1, 2. (a) Tua kũlĩha ndati okuti omanu va pondola oku kuata ukamba la Suku? (b) Nye tu konomuisa vocipama cilo?

TUNDE koku citiwa toke koku fa tu sukila ocisola. Omanu ka va sukila lika ocisola ci tuala volohuela, pole, va sukilavo ocisola cukamba ukuavo. Pole, pokati kocisola cosi tu pondola oku kuata, ca velapo ocisola ci tunda ku Yehova. Valua ka va tava okuti omanu va pondola oku kuata ukamba wocili haiwo wocisola la Suku, omo eye ka letiwe kuenda wavelapo. Pole, etu tua kũlĩha ocili catiamẽla kondaka yaco!

² Lekuatiso Liembimbiliya tua kũlĩha okuti omanu vamue va kala akamba va Suku. Tu sukila oku lilongisila kovolandu omanu vaco. Momo lie? Momo oku kuata ukamba la Suku, oco ocimãho cavelapo tu pondola oku kuata komuenyo. Tu kũlĩhĩsi ulandu wa Avirahama. (Tanga Tiago 2:23.) Eye wa  kuata ndati ukamba la Suku? Avirahama wa kuatele ukamba la Suku omo liekolelo, omo liaco, eye wa kũlĩhiwa okuti “isia ya vosi va kuete ekolelo.” (Va Roma 4:11) Osimbu o konomuisa ulandu waye, o sukila oku lipula ndoco: ‘Ndi setukula ndati ekolelo lia Avirahama loku pamisa ukamba wange la Yehova?’

3, 4. (a) Lombolola eci ca pita la Avirahama okuti ca seteka ekolelo liaye. (b) Momo lie Avirahama a tavela oku lumba Isake?

³ Sokolola Avirahama leci ci panda 125 kanyamo, oku enda levando oku lamanela komunda yimue. ^[1] (Tala etosi kesulilo liocipama cilo.) Omõlaye Isake okuti otembo yaco o kuete 25 kanyamo wa kala oku u kuama konyima. Isake wa ambata olohui, kuenda Avirahama wa ambata omoko lovina vikuavo vi sukiliwa vioku mĩha ondalu. Citava okuti, ungende waco wa kala ungende umue ka wa lelukile komuenyo wa Avirahama. Pole, ungende waco ka wa tĩlile omo lioku kuka. Eye handi wa kuatele ongusu yalua. Ungende waco wa tĩlile kokuaye omo okuti Yehova wo pinga oku lumba omõlaye!—Efetikilo 22:1-8.

⁴ Citava okuti, ya kala oseteko yinene yekolelo lia Avirahama. Omanu vamue va popia okuti Suku wa lekisa ungangala poku pinga okuti Avirahama o lumba omõlaye. Omanu vakuavo va popia vati, Avirahama wa tava oku ci linga omo okuti ka solele omõlaye. Omanu va popia ndoco, omo okuti ka va kuete ekolelo ale ka va kũlĩhĩle eci ci lomboloka ekolelo liocili. (1 Va Korindo 2:14-16) Pole, Avirahama wa kũlĩhĩle esunga lieci a sukililile oku pokola ku Suku. Eye wa pokola ku Suku momo wa kuatele ekolelo liocili. Wa kũlĩhĩle okuti Yehova lalimue eteke o pinga oku linga cimue okuti cu nenela evalo ka li pui. Avirahama wa kũlĩhĩlevo okuti nda wa pokola, Yehova u sumũlũisa, kuenda o sumũlũisavo omõlaye. Nye Avirahama a sukilile oku linga oco a kuate ekolelo lia pama? Wa sukilile oku kuata ukũlĩhĩso loku pita lovolandu amue.

5. Avirahama wa lilongisa ndati catiamẽla ku Yehova, kuenda ukũlĩhĩso waco wo vetiya oku linga nye?

⁵ Ukũlĩhiso. Avirahama wa kulila volupale lumue  lu tukuiwa hati Uri. Omanu volupale luaco oku kongelamo isia yaye, va enda oku fendela olosuku viesanda. (Yehosua 24:2) Oco hẽ, Avirahama wa lilongisa ndati catiamẽla ku Yehova? Embimbiliya li lekisa okuti omõla a Noha o tukuwa hati Semi, wa kala ukuepata lia Avirahama. Avirahama wa kala laye ci soka 150 kanyamo. Semi wa kala ulume umue wa kuata ekolelo lia pama kuenda citava okuti eye wa enda oku sapuila vakuepata liaye ovina viatiamẽla ku Yehova. Ka tua kũlĩhĩle ciwa ulandu waco, pole citava okuti Avirahama oco a lilongisa catiamẽla ku Yehova. Ovina Avirahama a lilongisa vio vetiya oku sola Yehova, kuenda ukũlĩhĩso waco wo kuatisa oku pamisa ekolelo liaye.

