Ame nda citiwa kunyamo wo 1983. Vanyamo atete omuenyo wange nda kuata uhayele uwa, pole eci nda tẽlisa ekũi lianyamo, nda fetika oku yeva evalo lialua vetimba. Noke lianyamo avali, eteke limue komẽle poku pasuka sia tẽlele vali oku lisenga. Nda likolisilako oku lisengasenga, pole, ovolu ange ka a kuatele ongusu. Tunde opo sia la tẽla vali oku enda. Uvei wange wa natekavo oku kula. Toke cilo ñasi ndomõla umue utito.

Noke liolosãi vimue loku vela, Olombangi vivali Via Yehova vieya konjo yange. Eci konjo kueyaya omanu nda enda oku solama, pole, keteke liaco nda ecelela okuti akãi olombangi va sapela lame. Ovo vangula eci catimẽla kocumbo Celau kuenda ca ndi ivaluisa eci nda yevele ale eci nda kuata anyamo atãlo. Kotembo yaco omisionaliu yimue o tukuiwa Jethro okuti wa kala ko Suriname, wa enda o kuiya vimbo lietu onjanja yimosi vosãi kuenda wa enda oku longisa Embimbiliya ku isiange. Jethro wa enda oku ndi tata locisola calua. Ndo solaile calua. Olosekulu viange via enda oku ngambata kolohongele vimue Violombangi Via Yehova via enda oku lingiwa vimbo lietu. Eci Florence umue pokati kakãi veyile konjo, a ndi pulisa nda njongola oku lilongisa vali ovina vikuavo, nda tambulula okuti oco.

Manji Florence wa tiuka lulume waye o tukuiwa Justus, kuenje va fetika oku ndi longisa Embimbiliya. Eci va limbuka okuti sia tẽlele oku tanga ovo va ndongisa oku tanga. Noke liotembo yimue, nda fetika oku tanga. Eteke limue ohueli ya ndi sapuila okuti va tambula ocikele coku ka kundila ko Suriname. Ci sumuisa ceci okuti ko Orealla ka kua kaile laumue wa ponduile oku amamako oku ndongisa Embimbiliya. Pole, ci sanjuisa ceci okuti Yehova lalimue eteke a njivala.

Ukundi umue wotembo yosi o tukuiwa hati, Floyd weya ko Orealla, wa ndi sanga eci a kala oku kundila vimbo limbo. Eci a ndi sapuila catiamẽla koku lilongisa Embimbiliya nda yolako. Yu wa pula hati momo lie o yolela? Ndo sapuila okuti nda lilongisa ale ombrochura Suku Oyongola Nye Kokuetu? kuenda nda fetikile ale oku lilongisa elivulu Ukũlĩhĩso u Tuala Komuenyo ko Pui. * Ndo lomboluila esunga lieci nda liwekelapo. La manji Floyd nda malusula elivulu Ukũlĩhĩso, pole noke eye wa tambulavo ocikele coku ka  kundila kocitumãlo ci kuavo. Nda liwekapo vali oku lilongisa Embimbiliya.

Pole, kunyamo wo 2004 Granville la Joshua akundi vavali valikasi va tumiwa ko Orealla. Ovo va kundila vimbo limbo kuenje va ndi sanga. Eci va mulisa nda ndi yongola oku lilongisa, nda yolako. Nda vapinga oco tu fetike oku lilongisa elivulu Ukũlĩhĩso. Nda yonguile oku mola nda ovo va ndongisa ovina vimuamue alongisi vange va ndongisile. Granville wa ndi sapuila okuti olohongele via siata oku lingiwila vimbo. Sia la tunda konjo vokuenda kuakũi kanyamo, nda yonguile oku enda kohongele. Kuenje Granville wa njelula loku ñapa komangu yalola kuenda wa ndi sinda toke Konjango Yusoma.

Vokuenda kuotembo Granville wa mbetiya oco ndi li sonehise Kosikola Yupange Wakristão. Eye hati: “Ove ku pondola oku enda pole o tẽla oku vangula. Eteke limue o ka linga ohundo. Ci kolela.” Olondaka viaye via ndi pamisa.

Nda fetika oku endaenda kupange woku kunda la Granville. Pole, atapalo alua ovimbo ka a kaile ciwa kuenje ca enda oku kokela ovitangi kuvana va endela komangu yalola. Yu nda pinga ku Granville oku ngambata lokangulu. Lia kala esokiyo liwa. Kosãi ya Kupupu 2005 nda papatisiwa. Noke vamanji va ndi pindisa oku tata alivulu o vekongelo kuenda oku talavaya locileñi Vonjango Yusoma.

Pole, kunyamo 2007 Isiange wa fa vocilunga cimue cowato. Ca sumuisa calua epata lietu. Granville wa enda oku likutilila letu kuenda oku tanga ovinimbu vimue Viembimbiliya vi lembeleka. Noke lianyamo avali, tua pita vali locilunga cikuavo, Granville wa favo locilunga cowato.

Ekongelo nda kala litito ka mua kaile vali akulu vekongelo mua siale lika oñuatisi yimosi yekongelo. Nda sumuile calua omo violofa via Granville momo wa kala ekamba liwa kokuange. Eye wa ñuatisa calua oku pamisa ukamba wange la Yehova kuenda kovina vikuavo nda sukilile. Noke violofa viaye kohongele ya kuamamako, nda kuata ocikele coku tanga ovinimbu Viutala Wondavululi Welilongiso. Nda tanga ovinimbu vivali viatete, pole noke nda fetika oku lila. Ca sukila oku tunda kembumbua.

Nda fetika oku liyeva ciwa eci manji umue wa tunda kekongelo likuavo eya oku tu kuatisa ko Orealla. Kuendavo ofiliale ya tuma Kojo ukundi olikasi. Noke ina yange kuenda vamanjange va fetika oku lilongisa Embimbiliya kuenje va papatisiwa. Kosãi Yelombo yunyamo 2015, nda nõliwa ndoñuatisi yekongelo. Vokuenda kuotembo, nda linga ohundo yange yatete. Keteke liaco nda sokolola loku memena kuenda oku lolula asuelela esanju kueci Granville a ndi sapuilile kanyamo apita: “Eteke limue o ka linga ohundo. Ci kolela.”

Kovipama vio JW Broadcasting^® nda lilongisa eci catiamẽla kolombangi vikuavo via Yehova va kasi lovitangi vimuamue ndevi viange. Ndaño lovitangi viaco, va tẽla ku linga ovina vialua kuenda va sanjuka. Lamevo mondola oku linga ovina viaco. Onjongole yange yoku eca ongusu ñuete ku Yehova ya ndi vetiya oku kala ukundi wotembo yosi. Kosãi Yenyenye Linene 2019 nda tambula esapulo liesanju! Kosãi yaco nda nõliwa ndukulu wekongelo vekongelo lietu likuete 40 kakundi.

Ndi pandula calua vamanji va ndongisa Embimbiliya kuenda va ñuatisa oku ngambayata kupange woku kunda. Ca velapo mandula Yehova okuti lalimue eteke a njivala.