SOKOLOLA eteke liesanju lialua komuenyo wove. Anga hẽ, eteke wa kuela ale eteke omõlove uveli a citiwa? Ale eteke wa papatisiwa? Ocili okuti, eteke liaco lia kala eteke liavelapo kuenda liesanju komuenyo wove. Keteke liaco, citava okuti vamanji va yeva esanju lialua, poku limbuka okuti o sole Suku lutima wove wosi, lomuenyo wove wosi, lolondunge viove viosi, kuenda longusu yove yosi!—Marko 12:30.

Citava okuti tunde eci wa papatisiwa wa linga ovina vialua via ku nenela esanju koku vumba Yehova. Pole, akundi valua ka va kuete vali esanju ndeli va kuatele. Momo lie? Esunga lipi tu kuete lioku amamako oku vumba Yehova lesanju?

Esapulo Liusoma li tu nenela esanju lialua. Momo lie? Momo Yehova wa likuminya okuti ndopo Usoma waye, u ka kundula oluali lulo lũvi, kuenda u ka nena oluali luokaliye. Kelivulu lia Sofoniya 1:14 ku popia hati: “Eteke linene lia Yehova li li ocipepi; li li ocipepi muẽle, lia yayulako!” Pole, nda tu kuete ovisimĩlo viokuti tu kasi oku talamẽla calua, esanju lietu li tepuluka. Eci ci pondolavo oku tepulula ombili tua kuatele kupange wa Suku.—Olosapo 13:12.

Eci tu kala kumue lavamanji ci tu pamisa oco tu amameko oku vumba Yehova lesanju. Ovituwa viwa via fendeli va Yehova via tu vetiya oku iya kefendelo liocili, kuenda lia tu kuatisa oku u vumba lesanju. (1 Petulu 2:12) Pole, nye ci pita nda manji umue wa lunguiwile omo ka pokuile kovihandeleko via Suku? Citava okuti ci sumuisa vamue vekongelo kuenda va tepulula esanju liavo.

Oku sandiliya enene ovokuasi ci pondolavo oku tepulula esanju lietu. Ndamupi? Oluali lua Satana lu tu vetiya oku landa ovina ka tu sukila. Tu sukila oku ivaluka olondaka via Yesu viokuti: “Lomue o tẽla oku vumba vacime vavali; pamue o suvuka umue kuenda o sola ukuavo, ale o kakatela umue kuenje o pembula ukuavo. Ka vu tẽla oku vumba Suku kuenda Ovokuasi.” (Mateo 6:24) Ka tu pondola oku vumba Yehova lesanju, osimbu tu kasi oku sanda oku kuata ovina viosi violuali lulo.

Komanu vana va sole Yehova oku u vumba hacilemoko. (1 Yoano 5:3) Ivaluka olondaka Yesu a popia viokuti: “Enjui kokuange, ene vosi wa kavi haene vu kuete ovilemo kuenje ndu kavuluisi. Tambuli okanga yange kuenda lilongisili kokuange, momo ame ndomboka haime ndonjuka vutima kuenje vu sanga ekavuluko kovimuenyo viene. Okanga yange ya sunguluka  kuenda ocitele cange ca lela.” (Mateo 11:28-30) Oku kala Ukristão wocili ci kavuluisa kuenda ci nena esanju. Ocili okuti tu kuete esunga lioku kuata esanju kupange wa Yehova. Cilo, tu konomuisi atatu pokati kasunga aco.—Havakuki 3:18.

Etu tu vumba Suku yetu Ukuamuenyo, haiye ukuesanju. (Ovilinga 17:28; 1 Timoteo 1:11) Tua kũlĩha okuti omuenyo wetu watiamẽla Kululiki wetu. Tu amamiko oku u vumba lesanju, ndaño okuti tunde eci tua papatisiwa pa pita ale anyamo alua.

Konomuisa ulandu wa Héctor, okuti wa vumba Yehova kupange woku nyula akongelo vokuenda kueci ci soka 40 kanyamo. Ndaño okuti “wa kuka ale,” toke cilo handi o yevite esanju lioku vumba Yehova. (Osamo 92:12-14) Oku vela kukãi waye kua tepulula otembo a enda oku pesila kupange wa Suku, pole, esanju lia Héctor ka lia trepulukile. Eye wa popia hati: “Ndaño okuti ndi sumua poku mõla okuti uveyi wukãi wange u kasi oku li vokiya, kuenda ka ca lelukile oku u tata, pole, si ecelela okuti ci tepulula esanju liange lioku vumba Suku yocili. Oku kũlĩha okuti omuenyo wange watiamẽla ku Yehova una wa lulika omunu locimãho cimue, ci ndi vetiya oku u sola kuenda oku u vumba lutima wosi. Ndi likolisilako oku lekisa ombili kupange woku kunda loku amamako oku sokolola elavoko Liusoma, oco esanju liange ka li ka tepuluke.”

