1. Nye Yesu a sapuila kolondonge viaye catiamẽla kesulilo kuenda elungulo lipi a va ĩha?

 ECI Yesu a kala oku panda kolofa, olondonge viaye vikuãla vio pula vati: “Yipi yi ka kala ondimbukiso . . . yesulilo lioluali?” (Mat. 24:3) Citava okuti olondonge via kala oku pula ndomo via ponduile oku kũlĩha otembo o Yerusalãi ya laikele oku sulila kuenda ndomo onembele yayo ya laikele oku nyõliwa. Vetambululo Yesu a eca ka mua kongelele lika oku nyõliwa kuo Yerusalãi kuenda onembele yayo, pole wa tukulavo ‘esulilo lioluali’ muna etu tua tunga. Catiamẽla kesulilo lioluali, Yesu wa popia hati: “Catiamẽla keteke liaco ale owola, lomue wa yi kũlĩha, ndaño ovangelo kilu, ndaño Omõla, te lika Isia.” Kuenje wa lungula olondonge viaye ndoco, “amamiko oku lunguka” kuenda “amamiko oku lavulula.”—Mar. 13:32-37.

2. Momo lie ca kuatela esilivilo Kakristão vokocita catete oku amamako oku lavulula?

² Akristão va Yudea kocita catete, va sukilile oku lavulula; oco va popele ovimuenyo viavo. Yesu wa sapuila olondonge viaye okuti ovo va sukilile oku limbuka otembo o Yuda ya laikele oku nyõliwa. Eye hati: “Eci vu mola okuti o Yerusalãi ya ñualiwa lasualali, limbuki okuti enyõleho liayo li kasi ocipepi.” Ovo va sukilile oku pokola kelungulo lia Yesu kuenda oku ‘tilila kolomunda.’ (Luka 21:20, 21) Vana va pokola kelungulo  liaco, veya oku popeliwa eci va Roma va lundula o Yerusalãi.

3. Nye tu konomuisa vocipama cilo?

³ Koloneke vilo, tu kasivo kotembo yesulilo lioluali lulo luvĩ. Omo liaco, tu sukila oku lunguka kuenda oku lavulula. Vocipama cilo, tu konomuisa ndomo tu pondola oku lekisa esunguluko osimbu tu amamako oku lavulula kovina vi pita voluali, ndomo tu lilava kuenda ndomo tu talavaya ciwa lotembo ya tu kambelako.

4. Momo lie tu sukilila oku lekisa onjongole poku mola ndomo ovina vi pita voluali vi kasi oku tẽlisa ocitumasuku Cembimbiliya?

⁴ Tu kuete esunga liwa lioku kũlĩha ndomo ovina vi pita voluali vi kasi oku tẽlisa ocitumasuku Cembimbiliya. Ndeci, Yesu wa tu sapuila ovina via laikele oku pita oco vi tu kuatise oku kũlĩha okuti esulilo lioluali lua Satana lu kasi ocipepi. (Mat. 24:3-14) Upostolo Petulu o tu vetiya oku luluvalela koku tẽlisiwa kuovitumasuku, oco ekolelo lietu liamameko oku pamisiwa. (2 Pet. 1:19-21) Elivulu lia sulako Liembimbiliya li fetika lolondaka vit: “Olondaka evi ovina Yesu Kristu a situlula cilo. Yesu wa tambula ovina viaco ku Suku oco a lekise kapika va Suku ovina via laikele oku pita ndopo.” (Esit. 1:1) Omo liaco, tu yongola oku kũlĩha ovina vi kasi oku pita voluali lulo cilo kuenda oku kũlĩha ndomo ovina viaco vi kasi oku tẽlisa ovitumasuku Viembimbiliya. Kuenje tu sanjukila oku sapuila ovina viaco komanu vakuavo.

5. Nye tu sukila oku yuvula pole, nye tu sukila oku linga? (Talavo oviluvialuvia.)

⁵ Eci tu vangula catiamẽla kovitumasuku Viembimbiliya, tu yuvuli oku vangula ovina ka tua kũlĩhĩle. Momo lie? Momo ka tu yongola oku popia ovina vi tepa omunga vekongelo. Ndeci, pamue tu yeva olombiali oku vangula catiamẽla koku yuvula ombuanja loku nena ombembua kuenda oku kolapo. Oco tu yuvule oku popia okuti olondaka viaco vi kasi oku tẽlisa ocitumasuku ci sangiwa 1 Va Tesalonike 5:3, tu sukila oku kũlĩha ovolandu okaliye a siata oku sandekiwa. Eci tu tiamisila ombangulo yetu kalivulu a sandekiwa locisoko ca Yehova, tu kuatisa ekongelo oku amamako lomunga loku kuata ‘ovisimĩlo vimuamue.’—1 Va Kor. 1:10; 4:6.

