OCIPAMA CELILONGISO 46
OCISUNGO 49 Oku Sanjuisa Utima wa Yehova
Ove hẽ o Kasi Oku Likolisilako Oco o Kale Oñuatisi Yekongelo?
“Esanju li tunda koku eca olio lia velapo, li tunda koku tambula li sule.”—OVIL. 20:35.
OCIMÃHO CELILONGISO
Oku vetiya vamanji alume va papatisiwa, oco va likolisileko oku kala oloñuatisi viekongelo.
1. Upostolo Paulu wa tendele ndati oloñuatisi viekongelo?
OLOÑUATISI viekongelo, vi kuete esilivilo lialua koku kuatisa akongelo. Upostolo Paulu wa kapeleko calua alume vaco vakuekolelo. Uvangi waco, tu u limbukila kueci eye a sonehela Akristão vo ko Filipoi okuti, wa lamisapo oloñuatisi viekongelo kumue lakulu vekongelo.—Va Fil. 1:1.
2. Manji umue o tukuiwa Luis o liyevite ndati omo lioku kala oñuatisi yekongelo?
2 Vamanji valua alume va kuavitunga via litepa, va kuete esanju lialua omo lioku talavaya ndoloñuatisi viekongelo. Ndeci, manji Devan wa kuata 18 kanyamo eci a nõliwa oku kala oñuatisi yekongelo. Pole, manji umue o tukuiwa Luis wa nõliwa eci a kuata ci pitahãla 50 kanyamo. Eye wa popia hati: “Kokuange esumũlũho linene oku talavaya ndoñuatisi yekongelo, ca piãla enene eci ndi sokolola ocisola calua vamanji va siata oku lekisa kokuange!” Kuenje oloñuatisi vialua viekongelo va kuetevo ovisimĩlo viaco.
3. Nye tu konomuisa vocipama cilo?
3 Nda okuti ove wumanji umue wa papatisiwa, pole, handi kuñuatisiko yekongelo, o pondola hẽ oku litumbikila ocimãho caco? Nye ci ku vetiya oku ci linga? Handi vali, nye Embimbiliya li popia okuti oco ove o sukila oku linga oco o kale oñuatisi yekongelo? Vocipama cilo, tu konomuisa atambululo apulilo aco. Pole, tete tu konomuisa upange oñuatisi yimue yekongelo yi pondola oku linga.
NYE OLOÑUATISI VIEKONGELO VIA SIATA OKU LINGA?
4. Ovopange api vamanji oloñuatisi viekongelo va siata oku linga? (Talavo ociluvialuvia.)
4 Oloñuatisi vimue viekongelo vi linga upange woku sokiya ovikanjo kuenda oku ongotiya alivulu tua siata oku talavaya lao kupange woku kunda. Vakuavo va kuatisa koku yelisa kuenda koku semulula Onjango Yusoma. Ovo va pondolavo oku nõliwa kupange wonjiliki kuenda woku talavaya lovikete vieca ocileñi, loku lekisa ovideo vokuenda kuolohongele. Ocili okuti ovopange aco osi a kuete esilivilo lialua. Pole, ca velapo vali ceci okuti, vamanji vaco va velisapo ocisola va kuetele Yehova loku ambata omuenyo u likuata lolonumbi Viembimbiliya. Handi vali, ovo va sole calua vamanji vekongelo. (Mat. 22:37-39) Nye vamanji alume va papatisiwa va sukila oku linga oco va kale oloñuatisi viekongelo?
Oloñuatisi viekongelo vi setukula Yesu, poku lieca olumue poku kuatisa vakuavo (Tala ocinimbu 4)
5. Oco manji umue ulume a nõliwe oku kala oñuatisi yekongelo, nye a sukila oku linga?
5 Embimbiliya li lombolola ananga a sukiliwa, oco manji umue ulume a nõliwe oku kala oñuatisi yekongelo. (1 Tim. 3:8-10, 12, 13) Momo lie ku lilongisila ananga aco, loku likolisilako oku akapako? Nda wa ci linga, ci ka ku kuatisa oku tẽlisa ocimãho caco. Pole, catete o sukila oku sokolola lutate esunga lieci o yonguila oku kala oñuatisi yekongelo.
MOMO LIE O YONGUILA OKU KALA OÑUATISI YEKONGELO?
