1. Tukula ocindekaise cimue ci lombolola esunga lieci tu sukilila oku kuama Yehova Ndusongui wetu.

 SOKOLOLA okuti wa nyelela vusenge umue. Vusenge waco muli ohele yalua ndeci: Ovinyama via tema, apuka a koka uvei, amẽla a kuete owule kuenda onepa yeyuka ovawe alua. Ocili okuti nda wa eca olopandu vialua poku songuiwa lomunu wa kũlĩha ciwa apa pali olohele kuenda ndomo o vi yuvula! Oluali lulo, lu sokisiwa lusenge waco. Mueyuka ovina vialua vi koka ohele, ca piãla enene kekalo lietu konepa yespiritu. Pole, etu tu kuete Usongui umue wa lipua okuti, Yehova. Eye o tu songuila okuti tu kala ocipãla lohele, oco tu loñe vonjila yomuenyo ko pui okuti, voluali luokaliye.

2. Yehova o tu songuila ndati?

² Yehova o tu songuila ndati? Catete, eye o ci linga pocakati Cembimbiliya. Pole, eye o talavayavo lomanu oco va tu songuile. Ndeci, eye o talavaya ‘lukuenje wa kolelua haeye wa lunguka’ oco a ece okulia kuespiritu kuna ku tu kuatisa oku nõla olonjila via sunguluka. (Mat. 24:45) Yehova o talavayavo lalume va loñoloha oco va tu songuile. Ndeci, vamanji vakuakunyula akongelo kuenda akulu vekongelo, va siata oku tu pamisa loku tu ĩha olonumbi vi tu kuatisa oku liyaka lovitangi. Tu eca olopandu vialua ku Yehova, omo a siata oku tu songuila ciwa koloneke vilo ka via lelukile osimbu esulilo ka lieyile! Eci ci tu kuatisa oku amamako oku kala ekamba lia Yehova, loku endela vonjila yomuenyo.

3. Nye tu konomuisa vocipama cilo?

³ Pamue ka ci leluka kokuetu oku kuama olonumbi via Yehova ca piãla enene eci ovio vi eciwa lalume ka va lipuile. Momo lie? Momo alungulo ovo va eca pamue ka tu a sanjukila. Ale,  tu pondola oku sima okuti onumbi tua tambula ka ya sungulukile kuenda elungulo liaco, ka lia tundile ku Yehova. Vepuluvi eli, tu sukila oku kolela okuti Yehova eye o kasi oku songuila afendeli vaye kuenda ci nena asumũlũho oku kuama onumbi yaye. Oco tu kuatisiwe oku pamisa ekolelo lietu, ocipama cilo ci ka lombolola (1) Ndomo Yehova a songuila afendeli vaye kosimbu, (2) ndomo a kasi oku tu songuila koloneke vilo kuenda (3) ndomo tu kuatisiwa eci tu amamako oku kuama olonumbi viaye.

NDOMO YEHOVA A SONGUILA VA ISARELI

4-5. Yehova wa lekisa ndati okuti wa kala oku vetiya Mose oco a va songuile? (Tala ociluvialuvia koñoño.)

⁴ Yehova wa nõla Mose oco a songuile va Isareli oku tunda Kegito. Eye wa eca uvangi ku va Isareli okuti wa kala oku va songuila pocakati ca Mose. Ndeci, kutanya wa va songuila longunji yelende kuenda kuteke wa va songuila lulienge wondalu. (Etu. 13:21) Mose wa kuama ongunji, yina yo songuila kumue la va Isareli Vokalunga ka Kakusuka. Pole, va Egito va kala oku va kuama kuenje va Isareli va yeva usumba walua, momo va simĩle okuti va Egito va laikele oku va ponda. Ovo va simĩle okuti Mose wa lueya poku va songuila Vokalunga ka Kakusuka. Pole, ka lueyele. Yehova eye wa vetiya Mose oco a songuile afendeli vaye. (Etu. 14:2) Suku wa va yovola lonjila yimue yi komõhisa.—Etu. 14:26-28.

⁵ Vokuenda kuanyamo a soka 40, Mose wamamako oku kuama ongunji yelende oco a songuile afendeli va Suku vekalasoko. a Vokuenda kuotembo yimue, Yehova wa kapa ongunji yaco kilu liombalaka ya Mose kuna va Isareli vosi va ponduile oku yi mola. (Etu. 33:7, 9, 10) Oku upisa kongunji, Yehova wa vangula la Mose kuenje Mose wa sapuila omanu ovina Yehova a vangula laye. (Osa. 99:7) Va Isareli va kuatele uvangi wasuapo wokuti Yehova wa vetiya Mose oco a va songuile.

