1. Yehova o tu ecelela okuti tu linga nye?

YEHOVA ecelela okuti etu, tu nõla eci tu yongola oku linga. Pole, eye o tu longisa ndomo tu nõla onjila ya sunguluka. Nda tua nõla onjila yimue yi sanjuisa Yehova, eye o tu kuatisa oku litunda ciwa kovina tu linga. (Osa. 119:173) Nda tu kapako alungulo Ondaka ya Suku, tu ka litunda ciwa kolonjila viosi tu nõla.—Va Hev. 5:14.

2. Ocitangi cipi tu pondola oku liyaka laco noke yoku nõla onjila yimue?

² Olonjanja vimue, ndaño onjila tua nõla ya sunguluka, pamue tu kuata ocitangi coku tẽlisa eci tua fetika. Kũlĩhĩsa ovindekaise evi: Manji umue ukuenje o linga esokiyo lioku tanga Embimbiliya oloneke viosi. Vokuenda kuolosemana vimue o litunda ciwa, pole, omo liatateko amue, o liwekapo. Manji umue ukãi, o linga esokiyo lioku kala ukundi wotembo yosi, pole, olonjanja viosi o pongolola eteke a sokiya oku fetika. Akulu vekongelo va sokiya oku linga apasu kolonjo via vamanji, pole, noke lioku pita olosãi vimue, ka va ci tẽlisa. Ovindekaise evi via litepa, pole, vi kuete elitokeko limue: Asokiyo osi a lingiwa, ka a tẽlisiwile. Akristão kocita catete ko Korindo, va liyakavo locitangi cimuamue. Kũlĩhĩsa ovina tu pondola oku lilongisila kokuavo.

3. Onjila yipi va Korindo va nõlelepo kuenda nye ce yililako?

³ Vokuenda kunyamo 55 K.K, vamanji ko Korindo va linga esokiyo limue lia kuata esilivilo lialua. Ovo va yeva okuti, vamanji ko Yerusalãi kuenda ko Yudea va sukilile ekuatiso, kuenda akongelo amue a kala oku kongola olombongo oco va va  kuatise. Omo okuti vamanji ko Korindo va lekisa ohenda kuenda ocituwa coku eca, va sokiya oku pongiya olombanjaile vimue oco vi kuatise vamanji kuenje va pula kupostolo Paulu eci va sukilile oku linga. Paulu wa eca olonumbi vekongelo liaco, noke wa tuma Tito oco a kuatise koku kongola. (1 Va Kor. 16:1; 2 Va Kor. 8:6) Pole, noke liolosãi vimue, Paulu wa yeva okuti vamanji ko Korindo, ka va fetikile handi oku kongola. Omo liaco, citava okuti, ka ca ecelele kokuavo oku tumisa olombanjaile viavo ko Yerusalãi kumosi lakongelo akuavo.—2 Va Kor. 9:4, 5.

4. Ndomo ca lomboluiwa ku 2 Va Korindo 8:7, 10, 11, evetiyo lipi Paulu a eca ku va Korindo?

⁴ Va Korindo va kuatele onjongole ya sunguluka kuenje Paulu wa pandiya ekolelo liavo kuenda ocituwa cavo coku eca. Pole, ca sukilile okuti Paulu o va vetiya oku tẽlisa eci va fetika. (Tanga 2 Va Korindo 8:7, 10, 11.) Ulandu wavo u tu longisa okuti, ndaño muẽle Akristão vakuekolelo va pondolavo oku kuata ocitangi cokuti ka va tẽlisa eci va fetika.

5. Apulilo api tu konomuisa vocipama cilo?

⁵ Ndeci ca pita la va Korindo, citava okuti tu kuatavo ocitangi coku tẽlisa eci tua fetika. Momo lie? Omo okuti ka tua lipuile, pamue tu kuata ocituwa coku linga ovina keteke likuavo. Ale, pamue ovitangi viya ño ocipikipiki, vi tu tateka oku tẽlisa eci tua fetika. (Uku. 9:11; Va Rom. 7:18) Tu kũlĩha ndati nda onjila yimue tua nõla, yi sukila oku yi pongolola? Nye ci tu kuatisa oku tẽlisa eci tua fetika? Tu ci konomuisi.

6. Momo lie tu sukilila olonjanja vimue oku pongolola onjila tua nõla?

⁶ Onjila yimue tua nõla pamue ka citava oku yi pongolola. Ndeci, etu, tua nõlapo onjila yoku vumba Yehova. Handi vali, tua nõlapo oku kala ukuacili kohueli yetu. (Mat. 16:24; 19:6) Pole, kuli olonjila vimue tua nõla okuti citava oku vi pongolola. Momo lie? Momo akalo a pongoloka. Nye tu sukila oku linga oco tu nõle ciwa onjila tu yongola oku kuama?

