1. Ondaka ya Suku yi tu kuatisa ndati?

ETU tu pondola oku yula ovitangi viosi tu liyaka lavio, omo Yehova eye Ulongisi wetu wa Velapo. (Isa. 30:20, 21) Ondaka ya Suku yi tu ĩha cosi tu sukila oco tu ‘loñolohe’ kuenda ‘oku liangiliyila upange wosi uwa.’ (2 Tim. 3:17) Eci tu kapako alongiso Embimbiliya komuenyo wetu, tu velapo kolondunge okuti vana va kuãi “olondunge violuali lulo,” ci sule.—1 Va Kor. 3:19; Osa. 119:97-100.

2. Nye tu lilongisa vocipama cilo?

² Ndomo tu ka ci lilongisa, olondunge violuali olonjanja vimue vi tu vetiya oku kuama olonjongole vietimba. Kuenje pamue ci tĩla oku tamãlala lovisimĩlo kuenda ovituwa via vana va panga onepa koluali. Eli olio esunga lieci Embimbiliya li popela hati: “Lunguki okuti lomue o vu yapuisi lolondunge violuali kuenda ovisila viomanu.” (Va Kol. 2:8) Vocipama cilo, tu lilongisa ovohembi amue avali okuti a siata calua pokati komanu. Kolonepa viaco, tu ka limbuka esunga lieci olondunge violuali vi tendiwila nduveke kuenda esunga lieci olondunge Viondaka ya Suku via velelapo ovina violuali.

3-4. Apongoloko api atiamẽla kovituwa vioku lipekela a pita kefetikilo liocita 20?

³ Kofeka yo Estados Unidos, kefetikilo liocita 20, kua limbukiwa okuti ovisimĩlo viomanu viatiamẽla koku lipekela via pongoloka calua. Kosimbu, valua va tavele okuti oku lipekela ocina cimue ci lingiwa lika lava va kuele kuenda ka ca tavele oku ci vanguila pokati komanu. Pole, ovituwa  viaco ka vi kasi oku kuamiwa vali kuenje ovisimĩlo ka via sungulukile via lisandula.

⁴ Vocakati cocita 20, kua pita epongoloko limue linene kovituwa viomanu. Olofilme vimue, olomapalo, ovisikilo kuenda alitalatu a patekiwa volokololo, vi vetiya lika ovisimĩlo vioku lipekela. Vokuenda kuotembo yaco, olomiluko vimue via fetika oku lingiwa lonjila yimue yi vetiya oloñeyi vietimba kuenda ovowalo amue ka a sungulukile. Embimbiliya lia popele ale okuti koloneke via sulako, omanu va laikele oku kala “vakuakusola ayele.”—2 Tim. 3:4.

5. Onjila ndomo omanu va tendaile oku lipekela, ya pongoloka ndati tunde kunyamo wo 1960?

⁵ Okupisa kunyamo wo 1960, etendelo liava ka va tokekisile olohuela kuenda etendelo lialume va lipekela lalume lia livokiya, oku kongelamo olohueli vi linyãla. Kua fetika oku lekisiwa ovitalukilo vialua okuti vi lekisa oku lipekela, pole, omanu va ci tenda ndu okuti hacĩviko. Onima yipi yeyililako? Usonehi umue wa popia hati, eci ci koka ovitangi vialua nda omanu ka va kuama olonumbi via sunguluka. Ndeci, ci koka oku litepa kuapata, esumuo lialua kuenda ci vetiya omanu oku tala ovina viumbondo kuenje “cosi eci ciyilila omo omanu ka va kapeleko olonumbi via sunguluka viatiamẽla kolohuela.” Ovitangi vikuavo, ovovei a sambuka ndeci o SIDA. Cosi eci ci lekisa okuti, eci oluali lu tenda okuti ca sanguluka komuenyo, uveke.—2 Pet. 2:19.

6. Ocisimĩlo coluali catiamẽla koku lipekela lonjila yimue ka ya sungulukile, ci tẽlisa nye?

⁶ Ocisimĩlo coluali catiamẽla koku lipekela lonjila yimue ka ya sungulukile, ci tẽlisa ocimãho ca Satana. Eye o sanjuka oku mola ndomo omanu va tenda oku lipekela lonjila yimue ka yi sanjuisa Suku. (Va Efe. 2:2) Nda omanu va litumbika kevĩho liukahonga ci lekisa okuti ka va kapeleko ombanjaile ya Yehova yoku kuata omãla, handi vali ka va pondola oku kuata omuenyo ka upui.—1 Va Kor. 6:9, 10.

7-8. Momo lie olonumbi Viembimbiliya viatiamẽla koku lipekela via velelapo ocisimĩlo coluali?

