1-2. Ndomo ca tangiwa Kosamo 25:14, nye tu sukila oku linga nda tu yongola oku kuata ukamba la Yehova?

 OVITUWA vipi o sima okuti vi kuete esilivilo, nda o yongola oku amamako oku kuata ukamba lomunu umue? Ove pamue nda wa tambulula okuti, akamba vawa va lisole kuenda va likuatisa pokati. Pamue nda kua simĩle okuti esumbilo ocituwa cimue ci kuete esilivilo koku kuata ukamba uwa. Omo liaco, ndomo osapi yocipama cilo ci popia, vana va yongola oku kuata ukamba uwa la Yehova va sukila oku u “sumbila.”—Tanga Olosamo 25:14.

² Ndaño tu kasi ale oku vumba Yehova vokuenda kuotembo yalua, vosi yetu tu sukila oku lekisa esumbilo liocili kokuaye. Pole, nye ci lomboloka oku sumbila Suku? Tu lekisa ndati esumbilo ku Yehova? Nye tu lilongisila ku Ovadiya, Kocitunda Cinene Yehoyada kuenda ku soma Yoasi catiamẽla ko ku sumbila Suku?

3. Lombolola ndomo usumba u pondola oku tu teyuila.

³ Pamue tu kuata usumba nda tua limbuka okuti cimue ci tu kokela ovitangi. Usumba waco uwa kuenda u tu vetiya oku nõla onjila ya sunguluka. Ndeci, usumba woku kupuka, u tu tateka oku endela kongenge yewe limue. Usumba woku lilemeha, u pondola oku tu vetiya oku yuvula ohele yaco. Usumba woku nyõla ukamba wetu lomunu umue tu sole, u tu kuatisa oku yuvula oku popia, ale oku linga cimue ka ca sungulukile.

4. Usumba upi Satana a yongola okuti owo tu kuatela Yehova?

 ⁴ Satana o yongola okuti omanu va kuatela Yehova usumba umue ka wa sungulukile. Satana o yongola oco etu tu tave okuti, Yehova olonjanja viosi wa tema kuenda o yongola oku tu kangisa, loku sima okuti lalimue eteke tu ko sanjuisa. (Yovi 4:18, 19) Satana o yongola okuti tu kuatela usumba Yehova oco tu liwekepo oku u vumba. Oco tu yuvule onjanjo yaco, tu sukila oku lekisa esumbilo li sesamẽla Suku.

5. Nye ci lomboloka oku sumbila Suku?

⁵ Omunu o kuetele Suku esumbilo liocili, u sole kuenda ka yongola oku linga cimue ci nyõla ukamba waye Leye. Yesu wa kuatela ‘esumbilo liaco Suku.’ (Va Hev. 5:7) Eye lalimue eteke a kuatelele Yehova usumba ka wa sungulukile. (Isa. 11:2, 3) Pole, wo kuatela ocisola calua kuenda wa yonguila oku pokola kokuaye. (Yoa. 14:21, 31) Ndeci ca linga Yesu, etu tu kuetele esumbilo liocili Yehova, momo eye ukuacisola, ukualondunge, ukuesunga kuenda ukuonene. Tua kũlĩhavo okuti Yehova o tu sole calua kuenda wa kapako ndomo tu tenda olonumbi viaye. Nda tua sinĩla Yehova, eye o sumua calua, pole, nda tua pokola kokuaye tu sanjuisa utima waye.—Osa. 78:41; Olosap. 27:11.

6. Volonjila vipi tu pondola oku lilongisa oku sumbila Suku? (Olosamo 34:11)

⁶ Etu ka tua citiwile locituwa coku sumbila Yehova; tu sukila oku ci lilongisa. (Tanga Olosamo 34:11.) Onjila yimue tu sukila oku ci linga poku konomuisa oviluvo viaye. Eci tu limbuka olondunge via Yehova, unene waye kuenda ocisola a tu kuetele ndomo via situluiwa “kovina via lulikiwa,” esumbilo kuenda ocisola cetu kokuaye ci li vokiya. (Va Rom. 1:20) Manji umue o tukuiwa Adrienne wa popia hati: “Eci ndi mola olondunge via Yehova kovina eye a lulika, ci ñomõhisa kuenda ci ñuatisa oku limbuka okuti eye wa kũlĩha eci ciwa kokuange.” Omo okuti eye wa enda oku sokolola kovina viaco olonjanja viosi, wa popia hati, “Ame si yongola oku linga lacimue ci nyõla ukamba wange la Yehova Ono yomuenyo wange.” Sokiya otembo vokuenda kuosemana yoku sokolola kocina cimue Yehova a lulika. Poku ci linga, ci ka vokiya ocisola lesumbilo o kuetele Yehova.—Osa. 111:2, 3.

