1-2. Momo lie Yesu a lekisila esakalalo?

YESU keteke lia sulako liomuenyo waye palo posi, wa sakalalele calua. Eye wa laikele oku tipuiwa kuenda oku pondiwa lomanu vakuakandu. Pole, eci haicoko lika ca sakalaisa Yesu. Eye wa solele calua Isiaye kuenda wa yonguile oku u sanjuisa. Yesu wa kũlĩhĩle okuti nda wa pandikisa koloseteko viosi, wa ponduile oku teyuila onduko ya Isiaye. Yesu wa solelevo omanu kuenda wa kũlĩhĩle okuti elavoko lietu lioku kuata omuenyo ko pui, lia tamba lika nda eye wamamako oku lekisa ekolelo ku Yehova toke kolofa.

² Ndaño okuti Yesu wa kala lesakalalo lialua, eye wamamako lombembua. Wa sapuila ovapostolo vaye hati, “ndu wĩhi ombembua yange.” (Yoa. 14:27) Eye wa kuata “ombembua ya Suku,” loku tula utima kuenje co kuatisa oku kuata ukamba wa pama la Yehova. Ombembua yaco ya kuatisa Yesu oku yuvula esakalalo.—Va Fil. 4:6, 7.

3. Ovina vipi tu konomuisa vocipama cilo?

³ Lomue pokati ketu o ka liyaka locitangi ca lisoka leci ca Yesu, pole, wosi o kuama ongangu ya Yesu o ka liyaka loloseteko. (Mat. 16:24, 25; Yoa. 15:20) Ndeci Yesu a lekisa esakalalo, etu olonjanja vimue tu sakalalavo. Oco hẽ nye tu sukila oku linga, oco tu yuvule oku sakalala calua, okuti ka tu pumbi ombembua yo vutima? Vocipama cilo, tu konomuisa ovina vitatu Yesu a linga vokuenda kupange waye oku kunda palo posi kuenda ndomo tu pondola oku u setukula eci tu liyaka lovitangi.

4. Ndamo ca tangiwa kukanda wa 1 Va Tesalonike 5:17, tukula ovolandu amue a lekisa okuti Yesu wa likutilila olonjanja vialua eci a kala palo posi?

⁴ Tanga 1 Va Tesalonike 5:17. Yesu keteke lia sulako liomuenyo waye palo posi, wa likutilila olonjanja vialua. Eci a tumbika ocipito conjivaluko colofa viaye, eye wa linga ohutililo yovinyu kuenda yombolo. (1 Va Kor. 11:23-25) Osimbu ka va tundile pocitumãlo va kala kuna va lingila o Paskoa, Yesu wa likutilila kumue lolondonge viaye. (Yoa. 17:1-26) Eci Yesu a pitĩla Komunda Yoliveira kumue lolondonge viaye kuteke waco, wa likutilila olonjanja vialua. (Mat. 26:36-39, 42, 44) Olondaka via sulako Yesu a popia osimbu ka file, via popiwa vohutililo. (Luka 23:46) Yesu poku likutilila ku Yehova, wa tukula viosi viatiamẽla kueci ca laikele oku pita keteke lia sulako liomuenyo waye.

5. Nye ca koka ovapostolo oku tepulula utõi wavo?

⁵ Eci ca kuatisa Yesu oku pandikisa kovitangi, ceci okuti wa lekisa ekolelo poku likutilila olonjanja viosi ku Isiaye. Pole, ovapostolo ka va tẽlele oku amamako oku likutilila kuteke waco. Kuenje utõi wavo wa tepuluka eci va pita loseteko. (Mat. 26:40, 41, 43, 45, 56) Eci tu pita lovitangi, tu amamako lika lekolelo nda tua kuama ongangu ya Yesu kuenda oku ‘likutilila olonjanja viosi.’ Nye tu pinga vohutililo?