6. Nye ci sukila oku ku vetiya oku kuatisa vakuene? (Mateo 20:28; talavo ociluvialuvia.)
6 Yesu Kristu eye ongangu yetu ya velapo. Ovina viosi eye a enda oku linga, wa vetiyiwa locisola a kuetele Isiaye kuenda omanu. Ocisola ca vetiya Yesu oku likolisilako oku kuatisa vakuavo kuenda oku linga ovopange ana a tendiwa okuti a sule. (Tanga Mateo 20:28; Yoa. 13:5, 14, 15) Nda okuti cosi o linga o ci linga locisola, Yehova o ka ku sumũlũisa loku ku kuatisa oku tẽlisa ocimãho coku kala oñuatisi yekongelo.—1 Va Kor. 16:14; 1 Pet. 5:5.
Yesu poku sukula olomãhi viovapostolo, wa va longisa kovilinga okuti, va sukila oku kala ambombe kuenda oku kuatisa vakuavo okuti ka va sandi oluhimo luavo muẽle (Tala ocinimbu 6)
7. Momo lie manji umue a sukilila oku yuvula oku kala ukuepela?
7 Voluali, omanu valua va siata oku komõha calua vana va sanda ekemãlo. Pole, afendeli va Yehova hacoko va tuwa. Manji una o vetiyiwa locisola poku kuatisa vakuavo ndeci Yesu a linga, ka sandi unene, ekemãlo kuenda ka yongola oku lilekisa okuti wa velapo vakuavo. Nda manji umue o sole ekemãlo kuenje o nõliwa oku kala oñuatisi yekongelo, citava okuti o ka likala oku linga ovopange amue a sulemo ana a sukiliwa koku tata olomeme via Yehova. Pamue eye o sima okuti ka pondola oku linga ovopange aco, omo okuti wa velapo vakuavo. (Yoa. 10:12) Yehova lalimue eteke a ka sumũlũisa omanu vana va linga ovina omo liepela, ale va yongola oku li kemãlisa.—1 Va Kor. 10:24, 33; 13:4, 5.
8. Elungulo lipi Yesu a eca kovapostolo vaye?
8 Vepuluvi limue akamba vamue va Yesu, va seteka oku kuata ovikele locimãho ka ca sungulukile. Kũlĩhĩsa ulandu wovapostolo vavali va Yesu okuti, Tiago la Yoano. Ovo va pinga ku Yesu oco va kuate ocikele ca velapo Vusoma waye. Pole, Yesu ka va pandiyile omo lionjongole yavo ka ya sungulukile yoku velapo vakuavo. Kuenje eye wa lungula 12 kovapostolo hati: “Wosi o yongola oku kala unene pokati kene, a linge ukuenje wene, kuenda wosi o yongola oku linga omunu watete pokati kene, a linge upika wa vosi.” (Mar. 10:35-37, 43, 44) Omo liaco, nda manji umue ulume o likolisilako oku kala oñuatisi yekongelo locimãho ca sunguluka okuti coku kuatisa vakuavo, eye o kala esumũlũho linene vekongelo.—1 Va Tes. 2:8.
O VOKIYA NDATI ONJONGOLE YOVE YOKU KALA OÑUATISI YEKONGELO?
9. O vokiya ndati onjongole yove yoku kuatisa vakuene?
9 Ocili okuti ove o sole Yehova kuenda o yongola oku kuatisa vakuene. Pole, pamue ku kuete onjongole yoku kala oñuatisi yekongelo, momo wa kũlĩha okuti voku kala oñuatisi yekongelo mua kongela upange walua. Oco hẽ o vokiya ndati onjongole yove yoku kuatisa vakuene? Onjila yimue yoku ci linga, oku sokolola kesanju tu pondola oku kuata eci tu kuatisa vamanjetu. Yesu wa popia hati: “Esanju li tunda koku eca olio lia velapo, li tunda koku tambula li sule.” (Ovil. 20:35) Yesu wa tẽlisa ciwa olondaka a popia. Eye wa kuatele esanju lialua omo lioku kuatisa vakuavo kuenje ove o pondolavo oku kuata esanju limuamue.
