Kocitangi eci, vamanji vekongelo va pondola oku tenda olohuela viatete okuti via pua loku tenda olohuela viokaliye lonjila yimue ya sunguluka. Oco tu kuate elomboloko lionjila yaco ya nõliwa, tu konomuisi eci Yesu a popia catiamẽla koku linyãla kuenda kolohuela viokaliye.

Ndomo ca lekisiwa kelivulu lia Mateo 19:9, Yesu wa lombolola esunga limosi li lekisiwa Vovisonehua lieci olohueli vi sukila oku linyãla. Eye wa popia hati: “Wosi o nyãla ukãi waye okuti halevĩhoko liukahonga kuenje o kuela ukuavo, o linga ukahokolo.” Kolondaka via Yesu, tu lilongisako okuti, (1) Ovisonehua vi lekisa okuti evĩho liukahonga oco lika cecelela ohueli oku linyãla (2) ulume o linyãla lukãi waye okuti esunga liaco ka li sangiwa Vovisonehua, kuenje o kuela lomunu ukuavo, o linga ukahokolo. *

Anga hẽ olondaka via Yesu vi lomboloka okuti ulume wa linga evĩho liukahonga kuenje o linyãla lukãi waye o kuete omoko yoku kuela lomunu ukuavo? Sio, hacoko. Eci umue pokati kohueli yi linga ukahokolo, ohueli yikuavo eye o nõla nda ecela ulume waye, ale sio. Nda okuti ukãi wa nõlapo oku siapo ulume waco kuenje va tata ovicapa vioku linyãla, kavali kavo va kuete omoko yoku kuela omunu ukuavo noke yoku linyãla.

Handi vali, ohueli ka yi kuete eko citava okuti, o kuata onjongole yoku teyuila olohuela viaye kuenda o nõlapo oku ecela ulume waye. Pole, nye ci popiwa nda okuti ulume wa linga ukahokolo o likala ongecelo yukãi waye kuenda o sanda eye muẽle ovicapa vioku linyãla ndaño okuti ukãi ka yongola? Omo okuti ukãi wa ecela ulume waye kuenda o yongola oku amamako lolohuela, Ovisonehua ka vi lekisa omoko oco eye a kuele omunu ukuavo. Nda eye wa nõlapo oku kuela omunu ukuavo ndaño ka kuete omoko yoku ci linga, o kasi oku linga vali ukahokolo, kuenje citava okuti akulu vekongelo va sombisa omunu waco, omo ka likekembelele kakulueya aye.—1Ko 5:1, 2; 6:9, 10.

Catiamẽla kulume una okuti Ovisonehua ka vi lekisa esunga oco eye a kuele omunu ukuavo, vamanji vekongelo va tenda ndati olohuela viatete lolohuela viokaliye? Ndomo ci lekisiwa Vovisonehua, olohuela viatete vi kuete hẽ esilivilo? Anga hẽ ohueli ka yi kuete eko, handi yi pondola oku nõlapo oku ecela, ale oku likala ulume waye? Vamanji vekongelo va pondola hẽ oku tenda olohuela viokaliye ndukahokolo?

Kosimbu, vamanji vekongelo va enda oku tenda olohuela viokaliye ndukahokolo osimbu ohueli ka yi kuete eko yi kasi lomuenyo, ka ya kuelele omunu ukuavo kuenda ka lingile evĩho liokahonga. Pole, Yesu ka tukuile ohueli ka yi kuete eko eci a vangula catiamẽla koku linyãla kuenda koku kuela omunu ukuavo. Eye wa popia okuti, ulume o linyãla lukãi waye kuenje o kuela lomunu ukuavo okuti Ovisonehua ka vi lekisa esunga liaco, o linga ukahokolo. Omo liaco, ndomo Yesu a ci popia, oku linyãla loku kuela omunu ukuavo, ci kasi ndoku linga ukahokolo okuti, ca ponduile oku malako olohuela viatete.

 Eci olohueli vimue vi linyãla kuenda umue pokati kavo o kuela omunu ukuavo, ka citava vali okuti ohueli ka yi kuete eko ecela, ale o likala oku ci linga. Kuenje eye ka kuete ocikele coku nõla nda ecela ulume waye, ale sio. Omo liaco, onjila ndomo vamanji vekongelo va ka tenda olohuela viokaliye, ka ca tambele nda ohueli ka yi kuete eko ya fa, ya kuela omunu ukuavo, ale ya linga evĩho liukahonga. *

Vulandu wa konomuisiwa konano, ulume wa linga ukahokolo kuenje o linyãla lukãi waye. Pole, nye ci pita nda okuti ulume ka lingile ukahokolo kuenje o linyãla loku kuela omunu ukuavo? Ale, nye ci popiwa nda okuti ulume ka lingile evĩho liukahonga osimbu handi ka linyãlele pole, o ci linga noke lioku linyãla kuenje o kuela omunu ukuavo ndaño okuti ukãi wa nõlapo oku u ecela? Kovolandu a-a, oku linyãla kuenda oku kuela omunu ukuavo, ci tendiwa ndukahokolo kuenje ci pondola oku malako olohuela viatete. Olohuela viokaliye ovio vi kuete esilivilo. Utala Wondavululi 15 ya Kuvala 1979 kemẽla 32, wa lombolola ndoco: “Kaliye eye wa kuela omunu ukuavo kuenda ka citava okuti u siapo loku tiukila vali kolohuela viatete; olohuela viatete via pua omo lioku linyãla, ukahokolo kuenda olohuela viokaliye.”

Eci ci tu kuatisa oku kuata elomboloko liokuti, tu sukila oku amamako oku tenda olohuela ndocina cimue ci kola kuenda ukahokolo ekandu limue linene. Eci ulume umue a linyãla lukãi waye okuti Ovisonehua ka vi lekisa esunga lioku ci linga, kuenje o kuela lomunu kuavo, akulu vekongelo va pondola oku u sombisa omo liekandu a linga. (Nda okuti omunu o kasi vekalo liaco manji umue ukãi, eye o sukilavo oku sombisiwa omo liekandu a linga.) Ndaño okuti olohuela viokaliye ka vi tendiwa ndukahokolo, ulume ka citava okuti o kuata ovikele vimue vekongelo vokuenda kuanyamo alua, nda handi omanu va amamako oku sokolola kocina cĩvi eye a linga, ale ka vo kuetele esumbilo. Osimbu handi ka tambuile ovikele vimue, akulu vekongelo va sukila oku konomuisa lutate ekalo liaye liatiamẽla kohueli yatete, ndomo a liyaka locitangi caco kuenda ndomo omãla va kasi noke lioku yandulukiwa la una wa linga ukahokolo.—Mal 2:14-16.

Oku linyãla okuti Embimbiliya ka lieci esunga lioku ci linga, ku nena ovitangi vialua, omo liaco Akristão vakualondunge va setukula Yehova kuenda va tenda olohuela okuti vi kola.—Uku 5:4, 5; Hev 13:4.