OCIPAMA CELILONGISO 47
Ku ka Ecelele Okuti Cimue ci ku Tepa ku Yehova
“Nda ku kolela, a Yehova.”—OSA. 31:14.
OCISUNGO 122 Kali Vakuepandi, Loku Pama!
OVINA TU LILONGISA a
1. Tua kũlĩha ndati okuti Yehova o yongola oku kala ocipepi letu?
YEHOVA o tu laleka oku amela kokuaye. (Tia. 4:8) Eye o yongola oku kala Suku yetu, Isietu kuenda Ekamba lietu. Eye o tambulula olohutililo vietu kuenda o tu kuatisa kotembo yovitangi. O talavayavo locisoko caye oco ci tu longise loku tu teyuila. Pole, nye tu sukila oku linga oco tu amele ku Yehova?
2. Tu amela ndati ku Yehova?
2 Tu pondola oku amela ku Yehova poku likutilila kokuaye, loku tanga Ondaka yaye kuenda oku sokolola kokuayo. Eci tu ci linga, tu u kuatela ocisola calua kuenda tu u sanjukila. Etu tu vetiyiwa oku u pokola kuenda oku eca esivayo eye a sesamela. (Esit. 4:11) Osimbu tu likolisilako oku kũlĩha Yehova, tu ka kolela vali kokuaye kuenda kocisoko caye muna a siata oku tu ĩha ekuatiso.
3. Eliapu li seteka ndati oku tu tepa ku Yehova, pole, nye ci ka tu kuatisa okuti lalimue eteke tu ka yanduluka Suku yetu kuenda ocisoko caye? (Olosamo 31:13, 14)
3 Eliapu li seteka oku tu tepa ku Yehova, capiãla ene eci tu kasi oku liyaka lovitangi. Eye o ci linga ndati? Kamue kamue, o seteka oku tu vetiya oku liwekapo oku kolela ku Yehova kuenda kocisoko caye. Pole, tu pondola oku tamãlala kayonjo aye. Nda ekolelo lietu lia pama loku kolela ku Yehova, ka tu ka yanduluka Suku yetu kuenda ocisoko caye.—Tanga Olosamo 31:13, 14.
4. Nye tu konomuisa vocipama cilo?
4 Vocipama cilo, tu konomuisa oloseteko vitatu okuti pamue vi tunda ku vana ka vafendela Yehova; okuti oseteko loseteko yi pondola oku kapa kohele ekolelo lietu ku Yehova kuenda kocisoko caye. Oloseteko viaco vi pondola oku tu tepa ndati ku Yehova? Nye tu sukila oku linga oco ka tu ka ece evelo kalikolisilo a Satana?
CECI TU LIYAKA LOVITANGI
5. Ovitangi vi pondola oku kapa ndati kohele ekolelo lietu ku Yehova kuenda kocisoko caye?
5 Olonjanja vimue, tu liyaka locitangi coku lambalaliwa lepata, ale coku pumba upange wetu. Ovitangi viaco vi kapa ndati kohele ekolelo lietu kocisoko ca Yehova loku tu tepa kokuaye? Eci tu liyaka lovitangi vokuenda kuotembo yalua, pamue tu sumua loku pua elavoko. Kuenje eci ceca epuluvi ku Satana lioku tu vetiya oku tatãla ocisola Yehova a tu kuetele. Eliapu li yongola oco tu sima okuti Yehova, ale ocisoko Caye, ovo va kasi oku tu kokela ohali. Eci oco ca pitavo la va Isareli vamue Kegito. Tete, va kolelele okuti, Yehova wa nõla Mose la Arone oco va va yovole kupika. (Etu. 4:29-31) Pole, eci Fareo a kala oku va kangisa, ovo va kapa eko ku Mose kuenda ku Arone omo liovitangi viavo, poku va sapuila hati: “Wa kokeli okuti Fareo lakuenje vaye va tu sepula kuenda wa kapi osipata povaka avo oco va tu ponde.” (Etu. 5:19-21) Ovo va kapa eko kafendeli vakuekolelo va Suku. Ci sumuisa calua! Nda o kasi oku pandikisa lovitangi vokuenda kuotembo yalua, o pondola oku amamako ndati oku pamisa ekolelo liove ku Yehova kuenda kocisoko caye?
