1. Onjila yipi ya velapo omanu vosi va sukila oku nõla?

 OMANU koloneke vilo, va sukila oku nõla onjila yimue va kuama. Anga hẽ va ka tiamẽla ku Yehova Suku o kuete omoko yoku viala oluali luosi, ale va ka tiamẽla kunyãli waye Satana Eliapu? Omanu vosi va sukila oku nõla onjila yimue. Onjila va nõla oyo yi ka lekisa nda va ka kuata omuenyo ko pui, ale sio. (Mat 25:31-33, 46) Vokuenda kuohali ya piãla, ovo va ka kapiwa ondimbukiso nda va popeliwa, ale va kunduiwa.—Esi 7:14; 14:9-11; Esk 9:4, 6.

2. (a) Nye ukanda ku Va Heveru 10:35-39, u tu vetiya oku linga? (b) Elivulu Liesituluilo li pondola oku tu kuatisa ndati?

² Tanga Va Heveru 10:35-39. Nda okuti wa nõlapo oku tiamẽla kuviali wa Yehova, wa nõla onjila yiwa. Cilo, o yongola oku kuatisa omanu vakuavo, oku nõla onjila ya sunguluka. Oco o va kuatise, o pondola oku kuama olonumbi vi sangiwa kelivulu Liesituluilo. Elivulu liaco li komõhisa, li situlula eci ci ka pita la vana va likala oku tiamẽla ku Yehova kuenda li lekisavo ndomo Yehova a ka sumũlũisa vana okuti lekolelo, va tiamẽla kuviali waye. Etu tu linga ciwa poku konomuisa ovina viaco vi kuete esilivilo. Poku ci linga, onjongole yetu yoku vumba Yehova yi ka amamako. Handi vali, tu pondola oku talavaya lovina tua lilongisa, oco tu kuatise omanu vakuavo oku nõla onjila ya sunguluka loku amamako oku vumba Yehova.

3. Nye tu konomuisa vocipama cilo?

 ³ Vocipama cilo, tu konomuisa apulilo a-a: Nye ci ka pita la vana va tiamẽla kuviali wa Suku? Pole, nye ci ka pita la vana va tiamẽla kocinyama ci kusuka nge, ca tukuiwa kelivulu Liesituluilo?

4. Ocimunga cipi upostolo Yoano a mola okuti, va kala la Yesu kilu?

⁴ Vocinjonde cimue, upostolo Yoano wa mola ovimunga vivali, via tiamẽla kuviali wa Yehova kuenje ovo va tambula asumũlũho omuenyo ko pui. Ocimunga catete, ci kuete eci ci soka 144.000 komanu. (Esi 7:4) Ovo vopiwa palo posi oco va ka viale, ale oku kala Olosoma la Yesu kilu. Ovo kumue la Yesu va ka viala ilu lieve. (Esi 5:9, 10; 14:3, 4) Vocinjonde cimue, Yoano wa va mola okuti, va talama kumue la Yesu Komunda Siono kilu.—Esi 14:1.

5. Nye ci ka pita ndopo lolombuavekua vi kasi handi palo posi?

⁵ Tunde kocita catete toke cilo, omanu vamue va siata oku nõliwa, oco va pange onepa kolombuavekua vi soka 144.000. (Luk 12:32; Rom 8:17) Yoano wa lombolola okuti, ocisupe cimue ale etendelo limue litito, olio lia ponduile oku kala lomuenyo palo posi vokuenda kuoloneke via sulako. Olombuavekua viaco via “supapo,” vi ka tambula “ondimbukiso” ya sulako yoku taviwa la Yehova, osimbu ohali ya piãla ka ya fetikile. (Esi 7:2, 3; 12:17) Vokuenda kuohali ya piãla, ocisupe caco ci ka ambatiwa kilu, oco ci ka li kongele la vakuavo va panga onepa ketendelo lio 144.000, okuti va pandikisa toke kolofa. Ovo va ka viala la Yesu Vusoma wa Suku.—Mat 24:31; Esi 5:9, 10.

6-7. (a) Ocimunga cipi Yoano a mola noke kuenda nye tu lilongisila kokuavo? (b) Momo lie elivulu Liesituluilo ocipama 7 ci kuetele esilivilo, ci kale kolombuavekua via supapo kuenda ‘kowiñi wakahandangala’?