7. Ndamupi ohutililo yi tu kuatisa oku kuatela esumbilo liocili Yehova?

⁷ Onjila yikuavo yoku sumbila Suku, poku likutilila olonjanja viosi. Kuenje olonjanja viosi tu likutilila ku Yehova tu u kũlĩha vali ciwa. Otembo yosi tu pinga kokuaye ongusu yoku pandikisa, tu ka ivaluka unene waye. Eci tu eca olopandu kokuaye omo lioku tu ĩha ombanjaile Yomõlaye, ci tu ivaluisa ocisola Yehova a tu kuetele. Eci tu pinga ekuatiso ku Yehova poku liyaka lovitangi, tu komõha vutima wetu omo liolondunge viaye. Olohutililo viaco vi tu kuatisa oku sumbila calua Yehova. Kuenda vi tu kuatisavo oku pamisa onjila tua nõlapo yoku yuvula ovina viosi vi nyõla ukamba wetu laye.

8. Nye tu sukila oku linga oco tu amameko oku sumbila Suku?

⁸ Tu pondola oku amamako oku sumbila Suku, poku tanga Embimbiliya locimãho coku lilongisila kovolandu awa kuenda kovolandu ãvi a sangiwamo. Tu konomuisi ulandu wafendeli vavali va Yehova vakuekolelo ndeci, Ovadiya wa kala kalei konjo ka Soma Ahava kuenda Citunda Cinene Yehoyada. Tu kũlĩhĩsavo eci tu lilongisila ku Soma Yoasi wo ko  Yuda, okuti noke wa siapo oku vumba Yehova.

9. Oku sumbila Yehova ca kuatisa ndati Ovadiya? (1 Olosoma 18:3, 12)

⁹ Onjanja yatete Embimbiliya li tukula Ovadiya b olio liti: “Ovadiya wa sumbilile calua Yehova.” (Tanga 1 Olosoma 18:3, 12.) Esumbilo liocili lia kuatisa ndati Ovadiya? Lio kuatisa oku kala ukuacili; haiye wa koleliwa kuenje soma wo nõla, oco a kale kalei konjo yaye. (Sokisa la Nehemiya 7:2.) Ovadiya poku lekisa esumbilo ku Suku co kuatisavo oku lekisa utõi kuenda oku kuata ovituwa a sukilile. Eye wa kala komuenyo vokuenda kuviali wondingãivi soma Ahava, una “wa linga ovina vialua vĩvi kovaso a Yehova okuti vosi vana [olosoma] va vialele tete, ci sule.” (1 Olos. 16:30) Ukãi waye Isevele okuti wa enda oku fendela Baale, eye wa suvukile calua Yehova kuenda wa seteka oku malako efendelo liocili kocikoti cekũi cusoma wa va Isareli. Toke muẽle wa ponda ovaprofeto valua va Suku. (1 Olos. 18:4) Ocili okuti, Ovadiya wa vumba Yehova vokuenda kuotembo yimue yovitangi.

10. Nye ca lekisa okuti Ovadiya wa kala ukuotõi walua?

¹⁰ Ovadiya wa lekisavo ndati utõi u komõhisa? Eci Isevele a kala oku sanda ovaprofeto va Suku oco a va ponde, Ovadiya wa salamisa eci ci soka 100 pokati kavo okuti “vocimunga locimunga mua kala 50, yu wa va tekula lombolo kuenda ovava.” (1 Olos. 18:13, 14) Nda eci Ovadiya ukuotõi a linga ca limbukiwile, nda wa pondiwa. Kuenje citava okuti Ovadiya wa kala lusumba kuenda ka yonguile oku fa. Pole, Ovadiya wa solele Yehova kumue lafendeli Vaye, okuti omuenyo waye muẽle ci sule.

