1-2. Nye tu sukila oku linga osimbu tu lavoka oluali luokaliye?

 ETU tua sanjukila calua ohuminyo ya Yehova yoku piñanya oluali lulo, oco lu kale oluali luokaliye luesunga. (2 Pet. 3:13) Ndaño ka tua kũlĩhĩle otembo oluali luokaliye lu keya, ovina vi kasi oku pita vi lekisa okuti oluo lu kasi ocipepi.—Mat. 24:32-34, 36; Ovil. 1:7.

² Ndaño tu kasi ale vocili otembo yalua, vosi yetu tu sukila oku pamisa ekolelo lietu kohuminyo yaco. Momo lie? Momo ndaño ekolelo lia pama cilo, pamue li pondola oku hongua. Upostolo Paulu wa tukula ekambo liekolelo hati, ‘ekandu li tu tanga tanga.’ (Va Hev. 12:1) Oco tu yuvule ekolelo lietu oku hongua, olonjanja viosi tu sukila oku limbuka ovovangi okuti, oluali luokaliye lu kasi ocipepi.—Va Hev. 11:1.

3. Nye tu konomuisa vocipama cilo?

³ Vocipama cilo, tu konomuisa olonjila vitatu tu pondola oku pamisa ekolelo lietu kolohuminyo via Yehova violuali luokaliye ndeci: (1) poku sokolola kocisembi (2) poku sokolola kunene wa Yehova kuenda (3) poku linga ovina vi pamisa ukamba tu kuetele Yehova. Noke tu ka konomuisa ndomo esapulo lia Yehova ku Havakuki li pamisa ekolelo lietu koloneke vilo. Tete tu konomuisa ovina tua siata oku liyaka lavio cilo okuti, vi sukila oku kuata ekolelo lia pama kolohuminyo vioku iya kuoluali luokaliye.

 OVINA VI SUKILA EKOLELO LIAPAMA

4. Olonjila vipi vi sukila ekolelo lia pama?

⁴ Eteke leteke tu nõla olonjila vi sukila ekolelo lia pama. Ndeci, tu sukila oku nõla onjila mua kongela akamba vetu, ovitalukilo, oku tanga kosikola, olohuela kuenda upange woku sanda eteku. Tu sukila oku lipula ndoco: ‘Ovina ndi nõla vi lekisa hẽ okuti nda tenda oluali lulo okuti ndopo lu ka piñanyiwa loluali luokaliye lua Suku? Oku nõla kuange ku vetiyiwa hẽ lomanu vana va sima okuti oku fa esulilo liovina viosi?’ (Mat. 6:19, 20; Luka 12:16-21) Tu ka nõla onjila yiwa nda tua pamisa ekolelo lietu liokuti oluali luokaliye lukasi ocipepi.

5-6. Momo lie tu sukilila oku pamisa ekolelo kotembo yovitangi? Tukula ocindekaise cimue.

⁵ Tua siatavo oku liyaka lovitangi vi sukila ekolelo liapama. Pamue tu liyaka lelambalalo, luvei umue ka u piti, ale lovina vi tu kokela esumuo. Kefetikilo pamue tu liyeva ndu okuti tu tẽla oku pandikisa kovitangi. Pole, nda ovitangi viaco viamamako vokuenda kuotembo yalua tu ka sukila ekolelo lia pama oco tu tẽle oku pandikisa kuenda oku amamako oku vumba Yehova lesanju.—Va Rom. 12:12; 1 Pet. 1:6, 7.

⁶ Eci tu liyaka lovitangi, pamue tu liyeva okuti oluali luokaliye lua Yehova lalimue eteke lu keya. Eci ci lomboloka hẽ okuti ekolelo lietu lia hongua? Pamue sio. Kũlĩhĩsa ocindekaise cimue. Ndeci, potembo yombambi yalua pamue tu sima okuti lalimue eteke ku keya otembo yowuya. Pole, ndaño ndoco ku laika oku kala owuya. Cimuamue haico okuti, eci tu sumua calua pamue tu sima okuti lalimue eteke oluali luokaliye lu keya. Nda ekolelo lietu lia pama tua kũlĩha okuti olohuminyo via Suku vi ka tẽlisiwa. (Osa. 94:3, 14, 15; Va Hev. 6:17-19) Lekolelo liaco, tu amamako oku pitisa kovaso efendelo lia Yehova komuenyo wetu.