⁶ Yoano noke yoku mola ocimunga cimue kilu, wa molavo “owiñi wakahandangala.” Ca litepa letendelo lio 144.000, ceci okuti omanu va tiamẽla kocimunga caco, ka va tendiwa. (Esi 7:9, 10) Nye tu lilongisa catiamẽla kokuavo? Yoano wa popia hati: “Ava vana va tunda kohali ya piãla okuti, va sukula ovowalo avo a lepa kuenda va a yelisa vosonde ya Kameme.” (Esi 7:14) Owiñi wakahandangala noke yoku puluka kohali ya piãla, va ka kala palo posi loku tambula asumũlũho a komõhisa.—Os 37:9-11, 27-29; Olo 2:21, 22; Esi 7:16, 17.

⁷ Ci kale okuti elavoko lietu lioku enda kilu, ale lioku kala palo posi, anga hẽ tu pondola oku kuatisiwa lolondaka vi sangiwa Kesituluilo ocipama 7? Ocili okuti oco. Otembo yaco yi ka kala otembo yimue yi komõhisa, kovimunga viaco viafendeli va Suku! Tu ka kuata esanju lialua, omo okuti tua nõlapo oku tiamẽla kuviali wa Yehova. Ovina vipi vikuavo elivulu Liesituluilo li tu sapuila catiamẽla kohali ya piãla?—Mat 24:21.

8. Ohali ya piãla yi ka fetika ndati kuenda omanu valua va ka kala ndati?

⁸ Ndomo tua lilongisa kocipama ca pita, ocisoko copulitika coluali lulo, ndopo ci ka ñualelapo o Bavulono Yinene okuti, ocisoko catavo esanda voluali luosi. (Esi 17:16, 17) Elinga liaco li ka kala efetikilo liohali ya piãla. Anga hẽ eci ci ka koka okuti, omanu valua va ka fetika oku fendela Yehova? Sio. Pole, Kesituluilo ocipama 6 ku lekisa okuti kotembo yaco, vana ka va vumbi Yehova va ka sanda eteyuilo kovisoko viopulitika kuenda ca  vakualomĩlu violuali lulo, vana va sokisiwa ndolomunda. Omo okuti ovo ka va ka tiamẽla Kusoma wa Suku, Yehova o ka va tenda okuti ovanyãli.—Luk 11:23; Esi 6:15-17.

9. Afendeli va Yehova vokuenda kuohali ya piãla va ka lekisa ndati okuti va litepa kuenda nye ci ka li pita lavo?

⁹ Afendeli va Yehova vakuekolelo vokuenda kuohali ya piãla, va ka lekisa okuti va li tepa. Ovo lika ocimunga comanu palo posi va ka vumba Yehova Suku, loku yuvula oku tiamẽla kocinyama ca tema. (Esi 13:14-17) Omo okuti va ka amamako oku kolela ku Yehova, vana va suvuka Yehova, va ka va kuatela onyeño yalua. Omo liaco, ocimunga cimue colofeka ci ka ñualelapo afendeli va Suku voluali luosi. Embimbiliya li tukula uyaki waco okuti, uyaki wa Goge la Magoge.—Esk 38:14-16.

10. Ndomo ca tangiwa kelivulu Liesituluilo 19:19-21, Yehova o ka liyeva ndati omo lielambalalo li ka lingiwa kafendeli vaye?

¹⁰ Yehova o ka liyeva ndati omo lielambalalo liaco ka lia sungulukile? Eye o tu sapuila hati: “Onyeño yange yalua yi ka wenguka.” (Esk 38:18, 21-23) Kesituluilo ocipama 19, ku lombolola eci ci ka pita noke. Yehova o ka tuma Omõlaye oco a teyuile afendeli vaye kuenda oku kundula ovanyãli vaco. Yesu o ka linga uyaki waco ‘lolohoka viokilu’ okuti, ovangelo vakuekolelo kuenda olombuavekua vi soka 144.000. (Esi 17:14; 19:11-15) Uyaki waco u ka sulila ndati? Omanu vosi kuenda ovisoko vina vi likala Yehova, va ka kunduiwa!—Tanga Esituluilo 19:19-21.