⁷ Omanu vana va tava kolondunge violuali va sepula olonumbi Viembimbiliya kuenje va vi tenda okuti ka vi kuete esilivilo. Omanu vaco va pondola oku lipula ndoco: ‘Nda Suku wa tu panga lonjongole yoku lipekela, momo lie a tu kisikila oku likandangiya?’  Ovo va linga epulilo eli, omo lioku sima okuti nda omunu o yongola oku linga cimue, citava okuti o ci linga. Pole, ocisimĩlo Cembimbiliya ca litepa. Embimbiliya li tu sapuila okuti, ka tu pondola oku pokola kolonjongole vietu viosi, pole, tu sukila oku tamãlala lolonjongole vĩvi. (Va Kol. 3:5) Handi vali, Yehova wa eca ombanjaile yolohuela oco okuti, oloñeyi vioku lipekela vi tẽlisiwa lonjila yimue ya sumbiwa. (1 Va Kor. 7:8, 9) Lonjila eyi, olohueli vi pondola oku lipekela okuti ka pa kala etateka, ale esakalalo lina lia siata komanu va linga ukahonga.

⁸ Ocisimĩlo coluali ca litepa leci Embimbiliya li popia catiamẽla konjila ya sunguluka yoku lipekela. Olio li popia okuti oku lipekela ku lingiwe lonjila yimue yi nena esanju. (Olosap. 5:18, 19) Embimbiliya li popiavo hati: “Omunu lomunu a kũlĩhe ndomo a tata etimba liaye loku kola kuenda esumbilo, halokulivelako oloñeyi viukahonga ndeci ca siata pokati ka vakualofeka, vana okuti ka va kũlĩhĩle Suku.”—1 Va Tes. 4:4, 5.

9. (a) Afendeli va Yehova vokuenda kuocita 20, va vetiyiwa ndati oku kuama olondunge via velapo Viondaka ya Suku? (b) Elungulo lipi li sangiwa ku 1 Yoano 2:15, 16? (c) Ndomo ca tangiwa ku Va Roma 1:24-27, ovina vipi vĩvi tu sukila oku yuvula?

⁹ Vokuenda kuocita 20, afendeli va Yehova ka va tavele oku yapuisiwa lovohembi omanu vana “ka va limbuka ovituwa viwa.” (Va Efe. 4:19) Ovo va likolisilako oku kuama olonumbi via Yehova. Utala Wondavululi, 15 ya Kupemba wo 1926, wa lomboluile okuti, “ulume, ale ukãi okuti ka kuelele o sukila oku liyelisa kovisimĩlo kuenda kovituwa ca piãla enene eci a kala lomunu una okuti, haweliyayeko.” Afendeli va Yehova va kuama olondunge via velapo Viondaka ya Suku, pole, ka va kuamele ovilinga vĩvi violuali. (Tanga 1 Yoano 2:15, 16.) Omo liaco, tu pandula calua omo tu kuete Ondaka ya Suku! Tu ecavo olopandu ku Yehova omo lioku tu ĩha okulia kuespiritu, kuna ku tu kuatisa oku tamãlala lolondunge violuali lulo viatiamẽla kovisimĩlo vĩvi vioku lipekela, oco ka tu ka yapuisiwe. *—Tanga Va Roma 1:24-27.

10-11. Nye Embimbiliya li popia okuti oco ca laikeile oku pita vokuenda kuoloneke via sulako?

¹⁰ Embimbiliya lieca elungulo liokuti koloneke via sulako, omanu va laikeile oku kala “vakuakulisola ovo muẽle.” (2 Tim. 3:1, 2) Omo liaco, ka tu komõha eci tu mola oluali oku vetiya oku kuata ocituwa coku livelisapo. Elivulu limue, lia lombolola okuti okupisa kunyamo 1970, “kua kala alivulu alua a eca ekuatiso.” Amue pokati kalivulu aco, “a lombolola okuti omunu ka pondola oku linga epongoloko lalimue kokuaye muẽle, ale oku sima okuti kuli cimue cĩvi kokuaye.” Elivulu likuavo, lia popia ndoco: “Lisola ove muẽle, omo umunu umue wa posoka calua.” Elivulu liaco, liamisako hati, “omunu lomunu eye muẽle o litumĩla loku linga ovina a sima okuti via sunguluka kuenda viwa.”

¹¹ Anga hẽ ondaka yaco wa yi yevele ale? Satana wa vetiya Eva oku linga ocina cimuamue. Eye wa popia okuti Eva wa ponduile oku kala nda ‘Suku, loku kulĩha eci ciwa leci cĩvi.’ (Efet. 3:5) Koloneke vilo, omanu va lisokolola lika ovo muẽle va yongola lika oku kuama ovisimĩlo viavo kuenda ka va yongola okuti omunu umue, ale Suku o va sapuila eci ciwa leci cĩvi. Ocituwa caco ca siata oku muiwa ca piãla enene konjila ndomo omanu va tenda olohuela.