6. Ekolelo li tu kuatisa ndati oku amamako oku kuata ombembua?

⁶ Tu pondola oku likutilila ku Yehova oco a “tu vokiyeko ekolelo.” (Luka 17:5; Yoa. 14:1) Tu sukila oku kuata ekolelo, momo Satana o  seteka vosi vana va kuãi ongangu ya Yesu. (Luka 22:31) Ekolelo li tu kuatisa ndati oku amamako lombembua ndaño ceci tu liyaka lovitangi vialua? Noke lioku linga cosi ci kasi vepondolo lietu, oco tu yule ocitangi cimue, ekolelo li tu vetiya oku eca ovitangi viaco ku Yehova. Oku kũlĩha okuti Yehova o pondola oku potolola ovitangi vietu, ci tu ĩha ombembua yo vutima.—1 Pet. 5:6, 7.

7. Nye wa lilongisa kulandu wa manji Robert?

⁷ Oku likutilila ci tu kuatisa oku amamako lombembua yo vutima, ndaño ceci tu liyaka lovitangi. Tu konomuisi ulandu wa manji Robert, okuti ukulu wekongelo ukuekolelo o kuete 80 kanyamo. Eye wa popia hati: “Elungulo li sangiwa ku va Filipoi 4:6, 7, lia ñuatisa oku yula ovitangi vialua komuenyo wange. Nda kuata ocitangi cekambo liolombongo. Kuenda ndopiwa ocikele coku kala ukulu wekongelo vokuenda kuotembo yimue.” Nye ca siata oku kuatisa manji Robert oku amamako lombembua yo vutima? Eye hati: “Eci ndi limbuka okuti esumuo li yongola oku ndi yula, vepuluvi liaco haico ndi likutilila. Ndi limbuka okuti poku ci linga ndi yeva ombembua yo vutima kuenda ndi kuata esanju lialua.”

8. Ndomo ca tangiwa kelivulu lia Yoano 8:29, esunga lipi likuavo Yesu a kuatela ombembua yo vutima?

⁸ Tanga Yoano 8:29. Yesu wa kuata ombembua yo vutima ndaño ceci a lambalaliwa omo wa kũlĩhĩle okuti, wa kala oku sanjuisa Isiaye. Eye wamamako oku lekisa epokolo, okuti oku ci linga ka ca lelukile. Eye wa solele Isiaye kuenda wa pitisile kovaso upange wa Yehova komuenyo waye. Osimbu keyile palo posi, eye wa kala “ndomesele” ya Suku. (Olosap. 8:30) Eci a kala palo posi, wa lekisa ombili koku longisa omanu catiamẽla ku Isiaye. (Mat. 6:9; Yoa. 5:17) Upange waco wa nena esanju lialua ku Yesu.—Yoa. 4:34-36.

9. Momo lie tu ponduila oku kuata ombembua yo vutima eci tu pita otembo yalua kupange woku kunda?

 ⁹ Tu setukula Yesu poku pokola Yehova kuenda ‘olonjanja viosi tu lingi vakuambili kupange wa Ñala. (1 Va Kor. 15:58) Eci tu “litumbika” kupange woku kunda, ka tu tiamisila utima kovitangi vietu. (Ovil. 18:5) Ndeci, omanu tu sanga kupange woku kunda, pamue ovitangi va kasi oku liyaka lavio vinene vali okuti vietu vi sule. Kuenje eci va lilongisa oku sola Yehova loku kapako olonumbi viaye, ekalo liavo li pongoloka kuenda va kuata esanju lialua. Eci tu mola ndomo omanu va linga apongoloko komuenyo, tu kolela okuti Yehova o tu tata. Ekolelo liaco, li tu kuatisa oku amamako lombembua yo vutima. Manji umue ukãi okuti wa liyaka lovitangi vinene viesumuo, wa limbuka okuti olondaka evi viocili. Eye wa popia hati: “Eci ndi pita otembo yalua kupange woku kunda, ndi liyeva okuti ñasi ciwa kuenda ñuete esanju. Ndi li yeva ndoco, momo upange woku kunda u pamisa ukamba wange la Yehova.”

