1. Ndomo ca tangiwa ku Va Efeso 6:10-13, nye ci lekisa okuti Yehova wa tu kapako? Ci lombolola.

OCINA ci lekisa okuti Yehova wa tu kapako, ekuatiso a siata oku tu ĩha oco tu tamalãle lovanyali vetu. Ovanyali vetu, Satana kuenda olondele. Yehova wa siata oku tu lungula catiamẽla kovanyali vaco loku tu ĩha ovina tu sukila oco tu tamalãle lavo. (Tanga Va Efeso 6:10-13.) Eci tu tava ekuatiso lia Yehova loku kolela kokuaye, tu pondola oku tamalãla Leliapu. Nda tua ci linga, tu kuata ekolelo ndeli upostolo Paulu a kuata. Eye wa soneha hati: “Nda Suku o kasi letu, helie o tu katukila?”—Va Rom. 8:31.

2. Nye tu lilongisa vocipama cilo?

² Omo okuti tuafendeli va Yehova, tu sukila oku yuvula oku tiamisila utima ku Satana kuenda kolondele. Pole, tu sukila oku tiamisila utima koku lilongisa ovina viatiamẽla ku Yehova loku u vumba. (Osa. 25:5) Omo liaco, tu sukila oku kũlĩha ovina Satana a siata oku linga. Momo lie? Oco ka tu ka yapuisiwe laye. (2 Va Kor. 2:11; etosi.) Vocipama cilo, tu lilongisa olonjila vimue Satana kumue lolondele va siata oku kuama oco va yapuise omanu. Tu ka lilongisavo ndomo tu pondola oku litunda ciwa poku tamalãla lavo.

3-4. (a) Umbanda u lomboloka nye? (b)  Nye ci lekisa okuti umbanda u sangiwa kolonepa viosi?

³ Onjila yimue ya velapo Satana kuenda olondele va siata  oku kuama oco va yapuise omanu, umbanda. Vana va litumbika kumbanda va popia okuti va kũlĩha ovina vialua okuti omanu vakuavo ka va pondola oku vi kũlĩha. Ndeci, vamue va popia okuti va kũlĩha ovina vi keya kovaso yoloneke, poku tãha. Vakuavo va ci linga poku lekisa ndu okuti va kala oku vangula lava va fa. Vamue va kuete ocituwa coku liangula, ale coku linga alumbu kuenda oku lova omanu vakuavo. *

⁴ Umbanda wa lisanduila ndati kolonepa viosi? Akonomuiso amue a lingiwa kueci ci soka 18 kolofeka vio Amerika Latina kuenda vio Karibe, a lekisa okuti onepa yalua yomanu, yi tava kalumbu, kuliangu, ale kumbanda kuenda ovo va kolela okuti ci tava oku sapela lomanu va fa. Ekonomuiso likuavo lia lingiwa kolofeka 18 vio Afrika, lia lekisa okuti onepa yimue yomanu yi popia okuti yi tava kuliangu. Omo liaco, apa posi tu kasi tu sukila oku yuvula ovina viosi viatiamẽla kumbanda. Momo ocimãho ca Satana, oku yapuisa “oluali luosi.”—Esit. 12:9.

5. Yehova o tenda ndati umbanda?

⁵ Yehova eye “Suku yocili.” (Osa. 31:5) Oco hẽ, eye o tenda ndati ovina viatiamẽla kumbanda? Eye onyãle ovituwa viaco! Yehova wa sapuila va Isareli hati: ‘Pokati kene ka pa ka sangiwe umue o yoka vondalu ndocilumba omõlaye ulume pamue omõlaye ukãi. Ka pa ka sangiwevo ukuakutãha, ndaño ukuakusingila, ndaño ukuakulova, ndaño onganga, ndaño ukuakuyamba, ndaño ukuakawengo, ndaño ociliangu, ndaño ukuavinjualume. Momo wosi o linga ovina evi eye ocimbondo ku Yehova.’ (Esin. 18:10-12) Ocili okuti, Akristão ka va kasi vali vemehi Liocihandeleko cina Yehova a ecele ku va Isareli pocakati ca Mose. Pole, tua kũlĩha okuti ovisimĩlo viaye viatiamẽla konjila ndomo a tenda umbanda, ka via pongolokele.—Mal. 3:6.