6. Va Isareli va tendele ndati onumbi ya Yehova? (Atendelo 14:2, 10, 11)

⁶ Ci sumuisa calua omo okuti va Isareli valua, va likala oku tava okuti Yehova wa nõla Mose oku popia eci o tuma. (Tanga Atendelo 14:2, 10, 11.) Olonjanja vialua, va likala oku tava okuti Yehova eye wa kala oku vetiya Mose oco a va songuile. Omo lielinga liaco, ocitumbulukila caco ca va Isareli ka ca iñilile Vofeka Yohuminyo.—Ate. 14:30.

7. Tukula omanu vakuangangu yiwa vana va kuama olonumbi via Yehova. (Atendelo 14:24) (Talavo ociluvialuvia.)

⁷ Va Isareli vamue, va kuama onumbi ya Yehova. Ndeci, Yehova wa popia hati: “Kalembe . . . wa pokola kokuange lutima wosi. (Tanga Atendelo 14:24.) Suku wa sumũlũisa Kalembe kuenda wa ecelelavo okuti o nõla ocitumãlo a yonguile oku kala Vofeka Yohuminyo. (Yeh. 14:12-14) Ocitumbulukila ca kuamamo ca va Isareli, ca ecavo ongangu yiwa poku kuama olonumbi via Yehova. Eci Yehosua a piñala Mose oco a kale usongui wa va Isareli, “ovo va lekisa esumbilo lialua kokuaye oloneke viosi viomuenyo waye.” (Yeh. 4:14) Kuenje Yehova wa va sumũlũisa poku va ĩha ofeka a va likuminyile.—Yeh. 21:43, 44.

8. Lombolola ndomo Yehova a songuila afendeli vaye kotembo yolosoma. (Talavo ociluvialuvia.)

⁸ Noke lianyamo amue, Yehova wa nõla olonganji oco vi songuile afendeli vaye. Vokuenda kuotembo yolosoma, Yehova wa nõla ovaprofeto oco va songuile afendeli vaye. Olosoma vakuekolelo va kuama alungulo ovaprofeto. Ndeci, Soma Daviti lumbombe, wa  tava eci a lunguiwa luprofeto Natana. (2 Sam. 12:7, 13; 1 Asa. 17:3, 4) Soma Yehosafata wa kuama olonumbi viuprofeto Yahasiyele, noke wa pamisa omanu vo Yuda oku ‘kolela ovaprofeto va Suku.’ (2 Asa. 20:14, 15, 20) Eci Soma Esekiya a kala kohele, wa pinga ekuatiso kuprofeto Isaya. (Isa. 37:1-6) Olonjanja viosi eci olosoma via pingaile olonumbi via Yehova, eye wa va sumũlũisa kuenda oku teyuila afendeli vaye. (2 Asa. 20:29, 30; 32:22) Ca ponduile oku limbukiwa la vosi okuti Yehova eye wa tumile ovaprofeto oku songuila afendeli vaye. Pole, olosoma vialua kuenda omanu, va likala ovaprofeto va Yehova.—Yer. 35:12-15.

NDOMO YEHOVA A SONGUILA AKRISTÃO VO KOCITA CATETE

9. Helie Yehova a nõlele oco va songuile Akristão kocita catete? (Talavo ociluvialuvia.)

⁹ Kocita catete K.K., Yehova wa sokiya ekongelo Liakristão. Eye wa songuila ndati Akristão vaco vatete? Eye wa nõla Yesu oco a kale utue wekongelo. (Va Efe. 5:23) Pole, Yesu ka sapuilile kondonge londonge eci ovo va sukilile oku linga. Eye wa nõla ovapostolo kuenda akulu vo ko Yerusalãi oco va kuate ocikele coku songola. (Ovil. 15:1, 2) Handi vali, kua nõliwa akulu oco va songuile ekongelo.—1 Va Tes. 5:12; Tito 1:5.

10. (a) Akristão valua vo kocita catete va tambuluiya ndati onumbi va tambuile? (Ovilinga 15:30, 31) (b) Momo lie vamue va likalela vana Yehova a tumile oku va songuila? (Tala okakasia losapi hati: “ Esunga Lieci Vamue va Likala Ovovangi Ocili.”)

¹⁰ Anga hẽ Akristão vo kocita catete va tava konumbi yaco? Valua pokati kavo va sanjukilile calua oku kuama olonumbi va tambula. Ovo “va sanjukila evetiyo liaco” lia eciwa kokuavo. (Tanga Ovilinga 15:30, 31.) Koloneke vilo, Yehova wa siata oku songuila ndati afendeli vaye?