10. Nye tu pondola oku lilongisa kolondaka via manji Brenda?

¹⁰ Tu kũlĩhĩsivo ulandu wa manji o tukuiwa Brenda. Eye kumue lomõlaye ufeko va kuete uvei umue unene. Manji Brenda cilo o pondola lika oku enda lekuatiso liokakãlu kovilema kuenda ongusu yaye ya tepuluka. Olonjanja vimue, o kundila konjo lanjo, pole, olonjanja vialua eca uvangi pocakati covikanda. Eye wa popia hati: “Omo lioku kũlĩha okuti uvei wange ka u kuete esaku voluali lulo, ndi tiamisila lika utima kupange woku kunda. Ocili okuti, eci ndi kunda si sokolola vali kovitangi viange. Pole, ndi tiamisila utima koku kuatisa vana va sangiwa vocikanjo cekongelo ñasi. Kuenje poku ci linga, ndi sokolola kelavoko ñuete liokovaso yoloneke.”

11-13. (a) Ovapostolo kuenda omanu vakuavo, va lekisa ndati okuti va kala akamba vocili va Yesu? (b) Onima yipi akamba va Yesu va kuata?

¹¹ Vokuenda kupange woku kunda Yesu a linga, ovapostolo vakuekolelo va lekisa okuti akamba vaye vocili. Ovo va kala akamba vana Embimbiliya li tukula okuti: “Kuli ekamba li ku lamelela okuti huvove o sule.” (Olosap. 18:24) Yesu wa kapeleko calua akamba vaye. Vokuenda kupange waye woku kunda, lomue pokati ka va manjaye wo kolelele. (Yoa. 7:3-5) Onjanja yimue vangandiaye va simĩle okuti wa linga eyui. (Mar. 3:21) Pole, Yesu wa sapuila kovapostolo vaye vakuekolelo vuteke osimbu handi ka file hati: “Ene vu kasi kumue lame kolohali viange.”—Luka 22:28.

¹² Ovapostolo olonjanja vimue va enda oku sumuisa Yesu, pole, eye ka la luluvalela kakulueya avo kuenje wa limbuka okuti vo kolela. (Mat. 26:40; Mar. 10:13, 14; Yoa. 6:66-69) Kuteke wa sulako Yesu a kala lavo osimbu ka kuatiwile, eye wa sapuila alume ava vakuekolelo hati: “Ndu tukuli akamba, momo ndo sapuili ovina viosi nda yeva ku Isiange.” (Yoa. 15:15) Ocili okuti, Yesu wa pamisiwa calua lakamba vaye. Ekuatiso va eca ku Yesu kupange woku kunda lio sanjuisa calua.—Luka 10:17, 21.

¹³ Yesu wa kuatelevo akamba vakuavo, okuti alume lakãi vana vo kuatisa kupange woku kunda kuenda kolonepa vikuavo. Vamue va enda oku u laleka kolonjo viavo oco a lie  lavo. (Luka 10:38-42; Yoa. 12:1, 2) Vakuavo va enda oku linga laye ungende loku u kuatisa lovipako viavo. (Luka 8:3) Yesu wa kuatele akamba vawa, omo eye wa kalavo ekamba liwa kokuavo. Eye wa lingaile ovina viwa kokuavo kuenda ka endaile oku va kisika oku linga eci ka va tẽla. Ocili okuti Yesu wa lipuile, pole, wa solele ekuatiso liakamba vaye ka va lipuile. Kuenje ovapostolo va kũlĩhĩle okuti poku u kuatisa va kamamako oku kuata ombembua yo vutima.

14-15. Tu sanga ndati akamba vawa kuenda va pondola oku tu kuatisa ndati?

