1-2. (a) Nye ci tu kuatisa oku pandikisa kovitangi vieteke leteke? Ci lombolola. (b) Nye tu konomuisa vocipama cilo?

“ECI ndi sokolola ovitangi nda liyaka lavio, ndi sima okuti kongusu yange muẽle, nda sia tẽlele oku pandikisa.” Anga hẽ ove wa popele ale olondaka ndevi? Valua pokati ketu va popele ale olondaka viaco. Citava okuti olondaka viaco, ove wa vi tukula eci wa sokolola ndomo wa tẽla oku pandikisa kocitangi cimue cinene coku vela, ale coku fisa umue o sole. Eci o sokolola kovitangi viaco, o limbuka okuti wa tẽla lika oku pandikisa, omo espiritu lia Yehova lia ku ĩha “unene wa piãla.”—2 Va Kor. 4:7-9.

² Etu tu sukilavo espiritu sandu oco li tu kuatise oku tamalãla loluali lulo lũvi. (1 Yoa. 5:19) Handi vali, tu sukila oku yaka ‘lolohoka violondele.’ (Va Efe. 6:12) Kaliye tu konomuisa olonjila vivali vi ka lekisa ndomo espiritu sandu li tu kuatisa. Tu konomuisavo ovina tu sukila oku linga oco tu kuatisiwe lespiritu sandu.

3. Volonjila vipi espiritu sandu li tu kuatisa eci tu liyaka lovitangi?

³ Espiritu lia Yehova li tu kuatisa poku tu ĩha unene ale ongusu yoku tẽlisa ovikele vietu, ndaño okuti tu liyaka lovitangi. Upostolo Paulu ndaño okuti wa liyaka lovitangi, wa limbuka okuti wamamako oku vumba Yehova, omo wa kolelele ‘kunene wa Kristu.’ (2 Va Kor. 12:9) Paulu kungende waye wavali wumisionaliu, wa talavaya calua kupange woku kunda kuenda wa sukililevo oku sanda eteku. Eye wa kala ko Korindo, konjo ya Akuila kuenda Prisila okuti va enda oku tunga olombalaka. Omo okuti Paulu wa tẽlelevo oku linga upange waco, wa enda  oku talavaya lavo oloneke vimue. (Ovil. 18:1-4) Espiritu sandu lia eca ku Paulu uloño woku linga upange woku sanda eteku kuenda unene woku tẽlisa ocikele caye coku kunda.

4. Ndomo ca tangiwa ku 2 Va Korindo 12:7b-9, ovitangi vipi Paulu a liyaka lavio?

⁴ Tanga 2 Va Korindo 12:7b-9. Kovinimbu evi nye Paulu a yonguile oku tukula poku popia hati, wa kuata “osongo ketimba”? Ocili okuti, nda osongo yimue ya ku iñila vetimba, o yeva evalo lialua. Lonjila eyi, Paulu wa kala oku popia okuti wa kala oku liyaka locitangi cimue cinene. Eye poku tukula ocitangi caco wa popia hati, “ungelo wa Satana” o kasi oku “mbeta mbeta” ale (“oku tipula,” etosi). Citava okuti Satana kuenda olondele havoko va koka ovitangi ku Paulu vi kasi ‘ndosongo’ vetimba liaye. Pole, citavavo okuti eci olondele via limbuka okuti Paulu wa kala ale ‘losongo’ yaco, via yonguile oku vokiya vali kohali yaye. Nye Paulu a linga?

5. Yehova wa tambulula ndati ohutililo ya Paulu?

⁵ Tete, Paulu wa yonguile okuti Yehova u upa “osongo” yaco. Eye wa popia hati: ‘Nda livondela ku Ñala [Yehova] olonjanja vitatu, oco osongo yaco yi nunde.’ Pole, ndaño Paulu wa likutilila, osongo yaco yamamako vetimba. Anga hẽ eci ca lekisa okuti Yehova ka tambuluile olohutililo via Paulu? Sio, hacoko. Yehova wa vi tambulula. Yehova kopileko ocitangi caye, pole, wa eca ongusu ku Paulu oco a pandikise. Yehova wa popia hati: “Unene wange u loñolohela poku pekengua.” (2 Va Kor. 12:8, 9) Kuenje lekuatiso lia Suku, Paulu wa tẽla oku amamako lesanju kuenda oku kuata ombembua yovutima!—Va Fil. 4:4-7.