12. Cipi ocisimĩlo coluali catiamĩla kolohuela?

 ¹² Embimbiliya lieca elungulo kulume lukãi oco va lisumbile pokati kuenda oku sumbilavo olohuela viavo. Olio li vetiya olohueli oku amamako oku kala pamosi volohuela viavo, poku popia hati: “Ulume o sia isiaye la inaye hã ha litokeka lukãi waye, kuenje va linga etimba limuamue.” (Efet. 2:24) Pole vana va kasi oku vetiyiwa lolondunge violuali va kuete ovisimĩlo via litepa viokuti ohueli lohueli yi pitise lika kovaso olonjongole viaye muẽle. “Kolofeka vimue,” eci omunu a kuela o linga “ohuminyo kovaso omanu yokuti ‘osimbu va kasi lomuenyo va kala pamosi toke eci olofa vi va tepa.’” Omanu vamue va pongolola ohuminyo eyi poku popia okuti, va kala pomosi nda vamamako oku li sola. Omo okuti omanu ka va kapeleko olohuela ndocina cimue ci kala otembo yosi, apata alua a siata oku litepa kuenje valua va kala lesumuo lialua. Eci ci lekisa okuti, ocisimĩlo coluali catiamẽla kolohuela, uveke.

13. Momo lie Yehova a suvukila omanu vakuepela?

¹³ Embimbiliya li popia hati: “Yehova o nyale ukuepela.” (Olosap. 16:5) Momo lie Yehova a suvukila vakuepela? Esunga limue lieli okuti vana va lisole lika ovo muẽle va kasi oku setukula ocituwa ca Satana coku lekisa epela. Sokolola ndomo Satana a lekisa epela poku sima okuti Yesu, una wa talavaya la Suku koku lulika ovina viosi, u fendela! (Mat. 4:8, 9; Va Kol. 1:15, 16) Ovina evi, vi eca uvangi wokuti olondunge violuali oku vi sokisa levi via Suku, uveke.

14. Elivulu lia Va Roma 12:3, li tu kuatisa ndati oku kuata ocisimĩlo ca sunguluka catiamẽla kokuetu?

¹⁴ Embimbiliya li tu kuatisa oku kuata ocisimĩlo ca sunguluka catiamẽla kokuetu muẽle. Olio li lekisa okuti hacĩviko oku lisola etu muẽle. Yesu wa popia hati: “Sola ukuẽle ndeci o lisole ove muẽle,” ci lekisa okuti asakalalo etu tu sukila oku a tenda lonjila yimue ya sunguluka. (Mat. 19:19) Embimbiliya ka li  tu longisa okuti etu tua velapo, vakuetu va sule. Pole, li tu sapuila hati: “Ko ka lingi cimue loku hoya pamue oku lipanda, pole, loku omboka tendi vakuene okuti va velapo ene vu sule.”—Va Fil. 2:3; tanga Va Roma 12:3.

15. Momo lie o popela okuti elungulo Liembimbiliya lioku yuvula oku livelisapo li kuete esilivilo lialua?

¹⁵ Omanu vana va litukula okuti va tanga calua, va tenda alungulo Embimbiliya, nduveke. Ovo va sima okuti nda wa tenda vakuene okuti va velapo ove o sule, va ku lavisa. Pole, nye ca siata oku yililako omo liovisimĩlo evi vĩvi violuali lua Satana? Nye ove wa siata oku limbuka? Anga hẽ omanu vakuepela va siata oku kuata esanju? Anga hẽ va kuete esanju vepata? Va kuete hẽ akamba vocili? Anga hẽ va kuete ukamba wa pama la Suku? Ndomo wa siata oku ci mola, nye ca siata oku eca onima yiwa, oku kuama olondunge violuali lulo, ale olondunge vi sangiwa Vondaka ya Suku?

16-17. Kovina vipi tu sukilila oku eca olopandu ku Yehova kuenda momo lie?

¹⁶ Omanu vana va kuãi olonumbi via vana oluali lu litenda okuti va kuete olondunge, va sokisiwa lomunu umue wa nyelela o pinga olonumbi komunu ukuavo okuti, wa nyelelavo. Yesu poku popia eci catiamẽla komanu vana va litendele okuti va kuete “olondunge” koloneke viaye, wa popia hati: “Ovo asongui olomeke. Nda omeke yi songuila omeke yikuavo, vosi yavo va kupukila vocitunu.” (Mat. 15:14) Omo liaco, Suku o tenda olondunge violuali nduveke.

¹⁷ Olonumbi Viembimbiliya olonjanja viosi “vi silivila koku tu longisa, koku tu pisa, koku suñamisa ovina loku tu pindisila vesunga.” (2 Tim. 3:16, etosi.) Tu pandula calua Yehova omo okuti pocakati cocisoko caye wa siata oku tu teyuila kolondunge violuali lulo! (Va Efe. 4:14) Okulia kuespiritu a siata oku tu ĩha ku tu kuatisa oku kakatela kolonumbi Viondaka yaye. Esumũlũho limue linene oku songuiwa lolondunge via Yehova vi sangiwa Vembimbiliya.