NDOMO YEHOVA A TU SONGUILA KOLONEKE VILO

11. Tukula ulandu umue u lekisa ndomo Yehova a siata oku songuila vana va kuete ocikele coku songola koloneke.

¹¹ Yehova koloneke vilo o kasi oku amamako oku songuila afendeli vaye. Eye wa siata oku ci linga pocakati Cembimbiliya kuenda Comõlaye, utue wekongelo. Tu lete hẽ ovovangi a lekisa okuti Yehova o kasi oku amamako oku  tu songuila pocakati comanu? Oco. Ndeci, sokolola kueci ca pita noke liunyamo wo 1870. Manji Charles Taze Russell kuenda vakuavo, va fetika oku kuata elomboloko liokuti unyamo 1914 wa laikele oku kala unyamo umue u kuete esilivilo lialua koku tumbikiwa Kusoma wa Suku. (Dan. 4:25, 26) Oco va kuate elomboloko liaco, va linga akonomuiso Embimbiliya kuenda va kolelele koku tẽlisiwa kuovitumasuku viaco. Anga hẽ Yehova wa kala oku songuila akonomuiso avo? Oco. Ovina via pita kunyamo 1914 via situlula okuti, Usoma wa Suku wa fetika oku viala. Kueya Uyaki Watete wa Pita Voluali Luosi kumue lafengi, ovilemawe kuenda onjala. (Luka 21:10, 11) Yehova wa kala oku talavaya Lakristão vaco vakuacili oco va kuatise afendeli vaye.

12-13. Esokiyo lipi lioku vokiya upange woku kunda loku longisa lia lingiwa vokuenda Kuyaki Wavali wa Pita Voluali?

¹² Kũlĩhĩsavo eci ca pita vokuenda Kuyaki Wavali wa Pita Voluali Luosi. Noke lioku linga ekonomuiso lielivulu Liesituluilo 17:8, vamanji asongui kombala yoluali luosi, va kuata elomboloko liokuti, uyaki waco ka wa laikele oku amamako toke ko Harmagedo, pole, kua ponduile oku kala ombembua yimue ya pita pokati yina ya laikele oku eca epuluvi lioku vokiya upange woku kunda. Pole, ndaño ka ca tavele kotembo yaco, vamanji va kuete ocikele coku songola, va sokiya osikola yo Gileada oco ku pindisiwe olomisionaliu vi kunda loku longisa koluali luosi. Olomisionaliu via tumiwa ndaño kua kala uyaki. Handi vali, ukuenje wa kolelua wa sokiyavo Osikola yimue yilikasi b kakongelo osi, oco yi kuatise akundi vosi oku kala akundi vawa. Lonjila eyi, afendeli va Yehova va kala oku pongiyiwila upange woku kunda wa laikele oku lingiwa.

¹³ Koloneke vilo, tu pondola oku mola ndomo Yehova a kala oku songuila afendeli vaye vokuenda kuotembo yaco ka ya lelukile. Tunde Kuyaki Wavali wa Pita Voluali afendeli va Yehova kolofeka vialua, va kuete ombembua yimue ya pita pokati kuenda elianjo lioku linga upange woku kunda. Kuenje omanu valua va kasi oku kũlĩha Yehova.

14. Momo lie tu kolelela kolonumbi viocisoko ca Yehova kuenda viakulu vekongelo via nõliwa? (Esituluilo 2:1) (Talavo ociluvialuvia.)

 ¹⁴ Koloneke vilo, Osungu Yolombangi Via Yehova yi kasi oku amamako oku kuama olonumbi via Kristu. Ovo va yongola okuti, olonumbi va eca ku vamanji vi situlula ovisimĩlo vio kilu viatiamẽla kovina. Kuenje pocakati ca vamanji va nyula akongelo kuenda akulu vekongelo, ovo va eca olonumbi kakongelo. c Akulu olombuavekua va kasi ‘peka liondio’ lia Kristu. (Tanga Esituluilo 2:1.) Ocili okuti vosi yavo ka va lipuile kuenda va siata oku lueya. Mose la Yehosua olonjanja vimue va enda oku lueya, oku kongelamo ovapostolo. (Ate. 20:12; Yeh. 9:14, 15; Va Rom. 3:23) Ndaño ndoco, Kristu o kasi oku songuila lutate ukuenje wa kolelua, lakulu vekongelo va nõliwa kuenda o kamamako oku ci linga “oloneke viosi, toke kesulilo lioluali.” (Mat. 28:20) Tu kuete asunga alua oku kolela konumbi eye a kasi oku eca pocakati ca vana eye a nõla oco va tu songuile.

