1, 2. Eci Yesu a tiukila kilu, citava okuti ovapostolo va lipula ndati?

ECI ovapostolo va Yesu va kala Komunda Yoliveira va mola eci cime haiye ekamba liavo Yesu, a kala oku londa kilu loku sitikiwa lalende. (Ovilinga 1:9, 10) Vokuenda kuanyamo avali, Yesu wa va longisa, wa va vetiya kuenda wa va songuila. Pole, cilo wa enda kilu. Nye va sukilile oku linga?

² Osimbu ka endele kilu, Yesu wa sapuila olondonge viaye hati: “vu linga olombangi viange vo Yerusalãi, vo Yudea yosi kuenda vo Samaria toke kasukiyo o kilu lieve.” (Ovilinga 1:8) Nda va tẽla oku linga ndati upange waco? Yesu wa likuminya okuti espiritu sandu lia ponduile oku va kuatisa. (Ovilinga 1:5) Helie, wa laikele oku va songuila loku va sokiya oco va linge upange woku kunda voluali luosi? Ovapostolo va kũlĩhĩle okuti, kosimbu Yehova wa nõlele alume oco va songuile va Isareli. Citava okuti, va kala oku li pula nda Yehova wa laikele oku nõla usongui ukuavo.

3. (a) Eci Yesu a tiukila kilu onjila yipi yi kuete esilivilo lia velapo ovapostolo vakuekolelo va kuama? (b) Apulilo api a ka tambuluiwa vocipama cilo?

 ³ Noke liotembo yimue, tunde eci Yesu a enda kilu, olondonge viaye via konomuisa Ovisonehua, via likutilila ku Suku oco a va kuatise kuenje va nõla Matiya oco a piñale Yuda Isikariote, oco a linge umue pokati kovapostolo 12. (Ovilinga 1:15-26) Momo lie oku nõliwa kuaco kua kuatela esilivilo kokuavo kuenda ku Yehova? Olondonge via limbukile okuti kua sukiliwile ovapostolo 12. * (Tala etosi pombuelo yemẽla.) Yesu wa nõla ovapostolo kuenda wa va pindisa, oco va linge upange umue u kuete eslivilo lia velapo pokati kafendeli va Suku. Upange upi wa kuatele esilivilo lia velapo kuenda Yehova la Yesu va pongiya ndati ovapostolo oco va linge upange waco? Eliangiliyo liaco li sokisiwa ndati leli lio koloneke vilo? Tu pondola oku ‘ivaluka ndati vana va songola’ pokati ketu, capiãla enene “ukuenje wa kolelua haeye wa lunguka”?—Va Heveru 13:7; Mateo 24:45.

4. Ocikele cipi ovapostolo kuenda akulu vakuavo vo Yerusãlai va kuata?

⁴ Ovapostolo va fetika oku songuila Ekongelo Liakristão vocili ko Pendekoste yunyamo wo 33. Embimbiliya li lekisa okuti “Petulu wa votoka pokati kolondonge Ekũi la Mosi” kuenda wa longisa esapulo li popela omuenyo kowiñi walua. (Ovilinga 2:14, 15) Valua pokati kowiñi waco va linga Akristão vocili. Noke, Akristão vaco vokaliye “va pandakaisa kelongiso liovapostolo.” (Ovilinga 2:42) Ovapostolo va kuata ocikele coku seleka olombongo viekongelo. (Ovilinga 4:34, 35) Va longisavo afendeli va Suku kuenda va va kongela volohutililo viavo, poku popia hati: “Tu litumbika kolohutililo loku longisa ondaka ya Suku.” (Ovilinga 6:4) Ovapostolo va tuma Akristão va loñoloha oco va kundile kovikanjo vikuavo. (Ovilinga 8:14, 15) Noke, akulu vakuavo okuti olombuavekua va kongeliwa kovapostolo oco va songuile ekongelo. Omo okuti va kala osungu yakulu, va kala oku songuila akongelo osi.—Ovilinga 15:2.

5, 6. (a) Espiritu sandu lia kuatisa ndati osungu yakulu? (Tala ociluvialuvia kefetikilo liocipama.) (b) Ovangelo va kuatisa ndati osungu yakulu? (c) Ondaka ya Suku ya kuatisa ndati osungu yakulu?

