1. Momo lie ku vamue ca tĩlila oku lilongisa?

KOLONEKE vilo, oco omunu a kuate cimue coku litekula, o sukila oku talavaya calua. Valua pokati ka vamanji va talavaya olowola vialua oco va ece kepata liavo ovina va sukila ndeci okulia, uwalo kuenda ocitumãlo coku kala. Vakuavo va tunda omẽle yalua oku enda kupange kuenje va tiuka tupu konjo ekumbi lia enda. Vamue va linga upange u kavisa calua, oco va tekule apata avo. Kuenje kesulilo lieteke, va lembuka tupu va kava calua! Noke ka va kuata vali ongusu yoku lilongisa.

2. Vapuluvi api wa siata oku sanda otembo yoku lilongisa?

² Ocili okuti, tu sukila oku sanda otembo yoku lilongisa Ondaka ya Suku kuenda alivulu etu. Eci ci kuete esilivilo nda tu yongola oku kuata ukamba uwa la Yehova kuenda omuenyo ko pui! (1 Tim. 4:15) Vamue eteke leteke komẽle noke lioku pasuka, va linga elilongiso liavo osimbu konjo kuoha kuenda utue wa talala. Vakuavo kesulilo lieteke oco va lilongisa loku sokolola kovina va tanga Vembimbiliya kuenda valivulu etu.

3-4. Apongoloko api a siata oku lingiwa atiamẽla kovina tu tanga levi tu tala kuenda momo lie?

³ Pamue o popia okuti, ca velapo oku sanda otembo yoku lilongisa. Pole, ovina vipi tu sukila oku lilongisa? Ale o popia okuti ‘kuli ovina vialua vioku tanga.’ ‘Kokuange ka ci leluka oku tanga ovina viosi.’ Ku vamue ci leluka oku tanga alivulu osi kuenda oku tala olovideo viosi, pole, ku vamanji vakuavo ka ci leluka oku ci linga. Osungu Yakulu Yolombangi Via Yehova ya ci kũlĩhavo. Eli olio esunga lieci Osungu  Yakulu ya lingila esokiyo lioku tepulula ovina vi tangiwa vopapelo levi vio internet.

⁴ Ndeci, ka tua siatele oku tambula vali o Anuário das Testemunhas de Jeová, momo ovolandu alua a vetiya a sangiwa ale vo jw.org^® kuenda vovipama vio JW Broadcasting^® viosãi losãi. Utala Wondavululi wowiñi kuenda o Desperti!, cilo vi sandekiwa lika lutatu vunyamo. Apongoloko aco, ka a lingiwile oco tu kuate otembo yalua yoku linga ovina ka vi pangi onepa kefendelo lia Yehova. Ocimãho capongoloko aco, ceci okuti tu kuata otembo yoku tiamisila utima ‘kovina via velapo.’ (Va Fil. 1:10) Tu ka lilongisa ndomo o pondola oku kuata otembo yoku lilongisa kuenda ndomo o pondola oku kuatisiwa lelilongiso liaco.

5-6. Alivulu api tu sukila oku lilongisa lutate?

⁵ Vovina via velapo mua kongela nye? Tu sukila oku sokiya otembo yoku lilongisa Ondaka ya Suku. Ovipama Viembimbiliya vi tangiwa vekongelo osemana losemana via tepuluiwa, oco tu kuate otembo yalua yoku sokolola kovina tua tanga loku ecelela okuti tu linga akonomuiso akuavo. Ocimãho cetu ka ci ka kale lika coku tanga lonjanga ovipama viaco, pole, tu ecelela okuti esapulo Liembimbiliya li vetiya utima wetu kuenda oku pamisa ukamba wetu la Yehova.—Osa. 19:14.

⁶ Ovina vipi tu sukila oku lilongisa lutate? Tu sukila oku pongiya ovipama Viutala Wondavululi Welilongiso, ovipama Vielilongiso Liembimbiliya Vekongelo kuenda ovipama vikuavo. Tu sukilavo oku tanga ovipama viosi Viutala Wondavululi wowiñi kuenda vio Despertai!

7. Anga hẽ tu sumua nda ka tu tẽla oku lilongisa ovina vi sangiwa vonumbi yetu yo Internet kuenda vo JW Broadcasting?

⁷ Pamue o popia okuti ‘ciwa,’ ‘pole, nye ci popiwa kovipama viosi vi sangiwa vonumbi yetu yo jw.org kuenda vina vi lekisiwa vo JW Broadcasting? Ocili okuti mu sangiwa ovina vialua!’ Kũlĩhĩsa ocindekaise eci: Vo Bare yimue mu sangiwa okulia kualua kupepa. Pole, omanu va enda vo Bare yaco pamue ka va li okulia kuosi ku sangiwamo. Ovo va lia lika cina va tẽla. Cimuamue haico okuti, nda ove ku tẽla oku tanga ovina viosi vi sangiwa vonumbi yetu yo Internet, ku ka sumue. Tanga, ale tala ovina vi kasi vepondolo liove. Kaliye tu kũlĩhĩsa ovina via kongela velilongiso kuenda onima tu kuata poku linga elilongiso lietu.