11. Ndamupi afendeli va Yehova koloneke vilo va kasi nda Ovadiya? (Talavo ociluvialuvia.)

¹¹ Koloneke vilo, afendeli valua va Yehova va kasi kolofeka vina okuti upange wetu wa tatekiwa. Ovo va lekisa kolombiali esumbilo va sesamẽla, pole, ndeci ca linga Ovadiya va likala oku liwekapo oku vumba Yehova! (Mat. 22:21) Ovo va lekisa esumbilo ku Yehova  poku pokola kokuaye, okuti komanu hakoko. (Ovil. 5:29) Va siata oku ci linga poku amamako oku kunda olondaka viwa kuenda oku linga olohongele vuyombeki. (Mat. 10:16, 28) Ovo va kũlĩhĩsa lutate nda vamanji va kuete ovina va sukila oco va pamise ukamba wavo la Yehova. Kũlĩhĩsa ulandu wa manji Henri, o kasi kofeka yimue yo Afrika kuna okuti upange wetu wa tatekiwile votembo yimue. Kotembo yaco, eye wa liecele olumue oco a kuatise koku ava okulia kuespiritu ku va manji. Eye wa soneha ndoco: Tunde vutila ame ndukuasõi. Pole, nda kolelele okuti esumbilo ñuetele Yehova lia nyĩha utõi nda sukilile. O pondola hẽ oku lekisa utõi ndowu wa manji Henri? O ci lekisa nda wa kuatela Suku esumbilo liocili.

12. O Citunda cinene Yehoyada kumue lukãi waye va lekisa ndati okuti va kala vakuacili ku Yehova?

¹² O Citunda Cinene Yehoyada wa sumbilile Yehova kuenda esumbilo liaco liovetiya oku kala ukuacili loku vetiya vakuavo oku fendela Yehova. Ca limbukiwa eci omõla a Isevele ukãi Ataliya, a tambula ocalo cusoma wo Yuda. Omanu va kuatele esunga lioku lulumila Ataliya. Eye wa kala ongangala, haiye ukuacipululu momo wa seteka oku konga vosi va tiamẽlele kocikoti caye okuti, olonekulu viaye! (2 Asa. 22:10, 11) Umue pokati komãla vaco, Yoasi, eye wa supulukapo omo ukãi wa Yehoyada Yehoasiaveata wo teyuila. Eye kumue lulume waye va salamisa kamõla kuenje vo tata. Lonjila eyi Yehoyada kuenda ukãi waye va kuatisa koku teyuila ocikoti ca soma Daviti. Yehoyada wa kakatelele ku Yehova, ka kuatelele usumba Ataliya.—Olosap. 29:25.

13. Eci Yoasi a kuata epanduvali kanyamo, Yehoyada wa lekisa vali ndati okuti ukuacili?

¹³ Eci Yoasi a kuata epanduvali kanyamo, yimue vali onjanja Yehoyada wa lekisa okuti wa kala ukuacili ku Yehova. Eye wa linga esokiyo limue. Nda esokiyo liaco lia tundile ciwa, Yoasi wa laikele oku kala osoma kapiñala ka soma Daviti. Nda ka lia tundule ciwa, Yehoyada nda wa pumba omuenyo waye. Omo liesumũlũho lia Yehova, esokiyo liaco lia kuata onima yiwa. Yehoyada omo lioku kuatisiwa lasongui kuenda va Lewi, wa lingisa okuti Yoasi o kala soma kuenda Ataliya o pondiwa. (2 Asa. 23:1-5, 11, 12, 15; 24:1) Noke Yehoyada “wa lisila eye muẽle ocisila cimue pokati ka Yehova la soma kuenda lomanu cokuti, va kamamako oku kala omanu va Yehova.” (2 Olos. 11:17) Yehoyada “wa kapavo vakualombundi polombundi vionjo ya Yehova oco okuti, omunu wosi wa vĩhisiwa ka citava okuti, iñilamo.”—2 Asa. 23:19.

14. Lonjila yipi Yehoyada a kemãlisiwa omo lioku kemãlisa Yehova?

¹⁴ Yehova wa popia hati: “Vana va ndi kemãlisa ndi ka va kemãlisavo.” Noke, eye wa sumũlũisa Yehoyada. (1 Sam. 2:30) Ndeci, Yehova wa kongela ulandu wa Yehoyada Vembimbiliya, oco tu lilongisile kulandu waye. (Va Rom. 15:4) Eci Yehoyada a fa, eye wa kuata esumũlũho lioku kendiwa “Volupale lua Daviti kumue lolosoma, momo eye wa linga eci ciwa vo Isareli catiamẽla ku Suku yocili kuenda konjo Yaye.”—2 Asa. 24:15, 16.