¹⁴ Akamba vawa va pondola oku tu kuatisa oku amamako oku kolela Yehova. Onjila yiwa yoku kuata akamba vawa, oku kala ekamba liwa. (Mat. 7:12) Ndeci, Embimbiliya li tu vetiya oku talavaya ciwa lotembo yetu kuenda ongusu oco tu kuatise vakuetu capiãla enene vana va “suka.” (Va Efe. 4:28) O pondola hẽ oku sokolola ku umue vekongelo o sukila ekuatiso liove? O pondola hẽ oku landa ovina vimue, oco o viece ku manji umue wa kuka, ale o vela? O pondola hẽ oku laleka epata limue likuete ekambo liolombongo oco va lie konjo yove? Nda o tẽla oku talavaya lo jw.org^® kuenda o JW Library^® o pondola hẽ oku kuatisa vakuene vekongelo ndomo va talavayavo locimalẽho caco? Eci tu lieca olumue poku kuatisa vakuetu esanju lietu li livokiya.—Ovil. 20:35.

¹⁵ Akamba va tu kuatisa, eci tu liyaka lovitangi kuenda va tu kuatisavo oku amamako lombembua. Ndeci Elihu a yevelela Yovi oku vangula ovitangi viaye, akamba vetu va tu kuatisavo poku tu yevelela lutate, eci tu va lomboluila  asakalalo etu. (Yovi 32:4) Etu ka tu lavoka okuti akamba vetu va tu nõlelako onjila tu kuama, pole, tu lekisa olondunge nda tua yevelela alungulo avo a kunamẽla Vembimbiliya. (Olosap. 15:22) Soma Daviti lumbombe wa tava ekuatiso liakamba vaye, etu tu sukilavo oku lekisa ocituwa caco poku tava ekuatiso liakamba vetu. (2 Sam. 17:27-29) Ocili okuti, akamba vawa, ombajaile yimue yi tunda ku Yehova.—Tia. 1:17.

16. Ndomo ca tangiwa kelivulu lia va Filipoi 4:6, 7, nye ci sukiliwa oco tu kuate ombembua yo vutima? Ci lombolola.

¹⁶ Tanga Va Filipoi 4:6, 7. Momo lie Yehova a tu sapuilila okuti tu pondola oku tambula ombembua yina eye a eca “vu Kristu Yesu”? Momo tu pondola oku kuata lika ombembua yo vutima nda tua kuata elomboloko kuenda ekolelo kocikele Yesu a kuete vocipango ca Yehova. Ndeci, pocakati cocilumba ca Yesu, akandu etu a pondola oku ecelua. (1 Yoa. 2:12) Eci tu sokolola kolondaka evi ci tu lembeleka calua! Yesu okuti eye Soma Yusoma wa Suku, o ka kundula Satana loluali luaye. (Isa. 65:17; 1 Yoa. 3:8; Esit. 21:3, 4) Eci ci tu ĩha elavoko limue li sanjuisa! Ndaño okuti Yesu wa tu ĩha ocikele cimue cinene, pole, eye o kasi letu toke kesulilo lioluali. (Mat. 28:19, 20) Eci ci tu pamisa calua! Ekuatiso, elavoko kuenda utõi, ovina evi ovio vi tu kuatisa oku kuata ombembua yo vutima.

17. (a) Ukristão amamako ndati lombembua yo vutima? (b) Ndomo ca tangiwa kelivulu lia Yoano 16:33, tu ka tẽla oku linga nye?

¹⁷ Tu amamako ndati lombembua yo vutima eci tu liyaka lovitangi vialua? Tu ci linga poku setukula ovina Yesu a linga. Tete, amamako oku likutilila ndaño lovitangi. Vali, pokola ku Yehova kuenda lekisa ombili kupange woku kunda ndaño okuti pamue ka ci leluka oku ci linga. Tatu, kolela okuti akamba vove va ku kuatisa eci o liyaka lovitangi. Nda wa ci linga, ombembua ya Suku yi lava utima wove lovisimĩlo. Omo liaco, ndeci Yesu a linga, tu ka yulavo ovitangi viosi.—Tanga Yoano 16:33.