1. Nye tu sukila oku linga oco tu ka puluke keteke lia Yehova?

 ECI Embimbiliya li tukula “eteke lia Yehova,” li tiamisila eteke liaco kotembo Yehova a ka sombisa ovanyali vaye, loku nenela epopelo kafendeli vaye. Kosimbu, Yehova wa nenele enyõleho kolofeka vimue. (Isa. 13:1, 6; Esek. 13:5; Sof. 1:8) Koloneke vietu, “eteke lia Yehova” li ka fetika loku nyõliwa kuo Bavulono Yinene kuenda li ka sulila kuyaki wo Harmagedo. Oco tu ka puluke “keteke” liaco, tu sukila oku lipongiya cilo. Yesu wa tu longisa okuti, ka tu sukila lika oku kapelako “ohali ya pĩala,” pole, tu sukilavo oku ‘lipongiyila’ eteke liaco.—Mat. 24:21; Luka 12:40.

2. Momo lie tu kuatisiwila lukanda 1 Va Tesalonike?

² Upostolo Paulu vukanda waye a sonehela va Tesalonike, wa tukula ovindekaise vialua oco a kuatise Akristão oku lipongiyila eteke linene lia Yehova liesombiso. Paulu wa kũlĩhĩle okuti eteke lia Yehova ka lia laikele oku iya kotembo yaco. (2 Va Tes. 2:1-3) Pole, ndaño ndoco, eye wa vetiya vamanji oku lipongiyila eteke liaco ndu okuti liya hẽla kuenje tu pondolavo oku kapako elungulo liaco. Tu konomuisi ovina eye a popia catiamẽla kolondaka vikuãimo: (1) Ndomo eteke lia Yehova li keya, (2) helie kaka puluka keteke liaco kuenda (3) ndomo tu lipongiya oco tu ka puluke keteke liaco.

3. Eteke lia Yehova li keya ndati ndocimunu kuteke? (Talavo ociluvialuvia.)

³ “Ndocimunu kuteke.” (1 Va Tes. 5:2) Eyi oyo ondaka yatete pokati kolondaka vitatu viocindekaise via tukuiwa poku lombolola oku iya kueteke lia Yehova. Ovimunu olonjanja vialua, viya ocipikipiki kuenda va ci linga vokati kuteke, vepuluvi lina okuti omanu ka va ci lavokaile. Eteke lia Yehova li keyavo ocipikipiki, vepuluvi lina okuti omanu ka va kapeleleko.  Ndaño muẽle Kakristão eteke liaco li keyavo kokuavo ocipikipiki. Pole, ca litepa lolondingãivi ceci okuti, etu ka tu ka nyõliwa.

4. Lonjila yipi eteke lia Yehova li ka kala ndolongembia vioku cita?

⁴ “Ndolongembia viukãi o laika oku cita.” (1 Va Tes. 5:3) Ina umue okuti omisi ka pondola oku tukula otembo ya suapo yoku iya kuolongembia vioku cita. Pole, eye ka kuete atatahãi, nda eci ci ka pita muẽle ale sio. Eci olongembia viaco via, citava okuti vi keya ocipikipiki kuenda levalo lialua. Cimuamue haico okuti, ka tua kũlĩhĩle eteke kuenda elivala eteke lia Yehova li ka fetika. Pole, tua kũlĩha okuti okuti eteke liaco li keya muẽle kuenda esombiso lia Suku kolondingãivi li keya ocipikipiki.

5. Lonjila yipi ohali ya piãla yi sokisiwila ndo kuca kuete?

⁵ Ndo kuca kueteke. Kocindekaise catatu Paulu o tukula vali ovimunu vi nyana luteke. Pole, onjanja eyi Paulu o sokisa eteke lia Yehova ndo kuca kuete. (1 Va Tes. 5:4) Ovimunu vina vi nyana kuteke, vi pondola oku sakalala calua okuti, ka vi moli otembo oku pita. Momo osimbu kuca va pondola oku muiwa kuenda oku kuatiwa ocipikipiki. Ohali ya piãla yi ka sitululavo vana va tuwa ndovimunu okuti, va kasi oku amamako vowelema wespiritu, poku linga ovina ka vi sanjuisa Suku. Ca litepa lavo ceci okuti, etu tu pondola oku yuvula oku linga ovina ka vi sanjuisa Yehova loku litumbika “kuwa wosi, kesunga, kuenda kocili.” (Va Efe. 5:8-12) Paulu noke wa tukula ovindekaise vivali oco a lombolole eci catiamẽla ku vana ka va ka puluka.

