1. Yehova o laleka Afendeli vaye oku linga nye? (Talavo ociluvialuvia.)

 KULIE tu pondola oku pinga elembeleko kuenda olonumbi? Tua kũlĩha etambululo liepulilo eli. Tu pondola oku amela ku Yehova Suku pocakati cohutililo. Yehova o tu laleka oku ci linga. Embimbiliya li tu sapuila hati: “Likutilili olonjanja viosi.” (1 Va Tes. 5:17) Tu pondolavo oku amela kokuaye poku likutilila loku sanda olonumbi viaye kolonepa viosi viomueyo wetu. (Olosap. 3:5, 6) Omo okuti Yehova ukuacali, o tu vetiya oco tu likutilile kokuaye otembo yosi tu yongola.

2. Nye tu konomuisa vocipama cilo?

² Tu pandula calua Yehova omo liombanjaile a tu ĩha yoku likutilila kokuaye. Ocili okuti, ndaño tu kuete ovina vialua vioku linga, tu sukila oku sanda otembo yoku likutilila. Etu pamue tu li yevavo okuti tu sukila oku mioñolola olohutililo vietu. Tu ecavo olopandu omo okuti tu pondola oku sanga elembeleko kuenda olonumbi Vovisonehua. Vocipama cilo, tu kũlĩhĩsa ndomo tu sanda otembo yoku likutilila poku konomuisa ulandu wa Yesu. Tu konomuisavo ndomo tu mioñolola olohutililo vietu poku kongelamo ovina vitãlo vi kuete esilivilo.

3. Nye Yesu a lilongisa catiamẽla kohutililo?

³ Yesu wa kũlĩhĩle okuti olohutililo vietu vi kuete esilivilo  lialua ku Yehova. Osimbu eye keyile palo posi, wa mola Isiaye oku tambulula olohutililo viafendeli vaye vakuekolelo. Ndeci, eci Isiaye a tambulula olohutililo via lingiwa lutima wosi la Hana, Daviti, Eliya kuenda vakuavo, Yesu wa kala laye. (1 Sam. 1:10, 11, 20; 1 Olos. 19:4-6; Osa. 32:5) Yesu wa longisa olondonge viaye oku likutilila lutima wosi kuenda lekolelo!—Mat. 7:7-11.

4. Nye tu lilongisila kolohutililo Yesu a linga?

⁴ Yesu omo lioku likutilila ku Yehova wa sia ongangu kolondonge viaye oco va yi kuame. Yesu poku linga upange waye woku kunda wa enda oku likutilila olonjanja viosi. Eye wa sandaile otembo yoku likutilila momo olonjanja vialua wa enda oku kala lomanu valua. (Mar. 6:31, 45, 46) Yesu wa pasokavo omele oco a kuate otembo yoku kala likaliaye oku likutilila. (Mar. 1:35) Vepuluvi limue wa likutilila uteke wosi, osimbu ka nõlele onjila yimue yikuete esilivilo lialua. (Luka 6:12, 13) Handi vali, Yesu wa likutilila olonjanja vialua vuteke osimbu handi ka file loku tiamisila utima kocikele caye ka ca lelukile palo posi.—Mat. 26:39, 42, 44.

5. Tu setukula ndati Yesu eci tu likutilila?

⁵ Ongangu ya Yesu yi tu longisa okuti ka kuli lacimue ci pondola oku tu tateka oku sanda otembo yoku likutilila. Ndeci Yesu a linga, tu sukila oku sanda otembo yoku likutilila poku pasuka omele, ale tu ci linga luteke. Nda tua ci linga tu lekisa ku Yehova okuti tua sanjukila ombanjaile yaco yilikasi. Manji umue ukãi o tukuiwa Lynne ivaluka ndomo a liyeva eci onjanja yatete a lilongisa catiamẽla kesumũlũho liohutililo. Eye hati: “Eci nda lilongisa okuti ndi pondola oku sapela la Yehova vapuluvi osi, ca ñuatisa oku u tenda Ndekamba liange kuenda oku mioñolola olohutililo viange.” Ocili okuti valua pokati ketu tua siata oku liyevavo ndoco. Kaliye tu konomuisi ovina vitãlo vi kuete esilivilo tu pondola oku kongela volohutililo vietu.

