1-2. Ovitangi vipi Olombangi vialua Via Yehova va siata oku liyaka lavio?

UPOSTOLO Paulu wa vetiya Timoteo kuenda Akristão vakuavo oco va tẽlisa ciwa upange wavo u kola. (2 Tim. 4:5) Vosi yetu tu sukila oku kapako elungulo eli lia Paulu. Pole, pamue ka ci leluka oku ci linga. Valua pokati ka vamanjetu va yeva usumba woku tẽlisa upange woku kunda. (2 Tim. 4:2) Ndeci, sokolola vamanji va kasi kolofeka vina okuti upange woku kunda wa siata oku tatekiwa. Ovo va siata oku kunda ndaño va kũlĩha okuti va pondola oku kapiwa vokayike poku linga upange waco!

² Afendeli va Yehova va siata oku pita lovitangi vialua vi va sumuisa. Ndeci, vamue va sukila oku talavaya calua oco va sange cimue coku kuatisa epata liaye. Ovo va yongola oku linga vali calua kupange woku kunda, pole, toke kesulilo liosemana va kava calua. Vakuavo ka va pondola oku linga ovina vialua omo liuvei ka u kuete esaku, oku kuka; ovo pamue va kisikiwa oku kala kolonjo okuti ka va tundi. Vamue va liyeva okuti ka va kuete esilivilo ku Yehova. Mary, * manji umue o kasi ko Oriente Médio, wa popia hati: “Nda siata oku likolisilako oku yula ovisimĩlo vi ndi sumuisa okuti vi ndi sakalaisa calua. Ame ndi livetela evelo momo ci pesela otembo longusu yange kupange woku kunda.”

3. Nye tu konomuisa vocipama cilo?

³ Ndaño tu liyaka lovitangi, Yehova o tu ĩha ongusu tu sukila oco tu amameko oku u vumba loku linga cosi ci likuata lepondolo lietu. Tete, tu konomuisa ndomo Yehova a pondola oku tu kuatisa, noke tu kũlĩhĩsa ndomo Yehova a pamisa Paulu kuenda Timoteo oku tẽlisa ocikele cavo coku kunda ndaño lovitangi.

4. Ovitangi vipi Paulu a liyaka lavio?

⁴ Paulu wa liyaka lovitangi vialua. Eye wa sukilile ekuatiso lia Yehova eci ovanyãli vaye vo tipula, vio kapa vokayike kuenda via seteka oku u ponda. (2 Va Kor. 11:23-25) Paulu ka kuatele osõi yoku popia olonjanja a sukilile oku likolisilako oku yuvula esumuo. (Va Rom. 7:18, 19, 24) Eye wa pandikisavo kocitangi cimue okuti ca kala ‘ndosongo ketimba,’ kuenje eye wa yonguile calua okuti Suku ohali yaco u yupa.—2 Va Kor. 12:7, 8.

5. Nye Paulu a tẽla oku linga ndaño lovitangi vilua a liyaka lavio?

⁵ Yehova wa eca ongusu ku Paulu oco amameko oku tẽlisa ocikele caye coku kunda ndaño wa liyaka lovitangi. Kũlĩhĩsa ovina Paulu a tẽlisa. Ndeci, osimbu eye a kala vokayike konjo yaye muẽle eye wa kala oku laviwa lasualali vo ko Roma, pole, wa lekisa ombili poku kundila asongui va Yudea kuenda olonumiwa violombiali. (Ovil. 28:17; Va Fil. 4:21, 22) Eye wa kundilavo akuenje valua velombe kuenda vana va enda oku u nyula. (Ovil. 28:30, 31; Va Fil. 1:13) Vokuenda kuotembo yaco, Paulu wa soneha ovikanda okuti via kuatisa Akristão vocili koloneke viaco kuenda vi tu kuatisavo cilo. Handi vali, ongangu ya Paulu ya pamisa akongelo vo ko Roma kuenje ca kuatisa vamanji okuti ‘va lekisa vali utõi wosi woku vangula ondaka ya Suku okuti, ka va kuatele usumba.’ (Va Fil. 1:14) Ndaño okuti Paulu ka ponduile oku linga ovina a yonguile, eye wa linga eci ca kala vepondolo liaye kuenje eci ca “kuatisa oku sandula olondaka viwa.”—Va Fil. 1:12.

