1. Nye vosi yetu tu sukila oku linga?

ANGA hẽ ove nda wa tava oku linga olupesi lumue wa kũlĩha okuti lua tĩla, ca piãla enene nda ove o vela ale wa kava? Ocili okuti sio. Upostolo Paulu wa lombolola okuti Akristão vosi va kasivo vekalo limue lioku yoloka. (Va Hev. 12:1) Nda tuamalẽhe ale tuakulu, nda tua pama ale tua hongua, vosi yetu tu sukila oku pandikisa toke kesulilo, nda tu yongola oku tambula onima Yehova a tu likuminya.—Mat. 24:13.

2. Ndomo ca tangiwa kukanda 2 Timoteo 4:7, 8, momo lie Paulu a tukuila olondaka evi?

² Paulu wa vangula eci catiamẽla koku yoloka, omo eye wa ‘yoloka toke eci a mala.’ (Tanga 2 Timoteo 4:7, 8.) Pole, oku yoloka kupi Paulu a kala oku popia?

3. Nye Paulu a sokisa loku yoloka?

³ Olonjanja vimue Paulu wa enda oku tukula ovina via enda oku lingiwa volomapalo vio ko Helasi yosimbu, oco a longise ovina vi kuete esilivilo. (1 Va Kor. 9:25-27; 2 Tim. 2:5) Olonjanja vialua, wa sokisa omuenyo Wukristão loku yoloka. (1 Va Kor. 9:24; Va Gal. 2:2; Va Fil. 2:16) Omunu umue, o fetika oku “yoloka,” eci a litumbika ku Yehova loku papatisiwa. (1 Pet. 3:21) Omunu waco o mala oku yoloka, eci Yehova o wĩha omuenyo ko pui.—Mat. 25:31-34, 46; 2 Tim. 4:8.

4. Nye tu konomuisa vocipama cilo?

⁴ Elitokeko lipi li kasi pokati koku yoloka lomuenyo Wukristão? Kuli ovina vialua vi kuete elitokeko. Vocipama cilo, tu  konomuisa ovina vitatu. Tete, tu sukila oku kuama olonumbi vioku yoloka; vali, tu sukila oku luluvalela konima; tatu, tu sukila oku pandikisa ndaño lovitangi.

5. Olonumbi vipi tu sukila oku kuama kuenda momo lie?

⁵ Vakuakuyoloka oco va tambule onima, va sukila oku kuama olonumbi via tumbikiwa lasongui vaco. Cimuamue haico okuti, nda tu yongola oku tambula omuenyo ko pui, tu sukila oku kuama olonumbi via tu tumbikiwila. (Ovil. 20:24; 1 Pet. 2:21) Pole, Satana kumue la vana va kuãi ovilinga viaye, ka va yongola okuti tu kuama olonumbi via Yehova; ovo va yongola okuti tu ‘endanda lavo,’ ale tu yoloka lavo. (1 Pet. 4:4) Ovo va sepula onjila tua nõla loku sima okuti onjila yavo ya velapo, hayo yi tuala kelianjo. Pole, olondaka viaco haviociliko.—2 Pet. 2:19.

6. Nye tua lilongisa kulandu wa Brian?

⁶ Omunu wosi o yoloka kumosi la vana va kasi oku songuiwa loluali lua Satana, noke va limbuka okuti onjila va nõla ka yi nena elianjo; pole, yi tuala kupika. (Va Rom. 6:16) Tu kũlĩhĩsi ulandu wa Brian. Olonjali viaye vio vetiya oku kuama omuenyo Wukristão. Pole, eci a kala umalẽhe, wa lipula nda onjila yaco ya laikele oku u nenela esanju. Brian wa nõlapo oku yoloka la vana va songuiwa lolonumbi via Satana. Eye wa popia hati: “Sia tẽlele oku limbuka okuti, elianjo liaco lia ponduile oku mbetiya oku linga ovina ka via sungulukile. Vokuenda kuotembo, nda litumbika vomuenyo wolodroga, loku nyua calua ovina vi koluisa kuenda ukahonga. Anyamo a kuamamo, nda fetika oku nyua olodroga vialua via litepa kuenda nda litumbikile lika koku linga ovina viaco. . . . Kuenje nda fetikavo oku landisa olodroga viaco, oco ci ñuatise kekalo liomuenyo wange.” Noke, Brian wa nõlapo oku pokola kolonumbi Yehova. Eye wa linga apongoloko kuenda wa papatisiwa kunyamo wo 2001. Eye cilo o kuete esanju omo wa nõlapo oku ambata omuenyo Wukristão. *

