1-2. Momo lie olonumbi vimue Viembimbiliya vi kuatela esilivilo lialua kokuetu eci ekalo lietu li pongoloka?

 KETEKE liolohuela olondombua okuti via posoka ciwa, vi yevelela lutate ohundo yuvala ya kunamẽla Vembimbiliya. Ovisonehua vi kasi oku tangiwa vohundo yaco, haviokaliyeko kokuavo. Pole, oku upisa keteke liolohuela viavo, ovisonehua viaco vi kuata esilivilo lialua kokuavo. Momo lie? Momo ovo va ka sukila oku vi kapako volohuela.

² Cimuamue haico ci lingiwa eci Ukristão umue a linga onjali. Vokuenda kuanyamo alua citava okuti, wa yeva ale olohundo vialua vi popia catiamẽla koku tata omãla. Pole cilo, elungulo liohundo yaco, yi kuata vali esilivilo kokuavo. Ovo va laika oku kuata omõla umue o sukila oku u tata. Ocikile cimue cinene! Ocili okuti, eci ekalo li pongoloka komuenyo wetu, ovisonehua vimue vi kuata vali esilivilo lialua kokuetu. Eli olio esunga lieci afendeli va Yehova va enda oku tanga Ovisonehua kuenda olosoma via enda oku kisikiwa oku ci linga, loku sokolola ovina viaco “oloneke viosi” viomuenyo wavo.—Esn 17:19.

3. Nye tu konomuisa vocipama cilo?

³ Ene alonjali, vu kuete esumũlũho limue linene lioku kala Akristão va pondola oku longisa omãla vavo catiamẽla ku Yehova. Pole, ove o yongola oku linga vali cikuavo okuti, ku va longisa lika ovina viatiamẽla ku Suku yetu. Ove o yongola okuti o va kuatisa oku sola Suku lutima wavo wosi. Oco hẽ, nye o sukila oku linga, oco o longise omãla vove oku  sola Yehova? Vocipama cilo, tu konomuisa olonumbi vikuãla Viembimbiliya vi pondola oku vu kuatisi ene wunjali. (2Ti 3:16) Tu konomuisavo ndomo olonjali vimue Akristão va siata oku kuatisiwa poku kapako alungulo Embimbiliya.

4. Yipi yimue pokati konumbi yi pondola oku kuatisa olonjali oku vetiya utima womãla vavo oku kuatela ocisola Yehova? (Tiago 1:5)

⁴ Onumbi 1: Sanda ekuatiso lia Yehova. Pinga ku Yehova oco a ku ĩhe olondunge o sukila, yoku kuatisa omãla vove oku lekisa ocisola kokuaye. (Tanga Tiago 1:5.) Yehova eye Omunu wavelapo koku eca alungulo. Kuli asunga amue. Kũlĩhĩsa asunga avali. Tete, Yehova o kuete uloño wa velapo woku kala onjali. (Os 36:9) Vali, alungulo osi olondunge eye a eca, a tu nenela lika asumũlũho.—Isa 48:17.

5. (a) Nye ocisoko ca Yehova ca siata oku eca, oco ci kuatise olonjali? (b) Ndomo ca lekisiwa vo video, nye wa lilongisa konjila ndomo manji Amorim lukãi waye va kuatisa omãla vavo?

⁵ Yehova pocakati cocisoko caye, wa eca kolonjali olonumbi vialua via kunamẽla Vembimbiliya, oco vi va kuatise oku longisa omãla vavo oku sola Yehova. (Mat 24:45) Ndeci, ove o pondola oku sanga olonumbi viwa vovipama vio Despertai! vosapi hati “Ekuatiso Vepata,” okuti cilo via siata oku moleha vovipama vio Internet. Handi vali vo jw.org, mua siatavo oku sandekiwa olovideo vialua vi pondola oku kuatisa olonjali oku kuama olonumbi via Yehova osimbu va tekula omãla vavo. *—Olo 2:4-6.

