1-2. Ohuminyo yipi yi sangiwa ku Isaya 65:16, 17, yi tu kuatisa oku pandikisa?

“KU KA LIWEKEPO!” eyi ya kala osapi yohongele yofeka yunyamo 2017. Ulandu waco wa lekisa ndomo tu pondola oku pandikisa kovitangi. Papita ale anyamo akuãla tunde eci kualingiwa ohongele yaco yofeka, pole, handi tu kasi oku pandikisa levĩho lipita voluali.

² Ovitangi vipi wa siata oku liyaka lavio cilo? Vioku fisa umue pokati kepata, ale ekamba limue o sole? Liuvei umue ka u kuete esaku? Lioku kuka? Liovilunga, liungangala, ale elambalalo? Ale o kasi oku liyaka lefengi limue ndeci, lio COVID-19? Tu kasi oku lavoka eteke ovitangi viosi evi vi ka pita, loku sokolola okuti lalimue eteke vi ka kalako vali!—Tanga Isaya 65:16, 17.

3. Nye tu sukila oku linga cilo kuenda momo lie?

³ Ekalo liomuenyo voluali lulo ka wa lelukile kuenda kovaso yoloneke tu ka liyaka vali lovitangi vialua. (Mat. 24:21) Kuenje tu sukila oku pamisa epandi lietu. Momo lie? Momo Yesu wa popia hati: “Omo liepandi liene, vu ka popela ovimuenyo viene.” (Luka 21:19) Tu ka tẽla oku pandikisa eci tu sokolola okuti valua va kasi loku pandikisavo kovitangi ndevi vietu.

4. Momo lie tu popela okuti Yehova eye ongangu ya velapo yoku pandikisa?

⁴ Helie ongangu ya velapo yepandi? Yehova Suku. Anga hẽ etambululo eli lia ku komõhisa? Citava okuti o sokolola ketambululo liaco. Satana eye o kasi oku viala oluali kuenje eli olio esunga ku kasilili ovitangi vialua. Yehova o kuete unene woku malako ovina vĩvi vi kasi voluali, pole, eye o kasi oku talamẽla eteke a sokiya oco a ci linge. (Va Rom. 9:22) Pole, Suku yetu o kasi oku amamako oku pandikisa toke eci otembo yaco yi ka  pitĩlapo. Tu konomuisi ovina ecea vi lekisa okuti Yehova o kasi oku pandikisa.

5. Ndamupi onduko ya Suku ya siata oku sepuiwa kuenda ove o liyeva ndati?

⁵ Onduko ya Yehova ya siata oku sepuiwa. Yehova o sole onduko yaye kuenje o yongola okuti omanu vosi va yi sumbila. (Isa. 42:8) Pole, vokuenda kueci ci soka olohulukãi epandu kanyamo, onduko yaye yiwa ya siata oku sepuiwa. (Osa. 74:10, 18, 23) Eci ca fetikila vocumbo Cedene eci Eliapu (ci lomboloka “Unyãli”) a lundila Suku okuti o kasi oku tateka Adama la Eva kocina cimue ciwa nda ca va nenela esanju. (Efet. 3:1-5) Tunde opo, Eliapu lia siata oku lundila Yehova okuti o tateka omanu kovina ovo va sukila. Yesu wa sakalalele omo okuti onduko ya Isiaye ya kala oku sepuiwa. Eli olio esunga lieci eye a longisila olondonge viaye oku likutilila ndoco: “A Isietu o kasi kovailu, onduko yove yi sumbiwe.”—Mat. 6:9.

6. Ndamupi Yehova a ecelela otembo yalua oco ku limbukiwe okuti eye o kuete omoko yoku viala ilu losi?

⁶ Oku suvukiwa kuomoko yaye yoku viala. Yehova eye o kuete omoko yoku viala ilu losi kuenda onjila yaye yoku viala ya velapo vali. (Esit. 4:11) Pole, Eliapu lia yapuisa ovangelo lomanu oku sima okuti Suku ka kuete omoko yaco yoku viala. Kuenje eci ca sukilile oku ambata otembo yalua oco ku limbukiwe okuti Yehova eye o kuete omoko yoku viala kuenda uviali waye owo wa velapo. Suku wa lekisa olondunge poku ecelela okuti omanu va li viala ovo muẽle loku limbuka okuti uviali womunu ka wendi ciwa nda ovo ka va pokola Kululiki. (Yer. 10:23) Omo liepandi lia Suku, ovina viosi vi ka potoluiwa. Eye o ka kemãlisiwa poku lekisa okuti Usoma waye owo lika u ka nena ombembua yocili loku kolapo kulo kilu lieve.