7. Ndomo ca tangiwa ku Mateo 7:13, 14, vipi olonjila vivali via tukuiwa?

⁷ Ci kuete esilivilo lialua oku nõla onjila ya sunguluka loku endelamo! Satana o yongola okuti, vosi yetu tu liwekapo oku yolokela vonjila ya likupika, yina yi “tuala komuenyo” kuenje tu iñila vombundi ya tanda okuti valua va iñilamo. Ombundi yaco ya sanjavala hayo ya leluka oku iñilamo. Pole, onjila yaco “yi tuala kenyõleho.” (Tanga Mateo 7:13, 14.) Tu amamiko oku kala vonjila ya sunguluka kuenda ka tu ka yapuisiwi lomanu vana ka va pokola kolonumbi via Yehova.

8. Nda umue ukuakuyoloka wa lilondoka, nye a pondola oku linga?

⁸ Vakuakuyoloka osimbu va yoloka, va luluvalela kovaso, oco ka va ka lilondoke. Pole, citava okuti umue o tusuiwa lukuavo, ale o lilondoka. Nda umue wa lilondoka, o pondola oku votoka kuenje amamako oku yoloka. Eye ka tiamisila utima kueci co kokisa oku lilondoka, pole, o luluvalela konima a lavoka oku tambula.

9. Nda tua lilondoka, nye tu sukila oku linga?

⁹ Osimbu tu yoloka, tu pondola oku lilondoka olonjanja vialua, ale oku lueya kolondaka kuenda kovilinga. Handi vali, vana tu kasi oku yolokela kumosi, pamue va linga ovina vi tu sumuisa. Nda eci ca pita letu ka tu lekisa onyeño. Omo vosi yetu ka tua lipuile kuenda tu kasi oku yolokela vonjila yimuamue yomuenyo. Omo liaco, citava okuti osimbu tu yoloka pamue tu “lilunduluila” lomunu ukuavo. Paulu wa kũlĩhile okuti, olonjanja vimue tu ‘kuatela ondaka ukuetu.’ (Va Kol. 3:13) Tu sukila oku yuvula oku luluvalela kueci ca tu kokela oku lilondoka, pole, tu luluvalela konima. Nda tua lilondoka, tu pondola oku votoka kuenje tu amamako oku yoloka. Pole, nda tua tema loku kuata onyeño, ci pondola oku tu tateka oku yoloka toke kesulilo loku tambula onima. Handi vali, citava okuti tu tatekavo vakuetu va kasi oku likolisilako oku yolokela vonjila yi tuala komuenyo.

10. Tu yuvula ndati oku kokela vakuetu “ocilondokua”?

¹⁰ Onjila yimue yoku yuvula oku “kokela ocilondokua” vana va kasi oku yoloka kumue letu, poku pitisa kovaso asakalalo avo okuti etu muẽle ci sule. (Va Rom. 14:13, 19-21; 1 Va Kor. 8:9, 13) Ocili okuti, tua litepa lava va linga olomapalo vioku yoloka. Momo omunu lomunu, o yakela onepa yaye kuenda umosi lika o tambula onima. Handi vali, ovo va pitisa lika kovaso olonjongole viavo muẽle. Omo liaco, vamue pokati kavo va lunduluila vakuavo, oco va pite kovaso. Pole, etu ka tu pitisa kovaso olonjongole vietu muẽle. (Va Gal. 5:26; 6:4) Ocimãho cetu, oku kuatisa omanu valua, oco tu yolokele kumosi toke kesulilo loku tambula onima yomuenyo. Omo liaco, tu sukila oku likolisilako oku kapako elungulo lia  Paulu liokuti: “Ko ka sokololi ovina viene lika, puãi sokololivo ovina via vakuene.”—Va Fil. 2:4.

11. Pi vakuakuyoloka va tiamisila utima kuenda momo lie?

¹¹ Vakuakuyoloka, ka va luluvalela lika kovaso yoku va loña, pole, va tiamisila utima koku mala oku yoloka kuavo. Ndaño okuti ka va moli apa pa sulila etapalo liaco, ovo va pondola oku sokolola koku mala oku yoloka loku tambula onima. Ovo va yeva esanju poku sokolola konima va pondola oku tambula.

12. Nye Yehova a eca kokuetu mekonda liocisola caye?

¹² Yehova mekonda liocisola, eca onima ya koleliwa kafendeli vaye, omo lioku mala oku yoloka. Onima yaco omuenyo ko pui ci kale kuava va enda kilu, ale kuava va ka kala palo posi vocumbo celau. Embimbiliya li lombolola asumũlũho aco, oco ci tu kuatise oku sokolola kekalo liwa tu ka kuata. Omo liaco, ka tu ka eceleli okuti cimue ci tu tateka oku yoloka, pole, elavoko lietu li sukila oku amamako oku kala vutima kuenda vovisimĩlo vietu.