6. Isia umue, wa liyeva ndati catiamẽla konumbi yimue eye kumue lukãi waye va tambula vocisoko ca Yehova?

⁶ Olonjali vialua via siata oku eca olopandu viavo kekuatiso Yehova a siata oku va ĩha, pocakati cocisoko caye. Isia umue o tukuiwa Joe, wa popia hati: “Oku tekula omãla vatatu vocili, ka ca lelukile.” Ame lukãi wange olonjanja viosi tua enda oku likutilila ku Yehova oco a tu kuatise. Kuenje olonjanja vialua tua enda oku limbuka okuti ocipama cimue, ale ovideo, yi sandekiwa votembo yina tu sukila ekuatiso, oco tu yule ocitangi cimue tua  kala oku liyaka laco. Olonjanja viosi tua siata oku kolela kolonumbi via Yehova.” Manji Joe lukãi waye va limbuka okuti, ovipama viaco kuenda olovideo, via siata oku kuatisa omãla vavo oku pamisa ukamba wavo la Yehova.

7. Momo lie olonjali vi sukilila oku likolisilako oku lekisa ongangu yiwa? (Va Roma 2:21)

⁷ Onumbi 2: Longisa poku lekisa ongangu yiwa. Omãla va lete ovina viosi vi linga olonjali viavo kuenje olonjanja vialua va va setukula. Pole, la yimue onjali ya li pua. (Rom 3:23) Ndaño ndoco, olonjali vakualondunge va likolisilako calua oku lekisa ongangu yiwa komãla vavo. (Tanga Va Roma 2:21.) Isia umue o vangula catiamẽla komãla eye wa popia hati: “Omãla va kasi ndosponja okuti yi kama ovava a sangiwa ponele yayo.” Eye wa popia vali hati: “Nda ovina tu popia havioko tu longisa, ovo va ka ci setukulavo.” Nda etu tu yongola okuti omãla vetu va sola Yehova, ocisola cetu kokuaye ci sukila oku pama kuenda oku limbukiwa.

8-9. Nye wa lilongisa kolondaka via popiwa la manji Andrew kuenda Emma?

⁸ Kuli olonjila vialua olonjali vi pondola oku kuama oco vi longise omãla vavo oku sola Yehova. Kũlĩhĩsa eci ca popia manji umue o tukuiwa Andrew ukuanyamo 17 eye hati: “Olonjali viange olonjanja viosi via enda oku ndi longisa esilivilo lioku likutilila. Ovoteke osi Isiange wa enda oku likutilila lame, ndaño ndo sapuila okuti nda linga ale ohutililo yange. Olonjali vietu via enda oku tu sapuila ndoco: ‘Vu pondola oku sapela la Yehova olonjanja viosi vu yongola.’ Evetiyo liaco, lia ñuatisa calua kuenje cilo, ndi lianja poku likutilila ku Yehova kuenda ndu u tenda nda Isia umue ukuacisola.” Ene alonjali ivaluki okuti ocisola vu kuetele Yehova ci pondola oku kuatisa omãla vene oku u solavo.

⁹ Kũlĩhĩsavo ulandu wa manji Emma. Eci Isiaye a siapo epata wa va sila olofuka vialua. Manji Emma wa popia hati: “Kua kala olonjanja vialua okuti Ina yange ka kuatele olombongo, pole, otembo yosi wa enda oku vangula ndomo Yehova a kapako loku tata afendeli vaye. Nda enda oku limbuka kekalo liomuenyo waye okuti, wa kolelele kolondaka viaco. Ina yange wa kapele ovina a enda oku longisa.” Nye tu lilongisilako? Alonjali longisi omãla vene longangu, ndaño poku liyaka lovitangi.—Gal 6:9.

10. Vapuluvi api olonjali va Isareli va ponduile oku sapela lomãla vavo catiamẽla ku Yehova? (Esinumuĩlo 6:6, 7)

¹⁰ Onumbi 3: Sapela lomãla vove olonjanja viosi. Yehova wa handelekele va Isareli kosimbu, oco va longise omãla vavo catiamẽla kokuaye olonjanja viosi. (Tanga Esinumuĩlo 6:6, 7.) Olonjali viaco via kuatele apuluvi alua vokuenda kueteke oco va sapele lomãla vavo kuenda oku va longisa oku sola Yehova lutima wosi. Ndeci, omõla umue ukuenje u Isareli wa ponduile oku pita olowola vialua oku kuatisa isiaye oku lima, ale oku ungula. Manjaye ukãi wa ponduile oku pita otembo la inaye oku tonga uwalo, oku tunga olongalo, loku linga ovopange akuavo okonjo. Osimbu olonjali via enda oku talavayela kumosi lomãla, ovo va ponduile oku sapela ovina vialua via kuata esilivilo. Ndeci, ovo va ponduile oku sapela catiamẽla kovituwa viwa via Yehova kuenda ndomo eye a kala oku kuatisa epata liavo.

