VAMANJI valua okuti va endele kolofeka vikuavo locimãho coku kuata olombongo vialua, cilo va tiuka kolofeka viavo. Omo lioku vetiyiwa locisola va kuetele Yehova kuenda omanu, va ilukila kovitumalo vina kuli esukila lialua liakundi. (Mat. 22:37-39) Alikolisilo api ovo va linga kuenda asumũlũho api vakuete? Oco tu ci limbuke, tu tiamisila utima kofeka yo Kamarões, kutakelo wo Afrika.

Kunyamo 1998, manji umue o tukuiwa okuti Onésime wa ilukila kofeka yaye ko Kamarões. Eye wa kala kosamua ci soka 14 kanyamo. Eteke limue kohongele yimue eye wa yeva ocindekaise cimue catiamẽla kupange woku kunda. Hundi wa popia hati: “Nda akamba vavali va kasi oku pipa kovitumalo via litepa kuenda umue o kasi oku pipa olõsi vialua, ekamba lina li kasi oku pipa citito nda ka ilukilile hẽ kocitumãlo kuna okuti ku kuatiwa olõsi vialua?”

Ocindekaise eci ca vetiya Onésime oku sokolola oku tiukila ko Kamarões kuna kuli omanu valua va yongola oku lilongisa Embimbiliya kuenda oku kuatisa akundi vo pocitumãlo. Pole wa kuata esakalalo. Eye wa ponduile hẽ oku likisa vali vofeka yaye noke lioku kala anyamo alua kofeka yikuavo? Oco a ci kũlĩhe Onésime wa nyula o Kamarões vokuenda kuolosãi epandu. Noke kunyamo wo 2012, wa ilukila ko Kamarões.

Onésime wa lombolola hati: “Nda sukilile oku likisa ekalo liowuya kuenda ekalo liomuenyo.” Vonjango Yusoma nda sukilile oku tumala kolomangu viavaya. Eye wa popia loku memenako hati, “osimbu ndi tiamisila utima kolohongele ndi ivalako oku sokolola kolomangu viwa nda enda oku tumala.”

Kunyamo 2013, Onésime wa kuela la Géraldine, una wa tiuka ko Kamarões noke lioku kala anyamo ecea ko Fransa. Asumũlũho api ohueli eyi ya kuata omo lioku pitisa kovaso upange wusoma? Onésime hati: “Kavali ketu tua pindisiwa Kosikola Yakundi Vusoma kuenda tua talavaya ko Betele. Kunyamo wa pita, ci soka 20 kolondonge Viembimbiliya vekongelo lietu va papatisiwa. Cilo, ndi liyevite okuti ñasi “pocitumalo ca sunguluka coku ‘pipa.’” (Mar. 1:17, 18) Géraldine hati: “Nda tambula asumũlũho alua sia lavokaile.”

Judith wa ilukila ko Estados Unidos, pole, wa yonguile oku vokiya upange waye woku kunda. Eye wa lombolola hati, otembo yosi nda enda oku ka nyula epata ko Kamarões, kesulilo liepasu nda enda oku lila momo nda sukilile oku siapo omanu nda fetikile oku longisa Embimbiliya. Handi vali, Judith ka yonguile oku tiukila ko  Kamarões. Eye wa kuatele upange umue va feta ciwa okuti ca enda oku u ecelela oku landa ovihemba isiaye a sukilile ko Kamarões. Pole, Judith wa kolela Yehova kuenje wa tiukila ko Kamarões. Eye wa lombolola hati, wa pumba ovina vimue viwa eci a kala ko Estados Unidos. Wa likutilila ku Yehova oco o kuatise oku likisa ekalo liaco kuenda wa kuatisiwa levetiyo a tambula kumanji onyula akongelo kumue lukãi waye.

Eci Judith a ivaluka ovina ndomo via kala eci a tiukila ko Kamarões wa popia hati: “Eci ndi sokolola kanyamo atatu apita, ndi yeva esanju omo lioku kuatisa omanu vakuãla oku enda kepapatiso.” Judith wa fetika oku talavaya ndukundi olikasi. Cilo, va kasi kupange woku nyula akongelo lulume waye Sam-Castel. Pole, nye ca pita la isia ya Judith? Eye kumue lepata liaye va sandiliya osipitali kofeka yikuavo yina nda ya feta olombongo vioku pelala isiaye. Kuenje upange waco woku pelala wa enda ciwa.

Manji umue o tukuiwa Victor wa ilukila ko Kanada. Noke lioku tanga ocipama cimue Vutala Wondavululi catiamẽla kelilongiso lia velapo, eye wa sokolola eci catiamẽla kekalo liaye. Eye wa siapo elilongiso lia velapo kuenje wa fetika oku lilongisa ovoloño akuavo. Eye wa popia hati, “eci ca ngecelela oku kuata lonjanga upange kuenda ca nyĩha epuluvi lioku kala ukundi wotembo yosi.” Noke manji Victor wa kuela la Caroline kuenda va nyula o Kamarões. Eci va kala oku nyula ofiliale vamanji va va vetiya oku sokolola kueci catiamẽla koku talavaya ko Kamarões. Victor wa popia hati: “Ka tua kuatele esunga lioku likala epuluvi liaco, kuenje tuamamako oku ambata omuenyo wa leluka, loku tava kelaleko liaco.” Ndaño okuti Caroline wa kala locitangi cuhayele, wa tava oku iluka.