10. Nye ca lekisa okuti Yesu wa kuatele esanju lialua omo lioku kuatisa vakuavo? (Marko 6:31-34)
10 Kũlĩhĩsa ulandu umue u lekisa ndomo Yesu a kuatele esanju omo lioku kuatisa vakuavo. (Tanga Marko 6:31-34.) Vepuluvi limue Yesu kumue lovapostolo vaye, va kavele calua. Ovo va kala oku enda kocitumãlo cimue cõha locimãho coku puyukapo. Pole, owiñi umue womanu wa pitĩla tete, kuenda va kala oku talamela Yesu. Ovo va yonguile oku yevelela alongiso aye. Yesu wa ponduile oku likala oku ci linga. Momo eye kumue lovapostolo “ka va kuatele otembo yoku lia.” Ale Yesu nda wa va longisa lika vokatembo katito kuenda oku va tiukilisa. Pole, Yesu wa solele omanu. Kuenje eye “wa fetika oku va longisa ovina vialua.” Eye wamamako oku ci linga toke eci “ekumbi lia enda.” (Mar. 6:35) Yesu ka ci lingile omo liekisika pole, wa ci lingila omo ‘liohenda a kuatela’ omanu. Eye wa yonguile oku va longisa momo wa va solele calua. Omo liaco, oku ci linga ca enda oku kokela esanju lialua ku Yesu.
11. Nye vali Yesu a linga oco a kuatise omanu? (Talavo ociluvialuvia.)
11 Yesu ka longisile lika ovina vilua kowiñi waco, pole, wa va kuatisavo lonjila yikuavo. Eye wa va ĩhavo ovina ovo va sukilile konepa yetimba. Vepuluvi liaco eye wa linga ocikomo cokuti, olombolo vitãlo kuenda olõsi vivali vi kala vialua kuenda wa vieca kolondonge oco va viavele komanu. (Mar. 6:41) Lonjila eyi Yesu wa longisa olondonge viaye oku kuatisa vakuavo. Eye wa va lekisavo esilivilo lioku kuatisa vakuavo kuenje eci oco oloñuatisi viekongelo vi sukila oku linga. Sokolola esanju ovapostolo vakuata omo lioku kuatisa Yesu oku ava okulia kuaco toke eci “vosi va lia kuenda vekuta!” (Mar. 6:42) Eyi ka ya kaile onjanja yatete Yesu a pitisa kovaso olonjongole via vakuavo. Eye wa ci linga vokuenda kuomuenyo waye wosi a kala palo posi. (Mat. 4:23; 8:16) Yesu poku longisa kuenda oku lingila vakuavo ovopange a sulemo oco a va kuatise, ca enda oku u nenela esanju lialua. Ocili okuti, ci ka ku nenelavo esanju lialua nda wa pitisa kovaso olonjongole via vakuene kuenda oku likolisilako oku kala oñuatisi yekongelo.
Ocisola o kuetele Yehova kuenda onjongole yoku kuatisa vakuene vi ka ku vetiya oku likolisilako oco o kuatise vakuene vekongelo (Tala ocinimbu 11) a
12. Momo lie lomue o kuete esunga lioku popia okuti ka kuete esilivilo vekongelo?
12 Omanu vamue va sima okuti ka va kuete uloño laumue ulikasi oco va kuatise ekongelo. Nda wa siata oku liyeva ndoco, ku ka sumue. Momo ove o pondola oku kuata ovituwa vi kuate esilivilo lialua oco o kuatise vamanji. Momo lie ku tangela olondaka via Paulu vi sangiwa kukanda 1 Va Korindo 12:12-30 kuenda oku likutilila catiamẽla kondaka yaco? Vocisonehua eci, Paulu wa lombolola ciwa okuti ufendeli lufendeli wa Yehova oku kongelamo ove, o kuete esilivilo lialua kuenda o sukiliwa calua vekongelo. Kuenje, nda cilo handi ku pondola oku kala oñuatisi yimue yekongelo, ku ka tokoke. Pole, linga eci ci kasi vepondolo liove oco o vumbe Yehova kuenda oku kuatisa vamanji. Kolela okuti akulu vekongelo va ka ku sokolola oku ku nõlela ovopange o tẽla oku linga.—Va Rom. 12:4-8.