6. Ndomo ca tangiwa Kesituluilo 4:10, 11 nye Yehova a sesamẽla oku tambula?

⁶ Yehova o sesamẽla esivayo. Vocinjonde cimue, upostolo Yoano wa mõla 24 kakulu  kilu oku fendela Yehova. Ovo va sivaya Suku kuenda va popia okuti eye o “sesamẽla oku tambula ulamba, lesumbilo kuenda unene.” (Tanga Esituluilo 4:10, 11.) Ovangelo va kuetevo esunga lioku sivaya kuenda oku sumbila Yehova. Ovo va kasi laye kilu kuenda vo kũlĩha ciwa. Ovo va siata oku mola ovituwa via Yehova kovina eye a linga. Eci ovo va mola ovilinga via Yehova, va vetiyiwa oku u sivaya.—Yovi 38:4-7.

7. Momo lie tu sivayela Yehova?

⁷ Etu tu yongolavo oku sivaya Yehova lolohutililo vietu, poku u situluila okuti tu u sole kuenda tuo sumbila. Eci o tanga loku lilongisa Embimbiliya, likolisilako oku limbuka ovituwa via Yehova vi ku komohĩsa vali calua. (Yovi 37:23; Va Rom. 11:33) Noke sapuilako Yehova ndomo o liyevite catiamẽle kovituwa viaco. Tu pondolavo oku sivaya Yehova omo eye o tu kuatisa kuenda vamanji vakuavo voluali luosi. Eye olonjanja viosi o tu tata loku tu teyuila.—1 Sam. 1:27; 2:1, 2. 

8. Asunga api tu kuete oku eca olopandu ku Yehova? (1 Va Tesalonike 5:18)

⁸ Oku eca olopandu ku Yehova. Tukuete asunga alua oku eca olopandu ku Yehova vohutililo. (Tanga 1 Va Tesalonike 5:18.) Etu tu pondola oku eca olopandu kokuaye kovina viosi eye a tu ĩha momo ongavelo yosi yiwa yi tunda kokuaye. (Tia. 1:17) Ndeci, tu pondola oku eca olopandu vietu omo liongongo ya posoka kuenda ovina vikuavo eye a linga. Tu ecavo olopandu omo liomuenyo a tu ĩha, epata, akamba kuenda elavoko. Handi vali, tu eca olopandu ku Yehova omo a ecelela oku kuata ukamba laye.

9. Momo lie tu sukilila oku lekisa olopandu ku Yehova?

⁹ Etu pamue tu sukila oku likolisilako oku sokolola kasunga tu kuete oku eca olopandu ku Yehova. Tu kasi voluali lumue okuti omanu valua ka va lekisa olopandu. Olonjanja vialua omanu va tiamisila lika utima kueci va yongola, pole, kovina va sukila oku linga oco va lekise olopandu, hakoko. Nda tua fetika oku setukula ovituwa evi, olohutililo vietu vi ka kala lika vioku liyeya. Oco tu yuvule elinga liaco, tu sukila oku amamako oku kuata ocituwa coku lekisa olopandu kovina viosi Yehova a siata oku tu lingila.—Luka 6:45.

10. Ocituwa coku lekisa olopandu ca kuatisa ndati manji umue oku pandikisa? (Talavo ociluvialuvia.)

¹⁰ Ocituwa coku eca olopandu ci tu kuatisa oku pandikisa kovitangi. Kũlĩhĩsa ulandu wa manji Kyung-sook u sangiwa Vutala Wondavululi 15 ya Susu wo 2015. Eye wa limbukiwa okuti wa kuatiwa lokanser vapuvi. Eye wa popia hati: “Ocitangi caco cuhayele ca kala oku ndi sumuisa calua. Nda liyeva ndu okuti nda pumba ovina viosi kuenda nda kala lusumba walua.” Nye co kuatisa oku pandikisa?  Wamisako hati, ovoteke osi osimbu ka pekelele, wa enda oku londa kilu lionjo yaye, loku likutilila lolukandi catiamẽla kovina vitãlo a ponduile oku eca olopandu keteke liaco. Poku ci linga wa liyevaile ciwa kuenda oku situlula ocisola caye ku Yehova. Eye wa mola ndomo Yehova a kuatisa afendeli vaye vakuekolelo eci va liyaka lovitangi kuenda wa limbukavo okuti kuli vali asumũlũho alua komuenyo wetu okuti ovitangi vi sule. Ndeci capita lamanji Kyung-sook, tu kuete asunga alua oku eca olopandu ku Yehova ndaño tu liyaka lovitangi. Oku situlula olopandu vietu kokuaye vohutililo ci tu kuatisa oku pandikisa kuenda oku amamako oku tula utima.