7. Velie va sinĩla Yehova kuenda nye eye a ka linga lavo?

⁷ Esino lia vamue pokati komãla vaye. Yehova wa lulika ovangelo kuenda omanu okuti va lipua. Pole, ungelo Satana (o lomboloka “Unyali”) wa sinĩla Yehova kuenda wa vetiyavo Adama la Eva oku sinĩla Yehova. Ovangelo vakuavo kuenda omanu va likongelavo kesino liaco. (Yuda 6) Noke Suku wa nõla va Isareli oco va kale afendeli vaye, pole, ovo veya oku sinĩla Suku loku fendela olosuku viesanda. (Isa. 63:8, 10) Kuenje eci ca sumuisa calua Yehova. Pole, eye wa pandikisa kuenda o kasi oku amamako oku pandikisa toke eci a ka kundula olondingaĩvi viosi. Eci ci ka nena ekavuluko ku vana vakuekolelo okuti kumue la Yehova va kasi oku pandikisa kevĩho liovina vi sangiwa voluali lulo!

8-9. Ovohembi api a siata oku popiwa atiamẽla ku Yehova kuenda nye tu sukila oku linga?

⁸ Ovohembi Eliapu ana a siata. Satana wa lundila Yovi ufendeli wa Yehova, poku popia okuti afendeli vosi va Yehova va kasi oku vumba Suku omo liovina va kuete. (Yovi 1:8-11; 2:3-5) Eliapu li kasi oku amamako lalundi aco, toke koloneke vilo. (Esit. 12:10) Tu kuatisa koku lekisa okuti Satana ohembi eci tu pandikisa kovitangi kuenda poku amamako lekolelo ku Yehova omo liocisola tu U kuetele. Ndeci ca pita la Yovi, Yehova o ka tu sumũlũisavo omo liepandi lietu.—Tia. 5:11.

⁹ Satana o vetiya asongui vatavo esanda oco va popie okuti Yehova ongangala kuenda eye wa siata oku koka ohali komanu. Vamue va siata oku popia okuti, eci omõla umue a fa, Suku eye wo vilikiya momo o sukila vali angelo kilu. Eci ci sumuisa calua Suku! Pole, tua kũlĩha okuti Yehova Isia umue ukuacisola. Eci tu liyaka luvei umue, ale oku fisa umue tu  sole, etu lalimue eteke tu pembula Suku yetu. Pole, tu kolela okuti, eteke limue eye o ka malako ovovei kuenda o ka pindula vana va fa. Tu pondola oku sapuila ku vosi vana va yevelela okuti Yehova o Suku yimue ukuacisola. Eci ci ka ecelela oku eca etambululo ku una u sepula.—Olosap. 27:11.

10. Nye Osamo 22:23, 24, yi lombolola catiamẽla ku Yehova?

¹⁰ Ohali afendeli vaye va tala. Yehova o Suku yimue yohenda. Eye o sumua eci a mola ohali tu kasi oku tala ndeci, elambalalo, ovovei, ale ekambo lietu lioku lipua. (Tanga Osamo 22:23, 24.) Yehova wa kapako ohali yetu; eye o yongola oku yi malako kuenje o ka ci tẽlisa muẽle. (Sokisa Etundilo 3:7, 8; Isaya 63:9.) Ku iya eteke eci ‘eye a ka puenya asuẽlẽla osi vovaso [etu], oku fa ka ku ka kalako vali, ndaño oku lila loku liyula levalo ka vi ka kalako vali.’—Esit. 21:4.

