1. Nye Yehova a lete kafendeli vaye?

YEHOVA SUKU “o sanjukila omanu vaye.” (Osa. 149:4) Eci ci tu sanjuisa calua! Yehova o lete ovituwa vietu viwa; alikolisilo etu kuenda o tu kuatisa oku kala akamba vaye. Nda tu amamako lekolelo kokuaye o ka amamakovo oku kala ekamba lietu otembo ka yi pui.—Yoa. 6:44.

2. Momo lie vamue va simila okuti ka va soliwe la Yehova?

² Vamue pamue va popia hati, ‘Ndi cĩ okuti Yehova o sole afendeli vaye ndocimunga, pole, ndi kolela ndati okuti eye o ndi sole?’ Momo lie omanu vamue va lingila epulilo liaco? Manji umue o tukuiwa Oksana * wa pita locitangi cimue eci a kala omõla wa popia hati: “Ame nda sanjukile calua eci ndapapatisiwa kuenda nda fetika upange wakundi votembo yosi. Pole, eci nda tẽlisa 15 kanyamo nda fetika oku sokolola ovina vĩvi via pita lame eci nda kala omõla. Noke nda fetika oku sima okuti Yehova ka ndi sole vali.” Manji Yua okuti ukundi wotembo yosi haiye wa kuatelevo ovitangi vialua eci a kala omõla, wa popia hati: “Nda tumbikile omuenyo wange ku Yehova momo nda yonguile oku u sanjuisa. Pole, nda simile okuti lalimue eteke eye a ka ndi sola.”

3. Nye tu konomuisa vocipama cilo?

³ Ndeci ca pita la vamanji vavali va tukuiwa ale, ocili okuti ove o sole calua Yehova, pole, pamue ku tava okuti eye o ku sole. Momo lie o sukilila oku kolela okuti Yehova wa ku kapako? Nye ci pondola oku ku kuatisa eci o sima okuti Yehova ka  ku sole? Tu konomuisi atambululo apulilo a-a.

4. Momo lie ci kuetele ohele oku kuatela atatahãi ocisola Yehova a tu kuetele?

⁴ Ocisola ocituwa cimue ci pamisa calua. Nda tua kolela kocisola kuenda kekuatiso lia Yehova, tu ka vetiyiwa oku u vumba lutima wosi ndaño lovitangi komuenyo. Pole, nda tua kuata atatahãi okuti Yehova ka tu kapeleko ‘ongusu yetu yi kala yitito.’ (Olosap. 24:10) Kuenje eci tu sumua kuenda ka tu lekisa ekolelo ku Suku tu ka yapuisiwa la Satana.—Va Efe. 6:16.

5. Nye ca siata oku pita la vamanji vamue va sima okuti Suku ka va sole?

⁵ Akristão vamue vakuekolelo koloneke vilo, veya oku hongua konepa yespiritu omo lioku kuata atatahãi. Manji umue ukulu wekongelo o tukuiwa James, wa popia hati: “Ndaño okuti nda kala kupange wo Betele kuenda nda kuatisa ekongelo limue lielimi likuavo, nda enda oku lipula nda Yehova o tava muẽle alikolisilo ange. Handi vali, nda enda oku lipula nda Yehova wa kala oku yevelela olohutilolo viange.” Manji umue o tukuiwa Eva okuti o kasi kupange ulikasi wa popia hati: “Nda limbuka okuti oku kuatela atatahãi ocisola Yehova a tu kuetele ci koka ohele. Eci ci tu kokela oku liwekapo oku pitisa kovaso ovina viespiritu kuenda ci tepulula esanju lietu kupange wa Yehova.” Manji Michael, ukundi wotembo yosi haiye ukulu wekongelo wa popia hati: “Nda ove ku tava okuti Suku wa kukapako o pondola oku yapuisiwa.”