6. Ndomo ca tangiwa 2 Va Korindo 12:9, 10, nye ca kuatisa Paulu oku tẽlisa ciwa ocikele caye coku kunda?

⁶ Paulu wa limbukile okuti, ovina viosi a tẽla oku linga vupange wa Yehova, wa ci tẽla lika longusu ya Yehova. Eye wa popia okuti unene wa Suku “suisuapo kokuove voku hongua.” (Tanga 2 Va Korindo 12:9, 10.) Yehova pocakati cespiritu sandu liaye wa eca ku Paulu ongusu yoku tẽlisa ciwa ocikele caye coku kunda ndaño lalambalalo, oku kapiwa vokayike kuenda oku liyaka lovitangi viñi viñi.

7. Ovitangi vipi Timoteo a sukilile oku yula oco a tẽlise ocikele caye coku kunda?

⁷ Timoteo ekamba lia Paulu wa kala umalẽhe, wa sukililevo oku kolela kunene wa Suku oco a tẽlisa ciwa ocikele caye coku kunda. Timoteo wa kuama Paulu kovongende anene  wumisionaliu va linga. Handi vali, Paulu wa tuma Timoteo kovongende akuavo oco a nyule loku pamisa akongelo. (1 Va Kor. 4:17) Citava okuti Timoteo wa li yevele okuti ka laikele oku tẽlisa ocikele caco. Pamue eli olio esunga lieci Paulu o sapuilila hati: “Lalimue eteke ku ka ecelele okuti umue oku lavisa omo wumalẽhe.” (1 Tim. 4:12) Vokuenda kuotembo yaco, Timoteo wa kala oku liyaka ‘lovovei akuavo.’ (1 Tim. 5:23) Pole, Timoteo wa kũlĩhĩle okuti unene wespiritu sandu lia Yehova wa laikele oku wĩha ongusu a sukilile oco a kunde olondaka viwa kuenda oku kuatisa vamanji.—2 Tim. 1:7.

8. Yehova o pamisa ndati afendeli vaye koloneke vilo?

⁸ Koloneke vilo, Yehova eca kafendeli vaye “unene wa piãla,” oco vamameko oku u vumba lekolelo. (2 Va Kor. 4:7) Tu konomuisa ovina vikuãla Yehova a eca, oco vi tu pamise kuenda oku tu kuatisa oku amamako oku kolela kokuaye ndeci: ohutililo, Embimbiliya, ukamba la vamanji kuenda upange woku kunda.

9. Ohutililo yi tu kuatisa ndati?

⁹ Oku pamisiwa pocakati cohutililo. Ndomo ca lomboluiwa ku Va Efeso 6:18, Paulu o tu vetiya oku likutilila ku Suku “vapuluvi osi.” Kuenje Yehova o pondola oku tu tambulula poku tu ĩha ongusu. Manji Jonnie, o kasi ko Bolivia wa limbuka ndomo Yehova o kuatisa eci eye a liyaka locitangi cimue cinene. Ukãi waye kuenda olonjali viaye va fetika oku vela calua vonjanja yimosi. Ka ca lelukile ku manji Jonnie oku va tata katatu kavo. Ina yaye wa fa kuenda papita otembo yalua oco ukãi waye la isiaye va kaye. Manji Jonnie poku lombolola catiamẽla kotembo yaco a liyaka locitangi wa popia hati, “Eci nda kala loku liyaka locitangi caco, eci ca ñuatisa oku lomboluila Yehova vohutililo ovina viosi ndi yevite vutima.” Yehova wa eca ku manji Jonnie ongusu yosi a sukilile oco a pandikise. Manji Ronald ukulu umue wekongelo o kasi ko Bolivia wa limbuka okuti ina yaye o kasi lo kanser. Osãi ya kuamamo eye wa fa. Nye co kuatisa oku liyaka locitangi caco? Eye hati: “Eci ndi likutilila ku Yehova, ndu sapuila ovina viosi ndi yevite. Nda kũlĩha okuti eye wa kapako ovisimĩlo viange okuti omunu umue ci sule, wa ñulĩha vali ciwa okuti ame muẽle ci sule.” Olonjanja vimue, tu liyeva okuti ka tu tẽla vali oku pandikisa kovitangi kuenje pamue ka tu kũlĩha vali olondaka tu tukula vohutililo. Pole, Yehova o tu laleka oco tu likutilile kokuaye ndaño okuti pamue ci tĩla calua oku lombolola ovisimĩlo vietu.—Va Rom. 8:26, 27.