8. Onjila yipi tu kuama poku lilongisa Utala Wondavululi kuenda ci pondola oku tu kuatisa ndati?

⁸ Osimbu o lilongisa tiamisila utima kovina o tanga oco upeko esilivilo. Oku lilongisa ka ci lomboloka oku tanga ño lonjanga, loku taya atambululo. Ndeci, poku pongiya Utala Wondavululi, tete kũlĩhĩsa onepa yi popia hati, ovina tu lilongisa yi kasi kefetikilo liocipama. Noke kũlĩhĩsa osapi yocipama, kumue lotulosapi tuaco kuenda apulilo oku pitulula. Kuenje tanga ocipama cosi levando kuenda utate. Luluvalela kolondaka via tete viovinimbu. Olondaka viaco via tete, vi ku kuatisa oku limbuka etosi lia velapo liocinimbu caco. Poku tanga ocipama caco, sokolola ndomo ocinimbu locinimbu ci likuata lotulosapi kuenda osapi ya velapo yocipama. Taya olondaka viosi via ku tatama kuenda atosi o yongola oku konomuisa.

9. (a) Momo lie tu sukilila oku tiamisila utima kovisonehua eci tu lilongisa Utala Wondavululi kuenda ci lingiwa ndati? (b) Ndomo ca tangiwa kelivulu lia Yehosua 1:8, nye tu sukila oku linga noke yoku tanga ovisonehua?

 ⁹ Elilongiso Liutala Wondavululi li tu kuatisa oku kuata elomboloko liasuapo Liembimbiliya. Omo liaco, tiamisila utima kovisonehua, ca piãla enene vina vi ka tangiwa loku lomboluiwa. Limbuka ndomo ocisonehua caco ci li kuata letosi lia velapo liocinimbu. Handi vali, osimbu o tanga sokolola lutate ndomo o pondola oku kapako ocisonehua caco komuenyo wove.—Tanga Yehosua 1:8.

10. Ndomo ca tangiwa ku Va Heveru 5:14, momo lie olonjali vefendelo liepata, vi sukilila oku pindisa omãla vavo ndomo va lilongisa loku linga akonomuiso?

¹⁰ Ocili okuti, olonjali vi yongola okuti omãla vavo va kuata esanju poku linga Efendelo Liepata olosemana viosi. Ndaño okuti olonjali vi pondola oku sokiya ovina va yongola oku lilongisa, ovo ka va sukila oku luvikiya, ale oku linga esokiyo limue lilikasi. Olonjanja vimue, vefendelo liepata citava oku tala ovipama vio JW Broadcasting, ale oku linga esokiyo likuavo ndeci, oku soneha ociluvialuvia cocimbaluku ca Noha, momo eci ci kuatisa omãla oku kũlĩha ndomo va lilongisa. Ovo va sukila oku kũlĩha ndomo va pondola oku pongiya olohongele, ale ndomo va linga akonomuiso eci va pulisiwa kosikola ovina viatiamẽla Kembimbiliya. (Tanga Va Heveru 5:14.) Nda omãla va kuete ocituwa coku pongiya ovipama violohongele, ci ka leluka kokuavo oku kapako ovina va yeva, ci kale kolohongele viekongelo, vimbo kuenda viofeka kuna kua siata oku lekisiwa olovideo. Otembo yi tumala elilongiso, ya tamba ño kutunga womãla kuenda kekalo liavo.

11. Momo lie tu sukilila oku longisa olondonge Viembimbiliya ndomo va pondola oku linga akonomuiso eci va kasi likaliavo?

¹¹ Vana tu longisa Embimbiliya va sukilavo oku kũlĩha ndomo va pondola oku lilongisa. Kuenje eci va fetika oku lilongisa Embimbiliya tu sanjuka, poku mola ndomo ovo va pongiya atambululo avo kelilongiso Liembimbiliya, ale kolohongele viekongelo. Pole, tu sukila oku va longisa ndomo va pondola oku linga akonomuiso eci va kasi likaliavo. Kuenje eci kuiya ovitangi ka va lupikila tete kekongelo oku sanda ekuatiso, pole, ovo va ka tẽla oku kapako olonumbi va konomuisa valivulu etu.