7. Ovisimĩlo vipi tu sukila oku yuvula?

⁷ Tu konomuisa vali onepa yikuavo tu sukila oku pamisa ekolelo lietu okuti kupange woku kunda. Omanu valua tua siata oku kundila va sima okuti “olondaka viwa” viatiamẽla kokuiya kuoluali luokaliye lua Suku haviociliko. (Mat. 24:14; Esek. 33:32) Lalimue eteke ka tu ka eceleli oku yapuisiwa lovisimĩlo viavo. Oco tu yuvule okuti ocina caco ci lipita letu tu sukila oku amamako oku pamisa ekolelo lietu. Tu konomuisi olonjila vitatu vioku ci linga.

SOKOLOLA KOCISEMBI

8-9. Oku sokolola kocisembi ci pamisa ndati ekolelo lietu?

⁸ Onjila yimue tu pondola oku pamisa ekolelo lietu, oku sokolola kocisembi. Ocisembi ci tu kuatisa oku kolela okuti olohuminyo via Suku vi ka tẽlisiwa muẽle. Eci tu sokolola lutate esunga lieci kua eciwila ocisembi, leci ca kongelamo tu pamisa ekolelo lietu liokuti ohuminyo ya Suku yoku kuata omuenyo ko pui voluali lua velapo, yi ka tẽlisiwa muẽle. Momo lie tu ci popela?

⁹ Nye ca kongela vocisembi? Yehova wa tuma Omõlaye uveli okuti ekamba liaye lia velapo, oco a citiwe palo posi ndomunu umue wa lipua. Osimbu Yesu a kala palo posi, wa pandikisa kovitangi viosi a liyaka lavio. Eye wa tala ohali kuenda wa fa lonjila yimue yi sumuisa. Ondando yimue yinene Yehova a feta! Suku yetu ukuacisola nda lalimue eteke a ecelela Omõlaye oku tala ohali kuenda oku fa locimãho coku eca omuenyo wa velapo, pole, vokatembo katito. (Yoa. 3:16; 1 Pet. 1:18, 19) Omo okuti Yehova wa eca omõlaye o soliwe oco a tu kuatise, eye wa tu likuminya  oku ka kala otembo ka yi pui voluali luokaliye.

OKU SOKOLOLA KUNENE WA YEHOVA

10. Ndomo ca tangiwa ku Va Efeso 3:20, nye Yehova a pondola oku linga?

¹⁰ Onjila yavali yoku pamisa ekolelo lietu oku sokolola kunene wa Yehova. Eye o kuete unene woku tẽlisa ovina viosi a likuminya oku linga. Omanu valua koloneke vilo, va sima okuti ohuminyo yomuenyo ko pui voluali luokaliye, ka yi ka tẽlisiwa. Pole, Yehova olonjanja viosi o likuminya ovina okuti omanu nda lalimue eteke va vi tẽlisa. Eye o pondola oku ci linga, momo eye Suku Ukuonene Wosi. (Yovi 42:2; Mar. 10:27) Omo liaco, ka ci tu komõhisa eci a likuminya kokuetu ovina via velapo!—Tanga Va Efeso 3:20.

11. Tukula ulandu umue wovina vi komõhisa Suku a likuminyile. (Tala okakasia losapi hati, “ Olohuminyo Vimue Via Tẽlisiwa.”)

¹¹ Kũlĩhĩsa ovina vimue Yehova a likuminyile kafendeli vaye kosimbu vina via molẽhele ndu okuti, ka vi tẽlisiwa. Eye wa likuminyile ku Avirahama kuenda Sara okuti, va pondule oku kuata omõla umue ulume ndaño va kukile ale. (Efet. 17:15-17) Eye wa sapuilavo Avirahama okuti ocitumbulukila caye ca laike oku tambula ofeka yo Kanana. Ocitumbulukila ca Avirahama okuti va Isareli, omo lioku kala otembo yalua ndapita Kegito, ca molẽhele ndu okuti ohuminyo yaco lalimue eteke ya laikele oku tẽlisiwa. Pole, ceya oku tẽlisiwa. Noke Yehova wa eca esapulo liokuti Elisavete wa ponduile oku kuata omõla, ndaño wa kukile ale. Wa sapuilavo ku Maria ufeko umue wosombo okuti wa laikele oku cita omõlaye kuenje ca laikele oku tẽlisa ohuminyo eye a lingile vokuenda kuanyamo alua vocumbo Cedene!— Efet. 3:15.

