1. Lombolola ovina via pita eci Yesu a linga ocikomo caye catete.

 SOKOLOLA kueci ca pita kesulilo liunyamo 29 K.K. kefetikilo liupange woku kunda wa Yesu. Yesu la ina yaye Maria kuenda vamue pokati kolondonge viaye, va lalekiwa kocipito cimue cuvala ko Kana, vimbo limue konano yolupale Yesu a citiwila ko Nasara. Maria wa kala ekamba liepata kuenda citava okuti wa kala oku kuatisa koku yekisa akombe. Pole, vokuenda kuocipito, kua molẽha ocitangi cimue ca ponduile oku kutisa osõi epata kuenda va sandombua momo ovinyu ya puile. b Citava okuti etendelo liava va lalekiwa, lia luile calua okuti ovo ka va ci lavokaile. Maria lonjanga yalua, wa lupukila komõlaye loku u sapuila hati: “Ovo ka va kuete ovinyu.” (Yoa. 2:1-3) Nye Yesu a linga? Eye wa linga ocina cimue ci komõhisa, okuti ocikomo coku pongolola ovava “ovinyu yiwa.”—Yoa. 2:9, 10.

2-3. (a) Ovikomo vipi Yesu a linga? (b) Tu kuatisiwa ndati poku konomuisa ovikomo via Yesu?

² Yesu wa laikele oku linga ovikomo vialua vikuavo vokuenda kupange waye woku kunda. c Eye wa talavaya lunene  waye woku linga ovikomo oco a kuatise omanu valua. Ndeci, pokati kovikomo viaye vivali, wa tekula 5.000 kalume kuenda kepuluvi likuavo 4.000 kalume citavavo okuti etendelo liaco, li pitahãla 27.000 komanu nda tua kongelamo akãi lomãla va kalapo. (Mat. 14:15-21; 15:32-38) Vepuluvi limuamue Yesu wa sakulavo olombei vialua. (Mat. 14:14; 15:30, 31) Sokolola ndomo owiñi wa komoha poku sakuiwa loku tekuiwa locikomo ca Yesu!

³ Tu pondola oku lilongisa calua kovikomo via Yesu koloneke vilo. Vocipama cilo, tu konomuisa ovolandu amue oku pamisa ekolelo kueci ovikomo viaco vi tu longisa. Kuenje tu konomuisavo ndomo tu setukula umbombe kuenda ocikembe Yesu a lekisa poku linga ovikomo.

4. Ovikomo via Yesu vi tu longisa oku pamisa ekolelo liatiamẽla kulie?

⁴ Ovikomo via Yesu ka vi tu longisa lika ovolandu a pamisa ekolelo atiamẽla kokuaye pole, vi tu longisavo catiamẽla ku Isiaye. Momo Yehova eye Ono yovikomo viaco. Kovilinga 10:38 ku tu sapuila ndoco: “Suku o waveka [Yesu] lespiritu sandu kuenda lunene, haeye wa endaenda kofeka yosi oku linga ovina viwa loku sakula vosi vana va talisiwile ohali vemẽhi liunene Weliapu; momo Suku wa kala laye.” Ivaluka okuti, cosi Yesu a popia leci eye a linga oku kongelamo ovikomo viaye wa situlula ciwa ovisimĩlo kuenda ekalo liwa lia Isiaye. (Yoa. 14:9) Kũlĩhĩsa ovina vitatu tu lilongisila kovikomo via Yesu.

5. Nye ca vetiya Yesu oku linga ovikomo? (Mateo 20:30-34)

⁵ Catete Yesu kuenda isiaye va tu sole calua. Eci Yesu a kala palo posi wa lekisa ocisola calua komanu, poku talavaya lunene waye woku linga ovikomo oco a kuatise omanu va kala oku tala ohali. Eteke limue olomeke vivali via kaluka kokuaye oku pinga ekuatiso. (Tanga Mateo 20:30-34.) Limbuka okuti Yesu “wa va kuatela ohenda” kuenje wa va kayisa. Vocinimbu eci ondaka yo Helasi ya pongoluiwa okuti “wa va kuatela ohenda,” yi lomboloka ocikembe calua ci tunda kosi yutima. Ocikembe caco cocili, ocindekaise cocisola ca vetiyavo Yesu oku tekula vana va kala lonjala kuenda oku sakula umue ukuavilundu. (Mat. 15:32; Mar. 1:41) Kuenje tua kolela okuti Yehova, Suku “yohenda” kumue lomõlaye va tu sole calua kuenda va kapako ohali yetu. (Luka 1:78; 1 Pet. 5:7) Ovo va yongola oku malako ohali yosi ya siata pokati komanu!