6. (a) Cipi ocimãho ca Satana? (b) Ndomo ca tangiwa kelivulu Liukundi 9:5, cipi ocili catiamẽla kuava va fa?

⁶ Yehova o tu lungula kueci catiamẽla kumbanda, momo wa kũlĩha okuti Satana o kuama onjila yaco oco a yapuise omanu. Satana o kuama umbanda oco a sandeke ovohembi oku kongelamo, uhembi wokuti ava va fa va amamako lomuenyo kocitumãlo cikuavo. (Tanga Ukundi 9:5.) Handi vali, Satana o ci lingavo oco saluise omanu kuenda oku va tindula ku Yehova. Ocimãho caye, oku vetiya omanu oku litumbika kumbanda loku kolela kolondele okuti ku Yehova hakoko.

7. Nye Yehova a tu sapuila?

⁷ Ndomo ca lomboluiwa ale, Yehova o tu sapuila eci tu sukila oku linga, oco tu yuvule oku yapuisiwa la Satana kuenda olondele. Tu kũlĩhĩsi ovina vimue tu sukila oku linga oco tu tamalãle la Satana kuenda olondele.

8. (a) Yipi onjila ya velapo yoku tamalãla lolondele? (b) Ndomo Osamo 146:4 ya lombolola, uhembi wa Satana watiamẽla kolofa wa situluiwa ndati?

⁸ Tanga kuenda sokolola Kondaka ya Suku. Eyi oyo onjila ya velapo yoku tamalãla lovohembi a siata oku sandekiwa lolondele. Ondaka ya Suku yi sokisiwa losipata yimue yatua yi pondola oku situlula ovohembi Satana a siata oku sandeka. (Va Efe. 6:17) Ndeci, Ondaka ya Suku yi situlula uhembi wokuti  omanu va fa va pondola oku vangula lava va kasi lomuenyo. (Tanga Osamo 146:4.) Handi vali, Ondaka ya Suku yi tu sapuila okuti, Yehova eye lika o pondola oku situlula ovina vikeya kovaso yoloneke. (Isa. 45:21; 46:10) Omo liaco, nda tua tanga loku sokolola Ondaka ya Suku olonjanja viosi, tu ka tẽla oku yula kuenda oku suvuka ovohembi olondele.

9. Ovina vipi viatiamẽla kolondele tu sukila oku yuvula?

⁹ Yuvula ovina viosi vi kuete elitokeko lolondele. Omo okuti Tuakristão vocili, tu sukila oku yuvula ovina viosi viatiamẽla kolondele. Ndeci, ka tu endi kovimbanda, ale oku sanda oku sapela lomanu va fa lonjila yikuavo. Ndomo ca lomboluiwa vocipama ca pita, etu tu yuvula oviholo vio polonambi mua kongela uhembi wokuti ava va fa handi va kasi lomuenyo kocitumãlo cikuavo. Handi vali, ka tu kuama umbanda loku tãha oco tu kũlĩhe ovina vi keya kovaso yoloneke. (Isa. 8:19) Tua kũlĩha okuti ovina viosi viatiamẽla kumbanda vi koka ohele kuenda nda ka tua yuvuile ovina viaco, tu ka lekisa okuti, tu kasi konele ya Satana kuenda yolondele.

10-11. (a) Kocita catete nye vamue va linga eci va tava kocili? (b) Ndomo ca tangiwa ku 1 Va Korindo 10:21, momo lie tu sukilila oku setukula ongangu Yakristão vo kocita catete kuenda ndamupi tu ci linga?