6. Nye tu lilongisila kuprofeto Havakuki catiamẽla koku pandikisa kovitangi? (Havakuki 3:17-19)
6 Likutilila lutima wosi ku Yehova kuenda sandiliya ekuatiso liaye. Uprofeto Havakuki wa liyaka lovitangi vialua. Vepuluvi limue, eye wa kuata atatahãi nda Yehova wo kapeleko muẽle. Kuenje eye wa lekisa esakalalo liaye ku Yehova vohutililo. Eye wa popia hati: “A Yehova, toke otembo yipi ndi kaluka oku pinga ekuatiso, pole, ku yevi? . . . Momo lie ecelela ohali?” (Hav. 1:2, 3) Yehova wa tambulula ohutililo yufendeli waye ukuekolelo. (Hav. 2:2, 3) Havakuki noke lioku sokolola ndomo Yehova a popela afendeli vaye, eye weya oku kuata vali esanju. Havakuki weya oku kolela okuti Yehova wo kapeleko kuenda wa ponduile oku u kuatisa oku pandikisa kovitangi viosi. (Tanga Havakuki 3:17-19.) Nye tu lilongisilako? Eci tu liyaka lovitangi, tu likutilila ku Yehova loku u sapuilako ndomo tu liyevite. Kuenje tu sandiliya kuatiso liaye. Eci o ci linga, kolela okuti Yehova o ka ku ĩha ongusu o sukila oco o pandikise. Handi vali, eci o limbuka okuti o kasi oku ku kuatisa, ekolelo liove kokuaye li ka pama.
7. Ndamupi epata lia manji Shirley lio seteka oku u yapuisa kuenda nye co kuatisa oco ka ka tepulule ekolelo liaye ku Yehova?
7 Amamako oku linga ovina vi ku kuatisa oku pamisa ukamba wove la Yehova. Eci oco ca kuatisa manji umue ukãi Shirley, o kasi ko Papua Nova Guine, eci a liyaka lovitangi. b Epata lia manji Shirley lia kala olohukũi kuenda olonjanja vimue va enda oku likolisilako calua oco va kuate okulia. Umue pokati kepata wa seteka oku honguisa ekolelo manji Shirley a kuatelele Yehova. Eye wa popia hati: “Ove o popia okuti espiritu sandu lia Suku li kasi oku ku kuatisa, pole, lipi ekuatiso liaco? Epata li kasi oku amamako luhukũi. O pesela lika otembo yove koku kunda.” Manji Shirley hati: “Ame nda lipula: ‘Suku wa tu kapako muẽle, ale sio?’ Kuenje lonjanga yalua nda likutilila ku Yehova kuenda ndo sapuila ovina viosi via kala vovisimĩlo viange. Sia liwekelepo oku tanga Embimbiliya, alivulu etu kuenda ndamamako oku kunda loku endaenda kolohongele.” Noke, eye wa fetika oku limbuka okuti Yehova wa kapeleko epata liaye. Epata liaye ka lia lapita onjala kuenda ovo va sanjukile. Manji Shirley wa popia hati: “Nda limbuka okuti Yehova wa tambulula olohutililo viange.” (1 Tim. 6:6-8) Nda o likolisilako oku linga ovina vi ku kuatisa oku pamisa ukamba wove la Yehova, ku ka ecelela okuti ovitangi, ale atatahãi vi ku tepa ku Yehova.
CECI VAMANJI VA KUETE OVIKELE VA POPIWA LAVĨ
8. Nye pamue ci pita la vamanji vamue va kuete ovikele vocisoko ca Yehova?
8 Pocakati colomidia vo internet, ovanyãli vetu va sandeka oku koka atatahãi atiamẽla ku vamanji va kuete ocikele coku songuila ocisoko ca Yehova. (Osa. 31:13) Vamanji vamue va siata oku lundiliwa loku kapiwa vokayike. Kocita catete, Akristão va liyakavo locitangi cimuamue eci upostolo Paulu a lundiliwa loku kapiwa vokayike. Ovo va lekisa ocituwa cipi?
