ASONEHI Vembimbiliya olonjanja vimue va enda oku pitulula ovinimbu vimue, ondaka londaka. Kũlĩhĩsa asunga atatu lieci asonehi vaco va ci lingila ndeci:

Otembo Embimbiliya lia sonehiwa. Kotembo ya va Isareli omanu valua ka va kuatele olokopia Viocihandeleko. Ovo va enda lika oku yevelela oku tangiwa Kuocihandeleko, eci va enda oku liongolola votavernakulu. (Esin. 31:10-12) Citava okuti, kua kala ovina via enda oku va taluisa osimbu va yevelela kuenda oku kala olowola vialua pokati kowiñi walua. (Neh. 8:2, 3, 7) Vapuluvi aco, oku pitulula olondaka via velapo, ca ponduile oku kuatisa omanu oku ivaluka ovisonehua loku vi kapako. Oku pitulula olondaka vimue ca laikele oku va kuatisa, ca piãla enene oku ivaluka olonumbi Viocihandeleko Yehova a ecele kokuavo.—Ovis. 18:4-22; Esin. 5:1.

Onjila ndomo Embimbiliya lia sonehiwa. Olonepa vimue Viembimbiliya via sonehiwa ndovisungo, ndeci: Elivulu Liolosamo, Ocisungo ca Salomone kuenda Asiõsuĩlo. Olonjanja vimue ovisungo vimue vi kuete etaviyo li tokekisa ocisungo kuenje eci ca enda oku kuatisa olonjeveleli oku patekela olondaka. Ndeci, kũlĩhĩsa olondaka vi sangiwa Kosamo 115:9-11 ku popia hati: “A Isareli, kolela Yehova Eye ekuatiso liove kuenda ociyepelo cove. Anjo ya Arone, kolela Yehova Eye ekuatiso liove kuenda ociyepelo cove. Ene wa sumbi Yehova, koleli Yehova Eye ekuatiso liene kuenda ociyepelo cene.” O tẽla hẽ oku limbuka ndomo olondaka evi via ponduile oku kuatisa olonjimbi oku patekela olondaka viaco vovisimĩlo kuenda vutima wavo?

Esunga lieci ci kuetele esilivilo oku tõlisa olondaka via velapo. Asonehi Vembimbiliya olonjanja vimue va enda oku pitulula olondaka via velapo. Ndeci, eci Yehova a handelekele va Isareli oco ka va kalie osonde eye wa sapuila Mose oco a pitulule olonjanja vialua esunga liaco. Yehova wa yonguile oku tõlisa okuti, omuenyo u kasi vosonde, ale osonde omuenyo. (Ovis. 17:11, 14) Noke, eci ovapostolo kuenda akulu vo ko Yerusalãi va soneha ovina Akristão va sukilile oku yuvula, yimue vali onjanja ovo va tõlisa esilivilo lioku yuvula osonde.—Ovil. 15:20, 29.

Ndaño okuti olondaka vimue Viembimbiliya via pituluiwa, ka ci lomboloka okuti Yehova o yongola okuti ci kala ocituwa oku pitolola olondaka Viembimbiliya. Ndeci, Yesu wa popia hati: “Poku likutilila ku ka tukole ovina vimuamue olonjanja viosi.” (Mat. 6:7) Kuenje eye wa tukula ovina tu pondola oku likutilila okuti vi likuata locipango ca Suku. (Mat. 6:9-13) Ndaño okuti, tu yuvula oku pitolola olondaka vimuamue volohutililo vietu, tu kuete elianjo lioku tukula olondaka viaco olonjanja vialua.—Mat. 7:7-11.

Kuli asunga awa lieci Embimbiliya li pituluila olondaka vimue kuenda ovinimbu. Eyi yimue pokati kolonjila Ulongisi wetu wa Velapo a tu longisa ndomo tu kuatisiwa.—Isa. 48:17, 18