7. Nye tu sukila oku pinga vohutililo, kuenda momo lie?

⁷ Likutilila oku pinga olondunge. Yehova wa vetiya Tiago oku soneha hati: “Nda umue pokati kene wa kamba olondunge, amameko oku pinga ku Suku, momo eye eca ku vosi lutima wosi.” (Tia. 1:5) Lomue pokati ketu o kuete “olondunge” vioku kũlĩha ovina viosi. Omo liaco, eci o nõla onjila o yongola oku kuama loku yi pongolola, kolela Yehova. Eye o ku kuatisa oku nõla onjila ya sunguluka.

8. Nye tu sukila oku linga, osimbu ka tua nõlele onjila yimue?

⁸ Linga akonomuiso. Tanga Ondaka ya Suku, lalivulu ocisoko ca Yehova loku sapela lomanu vana vakualondunge. (Olosap. 20:18) Oku linga akonomuiso ci kuete esilivilo, ca piãla enene osimbu kua nõlele onjila yimue ndeci: upange woku sanda eteku, oku ilukila kocitumãlo cikuavo, ale oku kuama epindiso limue li ku kuecelela oku linga upange wa Yehova.

9. Momo lie ci kuetele esilivilo oku kala ukuacili?

⁹ Kũlĩhĩsa esunga lieci o yonguila oku nõla onjila yimue. Yehova ka kapiko lika onjila tu nõla, pole, o kũlĩhĩsavo esunga lieci tu yonguila oku nõlela onjila yaco. (Olosap. 16:2) Eye oyongola okuti ove o kala ukuacili kolonepa viosi. Omo liaco, poku nõla onjila yimue, yi tẽlisa kuenda kala ukuacili la vakuẽle. Kuenje lipula ndoco: Momo lie ndi yonguila oku nõla onjila yaco? Nda ka tua kaile vakuacili, citava okuti ka tu tẽlisa onjila tua nõla. Ndeci, manji umue ukuenje, pamue o nõlapo oku talavaya ndukundi wotembo yosi. Pole, vokuenda kuotembo, o fetika oku kuata  ovitangi viokuti ka tẽlisa olowola kuenje esanju liaye kupange waco, li fetika oku tepuluka. Citava okuti umalẽhe waco wa simĩle okuti, onjongole yoku kala ukundi wotembo yosi, yoku sanjuisa Yehova. Ale citava okuti onjongole yaye, yoku sanjuisavo olonjali viaye kuenda vamanji vakuavo.

10. Nye ci sukiliwa oco omunu umue a linge apongoloko?

¹⁰ Sokolola kekalo liomunu umue o fetika ndopo oku lilongisa Embimbiliya okuti, o nõlapo onjila yoku siapo oku sipa. Vokuenda kuosemana yimosi ale vivali ndaño lohali yalua, eye o ci tẽlisa. Noke eye o konyõha kuenje o fetika oku sipa vali. Pole, eteke limue, o yula ocituwa caco! Ocisola ndonge a kuatela Yehova kuenda onjongole yoku u sanjuisa, vio kuatisa oku linga apongoloko.—Va Kol. 1:10; 3:23.

11. Momo lie o sukilila oku sokiya ciwa ovimãho viove?

¹¹ Litumbikila ovimãho vina okuti o vi tẽlisa. Nda wa sokiya ciwa ovimãho viove, ci ka leluka kokuove oku tẽlisa eci wa fetika. Ndeci, pamue wa sokiya oku tanga Embimbiliya, eteke leteke. Pole, nda kua lingile esokiyo liwa, citava okuti ku tẽlisa ocimãho caco. * Ocindekaise cikuavo ceci: Akulu vekongelo va sokiya oku linga epasu kolonjo via vamanji olonjanja viosi. Pole, noke lioku pita otembo yimue, ka va tẽlisa ocimãho cavo. Oco ovo va kuate onima yiwa, akulu vekongelo va sukila oku kũlĩhĩsa ndoco: “Anga hẽ tua kũlĩhĩsa ale vamanji va sukila epasu? Anga hẽ tua sokiya ale eteke lelivala tu linga apasu aco?”

12. Nye pamue o sukila oku linga kuenda momo lie?

¹² Kala ukuacili. Lomue pokati ketu o kuete otembo, epondolo, ale ongusu yoku linga cosi a yongola. Omo liaco, kala ukuacili loku lekisa esunguluko. Nda wa limbuka okuti esokiyo wa linga ku pondola oku li tẽlisa, citava okuti o li pongolola. (Uku. 3:6) Citava okuti, ove wa pongolola onjila yimue wa nõla kuenje o sima okuti citava oku yi kuama. Nye ci pondola oku ku kuatisa oku tẽlisa eci wa fetika? Kũlĩhĩsa ananga atãlo akuãimo.

13. O pondola oku kuata ndati ongusu oco tẽlise onjila wa nõla?

¹³ Likutilila oku pinga ongusu yoku tẽlisa eci wa nõla. Suku o pondola oku ku ĩha “ongusu” yoku tẽlisa onjila wa nõla. (Va Fil. 2:13) Pinga espiritu sandu lia Yehova okuti li ku ĩha ongusu o sukila. Nda osima okuti olohutililo viove ka vi kasi oku tambuluiwa lonjanga, amamako oku likutilila. Yesu wa popia hati: “Lipiliki oku pinga [espiritu sandu] kuenje vo wĩhi.—Luka 11:9, 13.