13. Ocina cipi ciwa catiamẽla kovituwa vi kisikiwa ku vana va yongola oku kala oñuatisi yekongelo?
13 Kũlĩhĩsa vali esunga likuavo lioku likolisilako oco o kale oñuatisi yekongelo. Ovituwa viosi o sukila oku kuata oco o kale oñuatisi yekongelo, havio Ukristão wosi a sukila oku kuata. Ndeci, Ukristão wosi o sukila oku pamisa ukamba waye la Yehova, oku sanjukila oku kuatisa vakuavo kuenda oku eca ongangu yiwa kovituwa viaye. Kuenje citava okuti, ove o kuete ale ovituwa viosi vi sukiliwa oco o kale oñuatisi yekongelo. Oco hẽ ovituwa vipi vi kisikiwa muẽle, oco manji umue a nõliwe ndoñuatisi yekongelo?
CECI O SUKILA OKU LINGA OCO O KALE NDOÑUATISI YEKONGELO
14. Nye ci lomboloka oku kala ‘omunu wa sumbiwa?’ (1 Timoteo 3:8-10, 12)
14 Tu konomuisi ovituwa vimue Embimbiliya li kisika kukanda 1 Timoteo 3:8-10, 12. (Tanga.) Oloñuatisi viekongelo vi sukila oku kala “omanu va sumbiwa.” Olondaka evi vi pondolavo oku lomboloka okuti va “sesamela oku sumbiwa la vakuavo,” oku kala “vakuotate,” ale “oku lekisa ovituwa vi vetiya vakuavo oku u sumbila.” Pole, eci ka ci lomboloka okuti ku sukila oku lianja, ale oku linga ovinjembe. (Uku. 3:1, 4) Ocisimĩlo colondaka evi ceci okuti, o sukila oku likolisilako oku tẽlisa ciwa ovikele viove. Nda wa kũlĩhĩwa okuti wa siata oku likolisilako kuenda wa koleliwa, ci ka koka okuti vosi vekongelo va ku sumbila.
15. Olondaka viokuti “ka vi ka kale lalimi avali,” kuenda “ka vi ka livele onganyu yevĩho” vi lomboloka nye?
15 Olondaka viokuti “ka vi ka kale lalimi avali,” vi lomboloka okuti ove sukila oku kala ukuacili, oku koleliwa kuenda olonjanja viosi o popia ocili. Yi lombolokavo oku tẽlisa ondaka yove kuenda oku yuvula oku limbika vakuene. (Olosap. 3:32) Olondaka viokuti,“ka vi ka livele onganyu yevĩho,” ci lomboloka okuti ove o sukila oku kala ukuacili kovopange ove osi kuenda konjila ndomo o talavaya lolombongo. Ka citava okuti o kemba vamanji locimãho coku nganyala olombongo.
16. (a) Olondaka viokuti “ka vi ka nyue ovinyu yalua” vi lomboloka nye? (b) Nye ci lomboloka oku kala “lowanji wutima wa yela?”
16 Olondaka viokuti “ka vi ka nyue ovinyu yalua,” vi lomboloka okuti ku pitahãla vonjongo poku nyua ovinyua vi koluisa kuenda ku kũlĩhĩwa okuti ove u holua. Oku kala “lowanji wutima wa yela,” ci lomboloka okuti ekalo liomuenyo wove u sukila oku likuata lolonumbi via Yehova. Ocili okuti ove kua lipuile, pole, o kuete ombembua yi tunda koku kuata ukamba uwa la Yehova.
17. Nye ci lomboloka olondaka viokuti “va setekiwe tete nda va tẽla oku tẽlisa ocikele caco?” (1 Timoteo 3:10; talavo ociluvialuvia.)