6. Nye tu sukila oku linga eci tu fetika oku sima okuti Suku ka tu sole?

⁶ Ovolandu a-a, a lekisa okuti, oku sima okuti Yehova ka tu sole, ci honguisa ekolelo lietu. Pole, nye tu sukila oku linga eci tu fetika oku sima okuti Yehova ka tu sole? Lonjanga yalua tu sukila oku liwekapo oku kuata ovisimĩlo viaco! Pinga ku Yehova oco a ku kuatise oku yuvula “ovisimĩlo” viaco loku kuata ‘ombembua ya Suku yina ya piãla olondunge viosi, yi lava utima wove kuenda ovisimĩlo viove.’ (Osa. 139:23; Va Fil. 4:6, 7) Ivaluka okuti haveko lika o kasi oku liyaka lovisimĩlo viaco. Vamanji valua vakuekolelo va kasivo oku liyaka lovisimĩlo ka via sungulukile. Ndaño muẽle afendeli va Yehova vo kosimbu va liyakavo lovitangi viaco. Kũlĩhĩsa eci tu lilongisila kulandu wupostolo Paulu.

7. Ovitangi vipi Paulu a liyaka lavio?

⁷ Anga onjanja yimue wa yevele ale esumuo omo liovikele vialua o kuete okuti ca tĩla oku vi tẽlisa viosi? Nda oco, o ka kuata elomboloko lieci ca pita la Paulu. Eye wa sakalalele la vamanji vatiamẽla ‘kakongelo osi.’ (2 Va Kor. 11:23-28) Anga hẽ o kasi luvei umue ka u piti okuti u tepulula esanju liove? Paulu wa kuata ocitangi cimue eye a tendele ‘ndosongo ketimba,’ citava okuti uvei umue woketimba kuenda eye wa yonguile okuti u pita. (2 Va Kor. 12:7-10) Anga hẽ ove wa sumua omo liekambo liove lioku lipua? Ovina evi, ovio Paulu a liyakavo lavio. Eye wa popia okuti, “ngongo yange we” omo olonjanja viosi wa sukilile oku yaka oco a linge eci ciwa.—Va Rom. 7:21-24.

8. Nye ca kuatisa Paulu oku pandikisa kovitangi a liyaka lavio?

⁸ Ndaño okuti Paulu wa liyaka lovitangi vialua lekalo li sumuisa, eye wamamako oku vumba Yehova. Nye co kuatisa oku ci linga? Ndaño wa limbukile ekambo liaye lioku lipua, eye wa kolelele kocisembi. Eye wa kũlĩhĩle ohuminyo ya Yesu yokuti, “wosi o kolela ku [Yesu] o kuata omuenyo ko pui.” (Yoa. 3:16; Va Rom. 6:23) Paulu wa kala umue pokati ka vana va kuatela ekolelo kocisembi. Eye wa kolelele okuti Yehova o pondola oku ecela, ndaño muẽle vana va linga ekandu linene nda ovo va likekembela.—Osa. 86:5.

9. Nye tu lilongisa kolondaka via Paulu vi sangiwa ku Va Galatia 2:20?

⁹ Paulu wa kolelelevo okuti Suku wo sola calua momo wa kũlĩhĩle okuti Suku wa tuma Yesu oco o file. (Tanga Va Galatia 2:20.) Kũlĩhĩsa ño olondaka vielembeleko kesulilo liocinimbu eci. Paulu wa popia hati: ‘Omõla a Suku . . . wa ndi sola kuenje wa lieca olumue mekonda liange.’ Paulu ka kuatele ocisimĩlo cokuti wa kala omunu umue uvĩ okuti Suku ka ponduile oku u sola, eye hati, ‘nda siata oku mola okuti Yehova o sole vamanji, omo liaco ca sunguluka okuti eye o ndi solavo.’ Paulu o sapuila va Roma hati: “Osimbu tua kala vakuakandu, Kristu wa tu fila.” (Va Rom. 5:8) Lacimue ci pondola oku tateka Suku oku tu sola!

10. Nye tu lilongisa kukanda ku Va Roma 8:38, 39?

¹⁰ Tanga Va Roma 8:38, 39. Paulu wa kolelele okuti Suku wo solele muẽle. Eye wa soneha okuti “lacimue ci tẽla oku tu tepa kocisola ca Suku.” Paulu wa kũlĩhĩle okuti Yehova wa lekisa epandi la va Isareli. Eye wa limbukavo ohenda ya piãla Yehova a lekisa kokuaye. Volondaka vikuavo, Paulu wa kala loku popia  hati: ‘Nda Yehova wa tuma omõlaye oco a ndi file, si kuete atatahãi okuti Yehova o ndi sole.’—Va Rom. 8:32.