6, 7. Ovolandu Avirahama a pita la-o a pamisa ndati ekolelo liaye?

⁶ Ulandu. Ulandu Avirahama a pita lawo wa pamisa ndati ukamba waye la Yehova? Omanu vamue va popia okuti ovisimĩlo omunu a kuete vi pondola oku u vetiya oku linga cimue. Avirahama wa vetiyiwa lovina a lilongisa viatiamẽla ku Suku, kuenje ovina viaco vio vetiyavo oku lekisa esumbilo ku “Yehova Suku Fũ, Usovoli wilu losi.” (Efetikilo 14:22) Embimbiliya li tukula ocituwa caco hati oku “sumbila Suku.” (Va Heveru 5:7) Oco tu kuate ukamba wocili la Suku, tu sukila oku lekisa esumbilo kokuaye. (Osamo 25:14) Ocituwa caco, oco ca vetiya Avirahama oku pokola ku Yehova.

⁷ Suku wa sapuila Avirahama la Sara oco va sie onjo yavo ko Uri, oku ilukila kofeka yimue ka va kũlĩhĩle. Kotembo yaco ndaño okuti va kukile ale, pole veya oku kala volombalaka vokuenda kuomuenyo wavo wosi. Ndaño okuti Avirahama wa kũlĩhĩle ovitangi a laikele oku pita lavio, pole eye wa nõlelepo oku pokola ku Yehova. Omo liepokolo liaye, Suku wo sumũlũisa kuenda wo teyuila. Eci Sara ukãi wa posoka calua wa Avirahama vo tambula, kuenda Avirahama wa kala kohele yoku pondiwa, Yehova olonjanja vialua wa linga ocikomo coku teyuila Avirahama la Sara. (Efetikilo 12:10-20; 20:2-7, 10-12, 17, 18) Ovolandu aco a pamisa ekolelo lia Avirahama.

8. Tu kuata ndati ukũlĩhĩso kuenda elomboloko oco tu pamise ukamba wetu la Yehova?

⁸ Anga hẽ citava oku kuata ukamba wocili la Yehova? Ocili okuti citava! Ndeci ca linga Avirahama, tu sukila oku lilongisa catiamẽla ku Yehova. Tu sukilavo oku kuata ukũlĩhĩso loku pita lovolandu. Koloneke vilo, tu kuete ovina vialua okuti Avirahama ci sule.  (Daniele 12:4; Va Roma 11:33) Vembimbiliya mu sangiwa ukũlĩhĩso walua watiamẽla ‘Kusovoli wilu losi.’ Ovina tu lilongisa, vi tu vetiya oku sola Yehova kuenda ci tu kuatisa oku u kuatela esumbilo lia lua. Ocisola kuenda esumbilo tu kuetele Suku vi tu vetiya oku pokola kokuaye. Poku ci linga, tu limbuka ndomo Suku a tu teyuila loku tu sumũlũisa, kuenje tu kuata ovolandu a pamisa ekolelo lietu. Eci tu vumba Yehova lutima wosi, tu kuata esanju, ombembua kuenda esumũlũho. (Osamo 34:8; Olosapo 10:22) Osimbu ukũlĩhĩso kuenda ovolandu etu a livokiya tu pamisa ukamba wetu laye.

9, 10. (a) Nye ci sukiliwa oco ukamba umue u pamisiwe? (b) Nye ci lekisa okuti Avirahama wa velisilepo ukamba waye la Yehova kuenda wa u pamisa?

⁹ Oku kuata ukamba wocili ci sokisiwa lukuasi umue u kuete esilivilo lialua okuti tu sukila oku u lava ciwa. (Tanga Olosapo 17:17.) Ukamba waco ka u sokisiwa locikuata cimue ca tĩla coku kapa olonelẽho, locimãho coku finisa lika. Pole, u sokisiwa lonelẽho ya posoka yi sukila ovava loku yi tata ciwa oco yi telẽhe. Avirahama wa velisilepo ukamba waye la Yehova kuenda wa u lava ciwa. Wa ci linga ndati?