6. Lonjila yipi omanu valua va kasi oku pekela? (1 Va Tesalonike 5:6, 7)

⁶ “Vana va pekela.” (Tanga 1 Va Tesalonike 5:6, 7.) Paulu wa sokisa vana ka va ka  puluka keteke lia Yehova ndomanu va kasi oku pekela. Ovo ka va kapeleko ovina vi kasi oku pita. Kuenje ka va tẽla oku limbuka eci ku pita ovina vi kuete esilivilo kuenda ka va lekisa onjongole yaco. Omanu valua koloneke vilo, va pekela konepa yespiritu. (Va Roma 11:8) Ovo ka va tava okuti tu kasi “koloneke via sulako” kuenda ohali ya piãla ndopo yiya. Eci ku pita apongoloko anene voluali, omanu vamue va siata oku vetiyiwa oku lekisa onjongole kesapulo lietu Liusoma. Pole, valua vamamako oku pekela konepa yespiritu okuti, ka va lavulula. Ndaño okuti vamue va tava keteke liesombiso, va sima okuti li kasi ocipãla. (2 Pet. 3:3, 4) Kuenje, eteke leteke tu sukila oku kapako elungulo lioku amamako oku lavulula.

7. Omanu vana Suku a ka kundula va sokisiwa ndati loloholua?

⁷ “Vana va kolua.” Upostolo Paulu wa sokisa omanu Suku a ka kundula ndoloholua. Omanu vana okuti oloholua ka va limbuka lonjanga ovina vi kasi oku pita kuenda va nõla olonjila ka via sungulukile. Cimuamue haico okuti, olondingãivi ka vi kapiko alungulo a Suku. Ovo va nõla onjila yi va tuala kenyõleho. Pole, Akristão va siata oku vetiyiwa oku kuata uloño woku sokolola. (1 Va Tes. 5:6) Ulume umue ukuakukonomuisa Embimbiliya wa popia hati, “omunu umue o kuete uloño woku sokolola o tulumũha kuenda ka sakalala kuenje o nõla onjila ya sunguluka.” Momo lie tu sukilila oku tulumũha kuenda oku kolapo? Oco ka tu ka yapuisiwe lovina vio pulitika, ale lovina vikuavo viokoloneke vilo. Onjanjo yoku panga onepa kovina viaco yi ka livokiya osimbu eteke lia Yehova li kasi ocipepi. Ndaño ndoco, ka tu sukila oku sakalala catiamẽla kocitangi caco. Espiritu lia Yehova li pondola oku tu kuatisa oku tulumũha, oku kolapo kuenda oku nõla onjila ya sunguluka.—Luka 12:11, 12.

8. Ukanda 1 Va Tesalonike 5:8 u tukula ndati ovituwa vi tu kuatisa oku lavulula kuenda oku kuata uloño woku sokolola? (Talavo ociluvialuvia.)

⁸ “Wali ociteyuilo covonete . . . ndocikoko.” Paulu wa tu sokisa ndasualali va kasi oku lavulula kuenda va limalehẽla uyaki. (Tanga 1 Va Tesalonike 5:8.) Esualali limue li sukila oku lipongiyila uyaki otembo yosi. Cimuamue haico letu. Tu amamako oku lipongiyila eteke lia Yehova poku wala ociteyuilo covonete cekolelo, locisola kuenda elavoko lieyovo ndocikoko. Ovituwa evi vi pondola oku tu kuatisa calua.

9. Ekolelo li tu teyuila ndati?

⁹ Ociteyuilo covonete ci teyuila onete yesualali. Ekolelo kuenda ocisola ci teyuila utima wetu wocindekaise. Ovituwa viaco vi tu kuatisa oku amamako oku vumba Suku loku kuama Yesu. Ekolelo li tu kuatisa oku kolela okuti Yehova o ka tu sumũlũisa nda tuo sanda lutima wosi. (Va Hev. 11:6) Eci ci ka tu vetiya oku amamako oku kakatela kusongui wetu Yesu, ndaño tu liyaka lovitangi. Tu pondola oku pamisa ekolelo lietu eci tu liyaka lovitangi komuenyo, poku lilongisila kovolandu a vamanji vokoloneke vilo okuti, va kasi oku amamako lekolelo ndaño lelambalalo, ale lovitangi viekambo liolombongo. Tu yuvulavo ohele yi tunda koku sakalala oku sanda olombongo poku setukula vana va leluisa omuenyo wavo, oco va pitise kovaso Usoma. b