11. Yehova o liyeva ndati catiamẽla kafendeli vaye vakuekolelo okuti vafa?

¹¹ Olofa viakamba vaye. Yehova o liyeva ndati catiamẽla kalume lakãi vakuekolelo okuti vafa? Eye o kuete ongeva yoku va mola! (Yovi 14:15) O sokolola ongeva Yehova a kuetele ekamba liaye Avirahama? (Tia. 2:23) Ale Mose una a vangula laye “polo la polo”? (Etu. 33:11) Kuenda sokolola onjongole a kuete yoku mola Daviti la va kualosamo vakuavo oku imba ovisungo viavo via fina viesivayo! (Osa. 104:33) Ndaño okuti akamba ava va Suku va pekela kotulo tuolofa, Yehova ka va ivalele. (Isa. 49:15) Eye ivaluka ovina vialua viatiamẽla kovituwa viavo. Embimbiliya li popia hati, “vocisimĩlo caye vosi va kasi lomuenyo.” (Luka 20:38, etosi.) Eteke limue, eye o ka va nena vali komuenyo kuenda o ka yeva vali olohutililo viavo loku tava efendelo liavo. Nda okuti wa fisa umue o sole olondaka evi vi pondola oku ku lembeleka.

12. Nye ci sumuisa calua Yehova koloneke vilo vĩvi via sulako?

 ¹² Omanu olondingaĩvi va siata oku kokela ohali ku vakuavo. Eci esino lia fetika Vedene, Yehova wa kũlĩhĩle okuti uvĩ wa laikele oku li vokiya calua. Yehova wa suvuka evĩho, ekambo liesunga kuenda ungangala u kasi voluali koloneke vilo. Eye olonjanja viosi o popela omanu vana ka va tẽla oku li teyuila, ndeci, olosiwe kuenda ovimbumba. (Sak. 7:9, 10) Yehova o sumua calua eci a mola afendeli vaye vakuekolelo oku nyikiwa kuenda oku kapiwa vokayike. Kolela okuti eye o sole vosi vana va pandikisila kumue laye.

13. Ndamupi Suku a liyeva oku mola evĩho lilingiwa pokati kapata omanu kuenda nye eye a ka linga?

¹³ Evĩho pokati kapata omanu. Satana o sole eci pokati komanu vana va lulikiwa lesetahãlo lia Suku, pa kala evĩho. Eci Suku a “mola okuti evĩho liomanu lia livokiya calua” koloneke via Noha “Yehova wa livela omo a lulika omanu kilu lieve kuenda co vala vutima.” (Efet. 6:5, 6, etosi 11) Anga hẽ muli ekalo liwa voluali? Sio ka muli! Eliapu li sanjuka calua eci li mola evĩho liukahonga oku livokiya pokati komanu ndeci, oku lipekela kuomanu vakuavimatamata via litepa kuenda vakuavimatamata vimuamue! (Va Efe. 4:18, 19) Satana o sanjuka calua eci a mola okuti vana va fendela Yehova va kupukila vekandu linene. Eci epandi lia Yehova li ka pitĩla kesulilo eye o ka lekisa okuti o nyãle evĩho liukahonga.

14. Nye omanu va kasi oku linga longongo kuenda ovinyama?

¹⁴ Oku nyõliwa kuoviluvo viaye. Omunu ka siatele lika oku ‘viala ukuavo oco o linge eci cĩvi,’ pole, eye o kasivo oku nyõla ongongo loku tata lãvi ovinyama vina Yehova a kundikile komunu oco a vi tate ciwa. (Uku. 8:9; Efet. 1:28) Olonoño vimue vi popia okuti, omo lieci omanu va siata oku linga kolombuto * vialua viovinyama, ovio vi pondola oku kunduka kovaso yanyamo. Ci leluka calua oku kuata elomboloko lieci omanu va sakalalela loku vihĩsiwa kuofela! Ci sanjuisa calua omo okuti Yehova wa likuminya okuti o ka “kundula vana va vĩhisa ilu lieve” kuenda oku pongolola ongongo oco yi linge ocumbo celau.—Esit. 11:18; Isa. 35:1.