¹⁰ Avirahama wa amamako oku sumbila Suku kuenda oku pokola kokuaye. Eci a kala oku linga ungende oku enda ko Kanana kumue lepata liaye kuenda apika vaye, handi wa amamako oku ecelela okuti Yehova u songuila oku nõla ovina a sukilile oku linga, ci kale vitito ale vinene. Eci Avirahama a kala la 99 kanyamo okuti, pa kambele unyamo oco Isake a citiwe, Yehova wo sapuila oco a sevise evamba kalume vosi va kala vonjo yaye. Anga hẽ Avirahama wa likala Yehova loku li sandela esunga oco ka ka linge ovina eye o pinga? Sio, eye wa kolelele Yehova kuenda wa pokola, loku ci linga muẽle “eteke liaco.”—Efetikilo 17:10-14, 23.

11. Momo lie Avirahama a lekisila esakalalo lolupale luo Sodoma lo Gomora, kuenda Yehova wo kuatisa ndati?

¹¹ Omo okuti Avirahama olonjanja viosi wa pokuile ku Yehova ndaño muẽle kovina vitito, ukamba wavo weya oku li vokiya calua. Eye wa limbuka okuti citava oku sapela la Yehova catiamẽla kovina viosi, ndaño muẽle oku u pinga ekuatiso kapulilo amue ka a lelukile eye a kuatele. Eci Yehova o sapuila okuti o ka nyõla alupale o Sodoma lo Gomora, Avirahama wa sakalalele calua. Momo lie? Eye wa kuata usumba wokuti, olondingesunga vi fila kumosi lolondingaĩvi. Citava okuti wa sakalalele la cimumba caye Lote kumue lepata liaye omo okuti va kala ko Sodoma. Avirahama wa kolelele Yehova “Onganji yoluali luosi,” kuenje lumbombe, wa sapela la Yehova catiamẽla kueci co sakalaisa. Yehova wa lekisa epandi kekamba liaye kuenje Wo kuatela ohenda. Yehova wo lomboluila okuti, poku nena esombiso, eye o sanda vakuesunga kuenje o va popela.—Efetikilo 18:22-33.

12, 13. (a) Ukũlĩhĩso kuenda elomboloko Avirahama a kuata vio kuatisa ndati? (b) Nye ci lekisa okuti Avirahama wa lekisile ekolelo ku Yehova?

 ¹² Ocili okuti ukũlĩhĩso kuenda elomboloko Avirahama a kuata, vio kuatisa oku amamako oku pamisa ukamba a kuatele la Yehova. Noke, eci Yehova a pinga ku Avirahama oco a lumbe omõlaye, eye wa kũlĩhĩle okuti olonjanja viosi Yehova wa lekisa kokuaye epandi, ohenda, ekolelo kuenda wo teyuila. Avirahama wa kũlĩhĩle okuti, Yehova lalimue eteke a ka lekisa ungangala! Momo lie tu popela ndoco?

¹³ Avirahama eci a kala oku liusika lakuenje vaye, wa va sapuila hati: “Ene siali palo locimbulu; ame lumãlehe tu amako toke okondoto; tu ka fendela, noke tu tiuka vali kokuene.” (Efetikilo 22:5) Nye Avirahama a yonguile oku popia? Anga hẽ, wa kala oku kemba okuti o tiuka la Isake, ndaño wa kũlĩhĩle okuti o ko weca ndocilumba? Sio. Embimbiliya li lekisa okuti, Avirahama wa kũlĩhĩle okuti Yehova o kuete unene woku pindula Isake kolofa. (Tanga Va Heveru 11:19.) Avirahama wa kũlĩhĩle okuti, Yehova wo wihĩle unene woku cita omõla umue ndaño okuti eye la Sara va kukile calua. (Va Heveru 11:11, 12, 18) Eye wa limbukile okuti ku Yehova ovina viosi vi tẽliwa. Avirahama ka kũlĩhĩle eci ca laikele oku pita keteke liaco. Pole, wa kolelele okuti, nda citava Yehova o pindula omõlaye kuenda o tẽlisa olohuminyo viaye viosi. Eli olio esunga lieci Avirahama a tukuiwila hati, “isia ya vosi va kuete ekolelo.”