11. Momo lie olondonge via Yesu via sukilile utõi noke lia Yesu oku tiukila kilu?

¹¹ Pinga ku Yehova utõi woku kunda. Osimbu Yesu ka endele kilu wa ivaluisa olondonge viaye ocikele va kuatele coku eca uvangi watiamẽla kokuaye “vo Yerusalãi, vo Yudea yosi kuenda vo Samaria toke kasulilo o kilu lieve.” (Ovil. 1:8; Luka 24:46-48) Noke liotembo yimue, asongui va va Yudea va kuata upostolo Petulu kuenda Yoano kuenje va va tuala Kekanga Linene kuenda va handeleka alume vaco vakuekolelo oku liwekapo oku kunda loku va saluisa. (Ovil. 4:18, 21) Ocituwa cipi Petulu la Yoano va lekisa?

12. Ndomo ca lekisiwa Kovilinga 4:29, 31, nye olondonge via linga?

¹² Petulu la Yoano va tambulula asongui va va Yudea hati: “Nda ca sunguluka kovaso a Suku oku tava kokuene okuti ku Suku hakoko, ci popi ene muẽle. Pole, catiamẽla kokuetu ka tu pondola oku liwekapo oku vangula ovina tua mola levi tua yeva.” (Ovil. 4:19, 20) Eci Petulu la Yoano va yovuiwa olondonge via likutilila lolukandi ku Yehova, oco va tiamisile utima koku linga ocipango caye. Ovo va likutilila ndoco: “Eca kakuenje vove utõi woku amamako oku popia ondaka yove.” Yehova wa tava ohutililo yaco ya lingiwa lutima wosi.—Tanga Ovilinga 4:29, 31.

13. Nye tu lilongisila kulandu wa manji Jin-hyuk?

¹³ Tu pondola oku setukula olondonge poku amamako oku kunda ndaño ceci olombiali vi tu handeleka oku liwekapo. Kũlĩhĩsa ulandu wa manji Jin-hyuk okuti wa kala vokayike omo liekolelo liaye. Vokayike vo wĩha ocikele coku tata olomandekua lakuavo, pole, vo wecelele lika oku sapela lavo ovina ovo va sukilile okuti ovina Viembimbiliya sio. Eye wa likutilila oku pinga utõi kuenje lutate wa kunda vapuluvi osi co wecelela. (Ovil. 5:29) Eye hati: “Yehova wa tambulula olohutililo viange poku nyĩha utõi kuenda olondunge oco ndi fetike alilongiso alua Embimbiliya vakukutu atãlo papito o kayike. Noke luteke, ndi soneha ovikanda ndi ka eca keteke likuavo kolomandekua lakuetu.” Tu pondolavo oku kolela okuti Yehova o ka tu kuatisa oku tẽlisa ocikele cetu coku kunda. Ndeci ca linga manji Jin-hyuk tu pondola oku likutilila oku pinga utõi kuenda olondunge.

14. Nye ci pondola oku tu kuatisa eci tu liyaka lovitangi? (Osamo 37:3, 5.)

¹⁴ Pinga ku Yehova oco a ku kuatise oku pandikisa kovitangi. Valua pokati ketu tua siata oku liyaka lovitangi vioku vela, esumuo, oku fisa umue tu sole, ovitangi vepata, oku lambalaliwa kuenda ovitangi vikuavo. Handi vali, ovina vikuavo ndeci, afengi kuenda ovoyaki ka via lelukilevo oku pandikisa lavio. Sapuila Yehova ndomo ove o liyevite.  U sapuila ocitangi cove ndeci nda wa linga lekamba liove o sole. Kolela okuti Yehova “o ka ku kuatisa.”—Tanga Osamo 37:3, 5.