9. Ocituwa cipi Akristão vamue va lekisa eci upostolo Paulu ambatiwa vokayike?
9 Akristão vamue vokocita catete, va liwekelepo oku kuatisa upostolo Paulu eci ambatiwile vokayike ko Roma. (2 Tim. 1:8, 15) Momo lie? Anga hẽ ovo va kala losõi omo okuti Paulu wa enda oku tendiwa lomanu ndongangala? (2 Tim. 2:8, 9) Ale, ovo va kala lusumba wokuti va ponduilevo oku lambalaliwa? Ndaño va kuatele esunga lioku ci linga, sokolola ndomo Paulu a liyeva. Eye wa pandikisa kovitangi vialua kuenda wa kapele kohele omuenyo waye omo liavo. (Ovil. 20:18-21; 2 Va Kor. 1:8) Citava okuti, pamue lalimue eteke tu ka kala nda vamanji vana va yanduluka Paulu vepuluvi a va sukilile! Nye tu sukila oku ivaluka eci vamanji va kuete ovikele va lambalaliwa?
10. Nye tu sukila oku ivaluka eci vamanji va kuete ovikele va lambalaliwa kuenda momo lie?
10 Ivaluka esunga lieci tu lambalaliwila kuenda u u wa siata oku ci koka. Ku Timoteo yavali 3:12 ku popia hati: “Vosi vana va yongola oku ambata omuenyo umue woku sumbila Suku ndolondonge via Kristu Yesu, va ka lambalaliwavo.” Omo liaco, ka tu komõha okuti, Satana o lambalala ca piãla enene, vamanji vana va kuete ocikele coku songola. Eye o yongola okuti vamanji vaco va liwekapo oku kala va kuekolelo ku Yehova loku tu kokelavo usumba.—1 Pet. 5:8.
Eci Paulu a kala vokayike Onesiforo lutõi wo kuatisa. Koloneke vilo, vamanji va siata oku kuatisa vamanji vakuavo va kasi vokayike, ndomo ci lekisiwa vociluvialuvia (Tala ovinimbu 11-12)
11. Nye tu lilongisa kongangu ya Onesiforo? (2 Tim. 1:16-18)
11 Amamako oku kuatisa vamanji kuenda oku pandikisa lavo lekolelo. (Tanga 2 Timoteo 1:16-18.) Ukristão umue o tukuiwa Onesiforo wa lekisa ovituwa via litepa eci Paulu a kala vokayike. “Eye ka kuatele osõi ya [Paulu] omo a kala kalienge.” Onesiforo wa sandiliya Paulu kuenda eci o sanga, wa likolisilako oku u kuatisa kovina a sukilile. Poku ci linga, Onesiforo wa kapele omuenyo waye kohele. Nye tu lilongisilako? Ka tu ka eceleli okuti usumba womunu u tu tateka oku kuatisa vamanji vana va kasi oku lambalaliwa. Handi vali, tu sukila oku va teyuila kuenda oku linga cosi oco tu va kuatise. (Olosap. 17:17) Ovo va sukila ocisola kuenda ekuatiso lietu.
12. Nye tu lilongisila ku vamanjetu ko Russia?
12 Kũlĩhĩsa ndomo vamanji ko Russia va siata oku kuatisa vamanji va kasi vokayike. Eci vamue pokati ka vamanji va lambalaliwa, vamanji valua va enda kombonge oco va va kuatise. Nye tu lilongisilako? Eci vamanji va popiwa lavĩ, va tipuiwa, ale oku lambalaliwa, ka ci komõhisa. Tu sukila oku va likutililako, oku kuatisa epata liavo kuenda oku sanda olonjila vikuavo vioku va kuatisa.—Ovil. 12:5; 2 Va Kor. 1:10, 11.