10. Ndomo ca tangiwa ku Va Heveru 4:12, momo lie oku tanga Embimbiliya kuenda oku sokolola kokuayo ci kuetele esilivilo?

¹⁰ Oku pamisiwa pocakati Cembimbiliya. Paulu wa enda oku tanga Ovisonehua oco a pamise loku lembeleka kuenje etu tu sukilavo oku linga ocina cimuamue. (Va Rom. 15:4) Nda tua tanga Ondaka ya Suku loku sokolola kokualio, Yehova o pondola oku tu kuatisa oku kuata elomboloko ndomo tu kapako Ovisonehua kocitangi cimue. (Tanga Va Heveru 4:12.) Manji Ronald wa tukuiwa ale, wa popia hati: “Ñuete esanju omo okuti ndi likolisilako oku tanga Embimbiliya ovoteke osi. Ndi sokolola kovituwa vialua via Yehova kuenda ocisola a lekisa poku tata afendeli vaye. Eci ci ndi pamisa.”

11. Ndamupi Embimbiliya lia kuatisa manji ukãi ocimbumba?

¹¹ Eci tu sokolola Kondaka ya Suku, ci tu kuatisa oku kuata ovisimĩlo via sunguluka poku liyaka lovitangi. Tu konomuisi ndomo  Embimbiliya lia kuatisa manji umue ukãi ocimbumba. Ukulu umue wekongelo wo kuatisa oku tanga ulandu u sangiwa kelivulu lia Yovi. Eci a fetika oku ci linga, tete wa pisa Yovi omo liovisimĩlo vĩvi a kuatele. Kovisimĩlo viaye eye wa kala oku lungula Yovi hati: “A Yovi! Ku ka sokolole lika kovitangi viove!” Pole, noke eye wa limbuka okuti ovisimĩlo a kuata via kalavo ndevi via Yovi. Eci co kuatisa oku pongolola ovisimĩlo viaye loku pamisa elavoko liaye omo lioku fisa ulume waye.

12. Yehova o tu pamisa ndati pocakati ca vamanji?

¹² Oku pamisiwa poku kuata ukamba la vamanji. Onjila yikuavo Yehova a kuama poku pamisa Akristão, pocakati ca vamanji. Paulu wa soneha okuti eye wa yonguile oku ‘likolisa pokati’ la vamanjaye kespiritu. (Va Rom. 1:11, 12) Manji Mary wa tukuiwa ale, wa sola ocituwa caco. Eye wa popia hati: “Yehova wa vetiya vamanji vana okuti ka va kũlĩhĩle ovitangi viange. Ovo va ndi sapuila olondaka vi lembeleka, va ndi sonehela otuikanda kuenda eci oco nda sukilile. Eci ca ñuatisavo oku lianja poku sapela la vamanji va kuatele ovitangi vimuamue kuenda nda lilongisila kovina ovo va linga. Akulu vekongelo olonjanja viosi va lekisa okuti va ñapeleko kuenda vamanji vosi vekongelo va ndi sole.”

13. Tu li pamisa ndati pokati kolohongele viekongelo?

¹³ Ocitumãlo ca velapo coku lipamisa pokati kolohongele viekongelo. Eci enda kohongele o kuete epuluvi lioku pamisa vakuene poku va sapuila okuti o va sole kuenda oku va pandula kovina va siata oku linga. Ndeci, kohongele yimue ukulu umue wekongelo o tukuiwa Peter o sapuila manji umue ukãi okuti ulume waye Hambangiko ya Yehova hati: “Ci tu sanjuisa calua oku ku mola olonjanja viosi kulo. Ove olonjanja viosi omãla vove epandu o va kuatisa oku lipongiya oku eca atambululo kolohongele.” Ina yaco lesanju lialua wa popia hati: “Nda pandula calua olondaka evi ovio nda sukilile oku yeva etaili.”

14. Oku litumbika kupange woku kunda ci tu kuatisa ndati?

¹⁴ Oku pamisiwa pocakati cupange woku kunda. Eci tu sapuilako omanu ocili catiamẽla Kembimbiliya, tu ka vu luisiwa calua nda va tu yevelela, ale sio. (Olosap. 11:25) Manji umue o tukuiwa Stacy wa limbuka ndomo upange woku kunda u pondola oku pamisa. Eci umue pokati kepata a siapo oku vumba Yehova co sumuisa calua kuenje wa lipula ndoco, ‘Nye ndi sukila oku linga oco ñuatise epata liange?’ Ca tĩlile Stacy oku liwekapo oku sokolola kocitangi caco. Nye co kuatisa oku yula ocitangi caco? Upange woku kunda! Osimbu a litumbika kupange woku kunda, eye wa fetika oku tiamisila utima komanu va kasi vocikanjo caye okuti va sukilile ekuatiso liaye. Eye wa popia hati: “Vokuenda kuotembo yaco, Yehova wa nyĩha ondonge yimue Yembimbiliya okuti ya linga lonjanga apongoloko. Eci ca ndi pamisa calua. Ocina ca ñuatisa oku yula ocitangi cange, oku litumbika kupange woku kunda.”