12. Ocimãho cipi tu sukila oku kuata poku lilongisa?

¹² Nda ku sole oku lilongisa, pamue o sima okuti ka ci nena esanju. Pole, ove o pondola oku kuata esanju. Citava okuti o lilongisa votembo yitito kuenje kamue kamue o vokiya otembo yove. Kuata ocimãho cimue. Ocili okuti, ocimãho cetu oku amamako oku pamisa ukamba wetu la Yehova. Pole, ocimãho cimue tu pondola oku kuata, oku eca etambululo kepulilo limue va tu linga, ale oku linga akonomuiso atiamẽla kocitangi cimue tu kasi oku liyaka laco.

13. (a) Nye umalẽhe umue a sukila oku linga oco a lomboluile kakamba vaye vo kosikola ovina a tava? (b) Tu kapako ndati olonumbi vi sangiwa ku Va Kolosai 4:6?

¹³ Sokolola ndu okuti, ove umalẽhe kuenje o kasi oku tanga kosikola. Akamba vove vo kosikola, va tava okuti ovina via tukuluka ño. Ove pamue o yongola oku teyuila ocili Cembimbiliya, pole, o liyeva okuti ku kuete uloño woku ci linga. O sukila oku linga akonomuiso atiamẽla kondaka yaco! O pondola oku kuata ovimãho vivali ndeci: (1) oku pamisa ekolelo liove liokuti Yehova wa lulika ovina viosi, (2) oco o kũlĩhe ndomo o pondola oku teyuila ocili Cembimbiliya. (Va Roma 1:20; 1 Petulu 3:15) Lipula ndoco, ‘Momo lie akamba vange va popela okuti ovina via tukuluka ño?’ Noke linga akonomuiso valivulu etu. Kuenje o ka limbuka okuti oku teyuila ovina o tava ka ca tĩlile ndomo ove o sima. Omanu valua va tava okuti ovina via tukuluka ño, momo vana ovo va sumbila va va sapuila okuti, eci ocili. Nda wa sanga etambululo limosi, ale atambululo avali, o pondola oku kuatisa umue oku kuata elomboloko liasuapo.—Tanga Va Kolosai 4:6.

14-16. (a) O pondola oku kũlĩha ndati elivulu limue Liembimbiliya okuti kua li kũlĩhĩle ciwa? (b) Lombolola ndomo ovisonehua via tukuiwa vi pondola oku ku kuatisa oku kuata elomboloko liasuapo lielivulu lia Amosi. (Tanga okakasia losapi hati, “Ecelela Okuti Embimbiliya li Vetiya Utima Wove.”)

¹⁴ Sokolola okuti, kohongele ku kasi oku tangiwa loku lomboluiwa elivulu limue Liembimbiliya lia sonehiwa la umue pokati kovaprofeto, citava okuti ove kuo kũlĩhĩle ciwa. Enanga liatete oku lekisa onjongole yoku kũlĩha ovina uprofeto a soneha. O pondola oku ci linga ndati?

¹⁵ Tete, lipula ndoco: ‘Ovina vipi nda kũlĩha ale viatiamẽla kusonehi welivulu liaco? Eye wa kala elie, wa tungilile pi, upi wa kala upange waye?’ Nda tua kũlĩha ciwa usonehi welivulu liaco, tu kuata elomboloko liwa lieci a tukuila ondaka yimue lonjila eyi, ale esunga lieci a tukuila olusapo lumue. Osimbu o tanga Embimbiliya sokolola kekalo liusonehi waco.

¹⁶ Kuenje ove o ka sola oku kũlĩha ocitumãlo elivulu liaco lia sonehiwa. O pondola oku ci linga poku konomuisa “Ulala Walivulu u Sangiwa” vo Tradução do Novo Mundo da Bíblia Sagrada kamẽla 1722-1723. O pondolavo oku konomuisa o mapa yi lekisa ovaprofeto kuenda olosoma, vo Apêndice A6 kamẽla 1808-1811. Nda o kasi oku tanga elivulu liovitumasuku, ciwa oku konomuisa ekalo liomanu va kala kotembo elivulu liaco lia sonehiwa. Ovituwa vipi vĩvi ovaprofeto va sukilile oku yuvula kotembo yaco? Helie wa kala kotembo yimuamue lusonehi waco? Oco o kuate elomboloko liasuapo o sukila oku konomuisa alivulu akuavo Embimbiliya. Ndeci, oco o kũlĩhe ocitumãlo uprofeto Amosi a kala, o ka kuatisiwa poku tanga alivulu akuavo ndeci lia 2 Olosoma kuenda  lia 2 Asapulo okuti, ovisonehua vi sangiwa kulala welivulu lia Amosi 1:1. Handi vali, o pondolavo oku konomuisa catiamẽla ku Hosea kuenje o ka limbuka okuti eye pamue wa kalavo kotembo yimuamue luprofeto Amosi. Akonomuiso osi a-a, a ku kuatisa oku kũlĩha otembo Amosi a kala komuenyo.—2 Olos. 14:25-28; 2 Asa. 26:1-15; Hos. 1:1-11; Amo. 1:1.