6. (a) Yehova o tambulula ndati olohutililo vietu? (b) Ovisonehua via tukuiwa vocinimbu vi pondola oku ku kuatisa ndati oku kuata ongusu?

⁶ Ndeci ca linga Paulu, ove hẽ wa pingile ale ku Yehova oco opeko ovitangi viove? Citava okuti wa likutilila ale olonjanja vialua, pole, ovitangi viaco handi viamamako, ale oku livokiya kuenje o fetika oku sima okuti Yehova ka ku sanjukilile. Nda oco, sokolola kulandu wa Paulu. Ndeci Yehova a tambulula Paulu, Eye o pondolavo oku tambulula olohutililo viove! Citava okuti Yehova kopiko ovitangi viaco. Pole, pocakati cespiritu sandu, eye o tu ĩha ongusu tu sukila oco tu pandikise kovitangi. (Osa. 61:3, 4) Citava okuti ove o “tipuiwa,” pole, Yehova ka ku yanduluka.—2 Va Kor. 4:8, 9; Va Fil. 4:13.

7-8. (a) Lonjila yipi espiritu sandu li sokisiwa lofela? (b)  Petulu wa lombolola ndati onjila ndomo espiritu sandu li talavaya?

⁷ Konepa yipi yikuavo espiritu sandu li tu kuatisa? Ndeci ofela yi songuila onaviyu yimue oku pita pokati kehunguhungu, espiritu sandu li tu songuila oku pita pokati kehunguhungu liovitangi oku loña vocitumãlo ca koka voluali luokaliye lua likuminyiwa la Suku.

⁸ Omo okuti upostolo Petulu wa kala ukuakupipa, wa kũlĩhĩle ciwa catiamẽla kovela yonaviyu. Poku tukula onjila ndomo espiritu sandu li talavaya, eye wa ci sokisa lonaviyu yi songuiwa lofela. Eye wa soneha hati: “Ocitumasuku ka ceyile locipango comanu, puãi omanu va popia ondaka ya tunda ku Suku, ndomo va vetiyiwa lespiritu sandu.” Kelimi lio Helasi ondaka oku “vetiyiwa” yi lomboloka oku “songuiwa.”—2 Pet. 1:21.

9. Nye Petulu a yonguile oku popia eci a tukula ondaka oku “vetiyiwa”?

⁹ Nye Petulu a yonguile oku popia eci a tukula ondaka, “oku vetiyiwa”? Luka usonehi welivulu Liovilinga, wa tukula ondaka yimuamue kelimi lio Helasi poku tukula onaviyu ‘yenda lofela.’ (Ovil. 27:15) Ulume  umue ukuakukonomuisa Embimbiliya wa popia hati, eci Petulu a tukula okuti asonehi Vembimbiliya va “vetiyiwa,” eye wa tukula ondaka yoku sokisa lonaviyu yi songuiwa lofela. Kuenje, Petulu wa yonguile oku popia okuti, ndeci onaviyu yi songuiwa lofela toke kocitumãlo ya loña, asonehi Vembimbiliya kuenda ovaprofeto va songuiwa lespiritu sandu, oco va tẽlise ocikele cavo. Ukuakukonomuisa Embimbiliya wamisako hati: “Vupopi wocidekaise ci kasi ndu okuti, ovaprofeto va tulika olovela viavo.” Yehova wa linga onepa yaye. Eye wa eca ‘ofela,’ ale espiritu sandu. Asonehi Vembimbiliya va lingavo onepa yavo. Ovo va kuama olonumbi viespiritu sandu.

10-11. Ovina vipi vivali tu sukila oku linga oco tu limbuke okuti tu kasi oku songuiwa lespiritu sandu? Ci lombolola.

¹⁰ Ocili okuti koloneke vilo, Yehova ka tumi espiritu sandu liaye oco li vetiye omanu oku soneha Embimbiliya. Pole, Yehova lopo o kasi oku amamako oku linga onepa yaye, o kasi oku ci linga poku eca espiritu sandu liaye oco li songuile afendeli vaye. Tu limbuka ndati okuti tu kasi oku songuiwa lespiritu sandu lia Suku? Tu sukila oku likũlĩhĩsa etu muẽle nda tu kasi oku linga onepa yetu. Tu ci linga ndati?