6. Nye tu lilongisila kolondaka vi sangiwa 2 Petulu 3:11-13?

⁶ Tanga 2 Petulu 3:11-13. Upostolo Petulu o tu kuatisa oku sokolola kesunga lieci tu sukilila oku konomuisa ovitumasuku Viembimbiliya. Eye o tu lungula oco tu ivaluke “olonjanja viosi oku tukuluka kueteke lia Yehova.” Momo lie? Hamomoko okuti tu yongola oku kũlĩha “eteke lowola” Yehova a ka nena o Harmagedo, pole, esunga liaco lieli okuti, tu yongola oku talavaya ciwa lotembo tu kuete poku “kola loku lekisa ovilinga vioku sumbila Suku.” (Mat. 24:36; Luka 12:40) Volondaka vikuavo, tu yongola oku amamako oku lekisa ovilinga viwa, loku kolela okuti alikolisilo tu linga kupange wa Yehova a situlula ocisola calua tu u kuetele. Oco tu ci linge tu sukila oku lilava.

7. Tu lekisa ndati okuti tu kasi oku lilava? (Luka 21:34)

⁷ Yesu wa sapuilile kolondonge viaye oco ka va ka lilave lika kovina via kala oku li pita voluali, pole, va sukililevo oku lilava ovo muẽle. Elungulo liaco li sangiwa ku Luka 21:34. (Tanga.) Kũlĩhĩsa olondaka via Yesu  viokuti: “lilavi.” Omunu o lilava, wa kapako ovina viosi vi kapa kohele ukamba waye la Yehova kuenda o yuvula ovina viaco. Lonjila eyi, eye amamako oku kala vocisola ca Suku.—Olosap. 22:3; Yuda 20, 21.

8. Elungulo lipi upostolo Paulu a eca Kakristão?

⁸ Upostolo Paulu wa lungula Akristão oco va lilave. Ndeci, eye wa sapuila Akristão ko Efeso hati: “Lavululi oco ka vu ka endaendi ndava ka va kuete olondunge, puãi te ndomanu va kuete olondunge.” (Va Efe. 5:15, 16) Satana olonjanja viosi o seteka oku nyõla ukamba wetu tu kuete la Yehova kuenje Embimbiliya li tu lungula hati, “amamiko oku limbuka cipi ocipango ca Yehova,” nda tua ci linga tu ka liteyuila koloseteko viosi via Satana.—Va Efe. 5:17.

9. Tu limbuka ndati ocipango ca Yehova kokuetu?

⁹ Embimbiliya ka lilombolola ovina viosi vi kapa kohele ukamba wetu la Yehova. Olonjanja vimue olonjila tu nõla ka vi tukuiwa Vovisonehua. Oco tu litunde ciwa kolonjila tu nõla, tu sukila oku limbuka “ocipango ca Yehova.” Tu pondola oku ci linga poku tanga Ondaka ya Suku eteke leteke, loku sokolola kueci tua tanga. Eci tu kuata elomboloko liocipango ca Yehova kuenda oku likolisilako oku kuata “ovisimĩlo via Kristu,” tu ka endaenda ‘ndomanu va kualondunge,’ ndaño ceci ka kuli olonumbi vi lekisa eci tu sukila oku linga. (1 Va Kor. 2:14-16) Olohele vimue via leluka oku vi limbuka, pole, vikuavo sio.

10. Ovina vipi vi koka ohele tu sukila oku yuvula?

¹⁰ Ovina vimue tu sukila oku yuvula mua kongela ocitiokoso, oku nyua calua, oku vangula ovina vi sumuisa, kuenda oku tala ovina viungangala, ovina viumbondo, lovina vikuavo. (Osa. 101:3) Unyãli wetu Eliapu, olonjanja viosi o sandiliya apuluvi oku kapa kohele ukamba tu kuete la Yehova. (1 Pet. 5:8) Nda ka tua lavuluile, Satana o pondola oku kũla vovisimĩlo vietu lovutima wetu, ombuto yonya, ocipululu, esuvu, oku lipanda, ocikumbiti kuenda oku yuvula oku kala ukuacili. (Va Gal. 5:19-21) Kefetikilo ovina viaco vi moleha ndu okuti ka vi koki ohele kokuetu. Pole, nda lonjanga yalua ka tua yuvuile ovina viaco, ovio vi ka amamako oku kula ndocikũla cimue ci nyõla kuenje ci koka ovitangi.—Tia. 1:14, 15.

