1. Nye Soma Salomone a tu longisa ndomo ci sangiwa kelivulu Liukundi 7:20?

 SOMA Salomone wa soneha hati: “Ka kuli omunu laumue ukuesunga kilu lieve okuti, o linga ovina viwa otembo yosi kuenje lalimue eteke a linga ekandu.” (Uku 7:20) Olondaka evi viocili! Vosi tuakuakandu. (1Yo 1:8) Omo liaco, vosi tu sukila ongecelo yi tunda ku Suku kuenda komanu.

2. O liyeva ndati nda ekamba limue lia ku ecela?

² Ocili okuti pamue ivaluka otembo wa lueyela ekamba liove. Ove o yongola oku lisunguluisa lekamba liove kuenje upinga ongecelo luitma wosi. O liyeva ndati eci ekamba liove liuku ecela lutima wosi? O liyeva hẽ ciwa? Ocili o liyeva ciwa kuenda o sanjuka calua!

3. Nye tu konomuisa vocipama cilo?

³ Etu tu yongola okuti Yehova o kala Ekamba lietu, pole, olonjanja vimue tu popia ale tu linga ovina vimue viusumuisa. Momo lie tu kolelela okuti Yehova o yongola oku tu ecela? Etepiso lipi li kasi konjila ya Yehova yoku ecela umue, lonjila yetu yoku ecela? Kuenda helie Suku a ecela?

4. Momo lie tu kolelela okuti Yehova olonjanja viosi wa likapelako oku ecela?

⁴ Ondaka ya Suku yi tu sapuila okuti, Yehova olonjanja viosi wa likapelako oku ecela. Eci Yehova a li sutulula  ku Mose Komunda Sinai, eye wa vanguila pocakati cungelo umue hati: “Yehova, Yehova, Suku umue ukuahenda, ukuacikembe, o livala konyeño kuenda ukuacisola calua haico ka ci pongoloka, haeye ukuacili, o lekisa ocisola ka ci pongoloka kolohulukãi, ecela okulueya, levĩho kuenda ekandu.” (Etu 34:6, 7) Yehova ukuacikembe kuenda Suku umue ukuahenda okuti, olonjanja viosi wa likapelako oku ecela vana va likekembela.—Neh 9:17; Os 86:15.

5. Ndomo ca tangiwa Kosamo 103:13, 14, nye Yehova a linga omo lioku kũlĩha ekalo liomanu?

⁵ Omo okuti Yehova eye ululiki wetu, wa kũlĩha ovina viosi viatiamẽla kokuetu. Ci sokolola handi! Eye wa kũlĩha ekalo liomanu vosi va kasi kulo kilu lieve. (Os 139:15-17) Kuenje eye o pondola oku mola akulueya osi tua piñala kolonjali vietu. Handi vali, eye wa kũlĩha ovina viosi via pongolola ekalo liomuenyo wetu. Nye Yehova a linga omo lioku kũlĩha ciwa ekalo lietu? Eci co vetiya oku lekisa ohenda kokuetu.—Os 78:39; Tanga Olosamo 103:13, 14.

6. Yehova wa siata oku lekisa ndati okuti wa likapelako oku ecela?

⁶ Yehova wa siata oku lekisa okuti wa likapelako oku ecela. Eye wa kũlĩha okuti, omo liovilinga viulume watete Adama, vosi yetu tuakuakandu kuenda tu fa. (Rom 5:12) Ka kuakaile onjila layimue yoku li yovola etu muẽle, ale omunu ukuavo oco a tu yovole kekandu kuenda kolofa. (Os 49:7-9) Kuenje Suku yetu ukuacisola, wa lekisa ohenda kuenda wa linga cimue oco a tu yovole. Nye a linga? Ndomo ci lekisiwa ku Yoano 3:16, Yehova wa tuma Omõlaye wongunga oco a tu file. (Mat 20:28; Rom 5:19) Yesu wa tu fila, oco okuti wosi una o kolela kokuaye o yovuiwa. (Hev 2:9) Yehova wa sumuile calua oku mola Omõlaye oku fa lonjila yimue yesepu! Ocili okuti, Yehova nda ka ecelele Omõlaye oku fa nda Eye ka yonguile oku tu ecela.