¹¹ Sokolola kocindekaise eci. Ukuakuendisa onaviyu oco a kuatisiwe lofela, o sukila oku linga ovina vivali. Tete, o sukila oku suñamisa onaviyu oku kuendela ofela. Nda ukuakuendisa onaviyu wa kala ocipãla loku ku tundilila ofela, onaviyu ka yi pondola oku enda. Vali, eye o sukila oku votola kuenda oku nyanyumula ciwa ovela. Ndaño okuti ofela yi sika calua, onaviyu yenda lika nda eye wa suñamisa ciwa ovela oku ku tundilila ofela. Cimuamue haico okuti, tu amamako lika kupange wa Yehova nda tu kuete ekuatiso liespiritu sandu. Oco tu kuatisiwe lespiritu sandu, tu sukila oku linga ovina vivali. Tete, tu sukila oku kala apa espiritu sandu li kasi oku “songuila.” Oco ci tẽliwe, tu sukila oku pokola kovina espiritu  sandu lia Suku li tuma afendeli vaye oku linga. Vali, tu sukila oku “votola ciwa olovela vietu” poku eca ongusu yetu yosi koku linga ovopange Suku a tuma. (Osa. 119:32) Nda tua linga ovina evi, espiritu sandu li ka tu ĩha ongusu yoku pandikisa kovitangi loku amamako oku vumba Yehova lekolelo toke voluali luokaliye lua Suku.

12. Ovina vipi tu konomuisa cilo?

¹² Toke cilo, tua konomuisa ovina vivali vi lekisa ndomo espiritu sandu li tu kuatisa. Tete, espiritu sandu li tu ĩha unene kuenda li tu kuatisa oku amamako lekolelo osimbu tu liyaka lovitangi. Vali, espiritu sandu li tu songuila kuenda li tu kuatisa oku linga upange Yehova a tu yonguila, oco tu kuate omuenyo ko pui. Kaliye tu konomuisa ovina vikuãla tu sukila oku linga oco tu kuatisiwe lespiritu sandu.

13. Ndomo ca lomboluiwa kukanda 2 Timoteo 3:16, 17, Ovisonehua vi tu kuatisa ndati kuenda nye tu sukila oku linga?

¹³ Tete, kuata ocituwa coku lilongisa Ondaka ya Suku. (Tanga 2 Timoteo 3:16, 17.) Kelimi lio Helasi ondaka yokuti, “vi tunda ku Suku” ya pongoluiwa hati, “ya fuimilua.” Suku pocakati cespiritu liaye, wa fuimila ale wa kapa ovisimĩlo viaye vutima womanu va soneha Embimbiliya. Eci tu tanga Embimbiliya loku sokolola kovina tu tanga, ovisimĩlo via Suku vi iñila vutima wetu. Kuenje, ovisimĩlo viaco via Suku, vi tu vetiya oku ambata omuenyo wetu ndomo ci litava locipango caye. (Va Hev. 4:12) Pole, oco tu kuatisiwe lespiritu sandu, tu sukila oku kuata ocituwa coku lilongisa Embimbiliya oloneke viosi kuenda oku sokolola lutate kovina tua lilongisa. Kuenje, Ondaka ya Suku yi ka tu kuatisa kovina viosi tu popia, levi tu linga.

14. (a) Momo lie tu popela okuti espiritu sandu li sangiwa kolohongele? (b) Tu kuatisiwa ndati lespiritu sandu kolohongele?

¹⁴ Vali, fendela Suku kolohongele. (Osa. 22:22) Olohongele vietu epuluvi limue lioku fendela Suku. Momo kolohongele oko tu sanga espiritu lia Yehova. (Esit. 2:29) Momo lie tu ci popela? Momo eci tu kasi kolohongele la vamanjetu, tu likutilila loku pinga espiritu sandu, tu imba ovisungo Viusoma via kunamẽla Vondaka ya Suku kuenda oku yevelela olonumbi via kunamẽla Vembimbiliya vi lomboluiwa la vamanji va nõliwa lespiritu sandu. Handi vali, espiritu sandu li kuatisavo vamanji akãi oku pongiya kuenda oku linga olonepa viavo. Oco tu kuatisiwe ciwa lespiritu sandu, tu sukila oku pongiya olonepa viosi violohongele, oco tu ece atambululo etu. Nda tua ci linga, tu ka kuatisiwa lespiritu sandu, ndeci onaviyu yi kuatisiwa eci yi votola ovela yalio.