12. Kelivulu lia Yehosua 23:14 kuenda Isaya 55:10, 11 ku tu sapuila nye catiamẽla kunene wa Yehova?

¹² Eci tu sokolola olohuminyo viosi Yehova a linga kuenda ndomo eye a ka vi tẽlisa, tu kuata elomboloko liokuti eye o kuete unene kuenje ekolelo lietu kohuminyo yoluali luokaliye li ka pama. (Tanga Yehosua 23:14; Isaya 55:10, 11.) Tu sukila oku likolisilako oku kuatisa vakuetu oku limbuka okuti ohuminyo yoluali luokaliye hanjoiko kuenda uhembiko. Yehova poku popia okuti, ku ka kala ilu liokaliye kuenda ongongo yokaliye, eye hati: “Olondaka evi via koleliwa kuenda viocili.”—Esit. 21:1, 5. 

LINGA OVINA VI PAMISA UKAMBA WOVE LA YEHOVA

13. Olohongele viekongele vi pamisa ndati ekolelo lietu? Ci lombolola.

¹³ Onjila yatatu yoku pamisa ekolelo lietu, oku pesila otembo kovina vi pamisa ukamba wetu la Yehova. Konomuisa ndomo tu kuatisiwa lolohongele vietu viekongelo. Manji umue o tukuiwa Anna, o kasi kupange wotembo yosi anyamo alua, wa popia hati: “Olohongele vi ñuatisa oku amamako lekolelo liapama. Ndaño okuti hundi ka loñolohele koku longisa, ale ka lombolola vimue viokaliye, olonjanja viosi ndi likolisilako oku yevelela loku kuata elomboloko lia suapo liocili Cembimbiliya kuenje ci pamisa ekolelo liange.” b Tu pamisavo ekolelo lietu eci tu yevelela lutate atambululo a vamanjetu kolohongele.—Va Rom. 1:11, 12; 10:17.

14. Upange woku kunda u pamisa ndati ekolelo lietu?

¹⁴ Tu pamisavo ekolelo lietu eci tu panga onepa kupange woku kunda. (Va Hev. 10:23) Manji Barbara okuti o kasi oku vumba Yehova ci pitahãla 70 kanyamo wa popia hati:  “Olonjanja viosi ndi tenda upange woku kunda okuti, u pamisa ekolelo. Eci ndi sapuila ku vakuetu catiamẽla kolohuminyo via Yehova, ekolelo liange liamamako kuenda li pama.”

15. Elilongiso liopokolika li pamisa ndati ekolelo lietu? (Talavo ociluvialuvia.)

¹⁵ Kũlĩhĩsa ocina cikuavo ci pamisa ekolelo lietu okuti: elilongiso lio pokolika. Manji Susan wa popia hati, eci ndi linga esokiyo lielilongiso liange, ci ñuatisa calua. Eye wamisako hati, “Calumingu ndi lilongisa ocipama Cutala Wondavululi wosemana yi kuamamo. Sengunda kuenda Vovali ndi pongiya ohongele yovokati kosemana. Voloneke vi supapo ndi linga esokiyo lielilongiso liange liopokolika.” Manji Susan omo lioku kuama esokiyo liaco lielilongiso, eye o kasi oku amamako oku pamisa ekolelo liaye. Manji Irene okuti o kasi oku talavaya kombala Yolombangi Via Yehova vokuenda kuanyamo alua, wa siata oku pamisa ekolelo liaye poku lilongisa ovitumasuku Viembimbiliya. Eye hati: “Nda siata oku komõha calua loku tẽlisiwa kuovitumasuku via Yehova ndaño muẽle kovina vitito.” c