11. Koloneke vilo vapuluvi api olonjali Akristão va kuete yoku sapela lomãla vavo?

¹¹ Koloneke vilo, ekalo ka lia lisokele leli liokosimbu. Kolofeka vialua, olonjali ka vi pondola oku pita otembo lomãla vavo vokuenda kueteke. Citava okuti olonjali vi enda kupange kuenda omãla va enda kosikola.  Omo liaco, olonjali vi sukila oku sanda otembo yoku sapela lomãla vavo. (Efs 5:15, 16; Flp 1:10) Efendelo liepata li eca epuluvi liaco. Manji umue ukuenje o tukuiwa Alexander wa popia hati: “Olonjanja viosi eci esiange a linga esokiyo liefendelo liepata, ka endaile oku ecelela okuti cimue ci tateka etu oku kala pamosi. Noke liefendelo liepata, tu sapela.”

12. Nye asongui vepata va sukila oku ivaluka vokuenda kuefendelo liepata?

¹² Nda okuti ove wusongui wepata nye o sukila oku linga, oco efendelo liepata li sanjuise omãla? Citava okuti o longisa omãla vove poku kuama elivulu liokaliye losapi hati, Sanjukili Omuenyo Otembo ka yi Pui! Oku kuama elivulu liaco ci kuatisa oku kuata ombangulo yiwa. Nda o yongola okuti omãla vove va situlula ovisimĩlo viavo kuenda asakalalo, ku ka sokiye oku ci linga kefendelo liepata oco o va pise, ale oku va lungula. Ku ka kisike omãla vove oku tava kovina ka vi likuata lolonumbi Viembimbiliya. Pole, lekisa olopandu omo lioku situlula ovisimĩlo viavo kuenda va vetiya oku lianja poku lisitulula. Ove o pondola lika oku kuatisa omãla vove eci o kũlĩha ndomo va liyevite.

13. Apuluvi api akuavo olonjali vi kuete oku kuatisa omãla vavo oku kuata ukamba la Yehova?

¹³ Alonjali, sandi otembo vokuenda kueteke oco vu kuatise omãla vene oku kuata ukamba la Yehova. Ove ku sukila oku talamela eteke lielilongiso oco o longise omãla vove catiamẽla ku Suku yetu ukuacisola. Kũlĩhĩsa eci ina umue o tukuiwa Lisa a popia, eye hati: “Etu tua kuatisa omãla vetu poku va lekisa ovina viosi via tu ñuala oco tu va longise ovina viatiamẽla ku Yehova kuenda evi eye a lulika. Ndeci, nda ombua yetu ya linga cimue okuti ca koka ovinjola komãla, tu sapuila komãla okuti, eci ocindekaise cokuti Yehova o Suku yimue yesanju kuenda wa cilingila oco tu kuate esanju poku tala ovina vi koka ovinjola.”

14. Momo lie ci kuetele esilivilo olonjali oku kuatisa omãla vavo oku nõla lolondunge akamba? (Olosapo 13:20)

¹⁴ Onumbi 4: Kuatisa omãla vove oku nõla ciwa akamba. Ondaka ya Suku yi tu sapuila okuti akamba va pondola oku tu kuatisa oku linga eci ciwa, ale oku tu yapuisa koku  linga eci cĩvi. (Tanga Olosapo 13:20.) Ene alonjali, wa kũlĩhi hẽ akamba vomãla vene? Anga hẽ wa siata oku sanda otembo yoku kala lavo? Nye o pondola oku linga oco o kuatise omãla vove oku linga ukamba la vana va sole Yehova? (1Ko 15:33) O pondola oku kuatisa omãla vove oku nõla akamba vawa poku laleka omanu vana okuti va kuete ukamba uwa la Yehova, oku kala kumue lene, loku linga ovopange amue lepata.—Os 119:63.