⁵ Akristão vo kocita catete va kũlĩhĩle okuti Yehova wa kala oku songuila osungu yakulu lekuatiso lia Yesu. Va ci limbuka ndati? Catete, unene wespiritu sandu wa kuatisa osungu yakulu. (Yoano 16:13) Akristão vosi olombuavekua va tambula espiritu sandu, capiãla enene ovapostolo kuenda akulu vo ko Yerusalãi oco va tẽlise ocikele cavo coku kala asongui. Kunyamo wo 49, espiritu sandu lia songuila osungu yakulu va kuatele ocikele coku songola oco va tetulule ocitangi coku seviwa evamba.  Akongelo va pokola kolonumbi via eciwile. Omo liaco, ovo “va amamako oku pamisiwa vekolelo loku livokiya eteke leteke.” (Ovilinga 16:4, 5) Omo liukanda wa tumiwa kakongelo watiamẽla koku seviwa evamba, tu pondola oku limbuka okuti, osungu yakulu ya kuatisiwa lespiritu lia Suku kuenda va lekisa ovituwa vimue ndeci, ocisola kuenda ekolelo.—Ovilinga 15:11, 25-29; Va Galatia 5:22, 23.

⁶ Cavali, ovangelo va kuatisa osungu yakulu. Ungelo umue wa sapuila Korneliu, oco a ka li sange lupostolo Petulu. Noke  Petulu wa kundila Korneliu kuenda vakuepata liaye, kuenje va tambula espiritu sandu ndaño okuti alume vaco ka va seviwile evamba. Korneliu, eye wa kala Ukristão watete Ukualofeka ka seviwile evamba. Eci ovapostolo kuenda vamanji vakuavo va yeva ovina viaco, va tava kocipango ca Suku kuenda va tambula lesanju omanu vana Vakualofeka ka va seviwile evamba, oco va linge onepa vekongelo Liakristão. (Ovilinga 11:13-18) Omo liaco, tua limbuka okuti ovangelo va kuatisa kupange woku kunda wa kala oku songuiwa losungu yakulu. (Ovilinga 5:19, 20) Catatu, Ondaka ya Suku ya songuila osungu yakulu. Alume vaco va konomuisa ovisonehua oco ci va kuatise oku nõla onjila ya sunguluka yatiamẽla kalongiso Akristão kuenda oku songuila akongelo.—Ovilinga 1:20-22; 15:15-20.

7. Momo lie tu popela okuti Yesu wa songuila Akristão vatete?

⁷ Ndaño okuti osungu yakulu ya kuatele omoko vekongelo, vana va pangele onepa kosungu yaco va kuatele elomboloko liokuti, Yesu Kristu eye wa kala Usongui wavo. Momo lie tu ci popela? Momo upostolo Paulu wa popia hati, Kristu eye wa nõla “ovapostolo vamue.” Eye wa popiavo hati, Kristu eye “utue” ale Usongui, wekongelo. (Va Efeso 4:11, 15) Ovo ka va litukuile okuti va kala ovapostolo, pole, ‘olondonge via tambula onumbi ya Suku yoku tukuiwa okuti Akristão.’ (Ovilinga 11:26) Paulu wa kũlĩhĩle okuti ca kuatele esilivilo lia velapo oku pokola kalongiso Embimbiliya a eciwile lovapostolo kuenda alume vakuavo va kuatele omoko yoku songuila. Ndaño lovina viaco, Paulu wa popia hati: “Ndi yongola okuti vu kũlĩha okuti utue wulume Kristu.” Volondaka evi mua kongelavo osungu yakulu. Noke Paulu wa lekisa okuti: “Utue wa Kristu Suku.” (1 Va Korindo 11:2, 3) Ocili okuti, Yehova wa nõla Omõlaye Kristu Yesu, oco a songuile ekongelo.

8, 9. Ocikele cipi ci kuete esilivilo lia velapo manji Russell a kuatele?

⁸ Kefetikilo liunyamo wo 1870, manji Charles Taze Russell kuenda akamba vaye, va fetika oku fendela Suku ndomo ci litava lolonumbi Viembimbiliya kuenda va vetiyavo omaunu vakuavo oku ci linga. Vovina viaco mua kongelele oku kuatisa omanu va vangula alimi a litepa. Omo liaco, o Sociedade de Tratados da Torre de Vigia de Sião ya tumbikiwa kunyamo wo 1884 kuenda Manji Russell eye wa linga usongui. * (Tala etosi pombuelo yemẽla.) Eye wa konomuisa lutate kuenda ka kuatele usumba woku sapela lomanu vakuavo catiamẽla kalongiso onembele ndeci, elongiso lia Suku umosi Muvatatu kuenda kelongiso liocilelembia ka cifi. Eye wa limbuka okuti, oku tiuka kua Kristu ka ku muiwa lovaso kuenda “otembo ya tukuiwila vakualofeka” ya laikele oku sulila kunyamo wo 1914. (Luka 21:24) Manji Russell wa talavaya ciwa lotembo, longusu kuenda olombongo viaye oco a longise ocili komanu vakuavo. Ocili okuti, Yehova kumue la Yesu va kuatisa Manji Russell oku songola kotembo ya kuata esilivilo lia velapo kulandu wafendeli va Suku.