13. Oku yoloka kuetu kua litepa ndati lolomapalo vioku yoloka?

¹³ Vakuakuyoloka ko Helasi, va sukilile oku yula ovitangi vimue, ndeci ekavo kuenda evalo. Pole, vosi yavo va sukilile oku kapako epindiso va tambula loku limbuka ongusu yavo. Etu tu tambulavo epindiso ndomo tu yoloka, ndeci ci linga vakuamapalo yoku yoloka. Pole, oku yoloka kuetu kua litepa lolomapalo vioku yoloka. Momo, ongusu yetu yi tunda ku Yehova una o kuete unene wa piãla. Nda tua kolela Yehova, eye o likuminya oku tu pindisa loku tu pamisa!—1 Pet. 5:10.

14. Ndomo ca tangiwa kukanda wa 2 Korindo 12:9, 10, nye ci pondola oku tu kuatisa oku yula ovitangi?

¹⁴ Paulu wa liyaka lovitangi vialua. Vimue pokati kovitangi viaco, oku sepuiwa, loku lambalaliwa kuenda olonjanja vimue wa yeva ehonguo. Handi vali, wa liyakavo locitangi cimue eye a tukula okuti, “osongo ketimba.” (2 Va Kor. 12:7) Eye ka tendele ovitangi viaco ndesunga lioku liwekapo oku vumba Yehova, pole, wa vi tenda ndepuluvi lioku kolela Yehova. (Tanga 2 Va Korindo 12:9, 10.) Paulu omo lioku tenda ovitangi lonjila eyi, Yehova wo kuatisa oku vi yula viosi.

15. Nda tua setukula Paulu, tu tenda ndati ovitangi tu liyaka lavio?

¹⁵ Etu citava okuti tu sepuiwavo, ale tu lambalaliwa omo liekolelo lietu. Handi vali, citava okuti tu liyaka lekambo liuhayele, ale ehonguo. Nda tua setukula Paulu, ovitangi viosi tu liyaka lavio, tu vi tenda ndepuluvi lioku limbuka ekuatiso lia Yehova.

16. Ndaño okuti uhayele wove utito, nye o pondola oku linga?

¹⁶ Anga hẽ o sangiwa kosipitali omo liuvei umue, ale endela komangu yalola? O kasi hẽ lekambo liongusu ketimba, ale ocitangi co vovaso? Nda oco, o pondola hẽ oku vumba Yehova kumue lamalẽhe va kuete uhayele? Ocili okuti o pondola! Vamanji valua okuti va kuka lava va vela, va kasi oku amamako oku yolokela komuenyo. Pole, ka va ci lingi longusu yavo muẽle. Ovo va kasi oku pamasiwa poku yevelela olohongele via ngalavaliwa lekuatiso liotelefone. Ovo va litumbika kupange woku longisa omanu oco va linge olondonge, poku kundila olondotolo, ifumelu kuenda epata liavo.

17. Yehova o liyeva ndati eci a mola vana okuti uhayele wavo utito?

¹⁷ Nda ku tẽla oku linga ovina viosi o yongola kupange wa Yehova, ku ka sumue kuenda  ku ka sime okuti ku tẽla oku pandikisa kovitangi violoneke vilo via sulako. Yehova oku sole omo liekolelo u kuetele kuenda epandi liove. Cilo, ove o sukila calua ekuatiso liaye kuenda eye lalimue eteke a ku yanduluka. (Osa. 9:10) Eye amela kokuove. Kũlĩhĩsa eci ca popia manji umue ukãi okuti wa liyaka lekambo liuhayele. Eye wa popia hati: “Omo okuti uvei wange wa kala oku livokiya, ca tepulula apuluvi ange oku kundila omanu. Pole, nda kũlĩha okuti alikolisilo ange ndaño atito, a sanjuisa utima wa Yehova kuenje ci ndi sanjuisavo.” Kuenje nda wa sumua, ivaluka okuti haveko lika o kasi vekalo liaco. Sokolola ongangu Paulu a sia kuenda ivaluka olondaka viaye vielembeleko viokuti: “Nda sanjukila oku hongua, . . . momo eci ndi hongua, oco ñuata vali ongusu.”—2 Va Kor. 12:10.

