Momo lie Yesu eci handi ka file a tukuila olondaka via Daviti vi sangiwa Kosamo 22:1?

Pokati kolondaka vimue Yesu a popia osimbu handi ka file, vi sangiwa kelivulu lia Mateo 27:46 viokuti: “A Suku yange, a Suku yange, wa njandulukila nye?” Yesu poku tukula olondaka evi wa tẽlisa olondaka viukualosamo Daviti vi sangiwa Kosamo 22:1. (Mar. 15:34) Ka ca sungulukile oku sima okuti Yesu wa tukula olondaka evi omo a sumuile, ale vokuenda kuotembo yimue ekolelo liaye lia tepulukile. Yesu wa kũlĩhĩle ciwa esunga lieci a sukililile oku fa kuenda wa sanjukilile oku ci linga. (Mat. 16:21; 20:28) Eye wa kũlĩhĩle okuti kepuluvi liolofa viaye, Yehova wa sukilile oku upa ovina viosi via “vindikiya” kolonele viaye. (Yovi 1:10) Omo liaco, Yehova wa ecelela okuti Yesu o lekisa okuti o pondola oku amamako lekolelo ndaño okuti olofa viaye ka via lelukile.—Mar. 14:35, 36.

Momo lie Yesu a tukuila olondaka viosamo eyi? Ndaño ka tua kũlĩhĩle ovina viosi via kongelamo tu konomuisi asunga amue. *

Yesu poku vangula olondaka evi, anga hẽ wa lekisa okuti Yehova ka ponduile oku tiamisila utima kolofa viaye? Yesu wa sukilile oku feta ocisembu okuti Yehova ko tateka. Eye wa kala omunu ukuasitu kuenda wa sukilile oku fa okuti o “mahẽla omanu vosi oku fa.”—Va Hev. 2:9.

Yesu poku tukula olondaka vimue viosamo yaco wa lekisa hẽ okuti wa yonguile oku tukula osamo yosi? Koloneke viaco ca siatele va Yudea oku patekela olosamo vialua. Eci va yeva ocinimbu cimue cosamo, nda ca va kokela oku sokolola kosamo yaco yosi. Nda oco Yesu a yonguile oku linga, eye nda wa kuatisa olondonge viaye va Yudea oku ivaluka ovitumasuku vialua vi sangiwa vosamo yaco viatiamẽla kolofa viaye. (Osa. 22:7, 8, 15, 16, 18, 24) Handi vali ovinimbu via sulako viosamo vi sivaya Yehova kuenda viu tukula okuti eye Soma yoluali luasi.—Osa. 22:27-31.

Yesu poku tukula olondaka via Daviti wa kala hẽ oku lekisa okuti ka kũlĩhĩle cimue? Yesu osimbu ka file wa sombisiwa lonjila yimue okuti wa lundiliwa oku popia etonãi. (Mat. 26:65, 66) Esombiso liaco lia lingiwa lonjanga kuteke kuenda ca lingiwa lonjila yimue okuti ka va kuamele ovihandeko via tumbikiwa. (Mat. 26:59; Mar. 14:56-59) Poku tukula olondaka viaco vi kasi ndepulilo, Yesu wa kala oku lekisa okuti ka lingile lacimue cĩvi nda ca va vetiya oku u ponda.

Anga Yesu wa yonguile oku ivaluisa omanu okuti ndaño okuti Daviti usonehi wosamo eyi wa ponduile oku tala ohali, ca lombolokele hẽ okuti Daviti ka taviwile la Yehova? Apulilo a Daviti ka a lombolokele okuti eye wa honguele kekolelo. Noke lioku linga apulilo aco eye wa yonguile oku lekisa ekolelo liokuti Yehova wa ponduile oku popela afendeli vaye loku amamako oku u sumũlũisa. (Osa. 22:23, 24, 27) Cimuamue haico okuti Yesu “Omõla a Daviti,” poku tala ohali kuti wekangiso ka ca lombolokele okuti ka taviwile la Yehova.—Mat. 21:9.

Anga hẽ Yesu wa kala oku lombolola evalo liaye omo lia Yehova oku Ecelela ovina via kala oku lipita laye oco ekolelo liaye li setekiwe? Eci ka ca kaile ocipango ca Yehova Omõlaye oku talisiwa ohali loku fa. Eci ca lingiwa noke lia Adama la Eva oku lueya. Yesu ka lingile lacimue cĩvi, pole, wa sukilile okuti o talisiwa ohali loku fa oco ku tambuluiwe epulilo Satana a votola loku linga eliangiliyo liocisembi okuti omanu va kuata vali ekalo va pumbile. (Mar. 8:31; 1 Pet. 2:21-24) Eci nda ca tẽlisiwa lika nda Yehova wa ecelelele okuti Yesu o liyaka lovitangi viaco lika waye onjanja yatete komuenyo waye.

Anga hẽ Yesu wa seteka oku kuatisa olondonge viaye oku tiamisila utima kesunga lieci Yehova a ecelela okuti Yesu o fila kuti wekangiso? * Yesu wa kũlĩhĩle okuti oku fila kuti wekangiso ndongangala ca ponduile oku koka ocilondokua ku valua. (1 Va Kor. 1:23) Nda olondonge viaye via tiamisilile utima kesunga lieci eye a fila ovo va ponduile oku kuata elomboloko liwa. (Va Gal. 3:13, 14) Ovo va ponduile oku u tenda ndupopeli okuti ndongangala sio.

Ndaño Yesu wa popia olondaka evi, eye wa kũlĩhĩle okuti oku fila kuti wekangiso ca kala oku tẽlisa ocipango ca Yehova. Yesu noke yoku tukula osamo eyi wa popia hati: “Ca tẽlisiwa!” (Yoa. 19:30; Luka 22:37) Esunga lieci Yehova a liwekelapo oku kuatisa Yesu vokatembo kamue, ca ecelela okuti Yesu o tẽlisa cosi a tumiwile oku linga palo posi. Kuendavo ca ecelela okuti eye o tẽlisa ovina viosi via sonehiwa catiamẽla kokuaye “Vocihandeleko ca Mose Lovaprofeto kuenda Olosamo.”—Luka 24:44.