¹⁰ Ovina viosi viatiamẽla kolondele, vi yoka. Vamue pokati komanu va kala ko Efeso kocita catete va kala vakuakutãha. Eci ovo va lilongisa ocili, va ñolapo oku linga ocina cimue ka ca lelukile. “Ovimbanda via nena alivulu avo oku tãha loku a yokela kovaso omanu vosi.” (Ovil. 19:19) Omanu vaco va linga cosi ci tava oco va tamalãle lolondele. Alivulu avo oku tãha a kuata ondando yinene. Ovo ka va ecele alivulu aco komanu vakuavo, ale oku a landisa, pole, va a yoka. Omo okuti va yonguile oku sanjuisa Yehova, ka va kapeleko ondando yalivulu aco.

 ¹¹ Tu setukula ndati ongangu Yakristão vaco vo kocita catete? Tu ci linga poku yuvula ovina viosi viatiamẽla kolondele. Vovina viaco, mua kongela oku tãha, alumbu kuenda ovina vikuavo omanu va kuete oco va liteyuile kolondele.—Tanga 1 Va Korindo 10:21.

12. Apululilo api tu sukila oku linga atiamẽla kovitalukilo vietu?

¹² Ñola lutate ovitalukilo viove. Lipula ndoco: ‘Nda siata hẽ oku tanga alivulu, olorevista, ale ovipama vio Internet viatiamẽla kolondele? Nye ci popiwa catiamẽla kovisikilo ndi yevelela, kolofilme kuenda kovipama ndi tala votelevisau, ale olovideo games? Vovitalukilo viange mua kongela hẽ ovina viatiamẽla kolondele? Vi lekisa hẽ ovina viatiamẽla kumbanda? Anga hẽ vi lekisa alumbu, loku tãha, ndomapalo yimue yiwa?’ Ocili okuti olomapalo haviosiko okuti vi tiamisiwila kolondele. Poku kũlĩhĩsa olomapalo viove, nõla vina vi ku kuatisa oku kala ocipãla lovina Yehova a nyale. Tu yongola oku “kuata utima wa yela” kovaso a Suku.—Ovil. 24:16. *

13. Ovina vipi tu sukila oku yuvula?

¹³ Yuvula ovolandu atiamẽla kolondele. Konepa eyi, tu yongola oku setukula ongangu ya Yesu. (1 Pet. 2:21) Yesu osimbu keyile palo posi, eye wa kala kilu kuenje wa kũlĩhĩle ciwa ekalo lia Satana kuenda liolondele. Pole, eye wa yuvula oku vangula eci catiamẽla kovina Satana kuenda olondele va enda oku linga. Yesu poku longisa wa yonguile okuti omanu va tiamisila utima kovina viatiamẽla ku Yehova okuti via Satana havioko. Etu  tu setukula Yesu poku yuvula oku sandeka ovolandu atiamẽla kolondele. Omo liaco, tu lekisi kolondaka vietu okuti, ‘utima wetu u supoka lovisimĩlo via posoka,’ okuti viocili.—Osa. 45:1.

14-15. (a) Momo lie ka tu sukilila oku kuata usumba olondele? (b) Nye ci lekisa okuti Yehova o teyuila afendeli vaye koloneke vilo?

¹⁴ Ku ka kuatele usumba olondele. Koloneke vilo, ovina vialua vĩvi vi pondola oku pita letu. Pamue ovilunga, ovovei, olofa, viya kokuetu ocipikipiki. Pole, ka tu ka simi okuti olondele ovio vi ci koka. Momo Embimbiliya li popia hati, “cosi ciya ño ci veta ño” lomue o puluka. (Uku. 9:11) Oku ci sokisa lolondele, unene wa Yehova wa velapo okuti wavo u sule. Ndeci, Suku ka ecelele okuti Satana o ponda Yovi. (Yovi 2:6) Koloneke via Mose, Yehova wa lekisa okuti unene waye wa velapo, okuti wa vakualumbu ko Egito u sule. (Etu. 8:18; 9:11) Yehova wa eca ku Yesu unene oco a tundise Satana kilu kumue lolondele. Kuenda kovaso yoloneke, ovo va ka imbiwa vekungu muna okuti ka va ka kuata vali unene woku yapuisa omanu.—Esit. 12:9; 20:2, 3.