7. Ovolandu api omanu va tukuiwa Vembimbiliya okuti va eceliwa la Yehova lutima wosi?

⁷ Vembimbiliya, mueyuka ovolandu omanu vana Yehova a ecela lutima wosi. (Efs 4:32) Helie o kasi oku sokola? Citava okuti, o kasi oku sokolola Kusoma Manase. Ulume  waco ondigaĩvi, wa enda oku lueyela Yehova lonjila yimue ĩvi calua. Eye wa enda oku fendela olosuku viesanda loku vetiya omanu vakuavo oku linga cimuamue. Eye wa ponda omãla vaye muẽle loku va eca ndocilumba kolosuku viesanda. Wa pitĩla petosi lioku tunga ociñumañuma cosuku yesanda vonembele yikola ya Yehova. Catiamẽla kokuaye Embimbiliya hati: “Eye wa linga ovina vialua vĩvi kovaso a Yehova oco a wengule onyeño yaye.” (2As 33:2-7) Kuenje eci Manase a likekembela lutima wosi, Yehova wo wecela. Suku wa ecelela okuti eye o kala vali osoma. (2As 33:12, 13) Citava okuti o sokololavo ku Soma Daviti, una wa lingila akandu anene Yehova, oku kongelamo ukahokolo kuenda umondi. Eci Daviti a litavela kakandu a linga, wa likekembela lutima wosi kuenje Yehova wo ecela. (2Sa 12:9, 10, 13, 14) Ocili, tu koleli okuti Yehova wa likapelako oku ecela. Ndomo tu ci konomuisa, onjila ya Yehova yoku ecela, ya li tepa calua leyi yomanu.

8. Ndamupi onjila ya Yehova yoku kala Onganji, yi li kuata ciwa locituwa caye coku ecela?

⁸ Yehova eye “Onganji yongongo yosi.” (Eft 18:25) Onganji yimue yiwa yi sukila oku kũlĩha ciwa ovihandeleko. Eci ci li kuata ciwa la Yehova momo eye Hanganji yetuko lika, pole, Usovolivo Wovihandeleko. (Isa 33:22) Handi vali, Yehova eye wa velapo poku kũlĩha eci ciwa leci cĩvi. Nye vali onganji yiwa yi sukila oku linga? Yi sukila oku kũlĩha ovina viosi via kongela vocitangi cimue, osimbu ka ya nõlele onjila yimue. Eci ci lekisa okuti Yehova eye lika o pondola oku kala Onganji ya velapo.

9. Olonumbi vipi Yehova a kuama nda eye ecela omunu umue ale sio?

⁹ Ca litepa lolonganji viomanu ceci okuti, Yehova wa kũlĩha cosi ca kongela vocitangi cimue. (Eft 18:20, 21; Os 90:8) Yehova ka kuama eci omanu va mola, ale ceci va yeva. Eye wa kũlĩha ciwa ndomo ovilinga viomunu umue vi yapuisiwa, omo liovilinga apiñala kolonjali viaye, epindiso atambula, ekalo lio posongo a kasi kuenda uhayele waye. Yehova wa kũlĩhavo cosi ci kasi vutima womunu. Eye wa kũlĩha ciwa ovisimĩlo kuenda olonjongole viomunu lomunu. Ka kuli lacimue ca salamisua kovaso a Yehova. (Hev 4:13) Ocili okuti, Yehova eci a ecela omunu umue, o ci linga omo wa kũlĩha ovina viosi via kongela vocitangi caco.

10. Momo lie tu popela okuti olonjanja viosi asombiso a Yehova esunga? (Esinumuĩlo 32:4)

¹⁰ Olonjanja viosi asombiso a Yehova esunga. Eye ka kuete ocame. Yehova lalimue eteke a ecela omunu umue omo okuti uwa, ohuasi, wa velapo, ale o kuete ovoloño alua. (1Sa 16:7; Tia 2:1-4) Lomue o pondola oku kisika Yehova, ale oku eca ovitukiko oco a linge cimue. (2As 19:7) Eye lalimue eteke a nõla onjila yimue omo liesakalo, ale ohenda. (Etu 34:7) Yehova eye onganji ya velapo omo okuti wa kũlĩha ovina viosi viatiamẽla kokuetu kuenda ekalo lietu.—Tanga Esinumuĩlo 32:4.

