1. Ovina vipi viwa tu pondola oku tambula omo liocisembi?

OCILUMBA cocisembi ca Yesu Kristu ca nena asumũlũho alua. Eliangiliyo liocisembi lia ecelela okuti omãla vosi va Adama vakuesunga, va kuata elavoko lioku panga onepa kepata lia Suku. Esumũlũho likuavo lieli okuti, tu pondolavo oku kuata esanju otembo ka yi pui. Handi vali, ocisembi ci kuete elitokeko lovina vi kuete esilivilo lia velapo kovilulikilo viosi vi sangiwa kilu kuenda palo posi.—Va Heveru 1:8, 9.

2. (a) Ovina vipi vi kuete esilivilo lia velapo viatiamẽla kilu kuenda palo posi Yesu a kongela vohutililo a linga? (Tala ociluvialuvia kefetikilo liocipama cilo.) (b) Nye tu konomuisa vocipama cilo?

² Eci pa kambele anyamo avali oco Yesu a fe wa longisa olondonge viaye oku likutilila hati: “A Isietu o kasi kilu, onduko yove yi sumbiwe. Usoma wove wiye. Ocipango cove ci lingiwe palo posi, ndeci ci lingiwa kilu.” (Mateo 6:9, 10) Tu konomuisi ndomo ocisembi ci kuete elitokeko loku sumbiwa kuonduko ya Yehova, luviali Wusoma waye kuenda oku linga ocipango caye.

3. Onduko ya Yehova yi situlula nye? Satana wa sepula ndati onduko ya Yehova?

³ Catete, Yesu wa likutilila oco onduko ya Yehova yi sumbiwe ale oku tatiwa lonjila yimue okuti yi kola. Onduko ya Yehova yi situlula ndomo eye a tuwa. Yesu wo tukulavo okuti “Tate o kola.” (Yoano 17:11) Omo okuti Yehova o kola, ovina viosi a siata oku linga kuenda ovihandeleko viaye vi kola. Pole, vocumbo Cendene Satana wa kapa vatatahãi omoko ya Yehova Suku yoku tumbika ovihandeleko komanu. Eye wa sepula onduko ya Suku poku popia uhembi watiamẽla ku Yehova Suku.—Efetikilo 3:1-5.

4. Nye Yesu a linga ci lekisa okuti wa sumbila onduko ya Suku?

⁴ Yesu kovina viosi a linga wa lekisa okuti wa kuatela ocisola cocili onduko ya Yehova kuenda wa ci linga oco a sumbile onduko yaco. (Yoano 17:25, 26) Wa ci linga ndati? Wa ci linga poku lekisa ovituwa viwa kuenda koku longisa kuaye. Yesu wa kuatisa omanu vakuavo oku limbuka okuti ovihandeleko via Yehova via sunguluka kuenda ovina viosi a yongola okuti tu vi linga vi pondola oku tu kuatisa etu muẽle. (Tanga Osamo 40:8-10.) Ndaño ceci Satana o lundila loku u talisa ohali kuenda oku u ponda, Yesu wa amamako oku pokola ku Yehova. Eye wa lekisa okuti omunu wa li pua o pondola oku lekisa epokolo liocili ku Yehova.

5. Tu pondola oku lekisa ndati okuti tua sumbila onduko ya Suku?

⁵ Tu lekisa ndati okuti tu kuetele ocisola onduko ya Yehova? Tu pondola oku ci lekisila kovituwa vietu. Yehova o yongola okuti tu kala omanu vamue va kola. (Tanga 1 Petulu 1:15, 16.) Eci ci lomboloka okuti eye lika tu fendela kuenda oku pokola kokuaye lutima wetu wosi. Eci tu lambalaliwa tu likolisilako oku ambata omuenyo wetu ndomo u litava lovina Yehova a tu longisa. Omo lioku ambata omuenyo wetu ndomo u litava lovihandeleko via Yehova, tu eca esivayo konduko yaye. (Mateo 5:14-16) Tua limbuka okuti, ovihandeleko via Yehova viwa kuenda Satana ohembi. Ocili okuti, etu ka tua li puile kuenda tua siata oku lueya. Pole, eci tu lueya, tu likekembela kuenda tu likolisilako oku yuvula oku linga ovina vi tomba onduko ya Suku.—Osamo 79:9.

