yehova. Eci Gideone a pandiyiwa poku yula va Midiane eye wa tiamisila esivayo liaco ku Yehova. (Olong. 8:22, 23) Alume vana va nõliwila oku kuata ocikele, va setukula ndati Gideone? Ovo va eca esivayo ku Yehova kovina viosi va siata oku tẽlisa. (1 Va Kor. 4:6, 7) Ndeci, nda ukulu umue wekongele o pandiyiwa omo liuloño waye woku longisa ciwa, eye o sukila oku tiamisila uloño waco kono yelongiso okuti, Ondaka ya Suku, ale kepindiso tu tambula vocisoko ca Yehova. Akulu vekongelo va sukila oku sokolola nda va kasi loku longisa lonjila yimue yi sivaya Yehova, ale va yongola lika oku komõhisa omanu. Kũlĩhĩsi ulandu wulume umue ukulu wekongelo o tukuiwa Timothy. Eci eye a nõliwa oku kala ukulu wekongelo, wa solaile calua oku linga olohundo viowiñi. Eye hati: “Nda enda oku sokiya ovolandu alua kuenda ovindekaise viatatama. Kuenje omanu va enda oku ndi pandiya. Pole, ca vetiya omanu oku tiamisila utima kokuange okuti Kembimbiliya, ale ku Yehova hakoko.” Vokuenda kuotembo manji Timothy wa limbuka okuti wa sukilile oku linga apongoloko konjila ndomo a longisa, oco a yuvule omanu oku tiamisila lika utima kokuaye. (Olosap. 27:21) Onima yipi yeyililako? Eye hati: “Cilo, vamanji va ndi sapuila okuti, olohundu viange via va kuatisa oku liyaka locitangi cimue, oku pandikisa ale oku pamisa ukamba wavo la Yehova. Ñuete esanju lialua poku yeva olondaka viaco viepandiyo okuti vina nda enda oku tambula kosimbu ci sule.”

9. Epokolo kuenda utõi wa Gideone via setekiwa ndati? (Tala ociluvialuvia koñoño.)

⁹ Eci Gideone a nõliwa oco a kale onganji epokolo liaye kuenda utõi via setekiwa. Eye wa tambula ocikele ci koka ohele coku nyõla ovotala atiamẽlele ku isiaye kuna va enda oku fendelela Baale. (Olong. 6:25, 26) Noke lia Gideone oku ongolola asualali, olonjanja vivali Yehova wo sapuila okuti wa laikele oku tepulula  etendelo liasualali vaco. (Olong. 7:2-7) Kuenje Yehova wo handeleka oku ka katukila ocilombo covanyali vuteke waco.—Olong. 7:9-11.

10. Epokolo liukulu umue wekongelo li pondola oku setekiwa ndati?

¹⁰ Akulu vekongelo va“likapelako oku pokola.” (Tia. 3:17) Ukulu umue wekongelo okuti ukuepokolo, o kapako eci Ovisonehua vi popia kuenda o pokola kolonumbi vi eciwa vocisoko ca Suku. Nda eye o ci linga, o lekisa ongangu yiwa ku vakuavo. Ndaño ceci epokolo liaye li setekiwa. Ndeci, pamue ka ci leluka kokuaye oku kuama olonumbi a tambula. Olonjanja vimue pamue eye o lipula nda onumbi yimue yiwa muẽle, ale ya sunguluka. Ale pamue vo pinga oku tẽlisa ocikele cimue ci pondola oku kapa kohele elianjo liaye. Akulu vekongelo va setukula ndati opokolo lia Gideone konepa yaco?