17 Olondaka viokuti “va setekiwe tete nda va tẽla oku tẽlisa ocikele caco,” vi lomboloka okuti, akulu vekongelo va mola ale okuti ove wa siata oku tata ciwa ovikele viove kuenda va pondola oku ku kolela. Omo liaco, nda akulu vekongelo va ku pinga oco o tẽlise ocikele cimue kuama lutate olonumbi viavo kuenda olonumbi vi eciwa locisoko cetu. Likolisilako oku kuata elomboloko liovina viosi via kongela kocikele cove kuenda otembo ya ku ilikiwila oku ci tẽlisa. Nda okuti ove o tẽlisa ciwa ovikele o tambula, vosi vekongelo va ka limbuka okuti wa liongotiya kuenda wa kula konepa yespiritu. Ene akulu vekongelo, amamiko oku pindisa vamanji alume va papatisiwa. (Tanga 1 Timoteo 3:10.) Anga hẽ vekongelo liove mu sangiwa amalẽhe va papatisiwa vakuanyamo 13 kuenda 14 ale vana ka va tẽlisile handi anyamo aco? Ovo va siata hẽ oku linga elilongiso liopokolika kuenda oku pongiya ciwa olohongele? Va siata hẽ oku eca atambululo kolohongele loku panga onepa kupange woku kunda? Nda etambululo kapulilo ava oco, eci kokuavo ovikele vi likuata lanyamo avo. Lonjila eyi amalẽhe vaco va ka ‘setekiwa tete nda va tẽla oku tẽlisa ocikele caco.’ Kuenje eci ovo va ka kuata oku pisa 17 ale 18 kanyamo, citava okuti va nõliwa oco va kale oloñuatisi viekongelo.
Akulu vekongelo va pondola oku eca ovikele ku vamanji alume vapapatisiwa oco ‘va setekiwe tete nda va tẽla oku tẽlisa ovikele viaco’ (Tala ocinimbu 17)
18. Olondaka viokuti “ka va kuete eko” vi lomboloka nye?
18 Olondaka viokuti “ka va kuete eko” vi lomboloka okuti lomue o kuata esunga lioku ku lundila elinga limue lĩvi. Ocili okuti, pamue omanu va ka ku lingila alundi uhembi. Toke muẽle ca lipitavo la Yesu, kuenje wa sapuilavo kolondonge viaye okuti ca laikelevo oku lipita lavo. (Yoa. 15:20) Pole, nda ovilinga viove viwa ndeci Yesu a linga, ove o ka kuata oluhimo luwa vekongelo.—Mat. 11:19.
19. Nye ci lomboloka olondaka ‘ulume wukãi umosi?’
19 “Vi linge alume wukãi umosi.” Ove o sukila oku kuata ovisimĩlo vimuamue via Yehova via tiamẽla kolohuela viulume lukãi. (Mat. 19:3-9) Ukristão umue ka citava okuti o linga evĩho liukahonga. (Va Hev. 13:4) Handi vali, ove o sukilavo oku kala ukuacili kukãi wove kuenda oku yuvula oku lekisa ocisola coku kuela komunu una okuti hukãi woveko.—Yovi 31:1.
20. Ulume umue o ‘songuila ndati ciwa epata liaye?’
20 “Vi songuile ciwa omãla vavo kuenda epata liavo muẽle.” Nda okuti ove usongui umue wepata, o sukila oku tẽlisa ciwa ovikele viove. Olonjanja viosi linga efendelo liepata. Likolisilako oku kundila kumosi lukãi wove kuenda omãla vove. Kuatisa omãla vove oku kuata ukamba uwa la Yehova. (Va Efe. 6:4) Ulume una o tata ciwa epata liaye, o lekisa okuti o pondola oku songuila ciwa ekongelo.—Sokisa 1 Timoteo 3:5.
21. Nye o sukila ku linga nda handi kuñuatisiko yekongelo?
21 Nda okuti handi ku ñuatisiko yekongelo, tu ku vetiya oku lilongisa ocipama cilo lutate kuenda oku likutilila catiamẽla kondaka yaco. Lilongisavo olonumbi Viembimbiliya viatiamẽla koku kala oloñuatisi viekongelo kuenda likolisilako oku kuama olonumbi viaco. Sokololavo kocisola o kuetele Yehova kuenda vamanji vovekongelo liove. Eci ci ka vokiya onjongole yove yoku va kuatisa. (1 Pet. 4:8, 10) Kuenje eci o ka kala oñuatisi yekongelo, o kuata esanju lialua li tunda koku kuatisa vamanji vekongelo. Omo liaco, kolela okuti Yehova o ka sumũlũisa alikolisilo ove oku kala oñuatisi yekongelo!—Va Fil. 2:13.
OCISUNGO 17 “Nda Panga”
a ELOMBOLUILO LIOVILUVIALUVIA: Konele yepĩli, Yesu o kuatisa olondonge viaye lonjila yimue yi lekisa umbombe; kondio, oñuatisi yimue yekongelo yi kuatisa manji umue wa kuka.