17-18. Ndomo ulandu wovinimbu, ale ulandu wove muẽle u lekisa, lombolola ndomo oku sokolola lutate kovina wa lilongisa ci ku kuatisa oku kuata esanju kelilongiso liopokolika.

¹⁷ Poku tanga Embimbiliya, ciwa oku kuata onjongole yoku kũlĩha vali ovina vikuavo. Sokolola okuti o kasi oku tanga ocipama 12 cocitumasuku ca Sakariya, cina ca lombolola olofa via Mesiya. (Sak. 12:10) Poku tanga ocinimbu 12, o pondola oku limbuka okuti ‘epata lia Natana’ lia ponduile oku lila calua omo liolofa via Mesiya. Poku tanga olondaka viaco, talama kuenda lipula ndoco: ‘Elitokeko lipi li kasi pokati kepata lia Natana la Mesiya? O pondola oku kũlĩha ndati ovina vikuavo?’ Pamue o vetiyiwa oku linga akonomuiso akuavo. Ulala umue wovisonehua u ka ku lekisa kelivulu lia 2 Samuele 5:13, 14, kuna o ka lilongisa okuti, Natana umue pokati komãla va Soma Daviti. Ulala wavali wovisonhua, u ku lekisa kelivulu lia Luka 3:23, ku lombolola okuti Yesu wa kala ocitumbulukila ca Natana okuti wa kala kukululu ya Maria. (Tanga Utala Wondavululi wowiñi wo 2016, etendelo lia 3 kem. 9 kovinimbu 1-3.) Citava okuti o komõha poku kũlĩha ovina viaco! Ove wa kũlĩha okuti ocitumasuku ca popele okuti Yesu wa laikele oku tunda kocikoti ca Daviti. (Mat. 22:42) Pole, Daviti wa kuatele eci  ci pitãhala 20 komãla. Eci ka ci komõhisa hẽ omo Sakariya a popia okuti epata lia Natana lia ponduile oku lila oku fa kua Yesu?

¹⁸ Kũlĩhĩsa ulandu ukuavo. Kocipama catete ca Luka tu tangako okuti, ungelo Gabriele wa nyula Maria kuenda wo sapuila eci catiamẽla komõla a laikele oku cita hati: “Eye o ka kala unene kuenje o ka tukuiwa Omõla a Tõlo kuenda Yehova Suku o ko wĩha ocalo ca isiaye Daviti kuenje o ka viala Ndosoma yonjo ya Yakoba otembo ka yi pui.” (Luka 1:32, 33) Tu pondola oku luluvalela konepa yatete yesapulo lia Gabriele eci a popia hati Yesu o ka tukuiwa okuti, “Omõla a Tõlo.” Pole Gabriele wa popelevo okuti Yesu o ka “viala Ndosoma.” Kuenje tu pondola oku lipula eci Maria a kala oku sima catiamẽla kolondaka Gabriele a kala oku u sapuila. Anga hẽ Maria wa simĩle okuti olondaka via Gabriele via lombolokele okuti Yesu o ka piñala Soma Herode kuviali, ale umue pokati kocitumbulukila caye? Nda Yesu vepuluvi liaco wa kaile osoma, Maria nda wa linga onasoma kuenda epata liaye nda lia kala konjo yelombe. Pole, Embimbiliya ka li lombolola okuti Maria wa tukula olondaka evi ku Gabriele kuenda ka li lombololavo okuti Maria wa pinga ocikele cimue Cusoma, ndeci ca linga olondonge vivali via Yesu. (Mat. 20:20-23) Ulandu owu u lekisa okuti Maria wa kala ukãi umue embombe calua!

19-20. Ndomo ca tangiwa ku Tiago 1:22-25; 4:8, cipi ocimãho cetu eci tu lilongisa?

¹⁹ Tu ivaluki okuti ocimãho cetu poku lilongisa Ondaka ya Suku kuenda alivulu etu, oku pamisa ukamba wetu la Yehova. Etu tu yongolavo oku limbuka eci tua “tuwa” kuenda oku linga apongoloko a sukiliwa oco tu sanjuise Suku. (Tanga Tiago 1:22-25; 4:8.) Osimbu ka tua fetikile oku lilongisa, tete tu sukila oku likutilila ku Yehova oku pinga espiritu sandu liaye. Tu pingavo kokuaye oco a tu kuatise okupa esilivilo lieci tu kasi oku tanga kuenda oku tu kuatisa oku limbuka apongoloko tu sukila oku linga.

²⁰ Valua pokati ketu va tuwa ndomunu wa Suku wa tukuiwa lukualosamo okuti: ‘Ovihandeleko via Yehova ovio a sanjukila. O sokolola ovihandeleko viaye utanya luteke. . . . Cosi a linga o sumũlũha laco.’—Osa. 1:2, 3.