6. Momo lie Yehova a tu tendela okuti tu vakuesunga ndaño okuti ka tua lipuile?

⁶ Cikale okuti tu lombuavekua ale tu ‘lomeme vikuavo,’ Yehova ecela akandu etu eci tu lekisa ekolelo kocisembi. Oco omunu a kale ufendeli wa Yehova o sukila oku litumbika kokuaye. Eye o tenda Akristão olombuavekua ndomãla vaye vakuesunga kuenda “olomeme vikuavo,” ndakamba vaye vakuesunga. (Yoano 10:16; Va Roma 5:1, 2; Tiago 2:21-25) Omo liaco, ocisembi ci tu kuatisa oku kuata ukamba uwa la Isietu kuenda oku sumbila onduko yaye.

7. Asumũlũho api tu lavoka omo liocisembi?

⁷ Vohutililo Yesu a longisa wa popia hati: “Usoma wove wiye.” Ocisembi ci kuete elitokeko lipi Lusoma wa Suku? Vusoma wa Suku ale vuviali, mua kongela Yesu kuenda eci ci soka 144.000 va nõliwa pokati komanu. Ocisembi ca ecelela okuti omanu vaco va pinduiwa oco va kuate omuenyo kilu. (Esituluilo 5:9, 10; 14:1) Ovo va ka kala ovitunda kuenda va ka viala ongongo kumue la Yesu vokuenda kueci ci soka ohulukãi yanyamo. Vokuenda kuotembo yaco Yehova lekuatiso Liusoma o ka pongolola ongongo oco yi linge ocumbo celau kuenda oku kuatisa omanu vosi oco va li pue.  Afendeli va Yehova kilu kuenda vana va ka kala palo posi va ka linga epata limuamue. (Esituluilo 5:13; 20:6) Yesu o ka kundula Satana kuenda o ka mãlako ovitangi viosi via siata oku kokiwa la Satana.—Efetikilo 3:15.

8. (a) Yesu wa kuatisa ndati olondonge viaye oku kuata elomboloko liokuti Usoma wa Suku u kuete esilivilo lia velapo? (b) Koloneke vilo tu pondola oku kuatisa ndati Usoma?

⁸ Yesu wa kuatisa olondonge viaye oku kuata elomboloko liesilivilo lia velapo Liusoma wa Suku. Wa ci linga ndati? Noke lioku papatisiwa, Yesu wa fetika oku kunda “olondaka viwa Viusoma wa Suku” kolonepa viosi a pita. (Luka 4:43) Eye wa sapuila olondonge viaye oco vi linge olombangi viaye “kasukiyo o kilu lieve.” (Ovilinga 1:6-8) Koloneke vilo, lekuatiso liupange woku kunda Usoma, omanu va kuete epuluvi lioku lilongisa eci catiamẽla kocisembi kuenda oku kala olonungi Viusoma wa Suku. Tu lekisa okuti tu lonungi viocili, poku kuatisa olombuavekua oku kunda olondaka viwa voluali luosi.—Mateo 24:14; 25:40.

9. Momo lie tua kolelela okuti Yehova o ka tẽlisa ocipango caye catiamẽla komanu?

⁹ Olondaka via Yesu viokuti: “Ocipango cove ci lingiwe” vi lomboloka nye? Ovio vilomboka okuti eci Yehova a popia ocina cimue, ci tẽlisiwa muẽle. (Isaya 55:11) Esino lia Satana ka li tateka ovina Yehova a yongola oku tẽlisa. Cipi ca kala ocipango ca Yehova catiamẽla kongongo? Eye wa yonguile okuti vongongo mu yuka omãla va li pua va Adama la Heva. (Efetikilo 1:28) Nda Adama la Heva va file okuti ka va kuatele omãla, ocipango ca Suku catiamẽla koku yukisa ongongo lomãla vavo nda ka ca tẽlisiwile. Omo liaco, Yehova wa ecelela okuti ovo va kuata omãla. Ocisembi ceca komanu vosi va lekisa ekolelo oco va kuate epuluvi lioku li pua kuenda oku kala otembo ka yi pui. Yehova o kuetele ocisola omanu kuenda o yongola okuti tu kuata omuenyo wesanju una a yonguile tunde kefetikilo.