6. Unene upi Suku a eca ku Yesu?

⁶ Cavali, Suku wa eca ku Yesu unene woku tetulula ovitangi viosi viomanu. Yesu pocakati covikomo viaye, eye wa lekisa unene woku yula ovitangi vina okuti nda lalimue eteke tua tẽla oku vi yula lika wetu. Ndeci, eye o kuete unene woku tu yovola kono yovitangi via kokiwa lekandu okuti, oku vela loku fa. (Mat. 9:1-6; Va Rom. 5:12, 18, 19) Ovikomo viaye via situlula okuti, eye o pondola oku sakula “ovovei aiñi aiñi” loku pindula ava va fa. (Mat. 4:23; Yoa. 11:43, 44) Eye o kuetevo unene woku tateka ahunguhungu anene loku yovola omanu kaspiritu avĩ. (Mar. 4:37-39; Luka 8:2) Ci pamisa calua oku kũlĩha okuti Yehova wa eca unene waco peka Liomõlaye!

7-8. (a) Ovikomo via Yesu vi tu ĩha ekolelo lipi? (b) Ocikomo cipi o yongola oku ka mola oku tẽlisiwa voluali luokaliye?

⁷ Catatu, tu pondola oku kolela okuti, asumũlũho o kovaso oloneke vemehi Liusoma wa Suku a ka tẽlisiwa muẽle ocili. Ovikomo Yesu  a linga eci a kala palo posi, vi tu longisa okuti o ka linga vali eci ca velapo Ndosoma Yusoma wa Suku. Kũlĩhĩsa asumũlũho tu ka kuata eci Kristu a ka viala ongongo. Tu ka kuata uhayele wa lipua momo o ka malako ovovei osi kuenda ovitangi viosi via siata oku sakalaisa omanu. (Isa. 33:24; 35:5, 6; Esit. 21:3, 4) Lalimue eteke tu ka liyaka vali lonjala ale ovitangi vi tundilila kovilunga. (Isa. 25:6; Mar. 4:41) Tu ka kuata esanju lialua lioku ka tambula vangandietu va kasi “vayambo.” (Yoa. 5:28, 29) Ocikomo cipi o yongola oku ka mola oku tẽlisiwa voluali luokaliye? 

⁸ Eci Yesu a linga ovikomo, wa lekisa umbombe walua kuenda ocikembe okuti ovituwa tu sukila calua oku setukula. Tu konomuisi ovolandu avali, poku fetikila lulandu wocipito cuvala wa pita ko Kana.

9. Nye Yesu a linga pocipito cimue cuvala? (Yoano 2:6-10)

⁹ Tanga Yoano 2:6-10. Eci ovinyu ya pua pocipito cuvala, anga hẽ Yesu wa kisikiwa oku linga ocina cimue? Sio. Ka kuli ocitumasuku lacimue ca popele okuti Mesiya wa laikele oku linga ocikomo coku pongolola ovinyu. Pole, sokolola ndomo nda wa liyeva nda ovinyua puvala wove via pua. Yesu wa kuatela ohenda epata, ca piãla enene olondombua kuenje ka yonguile okuti va kutisiwa osõi. Omo liaco, ndomo ca tukuiwa kefetikilo liocipama,  eye wa linga ocikomo cimue. Eye wa pongolola eci ci soka 103 kalitulu ovava oco a kale ovinyu yiwa. Citava okuti eye wa sokiya onjongo yaco oco okuti eyi yi supapo, yi landisiwa oco yi kuatise olohueli kovaso yoloneke kovina va ka sukila. Citava okuti ohueli yaco ya kuata esanju lialua!