15-16. Nye ci tu vetiya oku pandikisa ndeci Yehova? Tukula ocindekaise cimue

¹⁵ Sokolola kovitangi viosi vi sumuisa Isietu wokilu a siata oku pandikisa lavio vokuenda kuanyamo alua. (Tala okakasia losapi hati “ Kovina Yehova a Siata Oku Pandikisa.”) Yehova o pondola oku malako oluali lulo lũvi votembo eye a yongola. Pole, epandi liaye lia siata oku tu kuatisa calua! Tala ocindekaise eci. Sokolola, ulumue umue lukãi waye va va sapuila okuti oñaña yavo ka ya citiwile handi, yi kasi lovitangi vialua ketimba kuenda ka yi ka kuata uhayele, oyo yi ka fa selo. Pole, olonjali vi sanjuka eci oñaña yi citiwa, ndaño okuti ka ci leluka oku tata oñaña yaco. Ocisola va kuetele omõla, ci va kuatisa oku pandikisa kovitangi viosi loku linga cosi ci tava okuti vo tata.

 ¹⁶ Cimuamue haico okuti, ovitumbulukila viosi via Adama la Eva eci vi citiwa ka via lipuile. Pole, Yehova handi o va sole kuenda o va tata. (1 Yoa. 4:19) Ca litepa locindekaise colonjali via tukuiwa ndeti, Yehova o pondola oku malako ohali yosi yomãla vaye. Eye wa sokiya otembo a ka malako ohali yosi yi kasi pokati komanu. (Mat. 24:36) Ocisola caye ka ci tu vetiyavo hẽ oku pandikisa votembo yalua eci ci sukiliwa?

17. Momo lie ulandu wa Yesu u sangiwa ku Va Heveru 12:2, 3, u tu kuatisila oku amamako oku pandikisa?

¹⁷ Yehova eye ongangu ya velapo yoku pandikisa. Yesu wa setukulavo epandi lia Isiaye. Eci Yesu a kala palo posi, wa pandikisa kolombangulo viesepu, kosõi kuenda wa pandikisa kuti wekangiso, omo liakandu etu (Tanga Va Heveru 12:2, 3.) Epandi lia Yehova lia eca ongusu ku Yesu oco a pandikise. Eci ci tu pamisavo.

18. Ukanda 2 Petulu 3:9, u tu kuatisa oku kuata elomboloko lipi lieci Yehova a lekisila epandi?

¹⁸ Tanga 2 Petulu 3:9. Yehova wa kũlĩha otembo ya sunguluka yoku malako oluali lulo lũvi. Epandi liaye, lia siata oku ecelela okuti omanu valua vo kũlĩha kuenda owiñi wakahandangala u likongela koku u fendela. Valua pokati kavo va sanjuka omo lia Yehova oku pandikisa loku ecelela otembo okuti ovo va citiwa, va lilongisa oku u sola kuenda va litumbika kokuaye. Onjila Yehova a nõlapo yoku pandikisa yi ka limbukiwa vali enene eci eye lesanju lialua a ka tu sumũlũisa vosi yetu, omo lioku pandikisa toke kesulilo!

19. Nye tu sukila oku nõlapo oku linga kuenda onima yipi tu ka kuata?

¹⁹ Ku Yehova tua lilongisilako ndomo tu lekisa esanju poku pandikisa. Ndaño lovina vialua vi sumuisa kuenda ohali Satana a siata oku koka, Yehova amamako oku kala “Suku ukuesanju.” (1 Tim. 1:11) Etu tu pondolavo oku amamako lesanju osimbu tu talamẽla lepandi Yehova oku kemãlisa onduko yaye luviali waye, oku malako lũvi wosi kuenda oku malako lovitangi vietu viosi. Omo liaco, tu nõlipo oku amamako oku pandikisa kuenda tu lembelekiwa calua oku kũlĩha okuti Isietu wokilu o kasivo oku pandikisa. Nda tua ci linga, olondaka evi vi ka tẽlisiwa vokuetu viokuti: “Wa sumũlũha omunu una o pandikisa koseteko, momo eci a yula oseteko, o ka tambula ekolowa liomuenyo, lina Yehova a likuminya ku vana vamamako oku U sola”—Tia. 1:12.