10. Ocisembi ci pondola oku kuatisa ndati omanu vana va fa?

¹⁰ Nye ci popiwa catiamẽla komanu valua va fa okuti, ka va kuatele epuluvi lioku kũlĩha Yehova? Yehova o yongola okuti omanu va kala lomuenyo. Eye o ka pindula omanu vosi va fa. Ocisembi ci ka kuatisa oco ovo va pinduiwe. Handi vali, ovo va ka kuata epuluvi lioku lilongisa catiamẽla ku Yehova kuenda oku kala komuenyo otembo ka yi pui. (Ovilinga 24:15) Yehova eye ono yomuenyo. Eci Yehova a ka pindula omanu vana va fa, eye o ka linga Isiavo. (Osamo 36:9) Vohutililo Yesu a Longisa, eye wa popia okuti Yehova “Isietu o kasi kilu.” (Mateo 6:9) Yehova wa eca ku Yesu ocikele ca velapo coku pindula omanu va fa. Yesu wa popia hati: “Ame ndipinduko haime ndimuenyo.”—Yoano 6:40, 44; 11:25.

11. Cipi ocipango ca Suku catiamẽla ‘kowiñi wakahandangala’?

¹¹ Yesu wa popiavo hati: “Wosi o linga ocipango ca Suku, eye manjange ulume, la manjange ukãi kuenda ina yange.” (Marko 3:35) Suku o yongola okuti omanu vokolofeka viosi, vakuapata osi kuenda vakualimi osi va linga afendeli vaye. Ovo va tukuiwa hati, ‘owiñi wakahandangala, okuti lomue o tẽla oku u tenda.’ Ovo va kolela kocisembi kuenda va yongola oku pokola ku Suku. Handi vali, va eca esivayo kokuaye loku popia vati: “Epopelo li tunda ku Suku yetu, una wa tumãla kocalo kuenda ku Kameme.”—Esituluilo 7:9, 10.

12. Vohutillilo Yesu a linga, nye tu lilongisila kocipango ca Yehova catiamẽla komanu?

 ¹² Vohutililo Yesu a linga, tua lilongisa ovina vialua viatiamẽla ku Yehava kuenda kocipango caye catiamẽla komanu. Catete, tu sukila oku likolisilako oku linga ovina viosi vieca esivayo konduko ya Yehova kuenda oku lekisa esumbilo kokuaye. (Isaya 8:13) Ocilumba cocisembi ca Yesu, ca ecelela okuti tu popeliwa, loku sivaya onduko ya Suku. Ocili okuti onduko ya Yesu yi lomboloka okuti “Yehova Eye Upopeli.” Cavali, Yehova lekuatiso Liusoma waye o ka eca asumũlũho eyilila kocisembi komanu vana va pokola kokuaye. Catatu, tua kolela okuti lacimue ci pondola oku tateka oku tẽlisiwa kuocipango ca Yehova.—Osamo 135:6; Isaya 46:9, 10.

13. Momo lie tu sukilila oku papatisiwa?

¹³ Onjila yimue ya velapo yoku lekisa olopandu omo liocisembi, oku tumbika omuenyo wetu ku Yehova kuenda oku papatisiwa. Poku cilinga, tu lekisa okuti tua kolela kocisembi kuenda “tua tiamẽla ku Yehova.” (Va Roma 14:8) Eci tu papatisiwa, tu pinga ku Yehova oco a tu kuatise oku kuata “utima wa yela.” (1 Petulu 3:21) Yehova o tu tambulula poku tu ĩha asumũlũho eyilila kocisembi. Tua kolela okuti eye o ka tu ĩha ovina viosi a likuminya.—Va Roma 8:32.