Manji Victor la Caroline, va fetika oku talavaya ndukundi wotembo yosi oco va kuatise omanu va lekisa onjongole Kesapulo Liembimbiliya. Ovo va solekele olombongo oco vi va kuatise kefetikilo liupange wavo. Noke lioku talavaya olosãi vimue ko Kanada, ca ecelela okuti va tiukila ko Kamarões loku amamako ndakundi votembo yosi. Asumũlũho api ovo va kuata? Ovo va pindisiwa Kosikola Yakundi Vusoma, va kala kupange wakundi va likasi kuenda cilo va kasi kupange woku tunga. Manji Victor wa popia hati, “Oku siapo ekalo liwa ca tu ecelela oku limbuka ekuatiso lia Yehova.”

Kunyamo 2002, Alain wa kala kosikola ya velapo ko Alemanya, wa tanga okokanda losapi hati, Jovens — Como Usarão Sua Vida? Ulandu waco, wo vetiya oku litumbikila ovimãho vikuavo. Kunyamo 2006, eye wa pindisiwa Kosikola Yoku Pindisa Vamanji Alume ka va Kuelele kuenda wa tumiwa ko Kamarões, kofeka a citiwila.

Ko Kamarões Alain wa sangako upange wolowola vimue veteke. Noke wa sanga upange umue uwa, pole nda ka wo wecelelele oku talavaya calua kupange woku kunda. Kuenje eci a lalekiwa kupange wakundi va likasi, eye wa tava lonjanga. Cime caye cupange wo likuminya oku vokiya ofeto yaye, pole Alain wa likala kuenje wa linga ukundi o likasi. Noke, Alain wa kuela la Stéphanie, una wa kala anyamo alua ko Fransa. Ovitangi vipi Stéphanie a kuata noke lioku ilukila ko Kamarões?

Stéphanie hati: “Ndeya oku kuata ovitangi vialua viuhayele, onjuaya, pole nda sanga ovihemba viaco noke nda kaya.” Ovo va sumũlũisiwa omo liepandi liavo. Alain wa lombolola hati: “ Eci tua  kundilile vimbo limue litukuiwa Katé, tua sanga omanu valua va yonguile oku lilongisa Embimbiliya. Noke, tua tẽla oku endisa alilongiso aco pocakati cotelefone. Vavali pokati kolondonge viaco va papatisiwa kuenje kua sokiyiwa ocimunga cimue ca kundi.” Stéphanie wamisako ndoco: “Tua kuata esanju lioku kuatisa omanu oku tumbika omuenyo wavo ku Yehova. Oku talavaya kocitumãlo caco tua kuata ovolandu alua a sanjuisa.” Cilo Alain la Stéphanie va kasi kupange woku nyula akongelo.

Gisèle wa papatisiwa eci a kala oku tangela kosikola yoku lilongisa uloño woku tata olombeyi ko Italia. Eye wa komoha poku mola ohueli yimue yakundi votembo yosi yina ya kala oku u longisa Embimbiliya okuti va leluisa omuenyo kuenje co vetiya oku vokiya upange waye woku kunda. Noke Gisèle, wa litumbika kupange wakundi votembo yosi eci a malusula osikola.

Gisèle wa yonguile oku tiukila ko Kamarões locimaho coku vokiya upange waye ku Yehova, pole wa kuata ohele. Eye hati, “Ca sukilile oku sia o Italia, akamba kuenda epata lia kalako.” Kuenje kosãi ya Kupemba yunyamo 2016, Gisèle wa ilukila ko Kamarões.

Noke liotembo yimue eye wa kuela la Léonce kuenje ofiliale yo ko Kamarões ya va tuma oku ilukila ko Ayo kuna kua kala esukila lialua liakundi Vusoma.

Omuenyo wa kala ndati ko Ayo? Gisèle o lombolola hati: “kocitumãlo caco tua enda oku pita olosemana okuti ka tu kuata olusu kuenda ka tua ponduile oku yukisa olotelefone vietu. Olonjanja vialua ovio ka via talavayele. Nda lilongisa oku teleka kolõwi kuenda tua endaenda lokangulu luteke locimihilo oku ka tapa ovava eci ka kua kaile owi walua.” Nye ca kuatisa Gisèle lulume waye oku pandikisa? Gisèle wa papia hati: “Espiritu lia Yehova lia tu kuatisa oku pandikisa kuenda ame lulume wange tua li kuatisavo pokati. Handi vali, epata lakamba va tu pamisa kuenda olonjanja vimue va tu kuatisavo lolombongo.”

Ange hẽ Gisèle wa sanjukila oku tiukila kofeka yaye? “Oco!” Eye hati, “Nda sanjuka.” “Kefetikilo ka ca lelukile kuenda ndaenda oku sumua calua, pole, tua yula ocitangi caco, ame lulume wange tua liyeva okuti tua tẽlisa ovina tua yonguile. Tua kolela Yehova kuenda tua liyeva okuti tua kala ocipepi laye.” Léonce la Gisèle va pindisiwa Kosikola Yakundi Vusoma kuenje cilo va kasi oku talavaya ndakundi va likasi otembo yimue.

Ndeci vakuakupipa okuti va lekisa utõi oco va kuate olõsi vialua valivala alitepa, vana va tiukila kolofeka viavo va likolisilako oku kuatisa vana va lekisa onjongole kesapulo Liusoma. Ocili okuti, Yehova ka ivalako akundi vana va likolisilako oku lekisa ocisola konduko yaye. (Neh. 5:19; Va Hev. 6:10) Nda ove o kasi kofeka yikuavo kuenje vofeka wa citiwila muli esukila liakundi, anga hẽ o pondola oku tiukila? Nda wa ci linga, Yehova o ka ku sumũlũisa calua.—Olosap. 10:22.