TU KUATISIWA ECI TU AMAMAKO OKU KUAMA OLONUMBI VIA YEHOVA

15-16. Nye o li longisila kovolandu a vana va nõlapo oku kuama onumbi ya Yehova?

¹⁵ Eci tu amamako oku kuama olonumbi via Yehova, tu kuata asumũlũho cilo. Ndeci, manji Andy kuenda Robyn va kapako onumbi yukuenje wa kolelua yoku leluisa omuenyo wavo. (Va Hev. 13:5) Kuenje va tẽla oku lieca olumue kovopange oku tunga ovitumãlo viusoma. Manji Robyn wa popia hati: “Olonjanja vimue tua enda oku kala volonjo vimue vitito, okuti ka via kuatele okusinya.” Nda landisa olomakina viange viosi vioku upa alitalatu, ndaño nda solaile calua upange waco. Toke muẽle nda lila poku vi landisa. Pole, ndeci ca pita lukãi wa Avirahama Sara, nda nõlapo oku tiamisila utima kovina nda ponduile oku lingila Yehova cilo okuti si sumuila ovina nda sia konyima.” (Va Hev. 11:15) Ohueli eyi ya kuatisiwa ndati poku ci linga? Manji Robyn hati: “Tu kuete esanju lialua poku kũlĩha okuti tu kasi oku eca ku Yehova cosi tu kuete. Eci ame lulume wange tu linga upange Yehova a tu tuma, tu limbuka ndomo omuenyo u ka kala voluali luokaliye.” Manji Andy o tava kolondaka viaco, poku popia ndoco: “Tua sanjuka omo tu eca otembo yetu kuenda ongusu oco tu kuatise kupange Wusoma.”

 ¹⁶ Lonjila yipi yikuavo tu kuatisiwa eci tu amamako oku kuama olonumbi via Yehova? Marcia noke lioku mala elilongiso lia pita pokati, wa kapako evetiyo lioku kala ukundi wotembo yosi. (Mat. 6:33; Va Rom. 12:11) Eye hati: “Va nyĩha ombanjile yoku ka tangela kosikola ya velapo vokuenda kuanyamo akuãla. Pole, nda yonguile oku vokiya upange wange ku Yehova. Kuenje nda nõlapo oku enda kosikola yimue yoku lilongisa umesele oco ci ñuatise kupange woku kunda. Eyi ya kala onjila ya velapo nda nõla. Cilo, ndukundi wotembo yosi kuenda elivala liupange wange li ngecelela oku talavaya ko Betele loku tẽlisa ovikele vikuavo vilikasi.”

17. Asumũlũho api tu kuata eci tu amamako oku kuama olonumbi via Yehova? (Isaya 48:​17, 18)

¹⁷ Pamue tu tambula alungulo a tu teyuila kovina ndeci, ovokuasi kuenda ovina vikuavo vi pondola oku tu kapa kohele yoku lueya ovihandeleko via Yehova. Kovina evi, tu kuatisiwa calua eci tu kuama olonumbi via Yehova. Tu kuata utima wa yela, loku yuvula asakalalo. (1 Tim. 6:9, 10) Kuenje tu fendela Yehova lutima wosi okuti, ocina cimue ci nena esanju lialua, ombembua kuenda ekalo liwa.—Tanga Isaya 48:17, 18.

18. Momo lie wa nõlelapo oku kuama olonumbi via Yehova?

¹⁸ Ka kuli atatahãi okuti, Yehova o kamamako oku nõla omanu va songola oco va ece olonumbi vokuenda kuohali ya piãla kuenda Kuviali Wohulukãi Yanyamo. (Osa. 45:16) Anga hẽ tu kamamako oku kuama olonumbi viaco ndaño mua kongela oku siapo ovina tu sole? Ca tamba ño konjila ndomo tu tambuluiya olonumbi Yehova a siata oku eca cilo. Kuenje olonjanja viosi tu kuami olonumbi via Yehova oku kongelamo vina vi eciwa lalume va nõliwila oku tu tata. (Isa. 32:1, 2; Va Hev. 13:17) Omo liaco, nda tua ci linga, tu kuata asunga alua oku kolela Kusongui wetu Yehova, una o tu songuila vonjila yina okuti lacimue ci pondola oku nyõla ukamba wetu laye kuenda oku tu songuila komuenyo ko pui voluali luokaliye.