1-2. Nye ci lomboloka ocisembi kuenda momo lie tua ci sukilila?

WECI ulume wa lipuile Adama a linga ekandu, eye wa pumba epuluvi lioku kala lomuenyo otembo ka yi pui, hayeko lika, pole locitumbulukila caye. Ka kua kaile esunga oco Adama a lueye. Eye wa linga ekandu liocipango. Pole, ocitumbulukila caye ka ca lingile ekandu kuenda ka ca vetiyile Adama oco a linge ekandu. (Va Rom. 5:12, 14) Anga hẽ nda kua lingiwa cimue oco ocitumbulukila ca Adama ci yovuiwe? Oco! Noke Yehova wa lekisa ndomo a ponduile oku yovola olohuluwa viocitumbulukila ca Adama kekandu kuenda kolofa. (Efet. 3:15) Votembo ya sokiyiwa Yehova wa ponduile oku tuma Omõlaye oku tunda kilu ‘oku eca omuenyo waye ndocisembi coku yovola omanu valua.’—Mar. 10:45; Yoa. 6:51.

² Nye ci lomboloka ocisembi? Kelimi lio Helasi, ocisembi cilomboloka ondando yimue Yesu a feta oco a lande cina Adama a pumba. (1 Va Kor. 15:22) Momo lie tua sukilila ocisembi? Momo ocihandeleko ca Yehova cesunga, ndomo ca tumbikiwile Vocihandeleko ca kisikile oku eca omuenyo lomuenyo. (Etu. 21:23, 24) Adama wa pumba omuenyo waye wa lipua. Oco ku lingiwe esunga lia Suku, Yesu wa eca omuenyo waye wa lipua. (Va Rom. 5:17) Kuenje eye wa linga “Isia kapui,” yomanu vosi vana va lekisa ekolelo kocisembi.—Isa. 9:6; Va Rom. 3:23, 24.

3. Ndomo ca tangiwa ku Yoano 14:31; 15:13, momo lie Yesu a ecela omuenyo waye wa lipua ndocilumba?

³ Yesu wa sanjukilile oku eca omuenyo waye omo liocisola calua a kuatela Isiaye wokilu kuenda etu. (Tanga Yoano 14:31; 15:13.) Yesu omo lioku sola calua Yehova kuenda etu,  eye wa nõlelepo oku amamako lekolelo toke kesulilo liomuenyo waye loku tẽlisa ocipango ca Isiaye. Kuenje Yesu wamamako lekolelo toke kolofa. Omo lieci eye a linga, ocipango ca Yehova catiamẽla komanu kuenda kongongo ci ka tẽlisiwa. Vocipama cilo, tu konomuisa esunga lieci Suku a ecelela okuti Yesu o talisiwa ohali toke kolofa. Tu konomuisavo ulandu u sonehi umue Wembimbiliya okuti wa lekisa olopandu kocisembi. Kuenje kesulilo, tu konomuisa ndomo tu lekisa okuti tua sanjukila ocisembi kuenda ndomo tu lekisa olopandu vietu kocilumba Yehova la Yesu va tu angiliyila.

4. Lombolola ndomo Yesu a fa.

⁴ Sokolola eci ca pita vokuenda kueteke liasulako liomuenyo wa Yesu palo posi, osimbu handi ka file. Ndaño okuti Yesu wa kuatele omoko yoku pinga olohoka viovangelo, eye wa ecelela okuti asualali va Roma vo kuata loku u tipula. (Mat. 26:52-54; Yoa. 18:3; 19:1) Ovo vo veta lolombueti vina okuti vio lemeha. Noke vo wambatisa uti umue wa lema osimbu a kala oku pita osonde. Yesu wa fetika oku koka uti waco oku loña kocitumãlo a ka pondiwila kuenje ulume umue wa kala oku tala ovina via kala oku pita vo kuata loku wambatisa uti waco. (Mat. 27:32) Eci Yesu a pitĩla pocitumãlo a laikele oku pondiwa, asualali vo valela kovoko lokovolu kuti wekangiso. Omo lioku lema kuetimba lia Yesu apute a kala oku livokiya. Akamba vaye kuenda ina yaye va lila, pole, va Yudea va kala oku u pembula. (Luka 23:32-38; Yoa. 19:25) Yesu wa pita otembo yalua oku tala ohali. Omo lionjila etimba liaye lia patekiwa utima lapuvi via kala locitangi coku fuima ciwa. Yesu wa kũlĩhĩle okuti wa lekisa ekolelo osimbu handi ka file kuenje wa likutilila ku Yehova onjanja yasulako. Noke wa petamisa utue waye kuenje wa tula omuenyo. (Mar. 15:37; Luka 23:46; Yoa. 10:17, 18; 19:30) Ocili okuti lia kala evalo limue lialua kuenda olofa viesepu!