11. Nye ci kuatisa akulu vekongelo oku kala vakuepokolo?

¹¹ Yevelela lutate onumbi yimue kuenda yi kapako. Suku wa sapuilile Gideone ndomo a laikele oku nyõla utala wa isiaye, ocitumãlo a laikele oku tunga utala wokaliya wa Yehova kuenda ocinyama ca laikele oku lumbiwa. Gideone ka sepuile olonumbi viaco, eye wa linga ndeci Yehova o sapuila. Koloneke vilo, akulu vekongelo va tambula olonumbi vocisoko ca Yehova pocakati covikanda, casapulo kuenda olonumbi vikuavo vi tu kuatisa oku kolapo, loku pamisa ukamba wetu la Yehova. Etu tu sole akulu vetu vekongelo okuti lekolelo va kuama olonumbi viocisoko. Ocili okuti ekongelo liosi li kuatisiwa.—Osa. 119:112.

12. Akulu vekongelo va kapako ndati ukanda ku Va Heveru 13:17, eci ku lingiwa epongoloko limue vocisoko ca Yehova?

¹² Kapako apongoloko? Ivaluka okuti Yehova wa sapuila Gideone oku tuma konjo onepa yalua yasulali. (Olong. 7:8) Citava okuti eye wa sokolola ndoco, ‘Anga hẽ epongoloko liaco li sukiliwa muẽle? Anga hẽ li ka tunda ciwa?’ Pole, Gideone wa pokola. Koloneke vilo akulu vekongelo va setukula epokolo lia Gideone eci ocisoko ci va sapuila oku kuama onumbi yimue yo kaliye. (Tanga Va Heveru 13:17.) Ndeci, kunyamo 2014 Osungu Yolombangi Via Yehova ya pongolola onjila ndomo ovopange oku tunga Olonjango Viusoma kuenda Olonjango Violohongele Vinene, via laikele oku fetiwa. (2 Va Kor. 8:12-14) Akongelo ka a laikele vali oku feta olombongo via levaliwa. Pole, akongelo voluali luosi, a ponduile oku kongela olombanjaile viavo viosi, oco ku tungiwe ovitumãlo viusoma kuna kua sukiliwile ndaño ekongelo lio pocitumãlo lieca lika olombongo vitito. Eci manji José a yeva epongoloko liaco, wa simĩle okuti olio ka lia laikele oku nena onima yiwa kuenje wa sokolola ndoco: ‘Ka ku ka tungiwa ndaño muẽle Onjango yimue Yusoma. Ovina hacoko va vi lingainga konepa yilo yoluali.’ Nye ca kuatisa Manji José oku tava konumbi yaco? Eye hati: “Olondaka vi sangiwa kelivulu Liolosapo 3:5, 6, via njivaluisa okuti  ndi sukila oku kolela ku Yehova. Kuenje ca siata oku nena onima yiwa! Ka tu kasi lika oku tunga Olonjango vialua Viusoma, pole, tua lilongisavo oku eca olombanjale vietu volonjila via litepa vioku yayuisa ovopange aco.

13. (a) Ekolelo lipi Gideone a kuatele? (b) Akulu vekongelo va setukula ndati Gideone? (Talavo ociluvialuvia.)

¹³ Tẽlisa ocipango ca Yehova lutõi. Gideone wa pokola ku Yehova ndaño wa kala lusumba kuenda ohele ya kongeliwile vocikele caco. (Olong. 9:17) Gideone noke lioku tambula ohuminyo ya Yehova, wa kolelele okuti Suku o ko kuatisa oku teyuila afendeli vaye. Akulu vekongelo vana va kasi kovitumãlo okuti upange wetu u kasi oku tatekiwa, va setukula ongangu ya Gideone. Ovo lutõi va songola olohongele, upange woku kunda ndaño lohele yoku kapiwa vokayike, oku sombisiwa, oku pumba upange wavo woku sanda eteku, ale oku tatiwa lungangala. c Vokuenda kuohali ya piãla, akulu vekongelo va ka sukila calua utõi woku pokola kolonumbi va ka tambula, ndaño lohele yi ka kongelamo. Ndeci, pamue tu ka tambula olonumbi vioku kunda esapulo liesombiso kuenda eci tu ka sukila oku linga oco tu popeliwe kuyaki wa Goge ya Magoge.—Esek. 38:18; Esit. 16:21.