11. Ulandu upi u kuete esilivilo lialua, wa tukuiwa kelivulu Liesituluilo?

¹¹ Sokolola ndomo omanu vakuekolelo palo posi va ka liyeva, poku popeliwa eci ovanyãli va Suku va ka kunduiwa! Ocili okuti, otembo yaco yi ka kala yesanju lialua! Ndaño okuti kilu va ka kaluka lesanju eci o Bavulono Yinene yi ka kunduiwa, pole, ku ka kala cimue ci ka nena vali esanju lialua. (Esi 19:1-3) Ocina caco ca velapo ca tukuiwa kelivulu Liesituluilo okuti, “uvala wa kameme.”—Esi 19:6-9.

12. Ndomo ca tangiwa Kesituluilo 21:1, 2, otembo yipi uvala wa kameme u ka lingiwa?

¹² Otembo yipi uvala u ka lingiwa? Osimbu uyaki wo Harmagedo ka wa fetikile, olombuavekua viosi vi soka 144.000 vi ka kala ale kilu. Pole, hayoko handi yi ka kala otembo yuvala wa kameme. (Tanga Esituluilo 21:1, 2.) Uvala wa kameme u ka lingiwa noke liuyaki wo Harmagedo, eci ovanyãli vosi va Suku va ka kunduiwa.—Os 45:3, 4, 13-17.

13. Nye ci ka pita kuvala wa Kameme?

¹³ Nye uvala wa Kameme u ka lomboloka ku vana va kongeliwamo? Ndeci uvala umue u kongela ulume lukãi oco va kale kumosi, cimuamue haico okuti uvala wa Kameme u ka kongela Soma Yesu Kristu kumue lolombuavekua vi soka 144.000 okuti, ‘ondombua’ yaye. Uvala waco u ka tumbika usoma umue wokaliye, okuti u ka viala ongongo vokuenda 1.000 yanyamo.—Esi 20:6.

14-15. Ndomo ca tukuiwa kelivulu Liesituluilo ocipama 21, olombuavekua vi soka 144.000 vi sokisiwa la nye? (Tala elitalatu koñoño.)

¹⁴ Esituluilo ocipama 21 li sokisa olombuavekua vi soka 144.000, lolupale lumue lua posoka calua lu tukuiwa okuti, o “Yerusalãi Yokaliye.” (Esi 21:2, 9) Olupale luaco lua tumbikiwa leci ci soka 12 koviseveto viovawe, kuenda kua sonehiwa “12 kolonduko viovapostolo 12 va Kameme.” Momo lie eci  ca kuatela esilivilo lialua ku Yoano? Momo Yoano wa mola okuti pokati kovawe aco kua sonehiwavo onduko yaye. Eci ca kala esumũlũho limue linene!—Esi 21:10-14; Efs 2:20.

¹⁵ Olupale luaco ka lusokisiwa lolupale lalumue. Okololo yolupale luaco, ya kala yulu wa fina, olombundi viaco 12 via kala violomota viondongo, ovimbaka viaco via tungiwa lovawe a tĩla kuenda oloseteko viaco via suñama ciwa. (Esi 21:15-21) Pole, Yoano wa limbukele okuti kua kambele cimue! Yoano a popia hati: “Sia muililemo onembele, momo Yehova Suku Ukuonene Wosi kumue la Kameme, ovo onembele yaluo. Kuenje olupale ka lu sukila ekumbi pamue osãi oco vi ninilemo, momo ulamba wa Suku wa tuilamo kuenda Kameme eye wa kala ondiyelo yaluo.” (Esi 21:22, 23) Vana va panga onepa ko Yerusalãi Yokaliye, va ka kala la Yehova. (Hev 7:27; Esi 22:3, 4) Omo liaco, Yehova kuenda Yesu ovo onembele yolupale luaco.