CECI TU POPIWA LÃVI
13. Oku popiwa lãvi ku pondola oku honguisa ndati ekolelo lietu ku Yehova kuenda kocisoko caye?
13 Apata ana okuti Halombangiko Via Yehova, vana tu talavayela kumosi, ale vana tu tangela kumosi, olonjanja vialua va seteka oku tu popia lãvi omo liupange wetu woku kunda ale oku tu vetiya oku liwekapo oku pokola kolonumbi via Yehova. (1 Pet. 4:4) Pamue va popia vati: “Ame ndu ku sole ndomunu pole, olonumbi vietavo liove via tĩla kuenda viosimbu.” Vamue va tu pisa onjila ndomo tu tata vana va tundisiwa vekongelo, poku tu sapuila okuti: “Vu popia ndati okuti vu sole omunu umue”? Upopi wa soka ndowu, u pondola oku tu kokela atatahãi vutima. Pamue tu fetika oku lipula ndoco: ‘Anga hẽ Yehova o yongola okuti ndi linga ovina vialua okuti ka vi kasi vepondolo liange? Anga hẽ olonumbi viocisoko caye via tĩla?’ Nda o kasi oku tiamisila utima kovisimĩlo viaco, o pondola ndati oku pamisa ukamba wove la Yehova loku kolela kocisoko caye?
Yovi ka kolelele kovohembi a popiwa lakamba vaye vana vo popia lãvi. Handi vali, eye wa nõlelepo oku kolela ku Yehova (Tala ocinimbu 14)
14. Ovituwa vipi tu sukila oku lekisa eci vakuetu va tu popia lãvi omo lioku sola olonumbi via Yehova? (Osamo 119:50-52)
14 Nõlapo oku teyuila olonumbi via Yehova. Yovi wa kala ulume umue wa teyuila olonumbi via Yehova ndaño poku ci linga wa popiwa lãvi. Umue pokati kakamba vaye, wo vetiya oku tava okuti Suku ka ka peleko nda o kuama olonumbi viaye, ale sio. (Yovi 4:17, 18; 22:3) Pole, Yovi ka tavele kovohembi aco. Eye wa kũlĩhĩle okuti olonumbi via Yehova vieci ciwa leci cĩvi via suapo kuenje wa nõlelepo oku vi teyuila. Eye ka ecelele okuti vakuavo va honguisa ekolelo liaye. (Yovi 27:5, 6) Nye tu lilongisilako? Ku ka ecelele okuti oku popiwa lãvi ku ku kolela oku kuata atatahãi kolonumbi via Yehova. Sokolola ovolandu a pita komuenyo wove. Anga hẽ eteke limue wa limbukile ale okuti olonumbi via Yehova via suapo kuenda vi pondola oku ku kuatisa? Nõlapo oku kuatisa ocisoko ca Yehova poku teyuila olonumbi vialio. Ndaño okuti omanu va tu popia lãvi, etu lalimue eteke tu ka liwekapo oku vumba Yehova.—Tanga Osamo 119:50-52.
15. Momo lie manji Brizit a popiwila lãvi?
15 Kũlĩhĩsa ulandu wa manji Brizit wo ko India. Eye wa popiwa lãvi lepata omo liekolelo liaye. Noke yoku papatisiwa kunyamo 1997, ulume waye okuti Hambangiko ya Yehova wa tundisiwa kupange. Kuenje ulume waco wa nõlapo okuti eye, la Brizit kumue lomãla vavo vakãi, va ilukila kolupale lukuavo kua kala olonjali viavo. Pole, manji Brizit wa laikele oku liyaka lovitangi vialua. Omo okuti ulume waye ka kuatele upange, manji Brizit wa sukilile oku talavaya calua oco a kuatise epata liaye. Pole, ekongelo lia kala eci ci soka 220 kolokilometulu. Kuenje epata liulume waye lio lambalala omo liekolelo liaye. Ovitangi viaco vieya oku livokiya calua okuti epata lia manji Brizit lia sukilile oku iluka vali. Kuenje vocipikipiki, ulume waye wa fa. Noke umue pokati komãla vaye wa kuata 12 kanyamo wa fa luvei wo kanser. Epata lia manji Brizit lio popiavo lãvi omo liovitangi viaco. Ovo vo sapuila okuti nda ka kaile Ombangi ya Yehova, ovitangi viaco nda ka via pitile laye. Ndaño lovitangi viaco, eye o kasi oku amamako oku kolela Yehova kuenda kocisoko caye.