11. Onjila ya Yehova yoku ecela ya li tepa ndati leyi yomanu?

¹¹ Asonehi vovisonehua vio Heveru, va limbuka okuti, onjila ya Yehova yoku ecela ya li tepa. Olonjanja vimue, ovo va kuama olondaka vio Heveru, elivulu limue li popia hati, “olondaka viaco vi kuamiwa lika konjila ndomo Suku a ecela vakuakandu, pole, olondaka viaco ka vi lekisa ongave omunu a  kuama yoku liecela omunu lukuavo.” Yehova eye lika o kuete unene woku ecela omunu umue o likekembela lutima wosi. Eci Yehova a tu ecela onima yipi tu kuata?

12-13. (a) Ekalo lipi omunu a kuata eci a eceliwa la Yehova? (b) Ekuatiso liongecelo li tunda ku Yehova li kala otembo yiñami?

¹² Eci tu tava okuti Yehova wa tu ecela, tu kuata “oloneke viekavuluko,” oku kongelamo ombembua yovutima kuenda owanji wutima wayela. Ongecelo yaco ka yi tundi komunu pole, yi “tunda ku Yehova.” (Ovl 3:19) Eci Yehova a tu ecela eye o tumbulula ukamba waye letu, loku ecelela okuti tu kala vali akamba vaye ndeci ca kala kosimbu eci handi ka tua lueyele.

¹³ Yehova noke lioku tu ecela, lalimue eteke a tu kangisa, ale oku tu yambula omo liekandu tua lingile. (Isa 43:25; Yer 31:34) Yehova o kapa akandu etu “ndeci utundilo u kasi ocipãla lutakelo.” * (Os 103:12) Eci tu sokolola kongecelo ya Yehova, ci tu sanjuisa kuenda ci tu komõhisa calua. (Os 130:4) Pole, helie Yehova a pondola oku ecela?

14. Nye tua siata oku lilongisa kesunga lieci Yehova a lekisila ongecelo komunu umue?

¹⁴ Ndomo tua siata oku ci konomuisa, ongecelo ya Yehova ka ya tambele nda ekandu linene, ale litito. Tua siatavo oku lilongisa okuti, Yehova o talavaya lolondunge viaye, omo okuti Ululiki wetu, Usovoli Wovihandeleko kuenda Onganji eci eye a nõlapo nda ecela omunu umue. Pole, ovina vipi Yehova a sokolola tete osimbu ka nõlelepo oku ecela?

15. Ndomo ca tangiwa ku Luka 12:47, 48, ovina vipi Yehova a kũlĩhĩsa?

¹⁵ Ocina cimue Yehova a kũlĩhĩsa ceci okuti, nda omunu wa lueya wa limbuka okuti eci a linga ekandu. Yesu wa cilombolola ciwa ndomo ci sangiwa ku Luka 12:47, 48. (Tanga.) Eci omunu umue a sokiya lioku linga cimue okuti ka ci sanjuisa Yehova, kuenda wa kũlĩha okuti cĩvi kuenje o ci linga, eye o linga ekandu linene. Omunu waco o kala kohele okuti ka pondola oku eceliwa. (Mar 3:29; Yoa 9:41) Etu olonjanja vimue tu  sukila oku limbuka okuti eci tua linga cĩvi. Kocitangi eci, kuli hẽ elavoko lioku eceliwa? Ocili okuti kuli! Eci ci tu ambata kesunga likuavo Yehova a kũlĩhĩsa.