10. Ovina vipi vi komohĩsa vi sangiwa kulandu wa Yoano ocipama 2? (Talavo ociluvialuvia.)

¹⁰ Kũlĩhĩsa ovina vimue vi komohĩsa kulandu usangiwa ku Yoano ocipama 2. Wa limbuka hẽ okuti Yesu hayeko wa yukisa asanga ovava? Oco ka ka limolehĩse, eye wa sapuila kakuenje oco va yukise asanga. (Ovinimbu 6, 7) Yesu noke yoku pongolola ovava oco a linge ovinyu, hayeko wa ka tuaile okopo yovinyu kusongui wocipito oco a yi mahe. Pole, wa sapuila kakuenje oco va ci linge. (Ocinimbu 8) Handi vali, Yesu ka kuatele kokopo yovinyu loku yinyuila kovaso ya vana va lalekiwa kuenda oku lipanda okuti, ‘Mahi kovinyu nda panga!’

11. Nye tu lilongisila kocikomo ca Yesu?

¹¹ Nye tu lilongisila kocikomo Yesu a linga coku pongolola ovava oco a linge ovinyu? Tu lilongisilako oku lekisa umbombe. Yesu ka lipandele omo liocikomo a linga; handi vali, eye kala lipanda omo liovina a tẽlisa. Pole, olonjanja viosi lumbombe, wa eca esivayo liosi ku Isiaye. (Yoa. 5:19, 30; 8:28) Nda tua setukula Yesu poku amamako lumbombe, ka tu ka lipanda omo liovina tua siata oku linga. Cosi tu linga kupange wa Yehova, ka tu ka ci lipandeli, pole, tu lipandela esumũlũho tu kuete lioku vumba Suku. (Yer. 9:23, 24) Tu eci esivayo liosi kokuaye. Lalimue eteke nda tua tẽla oku tẽlisa ocina cimue ciwa, nda ka tua kuatele ekuatiso lia Yehova.—1 Va Kor. 1:26-31.

12. Onjila yipi yikuavo tu pondola oku setukula umbombe wa Yesu? Ci lombolola.

¹² Kũlĩhĩsa onjila yikuavo tu pondola oku setukula umbombe wa Yesu. Sokolola kocindekaise eci: Ukulu umue wekongelo, o pita otembo yalua oku kuatisa umalẽhe umue oñuatisi yekongelo oku pongiya ohundo yowiñi a ka linga onjanja yatete. Kuenje omo liekuatiso liaco, umalẽhe o linga ohundo yimue yiwa haiyo ya sanjuisa ekongelo. Noke liohongele, umue iya kukulu wekongelo kuenda u sapuila hati: ‘Manji Ngandi wa linga ohundo yiwa siti?’ Anga hẽ ukulu wekongelo o sukila oku popia hati: ‘Oco muẽle, pole nda pesela otembo yalua oku u kuatisa?’ Ale lumbombe o tambulula hati: ‘Ocili wa linga muẽle.’ Nda yi solavo. Eci tu lekisa umbombe, ka tu sandi oku pandiyiwa omo liovina viwa tua lingila vakuetu. Etu tu sanjuka omo tua kũlĩha okuti Yehova o ci lete kuenda wa kapako ovina tu linga. (Sokisa Mateo 6:2-4; Va Hev. 13:16) Ocili okuti, tu sanjuisa Yehova eci tu setukula Yesu poku lekisa umbombe.—1 Pet. 5:6.

13. Nye Yesu a mola ocipepi lolupale luo Naini kuenda nye eye a linga? (Luka 7:11-15)

¹³ Tanga Luka 7:11-15. Sokolola ulandu wa pita vokuenda kupange woku kunda wa Yesu. Eye wa kala oku enda ko Naini, volupale lumue luo Galilea okuti ka lua kale ocipãla lo Siuname, kuna uprofeto Elisia a pindula omõla wukãi umue noke lioku pita 900 kanyamo. (2 Olos. 4:32-37) Eci Yesu a kala ocipepi lombundi, wa mola omanu va kala oku enda oku ka kenda. Ekalo liaco ka lia lelukile momo cimbumba cimue ca fisa omõlaye wongunga. Pole, ina wa fisa  ka kaile lika waye; owiñi walua volupale wa kala laye. Yesu wa talamisa owiñi kuenje wa lingila ocina cimue ci komohĩsa ku ina wa fisa poku pindula omõlaye! Eli epinduko liatete pokati kapinduko atatu a lingiwa la Yesu a tukuiwa Vavangeliu.