15. Espritu sandu li tu kuatisa ndati kupange woku kunda?

¹⁵ Tatu, panga onepa kupange woku kunda. Eci tu talavaya Lembimbiliya kupange woku kunda kuenda koku longisa, tu ecelela okuti espiritu sandu li tu kuatisa kupange waco. (Va Rom. 15:18, 19) Oco ove o kuatisiwe ciwa lespiritu sandu, o sukila oku endaenda kupange woku kunda olonjanja viosi kuenda oku talavaya Lembimbiliya nda cecelela. Onjila yimue yoku litunda ciwa kupange woku kunda, poku kuama olonumbi vi sangiwa Vekalo Lietu Tuakristão Kuenda Oku Kunda.

16. Tu pondola oku tambula ndati espiritu sandu?

¹⁶ Kuãla, likutilila ku Yehova. (Mat. 7:7-11; Luka 11:13) Onjila yimue ya leluka yoku tambula espiritu sandu, oku pinga ku Yehova pocakati cohutililo. Lacimue ci tateka ohutililo yetu oku pitĩla ku Yehova, ale oku tambula espiritu lia Suku, ndaño tu kasi vokayike kuenda ndaño muẽle Satana ka yi tateka.  (Tia. 1:17) Lonjila yipi tu sukila oku likutilila, oco tu kuatisiwe lespiritu sandu? Oco tu sange etambulo liaco, tu kũlĩhĩsi olusapo lumue lu sangiwa lika Kevanjeliu lia Luka. *

17. Nye tua lilongisa kohutililo yatiamẽla kolusapo Yesu a tukula kelivulu lia Luka 11:5-9, 13?

¹⁷ Tanga Luka 11:5-9, 13. Olusapo lua Yesu lu lekisa ndomo tu sukila oku likutilila poku pinga espiritu sandu. Ulume volusapo, wa tambula eci a sukilile “omo lioku lipilika kuaye.” Eye ka kuatele ohele yoku pinga ekuatiso kekamba liaye ndaño okuti ca kala ale vokati kuteke. (Luka 11:8) Ovina Yesu a popia volusapo olu ci tu longisa nye catiamẽla kohutilo? Eye wa popia hati: “Lipiliki oku pinga kuenje vo wĩhi; lipiliki oku sandiliya kuenje vu sanga; kuenda lipiliki oku totola kuenje vo yuluili.” Nye tu lilongisilako? Oco tu tambule ekuatiso liespiritu sandu, tu sukila oku lipilika poku likutilila.

18. Ndomo Yesu a lombolola volusapo, momo lie tu kolelela okuti Yehova o tu ĩha espiritu sandu liaye?

¹⁸ Olusapo lua Yesu, lu tu kuatisavo oku limbuka esunga lieci Yehova a tu ĩhila espiritu sandu. Ulume volusapo, wa yonguile oku poka ciwa akombe vaye. Eye wa yonguile oku eca cimue cokulia kakombe va pitĩla vokati kuteke, pole, ka kuatele lacimue coku va ĩha. Yesu wa lombolola okuti, ulume volusapo wa kuatisiwa, omo wa lekisa utõi kuenda wa lipilika oku pinga ombolo. Nye Yesu a yonguile oku longisa? Nda omunu ka lipuile wa tẽla oku kuatisa una a lisungue laye, omo lioku lipilika, Isietu ukuacisola o pondolavo oku kuatisa vali calua vana va lipilika oku pinga kokuaye espiritu sandu! Omo liaco, tu pondola oku likutilila ku Yehova lekolelo liokuti ohutililo yetu yoku lipilika oku pinga espiritu sandu, eye o yi tambulula.—Osa. 10:17; 66:19.

19. Momo lie tu kolelela okuti tu pondola oku pandikisa?

¹⁹ Tu pondola oku kolela okuti ndaño Satana amamako oku tu lambalala, etu tu pondola oku pandikisa. Momo lie? Momo espiritu sandu li tu kuatisa volonjila vivali. Tete, olio li tu ĩha unene tu sukila oco tu pandikise kovitangi. Vali, olio li tu ĩha unene u tu kuatisa oku amamako oku vumba Yehova toke voluali luokaliye. Omo liaco, tu nõlipo oku tambula ekuatiso liespiritu sandu!