18. Ocitangi cipi cinene vamue va kasi oku liyaka laco?

¹⁸ Vana va kasi oku yolokela komuenyo, va kasi oku liyaka locitangi cikuavo. Ovo va kasi oku liyaka locitangi cimue cinene okuti vakuavo ka va pondola oku ci limbuka lonjanga. Ndeci, ovo va kasi oku liyaka lesumuo lialua kutima kuenda asakalalo alua. Momo lie afendeli ava va Yehova vakuekolelo va pitila lovitangi viaco? Nda omunu umue ocilema cokuokuo, ale endela komangu yalola, omanu vosi va pondola oku limbuka lonjanga ocitangi caye kuenje va vetiyiwa oku lekisa ohenda loku u kuatisa. Pole, vana va kasi oku liyaka lesumuo liovutima, pamue ovo ka va ci tendi ndocitangi cinene kokuavo. Evalo liavo lialua calua okuti, li sokisiwa lomunu ocilema cokuokuo, pole, ovo ka va tambula ekuatiso ndeli lieciwa kolombei vikuavo.

19. Nye tu lilongisila kongangu ya Mefivosiete?

¹⁹ Nda o kasi locitangi cimue culema kuenje o liyeva okuti kua kapiwileko, o pondola oku pamisiwa longangu ya Mefivosiete. (2 Sam. 4:4) Momo eye wa liyakavo locitangi culema kuenda Soma Daviti wo kuatelele ovisimĩlo ka via sungulukile. Pole, Mefivosiete ka lingile cimue cĩvi okuti o pita locitangi caco. Eye ka kuatele ocikumbiti, pole, wa tiamisilile utima kovina viwa via pita vomuenyo waye. Mefivosiete wa lekisa olopandu omo liohenda Daviti a lekisile kokuaye kosimbu. (2 Sam. 9:6-10) Eli olio esunga lieci okuti eci Daviti o kuatela ovisimĩlo ka via sungulukile, Mefivosiete ka ci kapeleko. Mefivosiete ka ecelele okuti akulueya a Daviti o sumuisa. Handi vali, ka kapele eko ku Yehova omo lieci Daviti o lingila. Mefivosiete wa tiamisila utima kueci a ponduile oku linga, oco a kuatise osoma ya nõliwa la Yehova. (2 Sam. 16:1-4; 19:24-30) Yehova wa tuma oku soneha ulandu wa Mefivosiete Vembimbiliya, oco u tu kuatise.—Va Rom. 15:4.

20. Nye esakalalo lia siata oku koka komanu vamue, pole, ekolelo lipi va sukila oku kuata?

 ²⁰ Vamanji vamue omo liasakalalo alua vutima, eteke leteke ci va kokela oku kuata ocinyeñohusa kuenda oku liamuha la vakuavo. Citava okuti ovo ka va yongola oku kala lavakuavo kolomapalo, pole, vamamako oku endaenda kolohongele viekongelo, kolohongele vimbo kuenda kolohongele viofeka. Ovo va kuete ohele yoku sapela lomanu vana ka va va kũlĩhĩle ciwa, pole, eci va kasi kupange woku kunda va vangula lomanu vosi. Nda eci oco ocitangi cove, kolela okuti ku kasi lika liove. Valua va kasivo oku liyaka locitangi caco. Ivaluka okuti Yehova o sanjukila elikolisilo o linga lutima wosi. Omo okuti kua konyohele, eci ci lekisa okuti Yehova o kasi oku ku sumũlũisa loku ku ĩha ongusu o sukila. * (Va Fil. 4:6, 7; 1 Pet. 5:7) Nda o kasi oku vumba Yehova, ndaño lekambo liuhayele kuenda lesumuo kutima, kolela okuti o kasi oku sanjuisa Yehova.

21. Lekuatiso lia Yehova, nye vosi yetu tu ka tẽla oku linga?

²¹ Ocili okuti omapalo yoku yoloka loku yoloka kuna Paulu a tukula, pali etepiso. Etepiso liaco lieli okuti, komapalo yoku yoloka, umosi eye lika wa enda oku tambula onima. Pole, Akristão vosi okuti va kasi oku pandikisa lekolelo koku yoloka, va ka tambula onima yomuenyo ko pui. (Yoa. 3:16) Handi vali, komapalo yoku yoloka, vosi va sukila oku kuata uhayele uwa, pole, nda uhayele wavo ka wa sokelepo, ka va tambula onima. Pole kokuetu, valua okuti ndaño ka va kuete uhayele ketimba, lopo tu kasi oku pandikisa. (2 Va Kor. 4:16) Omo liaco, lekuatiso lia Yehova, vosi yetu tu ka tẽla oku yoloka toke kesulilo!