14. Ulandu upi u komohĩsa u sangiwa ku Luka ocipama 7? (Talavo ociluvialuvia.)

¹⁴ Konomuisa ocina cimue ci komohisa vulandu u sangiwa ku Luka ocipama 7. Wa limbuka hẽ okuti eci Yesu a “mola” ina wa fisa wo “kuatela ohenda”? (Ocinimbu 13) Citava okuti Yesu wa mola ukãi oku lila osimbu a kala oku enda ocipepi locivimbi comõlaye yu wo kuatela ohenda yalua vutima. Yesu ka kuatelele lika ohenda ina; eye wa lekisa ocikembe kokuaye. Eye wa vangula laye londaka yi lembeleka kuenje wo sapuila hati: “Ku ka lile vali.” Noke wa linga ocina cimue oco o kuatise. Eye wa pindula omõla wa file kuenje “wo weca ku inaye.”—Ovinimbu 14, 15.

15. Nye tu lilongisila kocikomo ca Yesu?

¹⁵ Nye tu lilongisila kocimo ca Yesu coku pindula omõla wocimbumba? Tu lilongisilako okuti tu sukila oku lekisa ocikembe ku vana va fisa. Ocili okuti ka tu pondola oku pindula omunu wa fa, ndeci Yesu a linga. Pole, ndeci Yesu, tu lekisa ohenda kokuavo poku va kapako. Tu lekisavo ocikembe poku popia ale oku linga eci tu tẽla oco tu va kuatise kuenda oku va lembeleka. d (Olosap. 17:17; 2 Va Kor. 1:3, 4; 1 Pet. 3:8) Ondaka yimue ale, elinga limue litito, li pondola oku va lembeleka calua.

16. Ndomo ci lekisiwa kociluvialuvia, nye wa lilongisa kulandu wa ina umue wa fisile ndopo omõlaye?

¹⁶ Kũlĩhĩsa ulandu umue. Kanyamo a pita, osimbu kua kala oku imbiwa ocisungo cimue kohongele, manji umue ukãi wa limbuka okuti ina umue wa kala ponele yaye wa kala oku lila. Ocisungo ca kala oku tukula elavoko liepinduko kuenda ina yaco ndopo a fisile omõlaye ukãi. Poku ci kũlĩha manji lonjanga yalua, wa amela kokuaye wo kuata kapepe kuenda va malusuila kumosi ocisungo. Ina  yaco noke wa popia hati: “Nda liyeva okuti, ndi soliwe calua la vamanji.” Wa kuata esanju lialua omo lioku enda kohongele. Wa popiavo hati: “Konjango Yusoma oko tu tambuila ekuatiso.” Tu koleli okuti Yehova o lete kuenda wa kapako ovina tu linga oco tu lekise ohenda ku vana “vakuavitima via teka.”—Osa. 34:18.

17. Nye tua lilongisa vocipama cilo?

¹⁷ Tu pamisiwa calua eci tu lilongisa ovolandu Embimbiliya atiamẽla kovikomo via Yesu. Ovolandu aco a tu longisa okuti Yehova la Yesu va tu sole calua, Yesu o kuete unene woku malako ovitangi viomanu kuenda tu pondola oku kolela kohuminyo asumũlũho Wusoma o kovaso yoloneke. Omo liaco, osimbu tu konomuisa ovolandu aco, tu sokololi konjila ndomo tu setukula ovituwa via Yesu. Momo lie ku lingila esokiyo lioku linga elilongiso lio pokolika, ale, Efendelo Liepata lina li kunamela kovikomo vikuavo via Yesu? Limbuka ovina o lilongisilako kuenda noke sapuilako vakuene eci wa lilongisa. Nda wa ci linga, o ka kuata olombangulo vialua vi pamisa!—Va Rom. 1:11, 12.

18. Nye tu ka konomuisa vocipama cikuãimo?

¹⁸ Yesu kesulilo liupange waye woku kunda, wa linga ocikomo caye catatu haico ca sulako coku pindula ca tukuiwa Vembimbiliya. Pole, epinduko liaco lia li tepele momo wa pindula ekamba liaye o soliwe kuenda wa ci linga vekalo ka lia siatele. Nye tu lilongisila kulandu Wevangeliu wa tiamẽla kocikomo caco? Tu pamisa ndati ekolelo lietu kelavoko liepinduko? Vocipama cikuãimo tu ka konomuisa apulilo aco.