⁹ Manji Russell ka yonguile okuti omanu vo tata lonjila yimue yilikasi. Kunyamo wo 1896, Manji Russell wa soneha okuti, eye kumue lalume vakuavo vakuatele ovikele, ka va yonguile oku tambula esivayo. Ovo ka va yonguile oku tukuiwa lolonduko vilikasi kuenda ka va yonguilevo okuti ocimunga cimue ci tukuiwa lolonduko viavo. Noke Manji Russell wa popia hati: “Upange owu hawomunuko.”

10. (a) Otembo yipi Yesu a nõla “ukuenje wa kolelua haeye wa lunguka”? (b) Lombolola ndomo kua limbukiwa etipiso li kasi pokati Kosungu Yolombangi Via Yehova kuenda o Sociedade Torre de Vigia.

¹⁰ Noke lianyamo atatu tunde eci Manji Russell a fa, kunyamo wo 1919, Yesu wa nõla “ukuenje wa kolelua haeye wa lunguka.” Locimãho cipi? Locimãho coku eca kolondonge viaye “okulia votembo ya sokiyiwa.” (Mateo 24:45)  Osimbu unyamo waco ka wa pitĩlile, ocimunga cimue citito ca vamanji olombuavekua kombala Yolombangi Via Yehova ko Brooklyn Nova Yorke, ya eca okulia ku pamisa ekolelo kolondonge via Yesu. Ondaka yokuti “Osungu Yolombangi Via Yehova” ya fetika oku molẽha valivulu etu noke liunyamo wo 1940. Kotembo yaco, Osungu Yolombangi Via Yehova ya kuatele elitokeko lasongui vo ko Sociedade de Tratados da Torre de Vigia. Pole, kunyamo wo 1971 kua eciwa elomboloko liokuti, Osungu Yolombangi Via Yehova, ya litepa lo Sociedade Torre de Vigia, okuti ya kuatele lika ocikele coku potolola ovina viatiamẽla kombonge. Tunde kotembo yaco, vamanji olombuavekua va ponduile oku panga onepa Kosungu Yolombangi Via Yehova, ndaño okuti ka va pangele onepa kasongui o Sociedade. Vokuenda kuanyamo a sulako, vamanji va panga onepa “kolomeme vikuavo” va tambula ovikele vioku kala asongui vo Sociedade kuenda va tambulavo ovikele vikuavo vocisoko ca Suku. Omo liaco, Osungu Yolombangi Via Yehova, yi tiamisila utima koku eca olonumbi lekuatiso Liembimbiliya. (Yoano 10:16; Ovilinga 6:4) Utala Wondavululi 15 Yevambi Linene yunyamo wo 2013, u lombolola okuti “ukuenje wa kolelua haeye wa lunguka,” ocimunga cimue citito ca vamanji olombuavekua va panga onepa Kosungu Yolombangi Via Yehova.

11. Osungu Yolombangi Via Yehova ya siata oku ñola ndati onjila va kuama?

¹¹ Osungu Yolombangi Via Yehova, yi nõla onjila va yongola oku kuama ndocimunga eci va linga olohongele viavo osemana losemana. Olohongele viaco vi va kuatisa oku sapela pokati kuenda oku likuata omunga. (Olosapo 20:18) Lomue pokati kavo wa velapo ukuavo, omo liaco unyamo lunyamo umue pokati kavo eye o songola olohongele viavo. (1 Petulu 5:1) Eci oco ca siata oku lingiwavo lovisoko epandu Yosungu Yolombangi Via Yehova.  Lomue pokati kavo o li tenda ndu okuti usongui wa vamanji vakuavo. Omunu lomunu pokati kavo o pangavo onepa ku vakuanjo kuenda va siata oku tambulavo okulia ku pamisa ekolelo kua siata oku pongiyiwa lukuenje wa kolelua loku pokola kolonumbi viaco.