“CI KA TẼLISIWA MUẼLE”

16. Momo lie olondaka Yehova a sapuila ku Havakuki vi kuetele esilivilo koloneke vilo? (Va Heveru 10:36, 37)

¹⁶ Afendeli vamue va Yehova va kasi ale oku lavoka esulilo lioluali lulo vokuenda kuanyamo alua. Kovaso omanu, oku tẽlisiwa kuolohuminyo via Suku ci molẽha ndu okuti cikasi oku tumãla. Omo okuti Yehova wa kũlĩha ndomo afendeli vaye va liyevite, eye wa sapuilile kuprofeto Havakuki hati: “Ocinjonde handi ci kevelela otembo ya tukuiwa, kuenda oco ci lupuka toke kesulilo liaco kuenda ka ci ka kemba. Ndaño oco ci cilua, amamako oku ci lavoka! Momo oco ci ka tẽlisiwa muẽle. Ka ci ka cilua!” (Hav. 2:3) Anga hẽ Suku wa yonguile  okuti olondaka viaco vi kuatisa lika Havakuki? Ale olondaka viaco vi tu kuatisavo koloneke vilo? Yehova wa vetiya upostolo Paulu oku sonehela Akristão va kasi oku lavoka oluali luokaliye. (Tanga Va Heveru 10:36, 37.) Omo liaco, tu koleli okuti ndaño tu sima okuti ohuminyo ya Yehova yoku tu popela yi kasi oku cilua, “oco ci ka tẽlisiwa muẽle. Ka ci ka cilua!”

17. Ndamupi manji umue ukãi akapako elungulo Yehova a ecele ku Havakuki?

¹⁷ Afendeli valua va Yehova va siata oku kapako elungulo lia Yehova lioku “amamako oku lavoka” ndaño vokuenda kuanyamo alua. Ndeci, manji Louise wa fetika oku vumba Yehova kunyamo 1939. Eye hati: “Kotembo yaco nda simĩle okuti o Harmagedo yi keya osimbu handi sia malele osikola ya velapo. Pole, hacoko ca pita. Vokuenda kuayamo, nda kuatisiwa poku tanga ovolandu omanu va ‘lavokaile oku tẽlisiwa’ kuolohuminyo via Yehova ndeci: Noha, Avirahama, Yosefe kuenda vakuavo va talamelavo vokuenda kuotembo yalua osimbu ka va tambuile onima yohuminyo yavo ku Yehova. Oku amamako oku lavoka ca siata oku ndi kuatisa loku kuatisavo vakuetu oku kolela okuti, oluali luokaliye lu kasi ocipepi.” Valua va kasi oku fendela Yehova vokuenda kuanyamo alua, va tavavo kolondaka evi!

18. Eci tu tala ovina via lulikiwa ekolelo lietu kokuiya kuoluali luokaliye li pamisiwa ndati?

¹⁸ Ocili okuti oluali luokaliye handi ka lueyile. Sokolola kovina vimue ndeci, olombungululu, oviti, ovinyama kuenda etu tumanu. Kakuli atatahãi, ovina evi vi kasiko muẽle, ndaño kua kala otembo yimue okuti ka via kaileko. Ovio vi kasiko momo Yehova eye wa vi lulika. (Efet. 1:1, 26, 27) Suku yetu wa likuminyavo oku tumbulula oluali luokaliye. Eye o ka tẽlisa ohuminyo yaco. Voluali luokaliye omanu va ka sanjukila omuenyo ka u pui luhayele wa lipua. Tu koleli okuti oluali luokaliye lu keya votembo Suku a sokiya.—Isa. 65:17; Esit. 21:3, 4. 

19. O pamisa ndati ekolelo liove?

¹⁹ Olonjanja viosi sanda apuluvi oku pamisa ekolelo liove. Olonjanja viosi lekisavo olopandu kocisembi. Sokolola kunene wa Yehova. Linga ovina vi pamisa ukamba wove la Yehova. Poku ci linga, o ka kala pokati komanu vana okuti, “omo liekolelo kuenda epandi va piñala olohuminyo.”—Va Hev. 6:11, 12; Va Rom. 5:5.