5. Nye ca sakalaisaile vali Yesu okuti onjila ndomo a pondiwa ci sule?

⁵ Ku Yesu, onjila ndomo a pondiwa haiyoko yosakalaisale. Eye wa sakalalele vali calua lalundi a kokisa olofa viaye. Eye wa lundiliwa okuti wa popia atonãi haiye ka sumbilile Suku kuenda onduko Yaye. (Mat. 26:64-66) Omo okuti omanu va lundila Yesu okuti ka sumbilile Suku, eci co sakalaisa calua kuenda wa lavokaile okuti Isiaye ka ponduile oku ecelela okuti o sepuiwa lonjila ndeyi. (Mat. 26:38, 39, 42) Momo lie Yehova a ecelela okuti Omõlaye o soliwe o tala ohali loku fa? Tu konomuisi asunga atatu.

6. Momo lie Yesu a sukililile oku valeliwa kuti wekangiso?

⁶ Tete, Yesu wa sukilile oku valeliwa kuti oco a yovole va Yudea kekandu limue. (Va Gal. 3:10, 13) Ovo va linga ekandu liaco momo va likuminyile oku pokola kocihandeleko ca Suku, pole, ka va ci tẽlisile. Ovo va sesamẽlele oku fa momo va kala omãla va Adama. (Va Rom. 5:12) Ocihandeleko ca Suku ca eciwile ku va Isareli ca popele okuti, omunu umue wa linga ekandu wa sesamẽlele oku pondiwa. Noke lioku pondiwa etimba liaco li valeliwa kuti. * (Esin. 21:22, 23; 27:26) Yesu poku valeliwa kuti, ca ecelela okuti olofeka viosi vana vo li kala, va kuatisiwa locilumba caye.

7. Esunga lipi liavali lieci Suku a ecelela Omõlaye oku tala ohali?

 ⁷ Tu konomuisi esunga liavali lieci Suku a ecelela Omõlaye oku tala ohali. Eye wa kala oku pindisa Yesu kocikele cimue a laikele oku tambula okuti Ndocitunda cetu Cinene. Yesu wa limbuka okuti ka ca lelukile oku pokola ku Suku eci omunu umue a pita loseteko yinene. Eye wa sakalalele calua okuti wa likutilila oku pinga ekuatiso “loku lila kuenda asuelẽla.” Kuenje omo okuti Yesu wa pita levalo lialua, eye wa kuatele elomboloko liovitangi vietu kuenda “o pondola oku [tu] kuatisavo” eci tu “nyikiwa.” Tu sanjuka calua omo okuti Yehova wa tu ĩha Ocitunda Cinene cina okuti “ca kapako oku hongua kuetu”!—Va Hev. 2:17, 18; 4:14-16; 5:7-10.

8. Esunga lipi liatatu Suku a ecelela okuti Yesu o pita voseteko yinene?

⁸ Tatu, Yehova wa ecelela okuti Yesu o tala ohali omo lioku eca etambululo kocitangi cimue ca votuiwa cokuti: Omanu va pondola hẽ oku amamako lekolelo ndaño ceci a pita loseteko yinene? Satana wa ci tatãla! Satana wa popia okuti omunu o vumba lika Suku nda ekalo liaye li kasi ciwa. Eye o tava okuti omanu ka va sole Yehova, ndeci Adama ko solelevo. (Yovi 1:9-11; 2:4, 5) Omo okuti Yehova wa kolelele Omõlaye, wa ecelela okuti Yesu o setekiwa lonjila yina omunu umue a pondola oku pandikisa. Yesu wamamako lekolelo kuenda wa lekisa okuti Satana ohembi.