14. Ovitangi vipi wa siata oku liyaka lavio omo lioku vumba Yehova? Kuenda ulandu wa Avirahama u ku kuatisa ndati?

¹⁴ Koloneke vilo, Yehova ka pingi kokuetu oco tu lumbe omãla vetu, pole eye o tu pinga okuti, tu pokola kovihandeleko viaye. Olonjanja vimue, ka tu kuata elomboloko lieci ocihandeleko cimue ca tumbikiwila. Pamue ka ci leluka kokuetu oku pokola kocihandeleko caco. Anga hẽ, wa pitile ale locitangi caco? Komanu vamue oku kunda, upange umue ka wa lelukile. Citava okuti ovo va kuete osõi kuenda va sima okuti ka ca lelukile oku vangula lomanu ka va kũlĩhĩle. Vakuavo va kuete ohele yoku lekisa ovituwa via litepa lakamba vavo kupange ale kosikola. (Etundilo 23:2; 1 Va Tesalonike 2:2) Eci va ku pinga oku linga cimue ka ca lelukile, sokolola ongangu yekolelo kuenda utõi Avirahama a lekisa. Eci tu sokolola ovolandu alume kuenda akãi vakuekolelo, ci tu vetiya oku va setukula kuenda oku kuata ukamba uwa Lekamba lietu, Yehova.—Va Heveru 12:1, 2.

15. Momo lie tu popela okuti Avirahama lalimue eteke a livelele omo lioku pokola Yehova?

¹⁵ Anga hẽ Avirahama wa livela omo lioku pokola kovihandeleko via Yehova? Embimbiliya li popia okuti Avirahama “wa fa tupu ekongo liocili, osekulu muẽle, wa kuka ca lua.” (Efetikilo 25:8) Eci Avirahama a kala leci ci soka 175 kanyamo, wa sokolola esanju a kuata vokuenda komuenyo waye. Momo lie? Momo olonjanja viosi wa velisilepo ukamba waye la Yehova. Pole, eci tu tanga okuti Avirahama ‘o sekulu muẽle, wa kukile ca lua,’ ka ci lomboloka okuti eye ka kuatele onjongole yoku kala komuenyo kovaso yoloneke.

16. Voluali Luokaliye ulandu upi u ka sanjuisa Avirahama?

¹⁶ Embimbiliya li popia okuti Avirahama “wa kala oku lavoka olupale lu kuete ociseveto cocili, okuti usovoli walio kuenda utungi walio, Suku.” (Va Heveru 11:10) Avirahama wa kolelele okuti, eteke limue o ka mola olupale okuti, Usoma wa Suku u ka viala oluali luosi. Ocili okuti o ka lu mola muẽle! Sokolola esanju Avirahama a ka kuata, oku kala voluali luokaliye palo posi kuenda oku amamako oku pamisa ukamba waye la Suku. Eye o ka kuata esanju poku kũlĩha okuti ongangu yaye yekolelo ya kuatisa afendeli va Suku, vokuenda kuanyamo alua! Voluali luokaliye eye o ka limbuka okuti ocilumba komunda Moriya, ca lombolokele ocina cimue ca velapo. (Va Heveru 11:19) Eye o ka limbukavo okuti evalo a kuata poku pongiwa oku lumba omõlaye Isake, ca kuatisa omanu valua vakuekolelo oku kuata elomboloko lievalo Yehova a yeva poku eca Omõlaye Yesu Kristu ndocilumba coku yovola omanu. (Yoano 3:16) Ongangu ya Avirahama ya kuatisa vosi yetu oku lekisa olopandu kocisembi okuti oco ocisola ca velapo ca lekisiwa!

17. Nye wa ñolapo oku linga, kuenda nye tu ka lilongisa vocipama ci kuãimo?

¹⁷ Omunu lomunu pokati ketu a nõlepo oku setukula ongangu yekolelo ya Avirahama. Ndeci eye a linga, tu sukila oku kuata ukũlĩhĩso kuenda elomboloko. Osimbu tu amamako oku lilongisa catiamẽla ku Yehova kuenda oku pokola kokuaye, tu limbuka ndomo eye a tu sumũlũisa loku tu teyuila. (Tanga Va Heveru 6:10-12.) Tu eceleli okuti Yehova o kala Ekamba lietu otembo ka yi pui! Vocipama cikuãimo, tu ka lilongisa ovolandu atatu omanu vakuekolelo okuti va kuata ukamba uwa la Suku.