10. Oku sola Suku kuenda omanu ci tu kuatisa ndati oku pandikisa?

¹⁰ Ocisola ci kuetevo esilivilo oco tu amameko  oku lavulula loku kuata uloño woku sokolola. (Mat. 22:37-39) Oku sola Suku ci tu kuatisa oku pandikisa kupange woku kunda ndaño lovitangi vi pondola oku yililako. (2 Tim. 1:7, 8) Omo lioku sola vana ka va vumbi Yehova tu amamako oku kunda, loku kundila vovikanjo vietu, oku eca uvangi volotelefone kuenda pocakati co vikanda. Etu ka tu liwekapo oku kolela okuti eteke limue omanu va ka linga apongoloko kuenda va ka fetika oku linga eci ca sunguluka.—Esek. 18:27, 28.

11. Oku sola vamanjetu ci tu kuatisa ndati? (1 Va Tesalonike 5:12)

¹¹ Voku sola vakuetu mua kongelavo oku sola vamanjetu. Tu lekisa ocisola poku “li vetiya pokati loku li pamisa pokati.” (Tanga 1 Va Tesalonike 5:11.) Ndeci asualali va talavayela kumosi kuyaki, etu tu pondolavo ku li pamisa pokati. Ocili okuti esualali limue li pondola oku valula esualali likuavo kuyaki, pole, lalimue eteke nda a ci linga locipango. Oku ci sokisa, lalimue eteke tu ka valula vamanjetu, ale oku fetuluinya ũvi lũvi. (1 Va Tes. 5:13, 15) Tu lekisavo ocisola poku sumbila vamanjetu va kuete ocikele coku songola vekongelo. (1 Va Tes. 5:12) Eci Paulu a soneha ukanda owu, ekongelo lia va Tesalonike ndopo lia sokiyiwile. Alume va nõliwile oku songola, citava okuti ka va loñolohele kuenda va enda oku lueya. Ndaño ndoco, va sasamãlele oku sumbiwa. Omo okuti ohali ya piãla yi kasi ocipepi, citava okuti tu ka sukila oku kuama vali calua olonumbi viakulu vekongelo vo pocitumãlo. Etu pamue ka tu ka tẽla ndomo tu tambula olonumbi vi tunda Kombala Yolombangi Via Yehova kuenda kofiliale; omo liaco, ci kuete esilivilo oku lilongisa cilo oku sola loku sumbila akulu vekongelo. Vapuluvi osi tu amamiko oku kuata uloño woku sokolola, ka tu ka luluvaleli kakulueya avo, pole, tu tiamisili utima ku Yehova okuti pocakati ca Kristu o songuila alume vaco vakuekolelo.

12. Elavoko lietu li teyuila ndati ovisimĩlo vietu?

¹² Ndeci ocikoko ci teyuila utue wesualali, elavoko lietu liepopelo li teyuila ovisimĩlo  vietu. Lelavoko lia pama tu limbuka okuti, ovina oluali lueca komanu ka vi silivila. (Va Fil. 3:8) Elavoko li tu kuatisa oku tula utima kuenda oku kolapo. Olondaka evi via limbukiwa la manji Wallace kuenda Laurinda va kasi oku vumbila vo Afrika. Vokuenda kuolosemana vitatu, omunu lomunu pokati kavo wa fisa onjali yaye. Omo lio COVID-19, ovo ka va tẽlele oku enda konjo oco va kale lapata avo. Manji Wallace wa soneha ndaco: “Elavoko liepinduko lia ñuatisa oku va sokolola, handomoko va kala keteke lia sulako voluali lulo, pole, ndomo va ka kala keteke liatete voluali luokaliye. Elavoko liaco li ndi tulumuisa eci ndi liyaka lesumuo, ale lovisimĩlo vioku fisa.”