14. Momo lie Yehova a tu ĩhila ocihandeleko coku sola omanu vakuavo?

¹⁴ Yehova o vetiyiwa locisola poku linga ovina viosi. Ocipango caye ceci okuti afendeli vaye vo setukula kuenda va li sola pokati. (1 Yoano 4:8-11) Eci tu lekisa ocisola komanu, tu eca uvangi wokuti tu yongola oku kala ‘omãla va Isietu o kasi kilu.’ (Mateo 5:43-48) Ovihandeleko vivali via velapo vievi: Catete oku sola Yehova kuenda cavali, oku sola omanu. (Mateo 22:37-40) Onjila yimue yoku lekisa ocisola komanu, oku va longisa olondaka viwa Viusoma wa Suku. Nda tua kapako ocihandeleko ca Yehova coku sola omanu vakuavo, capiãla enene vamanjetu, ocisola cetu kokuaye ‘ci ka suapo.’—1 Yoano 4:12, 20.

15. (a) Asumũlũho api tua tambula cilo ku Yehova? (b) Asumũlũho api tu ka tambula kovaso yoloneke?

¹⁵ Yehova wa likuminya okuti omo liekolelo tu kuetele ocisembi akandu etu ‘a ecelua.’ Eye ecela akandu etu osi. (Tanga Ovilinga 3:19-21.) Ndomo tua ci konomuisa kefetikilo liocipama cilo, ocisembi ci ecelela okuti Suku o nõla omanu vamue oco va linge omãla vaye kilu. Omanu vaco olombuavekua. (Va Roma 8:15-17) Eye o lalekavo omanu vana okuti vatiamẽla “kolomeme vikuavo” oco va pange onepa kepata liaye palo posi. Noke lioku li pua, va ka pita voseteko ya sulako. Nda ovo va pokola ku Yehova, eye o ka va tendavo ndomãla vaye. (Va Roma 8:20, 21; Esituluilo 20:7-9) Yehova o ka lekisa ocisola komãla vaye o tembo yosi. Ocisembi ci ka amamako oku tu nenela asumũlũho otembo ka yi pui. (Va Heveru 9:12) Yehova wa tu ĩha ombanjaile yilikasi kuenda lomue o pondola oku yi tambula kokuetu.

16. Ocisembi ci tu yovola kovina vipi?

¹⁶ Nda tua likekembela akandu etu, Satana ka ka tẽla oku linga cimue, oco a tu tateke oku panga onepa kepata lia Yehova. Yesu wa ‘fa lika onjanja yimosi.’ Ocisembi ca fetiwa otembo ka yi pui. (Va Heveru 9:24-26) Adama wa tu nenela olofa pole, ocilumba ca Yesu ci ka tu ĩha omuenyo ko pui. Ocisembi ci pondola oku tu yovola koluali lua Satana kuenda kusumba wolofa.—Va Heveru 2:14, 15.

17. Ocisola ca Yehova ci lomboloka nye kokuove?

¹⁷ Olohuminyo via Suku olonjanja viosi vi tẽlisiwa. Ndeci ovihandeleko via Yehova viatiamẽla kovina via lulikiwa ka vi pongoloka, Yehova lalimue eteke a ka pongolokavo. Eye lalimue eteke a ka tu sumuisa. (Malakiya 3:6) Yehova Suku wa tu ĩha ovina vialua okuti ombanjaile yomuenyo yi sule. Eye wa tu ĩha ocisola caye. “Tua kũlĩha kuenda tua kolela kocisola Suku a tu kuetele.” (1 Yoano 4:16) Olohuminyo viaye olonjanja viosi vi tẽlisiwa. Ndopo ongongo yi ka kala ocumbo celau. Omanu vosi va ka setukula ocisola ca Yehova kuenda oku li sola pokati. Kuenje, afendeli vaye kilu lava va ka kala palo posi va ka popia vati: “Esivayo, ulamba, olondunge, olopandu, esumbilo, unene kuenda ongusu, vi kale la Suku yetu oloneke vi enda ño-o hũ ka vi pui. Amene.”—Esituluilo 7:12.