12. Apulilo api tu ka tambulula noke?

¹² Yehova ka siatele oku vangula Losungu Yolombangi Via Yehova mẽla la mẽla. Omo liaco, ovo va pondola oku lueya poku lombolola ovina vi sangiwa Vembimbiliya ale ceci va kasi oku songola ocisoko. O Índice das Publicações da Torre de Vigia, mua kongela onepa losapi hati: “Esclarecimento de crenças,” (Alomboluilo okaliye) okuti mu sangiwa apongoloko tua linga kelomboloko Liembimbiliya tunde kunyamo wo 1870. Yesu ka popele okuti ukuenje waye wa kolelua wa ponduile oku eca okulia ku pamisa ekolelo kua lipua. Tu pondola ndati oku tambulula epulilo lia Yesu liokuti: “Helie ukuenje wa kolelua haeye wa lunguka?” (Mateo 24:45) Uvangi upi u lekisa okuti, Osungu Yolombangi Via Yehova eye ukuenje wa kolelua? Tu konomuisi ovina vitatu via kuatisa osungu yakulu kotembo yo vapostolo.

13. Espiritu sandu li kuatisa ndati Osungu Yolombangi Via Yehova?

¹³ Espiritu sandu lia kuatisa Osungu Yolombangi Via Yehova. Espiritu sandu lia kuatisa Osungu Yolombangi Via Yehova, oku kuata elomboloko liovina okuti kosimbu ka va kuatele elomboloko liaco. Kũlĩhĩsa ulala u tukuwa hati, esclarecimento de crenças via tukuiwa kefetikilo. Ka kuli omunu o pondola oku kuata elomboloko lia suapo kuenda oku lombolola “ovina via longa via Suku” likaliaye! (Tanga 1 Va Korindo 2:10.) Osungu Yolombangi Via Yehova, yi kuete ovisimĩlo vimuamue lupostolo Paulu wa soneha ndoco: “Ovina evi ka tu vi popi lolondaka via longisiwa lolondunge viomanu, te vina via longisiwa lespiritu.” (1 Va Korindo 2:13) Ocili okuti vokuenda kuanyamo alua ka tua kuatele elomboloko lia suapo Liembimbiliya pole, oku upisa kunyamo wo 1919 tu kuete elomboloko lia suapo, momo lie? Momo Suku wa siata oku kuatisa lespiritu sandu liaye!

14. Ndomo ca lomboluiwa kelivulu liesituluilo 14:6, 7, ovangelo va siata oku kuatisa ndati Osungu Yolombangi Via Yehova kuenda afendeli vakuavo va Suku vokoloneke vilo?

¹⁴ Ovangelo va kuatisa Osungu Yolombangi Via Yehova. Osungu Yolombangi Via Yehova yi kuete ocikele coku songuila ci pitahãla olohuluwa ecelãla kakundi va kasi oku kundila koluali luosi. Momo lie upange waco wa siatela oku tẽlisiwa? Esunga limue lieli okuti, tua siata oku kuatisiwa lovangelo. (Tanga Esituluilo 14:6, 7.) Olonjanja vimue, ovangelo va siata oku songuila akundi oku kundila omanu vana va siata oku pinga ekuatiso ku Suku, vohutililo! * (Tala etosi pombuelo yemẽla.) Upange woku kunda kuenda woku longia u kasi oku amamako ndaño lalambalalo alua. Eci ci lingiwa lika omo liekuatiso liovangelo.

15. Osungu Yolombangi Via Yehova ya litepa ndati lasongui vatavo esanda? Tukula ulandu umue.

¹⁵ Ondaka ya Suku ya songuila Osungu Yolombangi Via Yehova. (Tanga Yoano 17:17.) Kũlĩhĩsa ovina via pita kunyamo wo 1973. Vocipama Cutala Wondavululi 1 Yevambi mu sangiwa epulilo liokuti, “omunu nda ka liwekelepo oku sipa, o pondola hẽ oku papatisiwa”? Etambululo lia eciwa Lutala Wondavululi liopiwa Vembimbiliya kuenda owo wa lekisa okuti, sio! Utala waco Wondavululi wa lombololavo ovisonehua vialua vi lekisa esunga lieci omunu ka yongola oku liwekapo oku sipa a sukilile oku tundisiwa vekongelo. (1 Va Korindo 5:7; 2 Va Korindo 7:1) Owo wa lekisa okuti olonumbi viaco haviomunuko pole, “via tunda ku Suku una o situlula ovisimĩlo viaye lekuatiso Liondaka yaye ya sonehiwa.I2” Ka kuli ocisoko cikuavo cetavo, ci lekisa onjongole yoku kolela Kondaka ya Suku. Pole, Olombangi Via Yehova ovio lika via siata oku ci linga ndaño okuti olonjanja vimue ka ca lelukile kokuavo. Elivulu limue liokaliye li lombolola ovina viatiamẽla ketavo kofeka yo Estados Unidos lia lombolola ndoco: “Asongui vatavo va siata oku kũlĩhĩsa elongiso liavo poku yevelela kuenda oku tava kovisimĩlo viomanu va kasi vetavo limuamue kuenda kovisimĩlo viomanu vakuavo.” Pole, Osungu Yolombangi Via Yehova ka ya siatele oku songuiwa lovisimĩlo viomanu. Oyo ya siata oku songuiwa Londaka ya Suku, oco cece uvangi wokuti Yehova eye o kasi oku songuila afendeli vaye koloneke vilo.