¹⁵ Koloneke vilo, tu kuete ovovangi alua a lekisa okuti Yehova o teyuila afendeli vaye. Sokolola handi: Etu tu kasi oku kunda kuenda oku longisa ocili koluali luosi. (Mat. 28:19, 20) Poku ci linga, tu kasi oku situlula ovilinga via Satana. Nda okuti Satana wa kuatele unene walua siti nda wa tẽla oku imula upange tu kasi oku linga, pole, ka pondola. Omo liaco, ka tu sukila oku kuatela usumba olondele. Tua kũlĩha okuti “ovaso a Yehova a vanja vanja kuosi kilu lieve ha lekisa unene waye kuvakuavitima vio sungulukila.” (2 Asa. 16:9) Nda tua kololela Yehova, olondele ka vi ka amamako oku tu kokela ovitangi.

16-17. Tukula ulandu umue wutõi tu sukila oku kuata oco tu tamalãle lolondele.

¹⁶ Tu sukila oku kuata utõi oco tu tamalãle lolondele, ca piãla enene eci akamba vetu, ale epata va tu lambalala. Momo Yehova o sumũlũisa vana va lekisa utõi. Tu konomuisi ulandu wamanji Erika o kasi ko Gana. Manji Erika wa kuata 21 kanyamo eci a tava oku lilongisa Embimbiliya. Eci a kala ufeko, isiaye wa kala ocitunda ukuakutãha okuti mua kongelele okulia olositu via lumbiwa kolosuku viaye. Eci manji Erika a likala oku ci linga, epata liaye lia ci tenda okuti ekambo liesumbilo kolosuku. Omo liaco, epata lia kala lusumba wokuti olosuku via ponduile oku va kokela ovitangi vialua.

¹⁷ Epata lia manji Erika, lio kisika oku kuama oviholo viavo, pole, eye wa likala oku ci linga ndaño okuti co kokela oku tunda konjo. Vamanji vamue vekongelo vo laleka oku kala lavo. Yehova wa sumũlũisa manji Erika poku sanga epata liokaliye vekongelo, okuti vamanji akãi lalume. (Mar. 10:29, 30) Ndaño epata liaye ka lio kapeleko kuenda lia timĩha ovina viaye viosi, manji Erika wamamako oku kolela Yehova kuenje wa papatisiwa, cilo o kasi kupange wakundi votembo yosi. Eye ka kuetelele usumba olondele. Poku lombolola catiamẽla kepata liaye, manji Erika wa popia hati: “Olonjanja viosi ndi likutilila oco epata liange li kuatevo esumũlũho lioku kũlĩha Yehova kuenda oku kuata elianjo li tunda koku vumba Suku yetu ukuacisola.”

18. Asumũlũho api tu kuata nda tua kolela Yehova?

¹⁸ Ocili okuti, havosiko pokati ketu okuti ekolelo liavo li ka setekiwa lonjila ndeyi. Pole, vosi yetu tu sukila oku tamalãla lolondele kuenda oku kolela ku Yehova. Nda tua ci linga, tu kuata asumũlũho alua kuenda tu ka yuvula oku yapuisiwa lovohembi a Satana. Handi vali, ka tu ka kuatela usumba olondele. Kuenje eci ci ka tu kuatisa oku pamisa ukamba wetu la Yehova. Ndonge Tiago wa soneha hati: “Pokoli ku Suku, puãi tamalãli Leliapu kuenje olio liu tili. Amẽli ku Suku kuenje eye amẽla kokuene.”—Tia. 4:7, 8.