16. Nye ci ka pita lomanu vokuenda Kuviali Wohulukãi Yanyamo Wusoma wa Suku?

¹⁶ Oku sokolola olupale luaco, ci sanjuisa calua olombuavekua. Pole, vana va kuete elavoko lioku kala palo posi, va kuetevo esunga lioku sanjuka. Vokuenda Kuviali Wohulukãi Yanyamo Wusoma wa Suku, o Yerusalãi Yokaliye yi ka nena asumũlũho alua palo posi. Yoano wa mola asumũlũho aco okuti, a kala ‘ndolui lumue luovava omuenyo.’ Kuenda kolonele vivali wolui, kua kala “oviti viomuenyo” okuti “amẽla oviti viaco, o ku sakula olofeka.” (Esi 22:1, 2) Omanu vosi va ka kuata epuluvi lioku kuatisiwa lasumũlũho aco. Kamue kamue, omanu vosi vana va pokola ku Yehova va ka li pua. Ka ku kala vali ovovei, evalo kuenda oku lila.—Esi 21:3-5.

17. Ndomo ca tangiwa Kesituluilo 20:11-13, helie o ka kuatisiwa Luviali Wohulukãi Yanyamo?

¹⁷ Helie o ka kuatisiwa lasumũlũho aco a komõhisa? Tete, owiñi wakahandangala una u ka puluka ko Harmagedo, noke omãla vosi va ka citiwa voluali luokaliye. Pole, Kesituluilo ocipama 20, ku sangiwavo ohuminyo yokuti vana va fa ka pinduiwa. (Tanga Esituluilo 20:11-13.) “Vakuesunga” vana va fa osimbu lava “havakuesungako,” okuti ka va kuatele epuluvi lioku lilongisa catiamẽla ku Yehova, va ka pinduiwa oco va kale lomuenyo  palo posi. (Ovl 24:15; Yoa 5:28, 29) Anga hẽ eci ci lomboloka okuti, vosi va ka pinduiwa oco va kale lomuenyo palo posi vokuenda kuviali Wohulukãi Yanyamo? Sio. Vana va likala epuluvi lioku vumba Yehova osimbu ovo va kala komuenyo, ka va ka pinduiwa. Ovo va kuatele ale epuluvi lioku ci linga, pole, ovilinga viavo via lekisa okuti ka va yonguile oku kuata omuenyo vocumbo Celau palo posi.—Mat 25:46; 2Te 1:9; Esi 17:8; 20:15.

18. Ongongo yi ka kala ndati kesulilo 1.000 yanyamo?

¹⁸ Kesulilo 1.000 yanyamo, omanu vosi va ka kala palo posi, va ka li pua. Lomue o ka kuata vali ekandu lina lia piñaliwa ku Adama. (Rom 5:12) Ekandu lia kokiwa la Adama ka li ka kalako vali. Lonjila eyi, vana va ka kala palo posi, va ka tambula ‘omuenyo’ wa lipua kesulilo 1.000 yanyamo.—Esi 20:5.

19. Momo lie ku ka sukiliwila oseteko ya sulako?

¹⁹ Tua kũlĩha okuti Yesu wa tamalãla kalikolisilo a Satana, oku nyõla ekolelo liaye. Eye wamamako lekolelo ndaño loloseteko viaco via Satana. Anga hẽ omanu vosi va ka li pua, va ka amamako lekolelo ku Yehova eci Satana a ka va seteka? Omunu lomunu o ka tẽla oku tambulula epulilo eli, eci Satana a kopiwa vokayike kesulilo 1.000 yanyamo. (Esi 20:7) Vana va ka pandikisa lekolelo vokuenda kuoseteko ya sulako, va ka tambula omuenyo ko pui kuenda oku sulako, eyovo liocili liulamba. (Rom 8:21) Vakuesino va ka kunduiwa otembo ka yi pui, kumue Leliapu kuenda olondele viaye.—Esi 20:8-10.

20. O liyevite ndati noke lioku linga ekonomuiso eli kelivulu Liesituluilo?

²⁰ Ku yevite hẽ esanju poku sokolola oku kala lomuenyo vokuenda kuoku tẽlisiwa kuovitumasuku evi vielivulu Liesituluilo? Ka ci ku vetiya hẽ oku laleka omanu vakuavo oco va likongele letu kefendelo liocili, ku Suku yetu? (Esi 22:17) Osimbu tu sokolola kovolandu a komõhisa a ka pita kovaso yoloneke, tu ka vetiyiwa oku popia olondaka viupostolo Yoano viokuti: “Amene! Enju, a Ñala Yesu.”—Esi 22:20.