16. Yipi onjila yimue yoku ivaluka Osungu Yolombangi Via Yehova?

¹⁶ Tanga Va Heveru 13:7. Embimbiliya li tu vetiya hati: “Ivaluki vana va songola pokati kene.” Onjila yimue yoku ci linga, oku kongela volohutililo vietu Osungu Yolombangi Via Yehova. (Va Efeso 6:18) Ovo va kuete ovikele vialua, ndeci: Oku pongiya okulia ku pamisa ekolelo, oku songuila upange woku kunda u kasi oku lingiwa voluali luosi kuenda oku talavaya ciwa lolombongo via siata oku eciwa locisoko. Ocili okuti tu sukila oku va kongela volohutililo vietu olonjanja viosi!

17, 18. (a) Tu pokola ndati kolonumbi Viosungu Yolombangi Via Yehova? (b) Upange woku kunda u kuatisa ndati Osungu Yolombangi Via Yehova la Yesu?

¹⁷ Tu sukilavo oku ivaluka Osungu Yolombangi Via Yehova poku pokola kolonumbi viosi va siata oku tu ĩha. Osungu Yolombangi Via Yehova ya siata oku tu songuila lekuatiso lialivulu etu, olohongele viekongelo, olohongele vimbo kuenda olohongelo viofeka. Oyo ya siatavo oku nõla akulu va nyula akongelo okuti, va kuete ocikele coku nõla akulu vekongelo. Omo lioku kuama olonumbi via siata oku tunda kokuavo, vamanji va nyula akongelo kuenda akulu vekongelo va ivaluka Osungu Yolombangi Via Yehova. Vosi yetu tu lekisa okuti tua sumbila Usongui wetu Yesu, poku pokola kalume vana eye a nõla koloneke vilo.—Va Heveru 13:17.

¹⁸ Onjila yikuavo yoku ivaluka Osungu Yolombangi Via Yehova, oku likolisilako kupange woku kunda. Ukanda wa va Heveru 13:7 u vetiya Akristão oku setukula ekolelo liomanu vana va tu songuila. Osungu Yolombangi Via Yehova, ya siata oku lekisa ekolelo liocili poku kala vakuambili kupange woku kunda kuenda oku sandeka olondaka viwa. Anga hẽ tua siata oku kuatisa vamanji vaco kupange woku kunda u kuete esilivilo lia velapo? Nda tu kasi oku ci linga, tu ka kuata esanju eci Yesu a ka tu sapuila hati: “Eci wa lingili ku vamanjange va sule, wa ci lingilivo ame.”—Mateo 25:34-40.

19. Momo lie tua nõlelapo oku pokola kusongui wetu Yesu?

¹⁹ Eci Yesu a tiukila kilu ka yandulukile olondonge viaye. (Mateo 28:20) Eci Yesu a kala usongui palo posi, wa kũlĩhĩle okuti wa kuatisiwa lespiritu sandu, lovangelo kuenda Londaka ya Suku. Eye wa siata oku eca ekuatiso limuamue kukuenje wa kolelua. Osungu Yolombangi Via Yehova yi kasi oku amamako “oku kuama Kameme,” Yesu “kuosi a enda.” (Esituluilo 14:4) Omo liaco eci tu pokola kolonumbi Viosungu Yolombangi Via Yehova, tu kasi oku pokola ku songui wetu Yesu. Eye ndopo o ka tu songuila oco tu kuate omuenyo ko pui. (Esituluilo 7:14-17) Ka kuli usongui laumue palo posi okuti o pondola oku tẽlisa ohuminyo yaco!