13. Nye tu sukila oku linga oco tu tambule espiritu sandu?

¹³ “Ko ka tateki upange wespiritu lia Suku vokuene.” (1 Va Tes. 5:19) Paulu wa sokisa espiritu sandu ndondalu vokati ketu. Eci tu kuata espiritu lia Suku tu lekisa ombili, loku sanjukila eci ca sunguluka kuenda tu likolisilako oku linga upange wa Yehova. (Va Rom. 12:11) Nye tu sukila oku linga oco tu tambule espiritu sandu? Tu sukila oku likutilila oku pinga espiritu sandu poku tanga Ondaka ya Suku kuenda oku tiamẽla kocisoko ca Yehova ci songuiwa lespiritu sandu. Oku ci linga ci ka tu kuatisa oku kuata “epako liespiritu.”—Va Gal. 5:22, 23.

14. Nye tu sukila oku yuvula nda tu yongola oku amamako oku tambula espiritu lia Suku? (Talavo ociluvialuvia.)

¹⁴ Noke lia Suku oku tu ĩha espiritu sandu tu sukila oku kuata utate “oco ka tu ka tateke upange wespiritu sandu vokuetu.” Suku eca espiritu liaye ku vana vamamako lovisimĩlo kuenda lovituwa via yela. Eye ka ka amamako oku tu ĩha espiritu liaye nda tua kuata ovisimĩlo via vĩha loku linga ovina ka via sungulukile. (1 Va Tes. 4:7, 8) Oco tu amameko oku tambula espiritu sandu ka tu ‘ka tativo leselula ovitumasuku.’ (1 Va Tes. 5:20) Vocinimbu eci ovitumasuku vi lomboloka esapulo Yehova a eca pocakati cespiritu liaye, oku kongelamo asapulo a lombolola catiamẽla keteke  liaye kuenda esunga lieci tu sukilila oku liangiliya lonjanga. Ka tu ka simi okuti eteke lia Yehova, ale o Harmagedo ka yi ka pita. Pole, tu lekisi okuti tu kasi oku lavoka okuiya kueteke liaco, poku li kapelako loku kuata ovituwa via sunguluka kuenda oku kakatela kovilinga “vioku sumbila Suku” oloneke viosi.—2 Pet. 3:11, 12.

15. Tu yuvula ndati oku yapuisiwa lasapulo uhembi kuenda lovohembi akuavo a tunda kolondele? (1 Va Tesalonike 5:21)

¹⁵ Ndopo ovanyali va Suku va ka popia vati: “Tu kuete ombembua kuenda tua kolapo!” (1 Va Tes. 5:3) Asapulo esanda ana a tunda kolondele a ka li sanduila kolonepa viosi violuali, oco a yapuise omanu valua. (Esit. 16:13, 14) Nye ci popiwa kokuetu? Ka tu ka yapuisiwa nda tua ‘kũlĩhĩsa ovina viosi.’ (Tanga 1 Va Tesalonike 5:21.) Ondaka yo Helasi ya pongoluiwa okuti “kũlĩhĩsi” ya kuamiwa oco ku lomboluiwe onjila omanu va siata oku kuama poku seteka ovotale a kuete esilivilo, ndeci ulu kuenda opalata, oco va kolele okuti viwa. Etu tu sukilavo oku kũlĩhĩsa ovina tu yeva ale tu tanga oco tu limbuke nda ovina viaco viocili. Eci ca kuata esilivilo ku va Tesalonike kuenda ci ka kuata vali esilivilo lialua kokuetu kohali ya piãla yi laika oku iya. Ka tu tava lika kovina vakuetu va popia, pole, tu sukila oku talavaya luloño wetu woku sokolola, oco tu sokise evi tu tanga levi tu yeva leci Embimbiliya li popia kuenda ocisoko ca Yehova. Nda tua ci linga, lalimue eteke tu ka yapuisiwa lasapulo uhembi a tunda kolondele.— Olosap. 14:15; 1 Tim. 4:1.

16. Elavoko lipi tu kuete kuenda tu vetiyiwa oku linga nye?

¹⁶ Tua kũlĩha okuti afendeli va Yehova va ka puluka kohali ya piãla. Omunu lomunu pokati ketu ka tua kũlĩhĩle eci ci ka pita letu hẽla. (Tia. 4:14) Ci kaile okuti tu ka kala lomuenyo vokuenda kuohali ya piãla, ale tu fa osimbu ohali ya piãla ka ya fetikile, tu ka sumũlũisiwa lomuenyo ko pui nda tu amamako lekolelo. Olombuavekua vi ka kala kilu la Kristu. Olomeme vikuavo vi ka kala vocumbo celau palo posi. Omo liaco, vosi yetu tu tiamisili utima kelavoko lietu likomohĩsa kuenda oku lipongiyila eteke lia Yehova!