15. Nye olonjali vi sukila oku linga oco ci kuatise omãla vavo oku kuata akamba vawa?

¹⁵ Kũlĩhĩsa ulandu wa Isia umue o tukuiwa Tony. Eye wa lombolola eci eye lukãi waye va linga oco va kuatise omãla vavo oku kuata akamba vawa poku popia hati: “Vokuenda kuanyamo alua, ame lukãi wange tu enda enda oku laleka vamanji vakuavitunga via litepa kuenda vakuafeka ya litepa oco veye konjo yetu. Tua enda oku lila kumosi kuenda oku lingila kumosi efendelo liepata. Eyi onjila yimue yoku kũlĩha vana va sole Yehova haivo vo vumba lesanju. Tua kuata esumũlũho lioku kala lavamanji vakuakunyula akongelo, olomisionaliu kuenda vamanji vakuavo konjo yetu. Ovolandu avo, ombili kuenda ocituwa cavo coku lieca olumue ca vetiya calua omãla vetu kuenda ca va kuatisa oku kuata ukamba la Yehova.” Ene alonjali, likolisiliko oku kuatisa omãla vene oku kuata akamba vawa.

16. Nye vu sukila oku linga nda okuti umue pokati komãla vene ka yongola vali oku vumba Yehova?

¹⁶ Nye vu sukila oku linga ndaño vu likolisilako calua, pole, umue pokati komãla vene o popia okuti ka yongola vali oku vumba Yehova? Anga hẽ o pondola oku sima okuti, ove unjali o kuete eko? Yehova wa siata oku eca kokuetu vosi, oku kongelamo omãla vove ombanjaile yelianjo lioku nõla, nda o vumba Suku ale sio. Nda omãla vove va nõlapo oku siapo Yehova ku ka pue elavoko liokuti eteke limue va ka tiuka. Ivailuka ulandu womõla ocisandui. (Luk 15:11-19, 22-24) Umãlehe waco wa linga ovina vialua vivi, pole, noke wa tiuka. Pamue umue o popia hati, “owu wa kala lika ulandu umue. Anga ci pondola muẽle oku lipita lomunu umue?” Ocili okuti ci  pondola! Eci oco ca lipita lamanji umue umãlehe o tukuiwa Elie.

17. Ulandu wa mamanji umue o tukuiwa Elie wa ku kuatisa ndati?

¹⁷ Manji Elie, catiamẽla kolonjali viaye wa popia hati: “Ovo va likolisilako oku ndi longisa oku sola Yehova kuenda Ondaka yaye Embimbiliya. Eci nda kuata anyamo ekũi, nda fetika oku lekisa esino.” Manji Elie wa fetika oku ambata omuenyo umue ka wa sungulukile loku pembula alikolisilo osi olonjali viaye via linga, oco vo kuatise konepa yespiritu. Noke wa tunda konjo, loku litumbika vomuenyo umue ka wa sungulukile. Ndaño ndoco, olonjanja vimue wa enda oku sapela lakamba vaye catiamẽla Kembimbiliya. Manji Elie wa popia hati: “Olonjanja viosi ndi sapela catiamẽla ku Yehova lakamba vange, ovisimĩlo viange viatiamẽla ku Yehova via enda oku livokiya. Kamue kamue ombuto yocili Cembimbiliya yina ya honguele vutima wange, okuti yina olonjali viange via likolisilako oku kapa vutima, ya fetika oku pama vali.” Vokuenda kuotembo manji Elie wa tiuka vali vocili. * Sokolola esanju olonjali viaye via kuata omo lioku likolisilako oku u longisa oku sola Yehova tunde vutila!—2Ti 3:14, 15.

18. O liyeva ndati omo lialikolisilo olonjali via siata oku linga poku longisa omãla vavo oku sola Yehova?

¹⁸ Ene alonjali, Yehova wa eca kokuene ocikele cimue ci kuete esilivilo lialua okuti, coku kuatisa ocitumbulukila cokaliye cafendeli va Yehova. (Os 78:4-6) Ocili okuti oku ci linga ka ca lelukile, omo liaco tu vu pandiyi calua omo lialikolisilo wa siata oku lingi oku kuatisa omãla vene! Nda ove wamamako oku likolisilako oku kuatisa omãla vove oku sola Yehova kuenda oku pokola kokuaye, kolela okuti Isietu wokilu ukuacisola o ka sanjuka calua.—Efs 6:4.