14. Epandi lia Gideone lia setekiwa ndati?

¹⁴ Gideone wa sukilile oku likolisilako kocikele caye coku kala onganji. Eci va Midiane va tila vokuenda kuyaki vokati kuteke, Gideone wa va kuama oku u pisa Vocimbota co Yesirele toke Volui Yordão kuenda citava okuti onjila yimue ya ñualiwile loviti vialua. (Olong. 7:22) Anga hẽ Gideone wa talama vo Yordão? Sio! Ndaño lekavo, eye kumue 300 kalume va yoka olui kuenda vamamako oku va landula. Kuenje va sanga va Midiane kuenda va va yula.—Olong. 8:4-12.

15. Epandi liukulu umue wekongelo pamue li setekiwa ndati?

¹⁵ Pamue ukulu umue wekongelo o yeva ekavo lialua omo liocikele a kuete vekongelo kuenda vepata. Kekalo liaco, akulu vekongelo va setukula ndati Gideone?

16-17. Nye ca kuatisa Gideone oku pandikisa kuenda ekolelo lipi akulu vekongelo va pondola oku kuata? (Isaya 40:28-31) (Talavo ociluvialuvia.)

 ¹⁶ Kolela okuti Yehova oku pamisa. Gideone wa kolelele okuti Yehova wa ponduile oku wĩha ongusu kuenje Yehova wa ci linga. (Olong. 6:14, 34) Onjanja yimue Gideone kuenda alume vaye, va kala oku landula olosoma vivali va Midiane poku endela posi osimbu olosoma viaco vivali via kala oku endela kolongamelo. (Olong. 8:12, 21) Kuenje lekuatiso lia Suku, va Isareli vaco va yula uyaki. Cimuamue haico okuti, akulu vekongelo va sukila oku kolela ku Yehova una okuti “lalimue eteke a kava ale oku pua ongusu.” Eye o ka eca kokuavo ongusu yosi va sukila.—Tanga Isaya 40:28-31.

¹⁷ Kũlĩhĩsa ulandu wa manji Matthew o panga onepa kocimunga Coseketa Yoku Tetulula Ocitangi Coku Yuvula Oku Sakuiwa Losonde. Nye co kuatisa oku pandikisa? Manji Matthew hati: “Nda limbuka ongusu ya Yehova ndomo ca lekisiwa ku Va Filipoi 4:13. Eci nda enda oku yeva ekavo loku sima okuti sia ponduile oku amamako, ndi likutilila lolupili oku pinga ku Suku ongusu ndi sukila, oco ñuatise vamanjange. Vepuluvi liaco nda siata oku limbuka espiritu lia Yehova oku ñuatisa oku pandikisa.” Ndeci ca pita la Gideone, akulu vetu vekongelo va likolisilako calua oku tata afendeli va Yehova, ndaño pamue ka ca lelukile. Ocili okuti, ovo va sukila oku liketisa loku limbuka okuti halonjanja viosiko va linga ovina viosi va yongola. Ovo va sukila oku kolela okuti Yehova o ka yeva apingilo avo ekuatiso kuenda oku va pamisa oco va pandikise.—Osa. 116:1; Va Fil. 2:13.

18. Akulu vekongelo va setukula ndati Gideone?

¹⁸ Akulu vekongelo va pondola oku lilongisila calua kulandu wa Gideone. Akulu vekongelo va sukila oku lekisa esunguluko lumbombe catiamẽla kovopange va tambula kuenda eci va pisiwa, ale ceci va pandiyiwa. Ovo va sukila oku lekisa epokolo kuenda utõi, ca piãla enene osimbu esulilo lioluali lulo li kasi ocipepi. Ovo va sukila oku kolela okuti, ndaño lovitangi Suku o ka va ĩha ongusu. Omo liaco, tu pandula calua upange ovo va siata oku linga kuenda tu “amamiko oku sumbila alume va soka ndava.”—Va Fil. 2:29.