15. Nye wa lilongisa kulandu wa manji Mary?

¹⁵ Vamanji vamue omo liekalo liavo, va liyeva okuti ka va pondola oku linga calua kupange woku kunda. Nda okuti o liyevite ndoco, ivaluka okuti Yehova o sanjukila alikolisilo ove. Kũlĩhĩsa vali ulandu wa manji Mary wa tukuiwa ale. Eci eye a ilukila kocitumãlo cikuavo okuti omanu vaco va vangula elimi likuavo, eye wa liyeva okuti lalimue eteke a ka li tẽla. Eye wa popia hati: “Olonjanja vimue, eci nda tẽlele lika oku linga, oku eca etambululo limue lia leluka kohongele, ale oku tanga ocinimbu cimue Cembimbiliya kuenda oku eca okokanda kamue kupange woku kunda.” Eye wa li yevele okuti eci a kala loku linga ka  ci kuete esilivilo oku ci sokisa lomanu va vangula ciwa elimi liaco. Noke weya oku pongolola ovisimĩlo viaye. Eye wa fetika oku limbuka okuti wa ponduile oku linga upange wa Yehova ndaño ka vangula ciwa elimi. Eye wa popia hati, “Ovina Embimbiliya li popia via leluka kuenda vi pongolola ovimuenyo viomanu.”

16. Nye ci kuatisa vana ka va pondola oku tunda kolonjo pole va yongola oku kunda?

¹⁶ Yehova wa kũlĩha okuti vamanji vamue va yongola oku linga upange woku kunda, pole, ka citava oku tunda konjo. Eye o pondola oku tu vetiya oku kundila vana veya oku tu nyula, olondotolo kuenda ovifumelu. Nda tua sokisa upange tu kasi oku linga cilo, lowu tua lingaile kosimbu, tu sumua. Pole, nda tua limbuka ndomo Yehova a tu kuatisa cilo, tu ka kuata ongusu tu sukila oco tu pandikise kovitangi viosi lesanju.

17. Ndomo ca tangiwa kelivulu Liukundi 11:6, momo lie tu sukilila oku amamako oku kunda ndaño okuti pamue ka tu limbuka lonjanga onima yiwa?

¹⁷ Ka tua kũlĩhĩle nda ocili combuto tu kũla yi pondola oku eca olombombo loku fetika oku kula. (Tanga Ukundi 11:6.) Ndeci, manji Barbara eci a kuata 80 kanyamo olonjanja viosi wa enda oku kunda lotelefone kuenda pocakati covikanda. Umue pokati kovikanda viaye wa kongelamo ocipama ci sangiwa Vutala Wondavululi 1 Yelombo 2014 losapi hati, “Ceci Suku a Siata Oku ku Lingila.” Eye ka kũlĩhĩle okuti ukanda waye wa pitĩla toke kohueli yimue ya liwekelepo oku kala Ombangi ya Yehova. Ohueli yaco ya tanga Utala waco Wondavululi olonjanja vialua. Ulume wa liyeva ndu okuti Yehova eye wa kala oku vangula laye. Noke lioku tẽlisa 27 kanyamo tunde eci ohueli ya liwekapo oku vumba Yehova, ya fetika vali oku endaenda kolohongele kuenje veya oku kala vakuambili. Sokolola esanju manji Barbara a kuata kuenda ndomo a pamisiwa poku mola onima yiwa ya tunda kukanda eye a sonehele!

18. Nye tu sukila oku linga oco tu pamisiwe la Suku?

¹⁸ Yehova o kuama olonjila vialua vioku tu ĩha ekuatiso liaye. Eci tu kapako ovina a tu ĩha ndeci, ohutililo, Embimbiliya, ukamba la vamanji kuenda upange woku kunda, tu lekisa okuti tua kolela kunene waye kuenda konjongole yaye yoku tu kuatisa. Omo liaco, tu koleli ku Isietu wokilu una o sanjukila oku ‘lekisa ongusu yaye koku kuatisa vana okuti, utima wavo wa sunguluka kokuaye.’—2 Asa. 16:9.