16. Nye ci lomboloka oku likekembela kuenda momo lie ci kuetele esilivilo nda tu yongola oku eceliwa la Yehova?

¹⁶ Esunga likuavo Yehova a kũlĩhĩsa lieli, nda omunu wa linga ekandu wa likekembela lutima wosi. Nye ci lomboloka oku likekembela? Oku likekembela ci lomboloka “oku pongolola ovisimĩlo, ovilinga kuenda onjongole.” Mua kongelavo ocisimĩlo cokuti omunu umue wa likekembela, o yeva esumuo lialua kocina cĩvi a linga, ale o livela omo ka lingile ocina a sukilile oku linga. Omunu wa likekembela o sumua, ka sumuila lika omo lieci cĩvi a linga, pole, o sumuavo omo lioku ecelela okuti ukamba waye la Yehova uhongua toke petosi lioku linga ekandu. Ivaluka okuti Soma Manase kuenda Soma Daviti, va lingile akandu anene, pole, Yehova wa va ecela momo va likekembela lutima wosi. (1Ol 14:8) Ocili okuti Yehova o tu ecela nda wa limbuka okuti tua likekembela. Pole, oku pinga lika ongecelo omo liekandu tua linga, ka ci tẽla. Tu sukila oku likolisilako oku ci lekisa kovilinga. * Eci ci tuambata kesunga likuavo Yehova a kũlĩhĩsa.

17. Nye ci lomboloka oku pongoloka kuenda momo lie ci kuetele esilivilo nda tu yongola oku yuvula akandu okosimbu? (Isaya 55:7)

¹⁷ Apongoloko ocina cikuavo ci kuete esilivilo Yehova a kũlĩhĩsa. Oku linga apongoloko ci lomboloka “oku siapo.” Volondaka vikuavo ci lomboloka oku siapo ovina vĩvi kuenda oku ambata omuenyo Yehova a yonguila kafendeli vaye. (Tanga Isaya 55:7.) Omunu o sukila oku pongolola ovisimĩlo viaye oco a songuiwe lovisimĩlo via Yehova. (Rom 12:2; Efs 4:23) Eye o sukila oku nõlapo oku yuvula ovisimĩlo viaye vĩvi kuenda ovilinga. (Kol 3:7-10) Ocili okuti, ekolelo lietu kocilumba ca Kristu, olio ono ya Yehova yoku tu ecela kuenda oku tu yelisa kekandu. Yehova o lekisa esilivilo liocilumba caco, Eci a limbuka okuti tu kasi oku likolisilako  oku linga apongoloko kovituwa vietu.—1Yo 1:7.

18. Nye tua konomuisa catiamẽla kongecelo ya Yehova?

¹⁸ Tu pitululi atosi amue a velapo tua konomuisa. Yehova eye wa velapo koku Ecela voluali luosi. Momo lie tu ci popela? Tete, eye olonjanja viosi wa li kapelako oku ecela. Vali, eye wa kũlĩha ovina viosi viatiamẽla kokuetu. Omo okuti, wa kũlĩha ciwa ekalo lietu, eye omunu wa velapo o tẽla oku limbuka nda tua likekembela lutima wosi. Kuenda tatu, eci Yehova a tu ecela, ci kala ndu okuti ka tua lalinga ekandu. Eci ci tu ecelela oku kuata owanji wutima wayela kuenda oku sanga ohenda yaye.

19. Ndaño okuti ka tua li puile kuenda tu amamako oku linga ekandu, momo lie tu kuatela esanju?

¹⁹ Osimbu ka tua li puile, tu ka amamako oku linga ekandu. Pole, tu pondola oku sanda elembeleko, volondaka vi sangiwa velivulu Estudo Perspicaz das Escrituras, volume 1 kemẽla 209, ku popia hati: “Omo okuti Yehova wa kapako oku hongua kuafendeli vaye, ovo ka va sukila oku li vetela evelo otembo yosi omo liakulueya a tunda kekandu va piñala. (Os 103:8-14; 130:3) Nda ovo va amamako oku endela volonjila via Suku, va pondola oku kuata esanju. (Flp 4:4-6; 1Yo 3:19-22).” Eci ci lembeleka calua!

20. Nye tu ka konomuisa vocipama ci kuãimo?

²⁰ Tu sanjuka calua omo okuti Yehova wa likapelako oku tu ecela eci tu likekembela kakandu osi tu linga. Omo liaco, tu setukula ndati ongecelo ya Yehova? Volonjila vipi okuti ongecelo yetu yimuamue leyi ya Yehova, pole, ya li tepa volonjila vipi? Momo lie ci kuetele esilivilo oku kũlĩha etepiso liaco? Vocipama ci kuãimo tu ka tambulula apulilo a-a.