15. Nye tu lilongisila kulandu watiamẽla ku Yehoyada? (Talavo ociluvialuvia.)

¹⁵ Ulandu watiamẽla ku Yehoyada, u pondola oku kuatisa vosi yetu oku kuata ocituwa coku sumbila Suku. Akulu vekongelo va setukula ongangu ya Yehoyada poku amamako oku lavulula kuenda poku teyuila ocunda ca Suku lekolelo. (Ovil. 20:28) Ku  Yehoyada Akulu vekongelo va lilongisilakovo okuti eci ovo va sumbila Yehova loku kakatela kokuaye, Yehova o ka ecelela okuti ovo va tẽlisa ocipango Caye. Yehova ka ka va likala. Amalẽhe va pondolavo oku kũlĩhĩsa ndomo Yehova a tata Yehoyada, loku u setukula poku tata lesumbilo akulu vekongelo, ca piãla enene vana va kasi ale oku vumba Yehova vokuenda kuanyamo alua. (Olosap. 16:31) Oku sulako, vosi yetu tu lilongisila kongangu yasongui kuenda ya va Lewi vana va kuatisa Yehoyada. Omo liaco, tu kuatisi vana va songola poku pokola kokuavo.—Va Hev. 13:17.

16. Nye ci lekisa okuti soma Yoasi wa honguele?

¹⁶ Yehoyada wa kuatisa soma Yoasi oku kala omunu umue uwa. (2 Olos. 12:2) Kuenje eci soma a kala umalẽhe, wa yonguile calua oku sanjuisa Yehova. Pole, noke lia Yehoyada oku fa, Yoasi wa yevelela olombuale olonanguluke. Nye ceyililako? Eye kumue loloñame viaye “va fetika oku vumba olombueti vi kola loviteka.” (2 Asa. 24:4, 17, 18) Ndaño Yehova wa sumuile calua, “wamamako oku tuma ovaprofeto pokati kavo . . . , pole, ovo va likala oku yevelela.” Ovo ka va yevelile Sakariya omõla a Yehoyada, una okuti ka kale lika uprofeto kuenda ocitunda, pole, wa kalavo epalume lia Yoasi. Toke muẽle soma Yoasi wa tuma oku ponda Sakariya ndaño epata liaye lio kuatisa oku popela omuenyo waye. (2 Asa. 22:11; 24:19-22)

17. Ndamupi Yoasi ovina ka vio tundile ciwa?

¹⁷ Yoasi ka kuatelele esumbilo liocili Yehova, kuenje ovina ka vio wendele ciwa. Yehova  wa popele hati, “vana va ndi pembula va ka pembuiwavo.” (1 Sam. 2:30) Etendelo limue litito liolohoka, vio ko Suria via katukila “etendelo lialua lialume” va Yoasi kuenda eye wa ‘lemẽhiwa calua.’ Noke lia va Suria oku siapo olupale, Yoasi wa pondiwa lakuenje vaye muẽle, omo lioku ponda Sakariya. Omo okuti wa kala osoma yimue ondingaĩvi ka “kendiwile vayambo olosoma.”—2 Asa. 24:23-25; tala ondaka omõla a Barakiya ku Mat. 23:35.

18. Ndomo ca lekisiwa ku Yeremiya 17:7, 8, tu yuvula ndati oku kala nda Yoasi?

¹⁸ Nye tu lilongisila kulandu wa Yoasi? Eye wa kala nduti umue okuti olombombo vialio via kunamelele kekuatiso liuti ukuavo. Noke lia Yehoyada oku fa una wa enda oku u kuatisa, Yoasi wa fetika oku yevelela olonanguluke kuenje kameleko lekolelo ku Yehova. Ocindekaise eci ci lekisa okuti, esumbilo lietu ku Suku ka li ka tambe ño kongangu yiwa Yakristão vakuavo, oku kongelamo apata etu. Oco tu amemeko lekolelo lia pama, tu sukila oku pamisa ocisola tu kuetele Suku kuenda esumbilo poku lilongisa oloneke viosi Ondaka yaye, oku sokolola kokuayo kuenda oku likutilila.—Tanga Yeremiya 17:7, 8; Va Kol. 2:6, 7.

19. Nye Yehova a pinga kokuetu?

¹⁹ Yehova ka kisika kokuetu ovina vialua. Eye o yongola lika eci ci sangiwa kelivulu Liukundi 12:13 kuna ku popia hati: “Sumba Suku yocili kuenda kapako ovihandeleko viaye, momo eci oco ocina cosi omunu a kisikiwa oku linga.” Eci tu sumbila Suku tu ka tẽla oku pandikisa koloseteko viosi vi keya kovaso yoloneke, loku kolapo ndeci ca pita la Ovadiya kuenda Yehoyada. Nda tua ci linga, lacimue ci ka tẽla oku nyõla ukamba wetu la Yehova.