9. Ongangu yipi upostolo Yoano a tu sila?

⁹ Ekolelo Liakristão valua lia pamisiwa omo lielongiso liocisembi. Ovo vamamako oku kunda ndaño lelambalalo va liyaka lavio vomuenyo wavo wosi. Kũlĩhĩsa ulandu wupostolo Yoano. Eye lekolelo wa kunda ocili catiamẽla ku Kristu kuenda ocisembi, citava okuti vokuenda 60 kanyamo. Eci a kala kesulilo 100 kanyamo Uviali wo ko Roma wo tendele okuti o koka ohele kuenje vo kapa kumandekua kocifuka co Patmo. Nye eye a linga okuti oco cĩvi? ‘Oku vangula catiamẽla ku Suku, loku imbila Yesu uvangi.’ (Esit. 1:9) Yoano wa sia ongangu yiwa yekolelo kuenda epandi!

10. Alivulu Yoano a soneha, a lekisa ndati okuti eye wa eca olopandu kocisembi?

¹⁰ Yoano valivulu aye a soneha wa lekisa ocisola calua ku Yesu kuenda olopandu kocisembi. Valivulu aco, mua lomboluiwa 100 kolonjanja catiamẽla kocisembi kuenda ovina viwa ocisembi ci ka linga. Ndeci, Yoano wa soneha hati: “Nda umue wa linga ekandu, tu kuete oñuatisi yimue yi kasi kumue la Isia okuti, Yesu Kristu ukuesunga.” (1 Yoa. 2:1, 2) Yoano wa tukulavo esilivilo ‘lioku imba uvangi watiamẽla ku Yesu.’ (Esit. 19:10) Ocili okuti Yoano wa lekisa olopandu vialua kocisembi. Tu lekisavo ndati olopandu kocisembi?

11. Nye ci tu kuatisa oku yuvula oku kupukila veyonjo?

¹¹ Tamalãla keyonjo liekandu. Nda tua sanjukila ocisembi ka tu ka lekisa ocituwa cokuti: ‘Ka kuli esunga lioku likolisilako oku tamalãla eci ndi setekiwa. Ndi pondola oku linga ekandu kuenda oku pinga ongecelo.’ Pole, eci tu setekiwa oku linga cimue cĩvi tu pondola oku popia hati: ‘Sio! Momo lie ndi lingila ovina evi noke liovina viosi Yehova la Yesu va siata oku ndingila?’ Oco ka tu ka wile veyonjo liaco, tu sukila oku pinga  ongusu ku Yehova loku u sapuila hati: ‘Ku ka ecelele okuti ndi yonjiwa.’—Mat. 6:13.

12. Tu kapako ndati elungulo li sangiwa 1 Yoano 3:16-18?

¹² Sola vamanji. Eci tu lekisa ocisola, tu lekisavo okuti tua sanjukila ocisembi. Momo lie? Momo Yesu ka ecele lika omuenyo waye kokuetu pole, wa wecavo ku vamanjetu. Nda eye wa va fila, momo va kuete esilivilo kovaso aye. (Tanga 1 Yoano 3:16-18.) Tu lekisa okuti tu sole vamanji konjila ndomo tu vatata. (Va Efe. 4:29, 31–5:2) Ndeci, tu va kuatisa eci va vela, ale ceci va pita lovitangi vialua, oku kongelamo ovilunga. Pole, nye tu sukila oku linga nda manji umue wa linga, ale wa popia cimue ci tu sumuisa?

13. Momo lie tu sukilila oku kala vakuakuecela?

¹³ Anga hẽ olonjanja vimue ca tĩla kokuove oku ecela manji umue? (Ovis. 19:18) Nda oco, kapako onumbi eyi yokuti: “Amamiko oku likapako omunu lukuavo, oku liecela pokati lutima wosi, nda umue o kuetele ondaka ukuavo. Ndeci Yehova o weceli lutima wosi, cimuamue haico vu linga.” (Va Kol. 3:13) Olonjanja viosi tu ecela vamanjetu, tu lekisa ku Isietu wokilu okuti tua sanjukila ocisembi. Tu amamako ndati oku lekisa okuti tua sanjukila ombanjaile eyi ya tunda ku Suku?

