Yehova o yongola okuti omanu vavali va likuela, va kuata esanju kuenda va likuatela ukamba wocili pokati. (Mat. 19:4-6) Nda o yongola oku kuela, o sanda ndati omunu umue uwa? Yehova omo okuti eye Ululiki wetu wa kũlĩha eci tu sukila oku linga oco tu kuate esanju volohuela. Omo liaco, nda wa kapako olonumbi eye a tu ĩha, o ka kuata esanju liocili volohuela. Konomuisa amue pokati kolonumbi viaco.

Tete, tu sukila oku kuata elomboloko lieci catiamẽla kokuetu muẽle: “Utima wa piãla kelimbi okuti, ocina cikuavo ci sule kuenda owo ũvi calua.” (Yer. 17:9) Eci omanu vavali va yongola oku li kuela va lisanga kuenda va fetika oku namũlala, kuenje kavali kavo va li kuatela ocisola calua noke ci tĩla calua kokuavo oku nõla onjila yiwa. Eci umue a nõla onjila yoku kuela poku kuama ovisimĩlo viaye muẽle, olonjanja vialua o likokela ohali. (Olosap. 28:26) Momo ka ca sungulukile omanu vavali oku linga ohuminyo yolohuela kefetikilo osimbu okuti handi ka va li kũlĩhĩle ciwa.

Elivulu Liolosapo 22:3 li popia hati: “Ukualondunge o mola ohele kuenje o salama, Pole, omunu wa kamba olondunge amamako oku enda kuenje o tala ohali.” Ohele yipi iyililako poku sandiliya umue o yongola oku kuela vo Internet? Ci sumuisa calua oku limbuka okuti, omanu valua va siata oku sapela lomanu ka va kũlĩha vo Internet loku fetika oku namũlala lavo kuenje noke va limbuka okuti omunu waco wo kemba. Handi vali, omanu olohembi va sandeka olonumbi viesanda oco va nyane olombongo viomanu. Olonjanja vimue omanu vaco va siata oku linga ovina evi vĩvi, va popia okuti Olombangi Via Yehova.

Konomuisa ohele yikuavo iyililako. Vamue va siata oku talavaya lonumbi yaco eyi yo Internet, va kuama olonjila vina okuti va sanga omunu va yongola. Pole, ka kuli uvangi u lekisa okuti olonjila viaco vi pondola oku kuata onima yiwa. Halondungeko oku kolela ko kombutador yimue ya pangiwa lomunu oco o sange umue o kuela laye. Ovipama vio kombutador ka vi tẽla oku eca olonumbi viwa ndeci olonumbi Viembimbiliya.—Olosap. 1:7; 3:5-7.

Onumbi yi sangiwa Kolosapo 14:15 yi popia hati: “Omunu wa kamba olondunge o kolela kolondaka viosi, pole, ukualondunge o kũlĩhĩsa onjila yosi.” Osimbu kua nõlele omunu umue o yongola oku kuela laye, o sukila oku u kũlĩha  ciwa. Pole, oku ci lingila vo Internet ci tĩla calua. Ndaño okuti vu pita otembo yalua oku li sonehela kuenda oku sapela otembo yalua pocakati co Internet, anga hẽ ci lekisa okuti wa li kũlĩhi ciwa? Vamue va simĩle okuti va sanga omunu wocili a yongola oku kuela, pole, va kuata esumuo lialua eci va li sanga polo lapolo lomunu waco.

Ukualosamo wa popia hati: “Ame si likongela lomanu vakuelimbi, kuenda ndi yuvula vana va limbika eci va tuwa.” (Osa. 26:4) Valua va kuete ocituwa coku kemba kolonumbi viavo eci va kasi oku namũlala pocakati co Internet oco va limolehise okuti va kuete ekalo liwa. Ovo pamue ka va lekisa ovituwa viavo vĩvi va kuete, ale ovituwa viaco vĩvi ka vi muiwa eci ovo va kasi oku tuma esapulo ku vakuavo. Ndaño okuti vamue va lilekisa okuti Olombangi Via Yehova anga hẽ ovo Akristão va papatisiwa? Va pama hẽ kekolelo? Va kuete ukamba uwa la Yehova? Vekongelo va tiamẽla, va sumbiwa hẽ la vamanji? Ale ka va kuete ongangu yiwa kuenda “akamba vãvi”? (1 Va Kor. 15:33; 2 Tim. 2:20, 21) Va yongola hẽ oku kuama olonumbi Viembimbiliya poku kuela? Ove o sukila oku kũlĩha atambululo kapulilo a-a, pole, ci tĩla calua oku kũlĩha atambululo aco nda kua sapelele Lombangi yikuavo ya Yehova yo kũlĩha ciwa. (Olosap. 15:22) Kuenje, ufendeli umue wa Yehova ukuekolelo, ka simi oku ‘likutila kokanga’ yimuamue lomunu una ka fendela Yehova.—2 Va Kor. 6:14; 1 Va Kor. 7:39.

Omo liohele yi tunda koku namũlalela pocakati co Internet, kuli olonjila vikuavo o pondola oku kuama vioku sandiliya, ale yoku kũlĩha omunu o yongola oku kuela laye. Pi o pondola oku sanga omunu umue oco o likuele laye? Eci tu sanda apuluvi oku kala pamosi ndeci, kolohongele viekongelo, kohongele vimbo, kolohongele viofeka kuenda kolomapalo vikuavo tu li kũlĩha ciwa omunu lukuavo.

Nda ka ci tava oku kala pamosi kolohongele viaco omo lio COVID-19, tu kuama ovimalẽho vikuavo oco tu kale kolohongele okuti ci tu ecelela oku kũlĩha ciwa Olombangi vikuavo via Yehova. Ove o pondola oku va yevelela poku eca atambululo avo kolohongele kuenda oku yeva olondaka viavo viekolelo. (1 Tim. 6:11, 12) Ove o pondola oku sapela la vamanji pocakati cocimunga ci lingiwa vo zoom noke liohongele. Omo lioku liongolola ndocimunga Colombangi via Yehova, ove o ka limbuka ndomo omunu o yongola oku kuela laye a tenda omanu vakuavo kuenje eci oco ci ka lekisa ndomo omunu waco. (1 Pet. 3:4) Vokuenda kuotembo, osimbu vu likũlĩha ciwa, ove o pondola oku limbuka nda olonjongole viene kuenda ovimãho vimuamue, ale nda kavali kene vu pondola oku kala olohueli viwa.

Nda una kakuelele o likolisilako oku sanda omunu a likuela laye okuti o kuete ovituwa vi likuata lolonumbi Viembimbiliya, vokuavo mu laika oku tẽlisiwa ocili colondaka violosapo viokuti: “Una o sanga ukãi umue uwa, [ale ulume umue uwa] wa sanga ocina cimue ciwa, kuenje o tambula ohenda ya Yehova.”—Olosap. 18:22.