11. Ohele yipi tu sukila oku yuvula kuenda momo lie?

¹¹ Onjanjo yimue yi koka ohele akamba vãvi? Kũlĩhĩsa ocitangi eci. Kupange woku sanda eteku, ove o talavaya lomunu umue okuti Hambangiko ya Yehova. Ove o yongola okuti omunu waco o kuata ovisimĩlo via sunguluka viatiamẽla Kolombangi Via Yehova viokuti vakuahenda kuenda va kapako vakuavo. Olonjanja vimue citava okuti, o tava okulia kumosi lomunu waco. Kuenje ci kala ocituwa ene okulila kumosi. Omunu waco, ombangulo yaye o yi tiamisila lika kovina viumbondo kuenda kefetikilo ove o yuvula oku yevelela ombangulo yaco. Pole, vokuenda kuotembo ku yuvula vali ombangulo yaco. Noke eteke limue, eye oku laleka oku nyua ovina vi koluisa noke liupange kuenje ove o tava. Kaliye ove o fetika oku tava kolombangulo viaye. Kuenje ku ka tumala otembo yalua, o ka lekisa ovilinga vimuamue ndevi viomunu waco. Ocili okuti, etu tua kuahenda kuenda tua sumbila omanu vosi, pole tu ivaluki okuti tu pondola oku yapuisiwa la vana tu nõla oku pita lavo otembo. (1 Va Kor. 15:33) Nda tua lilava ndeci Yesu a tu lungula, tu ka yuvula oku  linga ukamba la vana ka va kapeleko olonumbi via Yehova. (2 Va Kor. 6:15) Kuenje tu ka limbuka ohele loku yi yuvula.

12. Nye olondonge via Yesu via linga osimbu va kala oku lavoka esulilo lioluali?

¹² Olondonge via Yesu via li tumbikile kupange osimbu via kala oku lavoka esulilo lioluali. Yesu wa ecele kokuavo upange umue oco va u linge. Eye wa va handeleka oku kunda olondaka viwa “vo Yerusalãi, vo Yudea yosi kuenda vo Samaria toke kasulilo o kilu lieve.” (Ovil. 1:6-8) Wa kala upange umue wa luile calua! Omo lioku litumbika kupange waco, ovo va talavaya ciwa lotembo yavo.

13. Momo lie tu sukilila oku talavaya ciwa lotembo yetu? (Va Kolosai 4:5)

¹³ Tanga Va Kolosai 4:5. Oco tu lilave tu sukila oku sokolola ndomo tu talavaya ciwa lotembo yetu. Momo “ovina viya ño ocipikipiki” vi pondola oku pita la vosi yetu. (Uku. 9:11) Kuenje tu pondola oku fa vocipikipiki.

14-15. Tu talavaya ndati ciwa lotembo yetu? (Va Heveru 6:11, 12) (Talavo ociluvialuvia.)

¹⁴ Tu pondola oku talavaya ciwa lotembo yetu poku linga ocipango ca Yehova loku pamisa ukamba wetu laye. (Yoa. 14:21) Tu  sukila oku ‘kala vakuepandi, loku pama, olonjanja viosi tu lingi vakuambili kupange wa Ñala.’ (1 Va Kor. 15:58) Momo nda tua fa, ale esulilo lioluali lulo lueya, ka tu lingi vali upange laumue wa Yehova.—Mat. 24:13; Va Rom. 14:8.

¹⁵ Koloneke vilo, Yesu o kasi oku amamako oku songuila olondonge viaye osimbu va kunda catiamẽla Kusoma wa Suku voluali luosi. Eye o kasi oku tẽlisa ohuminyo yaye. Pocakati cocisoko ca Yehova, Yesu o tu pindisa ndomo tu kunda kuenda o tu ĩha ovimalẽho tu sukila oco tu kunde olondaka viwa. (Mat. 28:18-20) Etu tu linga eci Yesu a lavoka kokuetu poku likolisilako oku kunda, loku longisa vakuetu kuenda oku amamako oku lavulula osimbu tu lavoka Yehova oku nena esulilo lioluali lulo. Osimbu tu kapako elungulo li sangiwa kukanda ku Va Heveru 6:11, 12, tu ka amamako oku kolela kelavoko lietu “toke kesulilo.”—Tanga.

16. Nye tua nõlapo oku linga?

¹⁶ Yehova wa sokiya eteke kuenda owola yoku nena esulilo lioluali lulo lua Satana. Eci eteke liaco liya, Yehova o ka tẽlisa muẽle ovitumasuku eye a soneha Vondaka yaye. Pamue tu sima okuti esulilo lioluali lulo li kasi oku cilua. Pole, eteke lia Yehova ‘ka li ka cilua!’ (Hav. 2:3) Omo liaco, tu nõlipo oku ‘amamako oku kevelela ku Yehova,’ poku “lekisa ocituwa coku kevelela ku Suku [yetu] yepopelo.”—Mika 7:7.