15. Ohutililo yi tu kuatisa ndati oku ‘pandikisa kohali’? Tukula ulandu umue.

¹⁵ Oku amamako oku likutilila ci tu kuatisa oku ‘pandikisa kohali.’ (Va Rom. 12:12) Yehova wa kũlĩha okuti afendeli vaye va kasi oku pandikisa kuenje “eye o yevelela oku liyula kuavo kuekuatiso.” (Osa. 145:18, 19) Manji umue ukãi okuti ukundi wotembo yosi o tukuiwa Kristie ukuanyamo 29 wa limbuka ocili caco. Vepuluvi limue vocipikipiki, wa kuatiwa locitangi cimue cuvei wa kãla. Kuenje cokokela esumuo lialua. Noke wa yeva okuti inaye wa kuatiwa luvei umue utuala kolofa. Manji Kristie hati: “Ame nda likutilila calua ku Yehova oco a nyihe ongusu yoku pandikisa eteke leteke. Nda likolisilako oku kuata esokiyo liwa konepa yespiritu poku endaenda kolohongele loku linga elilongiso lio pokolika.” Eye wa amisako hati: “Oku likutilila ca ñuatisa oku pandikisa kotembo yovitangi. Nda kũlĩhĩle okuti Yehova olonjanja viosi o kasi lame kuenje ca ñuatisa oku tula utima. Ndaño okuti ocitangi cange cuvei ka ca pitile lonjanga, Yehova wa tambulula olohutililo viange poku nyĩha ombembua kuenda utima watula.” Lalimue eteke ka tu ka ivaliko okuti “Yehova wa kũlĩha ndomo a yovola koseteko omanu vo sumbila.”—2 Pet. 2:9.

16. Momo lie tu sukilila ekuatiso lia Yehova oco tu tamalãle kayonjo?

¹⁶ Pinga ekuatiso lia Yehova oco o tẽle oku tamãlala kayonjo. Omo liekambo lietu lioku lipua, olonjanja viosi tu setekiwa oku linga ovina ka via sungulukile. Satana o kasi oku likolisilako calua oco a lingise okuti ka ci leluka kokuetu oku tamãlala. Onjila yimue eye a kuama, poku seteka oku yapuisa ovisimĩlo vietu pocakati covitalukilo ka via sungulukile. Ovitalukilo viaco vi pondola oku yukisa olondunge vietu lovisimĩlo via vĩha  vina vi vihĩsa utima wetu loku tu kokela oku linga akandu anene.—Mar. 7:21-23; Tia. 1:14, 15.

17. Nye tu sukila oku linga oco olohutililo vietu vi likuate leci tua pinga? (Talavo ociluvialuvia.)

¹⁷ Tu sukila ekuatiso lia Yehova nda tu yongola oku yula oseteko yimue ka ya sungulukile. Vohutililo Yesu a linga wa kongelamo epingilo liokuti: “Ku ka ecelele okuti tu yonjiwa, puãi tu popele kondingaĩvi.” (Mat. 6:13) Yehova o yongola oku tu kuatisa, pole, tu sukila oku pinga kokuaye oco a tu kuatise. Tu sukilavo oku lekisa ovilinga vi likuata lolohutililo vietu. Handi vali, tu likolisilakovo oku yuvula oku tanga loku yevelela ovisimĩlo ka via sungulukile via siata voluali lua Satana. (Osa. 97:10) Tu sukila oku yukisa olondunge vietu lovisimĩlo via sunguluka poku tanga loku lilongisa Embimbiliya. Oku endaenda kolohongele kuenda kupange woku kunda ci ka teyuilavo ovisimĩlo vietu. Yehova wa tu likuminyavo okuti ka ka ecelela okuti tu yonjiwa leci ka tu tẽla.—1 Va Kor. 10:12, 13.

18. Catiamẽla kohutililo nye vosi yetu tu sukila oku linga?

¹⁸ Omunu lomunu pokati ketu o sukila oku likutilila oco amameko lekolelo ku Yehova koloneke vilo via sulako viohali yalua. Eteke leteke sokiya otembo yoku likutilila lutima wosi. Yehova o yongola okuti tu ‘situlula ovisimĩlo vietu viosi kokuaye’ vohutililo. (Osa. 62:8) Eca esivayo ku Yehova kuenda eca olopandu kovina viosi a siata oku ku lingila. Pinga kokuaye oco a ku ĩhe utõi kupange woku kunda. Pingavo kokuaye oco a ku kuatise oku pandikisa kovitangi viosi kuenda kayonjo osi o pondola oku liyaka lao. Ku ka ecelele okuti cimue, ale omunu umue, oku tateka oku likutilila ku Yehova olonjanja viosi. Yehova o tambulula ndati olohutililo vietu? Epulilo eli tu ka li konomuisa vocipama cikuãimo.