Yehova wa eca ocilumba cocisembi, okuti tu kuata esanju komuenyo. “Omo Suku a sola calua oluali, wa eca Omõlaye wongunga, okuti wosi o kolela kokuaye ka nyõliwa, o kuata omuenyo ko pui.” (Yoano 3:16) Akandu etu a eceliwa kuenda tu pondola oku kuata omuenyo ko pui, nda tua kolela kombanjaile ya Suku yocisola okuti, ocisembi. Eli esunga limue liwa lioku eca olopandu! Olopandu tu lekisa kocisembi vi tu vetiya oku vumba Yehova lesanju.

Manji umue o tukuiwa hati, Jesús wa kala kofeka yo Mesiku wa popele hati: “Ame nda kala upika wupange wange, momo nda kuatele ovitumãlo vitãlo viupange, ndaño ka ca kisikiwile. Nda ci lingila oco kofeto yange ku vokiyiwe. Noke, nda lilongisa eci catiamẽla ku Yehova kuenda ndomo eye a eca Omõlaye wa soliwa oco a yovole omanu. Nda kuata onjongole yalua yoku u vumba. Kuenje, nda li tumbika ku Yehova kuenda nda siapo upange una nda talavaya vokuenda kueci ci soka 28 kanyamo, noke, nda litumbika kupange wakundi votembo yosi.” Ndi kuete esanju lialua lioku vumba Suku vokuenda kuanyamo aco.” Ci kasi ndu okuti Jesús tunde eci a fetika oku vumba Yehova toke cilo o kuete esanju.

Omo tua liyelisa kovituwa kuenje ci tu nenela esanju. Ivaluka hẽ, ndomo omuenyo wove wa kala osimbu kua kũlĩhĩle Yehova? Upostolo Paulu wa ivaluisa Akristão va kala ko Roma okuti,  ovo va kala “apika vekandu,” pole, noke va linga “apika vesunga.” Omo okuti va liyelisile kovituwa, va kuata elavoko liomuenyo ko pui. (Va Roma 6:17-22) Etu tu pokolavo kolonumbi via Suku kuenda tu liteyuila kesumuo li tunda koku lekisa ovituwa ka via sungulukile kuenda omuenyo umue wungangala. Ovina viaco vi eca esanju lialua!

Kũlĩhĩsa ulandu wa Jaime. Eye ka tavele okuti kuli Suku, kuenda okuti ovina via lulikiwa, kuenda wa kala ukuakuyaka o boxe. Eci Jaime a fetika oku enda enda kolohongele Viakristão, wa vetiyiwa locisola a sangako. Oco a siepo ovituwa a kuatele kosimbu, Jaime wa pinga ku Yehova oco o kuatise oku tava Kokuaye. Jaime wa popia hati: “Vokuenda kuotembo nda limbuka okuti kuli Isia umue ukuacisola okuti, Suku ukuahenda. Oku pokola kolonumbi via Yehova viesunga, ca siata oku ndi teyuila. Nda sia lingile apongoloko komuenyo, cilo nda nda fa ale, ndeci akamba vange vakuakuyaka o boxe. Otembo yesanju komuenyo wange, anyamo ñasi oku vumba Yehova.”

Nye tu yeva vutima osimbu tu lavoka oku nyoliwa kuoluali lulo lua vĩha? Ivaluka okuti, tu kasi oku linga ocipango ca Suku kuenda tu lavoka oku kuata omuenyo ko pui. “Puãi ka tu ka liwekipo oku linga eci ciwa, omo tu ungula votembo ya sokiyiwa nda ka tua konyõhele.” (Va Galatia 6:8, 9) Lekuatiso lia Yehova tu pandikisi, tu likolisiliko oku kuata ovituwa tu sukila oco tu popeliwe vokuenda ‘kuohali ya piãla,’ kuenda oku amamako oku vumba Yehova lesanju.—Esituluilo 7:9, 13, 14; Tiago 1:2-4.

Tu koleli okuti Yehova o ka tu sumũlũisa omo liepandi lietu, momo eye wa kũlĩha upange tua siata oku u lingila locisola tu u kuetele kuenda tu kuetele onduko yaye. Nda tu amamako oku vumba Yehova lesanju, tu ka linga ndeci ukualosamo Daviti a popia hati: “Oloneke viosi ñapa ñapa Yehova kovaso ange. Omo eye o kasi kondio yange si sengiwa. Oco utima wange wa yolela, espiritu liange lia sangatela. Etimba liange laliovo li tumãla ño loku koka.”—Osamo 16:8, 9.