14. Volonjila vipi tu pondola oku amamako oku sanjukila ocisembi?

¹⁴ Pandula Yehova omo liocisembi. Manji umue o tukuiwa Joanna o kuete 83 kanyamo, o kasi ko India wa popia hati: “Ndi sima okuti ci kuete esilivilo eteke leteke oku tukula ocisembi volohutililo viange kuenda oku eca olopandu ku Yehova omo liocisembi caco.” Volohutililo viove vio pokolika, sokolola kakulueya wa linga vokuenda kueteke noke pinga ku Yehova oco a ku ecele. Nda okuti wa linga ekandu linene, o sukilavo oku pinga ekuatiso kakulu vekongelo. Ovo va pondola oku ku yevelela kuenda locisola calua va ku kuatisa Londaka ya Suku. Ovo va likutilila love kuenda va pinga ku Yehova oco a ku ecele loku kuata vali ukamba uwa Laye.—Tia. 5:14-16.

15. Momo lie tu sukilila oku sanda otembo yoku tanga kuenda oku sokolola catiamẽla kocisembi?

¹⁵ Sokolola kocisembi. Manji umue ukãi o tukuiwa Rajamani o kuete 73 kanyamo wa popia hati: “Eci ndi tanga ohali Yesu a pita  layo, vovaso ange mu tunda asuelẽla.” Citava okuti ove pamue o yevavo esumuo lialua poku sokolola ndomo Omõla a Suku a tala ohali yalua. Pole, osimbu o sokolola kocilumba ca Yesu, ocisola cove kokuaye kuenda ku Isiaye, ci livokiya. Oco o kuatisiwe oku sokolola kocisembi, momo lie kelilongiso liove lio pokolika ku konomuisila ulandu waco?

16. Oku longisa vakuetu catiamẽla kocisembi, ci tu kuatisa ndati? (Tala ociluvialuvia koñoño.)

¹⁶ Longisa vakuene catiamẽla kocisembi. Olonjanja viosi tu sapuilako vakuetu catiamẽla kocisembi, esanju lietu kokuayo li ka livokiya. Tu kuete ovimalẽho vialua oco tu longise lavio vakuetu esunga lieci Yesu a tu fila. Ndeci, tu pondola oku lekisa ocipama 4 combrochura Olondaka Viwa vi Tunda ku Suku! Kocipama losapi hati, “Yesu Kristu Helie?” Ale, tu kuama ocipama 5 velivulu Embimbiliya li Pondola Oku tu Longisa Nye? Losapi hati, “Ocisembi Ombanjaile Ya Velapo Ya Suku.” Unyamo lunyamo tu vokiya olopandu vietu kocisembi poku kala Kocipito Condalelo yo Kufa kua Yesu kuenda oku laleka omanu vakuavo oco va likongele kokuetu. Yehova wa tu ĩha esumũlũho linene lioku longisa vakuetu catiamẽla Komõlaye!

17. Momo lie ocisembi ombanjaile ya velapo Suku a eca komanu?

¹⁷ Ocili okuti tu kuete asunga alua oku amamako oku vokiya olopandu vietu kocisembi. Omo liocisembi, tu pondola oku kuata ukamba la Yehova ndaño okuti ka tua lipuile. Omo liocisembi, ovilinga via Satana vi ka imũha otembo ka yi pui. (1 Yoa. 3:8) Handi vali omo liocisembi ocipango catete ca Yehova mulo vongongo ci ka tẽlisiwa. Osi yi ka kala ocumbo celau. Vosi vana ove o ka kũlĩha va ka sola Yehova kuenda oku u vumba. Omo liaco, eteke leteke tu sandi onjila yoku lekisa olopandu vietu kocisembi okuti, ombanjaile ya velapo Suku a eca komanu!