16. Manji Brizit wa sumũlũisiwa ndati poku amamako oku kolela ku Yehova kuenda kocisoko caye?
16 Ndaño okuti manji Brizit wa kala ocipãla lekongelo, manji ukuakunyula akongelo wo vetiya oku kundila muẽle kocikanjo a kala loku linga olohongele konjo yaye muẽle. Tete, eye wa simĩle okuti ka ka ci tẽla. Pole, manji Brizit wa kuama olonumbi vo wĩha. Eye wa kundila olondaka viwa komanu vakuavo, olohongele via enda oku lingiwa konjo yaye kuenda olonjanja viosi wa enda oku linga efendelo liepata lomãla vaye. Onima yipi yeyililako? Manji Brizit wa tẽla oku songola alilongiso alua Embimbiliya kuenda valua pokati kolondonge viaco via papatisiwa. Kunyamo 2005 eye wa fetika upange wakundi votembo yosi. Ekolelo a kuetelele Yehova kuenda kocisoko caye lia sumũlũisiwa. Omãla vaye va kasi oku vumba Yehova lekolelo kuenda kocitumãlo va kasi kuli akongelo avali! Manji Brizit wa kolelele okuti Yehova wa eca ongusu kokuaye yoku liyaka lovitangi kuenda oku pandikisa kelambalalo liepata liaye.
AMAMAKO OKU KOLELA KU YEHOVA KUENDA KOCISOKO CAYE
17. Nye tua nõlapo oku linga?
17 Satana o yongola oco tu sime okuti Yehova, o tu yanduluka eci tu liyaka lovitangi kuenda ocisoko caye ka ci tu ĩha ekuatiso tu sukila poku liyaka lovitangi viaco. Satana o yongola okuti tu kuata usumba eci vamanji va kuete ovikele va popiwa lãvi, va lambalaliwa ale ceci va kapiwa vokayike. Omo liolombangulo viaco ka via sungulukile, eye o yongola oku nyõla ekolelo tu kuetele olonumbi via Yehova kuenda kocisoko caye. Tua kũlĩha ciwa ayonjo aye kuenda ka tu yapuisiwa lao. (2 Va Kor. 2:11) Nõlapo oku yuvula ovohembi a Satana loku amamako oku kolela ku Yehova kuenda kocisoko Caye. Ivaluka okuti Yehova lalimue eteke a ka ku yanduluka. (Osa. 28:7) Omo liaco, ku ka ecelele okuti cimue ci ku tepa ku Yehova!—Va Rom. 8:35-39.
18. Nye tu ka konomuisa vocipama ci kuãimo?
18 Vocipama cilo, tua konomuisa ovitangi vi tunda komanu vana okuti Halombangiko via Yehova. Pole, ekolelo lietu ku Yehova kuenda kocisoko caye, li pondolavo oku setekiwa omo liovitangi vi tunda ku vana va kasi vekongelo. Tu kuata ndati onima yiwa poku liyaka lovitangi viaco? Tu ka konomuisa ovina viaco vocipama ci kuãimo.
OCISUNGO 118 “Tu Vokiyeko Ekolelo”
a Oco tu tẽle oku pandikisa lekolelo koloneke vilo via sulako, tu sukila oku amamako oku kolela ku Yehova kuenda kocisoko caye. Eliapu li kuama oloseteko oco linyõle ekolelo lietu. Vocipama cilo, tu ka konomuisa oloseteko vitatu Eliapu li kuama kuenda eci tu sukila oku linga oco tu amameko lekolelo ku Yehova lokocisoko caye.
b Olonduko vimue via pongoluiwa.