11. Ndaño okuti Paulu wa lingile akandu nda-a a tukuiwa 1 Timoteo 1:12-15, momo lie a kolelele okuti Suku u sole?

¹¹ Tanga 1 Timoteo 1:12-15. Citava okuti Paulu wa enda oku sumua poku sokolola ovina vĩvi a enda oku linga osimbu ka kaile Ukristão. Eye wa litukula hati, “ñuetepo vali” akandu kuenje eci ka ci komõhisa! Osimbu handi Paulu ka kũlĩhĩle ocili, wa enda oku lambalala Akristão kalupale aco osi loku kapa vamue vokayike kuenda oku ponda Akristão vakuavo. (Ovil. 26:10, 11) O pondola hẽ oku sokolola ndomo Paulu nda a liyeva oku kũlĩha umalẽhe umue Ukristão okuti olonjali viaye eci via pondiwa eye wa pangavo onepa? Paulu wa likekembela akulueya aye, pole, wa kũlĩhĩle okuti ka ponduile oku pongolola ovina vĩvi a linga kosimbu. Eye wa tavele okuti Kristu wo fila kuenje wa popia hati: “Ñuete ocikele caco omo liohenda ya piãla ya Suku.” (1 Va Kor. 15:3, 10) Nye tu lilongisilako? O sukila oku tava okuti Yesu wa ku fila, lonjila eyi ca ecelela okuti o kuata ukamba la Yehova. (Ovil. 3:19) Eci ci kuete vali esilivilo ku Suku ceci tu kasi oku linga cilo, leci tu ka linga kovaso, pole, ka tiamisila utima kakulueya tua linga kosimbu nda tua kala Olombangi Via Yehova kosimbu, ale sio—Isa. 1:18.

12. Olondaka vi sangiwa 1 Yoano 3:19, 20, vi tu kuatisa ndati, nda tu kasi oku liyeva okuti ka tu kuete esilivilo?

¹² Eci o sokolola okuti Yesu wa fa omo liakandu ove, ove pamue o popia ndoco, ‘Ame si sesamẽla oku tambula ombanjaile eyi.’ Momo lie o simĩla ndoco? Utima wetu ka wa li puile, u pondola oku tu ya puisa, poku sima okuti ka tu kuete esilivilo. (Tanga 1 Yoano 3:19, 20.) Eci tu fetika oku kuata ovisimĩlo ndevi, tu sukila oku ivaluka okuti “Suku wa velapo, ovitima vietu vi sule.” Ocisola Isietu wokilu a tu  kuetele kuenda ongecelo yaye via velapo okuti ovisimĩlo ka via sungulukile vi kasi vutima wetu, vi sule. Tu sukila oku kolela okuti Yehova o tu sole. Oco tu ci linge, tu sukila oku lilongisa Ondaka yaye, oku likutilila olonjanja viosi kokuaye kuenda oku kala pamosi la vamanji. Momo lie oku linga ovina viaco ci kuetele esilivilo?

13. Oku lilongisa Ondaka ya Suku ci tu kuatisa ndati? (Talavo okakasia losapi hati, “ Ndomo Ondaka ya Suku ya va Kuatisa.”)

¹³ Oku lilongisa Ondaka ya Suku etete leteke, o ka kũlĩha vali ciwa ovituwa via posoka via Yehova. Ove o ka limbuka ocisola calua eye a ku kuetele. Eci o sokolola kovina o tanga Vondaka ya Suku eteke leteke, ci pondola oku ku kuatisa “koku suñamisa ovina” vutima wove kuenda kovisimĩlo. (2 Tim. 3:17) Ukulu umue wekongelo o tukuiwa Kevin, wa liyaka lovisimĩlo viokuti ka kuete esilivilo wa popia hati: “Oku tanga Osamo 103 loku sokolola kokuayo ca ñuatisa oku pongolola ovisimĩlo viange kuenda oku kuata elomboloko ndomo Yehova a ndi tenda.” Manji Eva wa tukuiwa ale, wa popia hati, “Kesulilo lieteke ndi sanda otembo yoku sokolola ovisimĩlo via Yehova. eci ci nyiha ombembua yovutima kuenda ci pamisa ekolelo liange.”