14. Onumbi yi sangiwa kelivulu Liolosapo 21:5 yi pondola oku kuatisa ndati oku kapako onjila wa nõla?

¹⁴ Linga esokiyo. (Tanga Olosapo 21:5.) Oco o tẽlise ciwa upange umue, o sukila oku linga esokiyo loku kapako esokiyo liaco. Eci ci tiamisiwilavo kolonjila viosi o nõla. Soneha ovina o sukila oku linga oco ci leluke oku kapako onjila o yongola oku kuama. Seteka oku tepisa ovopange anene, vovopange atito. Nda wa ci linga, ci ka leluka kokuove oku tẽlisa ciwa esokiyo wa linga. Ndeci, Paulu wa sapuila va Korindo okuti “keteke liatete kosemana,” va soleka olombongo vimue oco va viece ndombanjaile. Oku ci linga, ca ecelela okuti ka va kongola cosi vonjanja yimosi eci Paulu a pitĩla. (1 Va Kor. 16:2) Oku tepaisa ovopange anene vovopange atito, ci pondola oku ku kuatisavo oku tepulula ekavo lialua.

15. Noke lioku sokiya cimue, nye o sukila oku linga?

¹⁵ Soneha ovina wa sokiya. Oku ci linga, ci ku kuatisa oku tẽlisa ovina viosi o yongola oku linga. (1 Va Kor. 14:40) Ndeci, akulu  vekongelo va tambula onumbi yoku nõla ukulu umue pokati kavo oco a sonehe olonjila viosi vi nõliwa lavo. Manji wa nõliwa, o seneha ocikele umue a tambula pokati kavo kuenda otembo ya sokiyiwa oku ci tẽlisa. Nda akulu vekongelo va kuama onumbi yaco, va litunda ciwa koku tẽlisa esokiyo limue. (1 Va Kor. 9:26) Setekavo oku kuama onjila yaco poku linga asokiyo ove. Ndeci, soneha ulala umue wovina viosi o sukila oku linga eteke leteke. Noke, tepisa ndomo o yongola oku vi tẽlisa. Oku ci linga, ka ci ku kuatisa lika oku malusula eci wa fetika, pole, ci ka ku kuatisavo oku linga ovina vialua votembo yitito.

16. Ndomo ca lomboluiwa Vukanda ku va Roma 12:11 enanga lipi likuete esilivilo li tu kuatisa oku kapako onjila tua nõla?

¹⁶ Likolisilako. Oku kuama esokiyo limue loku tẽlisa eci wa fetika, ci sukila elikolisilo lialua. (Tanga Va Roma 12:11.) Paulu wa sapuila Timoteo oco ‘amameko oku litumbika koku tanga’ loku “pandikisa” koku kala ulongisi uwa. Elungulo eli li kuete esilivilo kovimãho viosi viespiritu.—1 Tim. 4:13, 16.

17. Ukanda ku Va Efeso 5:15, 16 u pondola oku tu kuatisa ndati kesokiyo tu linga?

¹⁷ Talavaya ciwa lotembo yove. (Tanga Va Efeso 5:15, 16.) Nõla eteke lowola, yoku tẽlisa onjila wa nõla kuenda kakatela kokualio. Ku ka talamele eci otembo yi ku ecelela. Pamue otembo wa lavokaile ka yu ku ecelela. (Uku. 11:4) Kuata utate oco ovina ka vi kuete esilivilo ka vi ka ku pumbise otembo yove kuenda ongusu yoku linga ovina vi kuete esilivilo. (Va Fil. 1:10) Nda ci tava, linga ovopange amue kalivala ana okuti lomue oku tateka. Sapuila vakuene okuti velivala liaco ove ku ka kuata otembo. Nda citava yika otelefone yove kuenje asapulo, a tala noke. *

18-19. Nye ci pondola oku ku kuatisa oco amameko konjila yiwa wa nõla ndaño latateko?

¹⁸ Luluvalela konima yupange wove. Onima yi tunda konjila tua nõla yi sokisiwa loku pitĩla kungende umue. Oco o pitile oku wa loña, ove o sukila oku amamako lungende, ndaño etapalo lia nyõleha okuti ci sukila oku pongolola onjila yikuavo. Cimuamue haico okuti, nda wa luluvalela konima yonjila wa nõla, ku ka liwekapo lonjanga, ndaño ceci o lipita locitangi cimue ale ceci o ka sukila oku linga epongoloko limue.—Va Gal. 6:9.

¹⁹ Ka ca lelukile oku nõla onjila yimue loku yi kapako. Pole, lekuatiso lia Yehova ove o pondola oku kuata olondunge kuenda ongusu o sukila, oco o tẽlise cosi wa fetika!