14. Ohutililo yi tu kuatisa ndati?

¹⁴ Likutilila olonjanja viosi. (1 Va Tes. 5:17) Eci o yongola oku linga ukamba lomunu umue, o sukila oku sapela laye kuenda oku u lomboluilako ovisimĩlo viove. Cimuamue haico tu linga lukamba tu kuete la Yehova. Eci tu u lomboluilako ovisimĩlo vietu kuenda asakalalo etu poku likutilila kokuaye, tu lekisa okuti tuo kolela kuenda tua kũlĩha okuti o tu sole. (Osa. 94:17-19; 1 Yoa. 5:14, 15) Manji Yua, wa tukuiwa ale, wa popia hati: “Eci ndi likutilila, si sapuila lika Yehova ovina via pita lame vokuenda kueteke. Ndu sapuila ovina ñasi oku sima kuenda ndomo ndi liyevite. Kamue kamue, nda siata oku limbuka okuti Yehova ka kasi ndusongui wupange umue, pole, nda Isia umue o sole omãla vaye.”—Tala okakasia losapi “ Wa Siata hẽ Oku li Tanga?”

15. Yehova o lekisa ndati okuti wa tu kapako?

¹⁵ Oku kala lakamba vakuacili; ombanjaile yimue yi tunda ku Yehova. (Tia. 1:17) Isietu wokilu o lekisa okuti wa tu kapako poku tu ĩha epata konepa yespiritu okuti vamanji va lekisa ‘ocisola olonjanja viosi.’ (Olosap. 17:17) Paulu kukanda a sonehela va Kolosai, wa tukula Akristão vana vo kuatisa kuenda wa va tukula okuti ‘vakuaku pamisa.’ (Va Kol. 4:10, 11) Ndaño muẽle Kristu Yesu wa sukilile kuenda wa sanjukilile ekuatiso eye a tambula kakamba vaye, ndeci kovangelo lokomanu.—Luka 22:28, 43.

16. Akamba vocili va tu kuatisa ndati oku kala akamba va Yehova?

 ¹⁶ Wa siata hẽ oku sandiliya loku tava ekuatiso liakamba vove vekongelo? Eci tu sapela lekamba limue lia pama kekolelo, ka ci lomboloka okuti tua hongua kespiritu. Konomuisa eci manji James wa tukuiwa ale a popia, eye hati: “Oku kuata ukamba uwa Lukristão wa pama kekolelo, ca siata oku ñuatisa calua. Eci ñuata ovisimĩlo ka via sungulukile, akamba vaco va ndi yevelela lepandi kuenda va ndi sapuila okuti, va ndi sole. Eci va linga ovina viaco, ndi limbuka okuti Yehova o ndi sole kuenda o ndi tata.” Ci kuete esilivilo lialua oku kuata ukamba wa pama la vamanjetu!

17-18. Helie tu sukila oku yevelela kuenda momo lie?

¹⁷ Satana o yongola okuti tu liwekapo oku likolisilako oku linga eci ciwa. Eye o yongola okuti tu kuata ovisimĩlo viokuti Yehova ka tu sole kuenda ka tu sesamẽla oku popeliwa. Pole, ndomo tua siata ale oku ci mola, eci haciliko.

¹⁸ Yehova oku sole. Ove o kuete esilivilo lialua kovaso aye. Nda ove wa pokola kokuaye, o ka amamako oku kala “vocisola caye” o tempo ka yi pui, nda Yesu. (Yoa. 15:10) Kuenje ku ka yevelele Satana, ale kovisimĩlo viove viokuti Yehova ka tu sole. Omo liaco, yevelela Yehova una o lete eci ciwa pokati komunu lomunu. Kolela okuti eye “o sanjukila omanu vaye,” oku kongelamo ove!