OCIPAMA CELILONGISO 45
Ndomo Yehova a tu Kuatisa Oku Tẽlisa Upange Woku Kunda
“Ovo va ka kũlĩha okuti, pokati kavo pa kala uprofeto umue.”—ESEK. 2:5.
OCISUNGO 67 “Kunda Ondaka”
OVINA TU LILONGISA a
1. Nye tu lavoka kuenda ekolelo lipi tu kuete?
TU LAVOKA oku lambalaliwa osimbu tu tẽlisa ocikele cetu coku kunda. Citava okuti elambalalo liaco, li ka livokiya kovaso yoloneke. (Dan. 11:44; 2 Tim. 3:12; Esit. 16:21) Pole, tua kolela okuti, Yehova o ka tu ĩha ekuatiso tu sukila. Momo lie? Momo Yehova tunde kosimbu, wa siata oku kuatisa afendeli vaye oku tẽlisa ocikele cavo ndaño ka ca lelukile. Ndocindekaise, tu kũlĩhĩsa ovina vimue via pita komuenyo wuprofeto Esekiele, wa kundila va Yudea va kala kumandekua ko Bavulono.
2. Nye Yehova a popia catiamẽla komanu Esekiele a laikele oku kundila kuenda nye tu konomuisa vocipama cilo? (Esekiele 2:3-6)
2 Omanu vapi Esekiele a laikele oku kundila? Yehova wa va tukula okuti “va siva,” “ovimbinde” kuenda “va sina.” Ovo va kala vakuavitima via siva ndolosongo kuenda va kokele ohele ndanyenya. Eli olio esunga lieci Yehova a sapuilila Esekiele olonjanja vialua hati: “Ku ka kuate usumba”! (Tanga Esekiele 2:3-6.) Omo liaco, vocipama cilo tu konomuisa okuti Esekiele wa tẽlisa ocikele caye coku kunda momo (1) wa tumiwa la Yehova, (2) espiritu lia Suku lio wi ĩha ongusu a sukilile kuenda (3) ondaka ya Suku ya pamisa ekolelo liaye. Ovina evi vitatu via kuatisa ndati Esekiele? Ovio vi tu kuatisavo ndati koloneke vilo?
ESEKIELE WA TUMIWA LA YEHOVA
3. Olondaka vipi via pamisa Esekiele kuenda Yehova wo kuatisa ndati?
3 Yehova wa sapuila Esekiele hati: “Ñasi oku ku tuma.” (Esek. 2:3, 4) Citava okuti olondaka evi via pamisa calua Esekiele. Momo lie? Momo wa ivaluka okuti Yehova wa tukula olondaka vimuamue eci a nõla Mose la Isaya oco va kale ovaprofeto vaye. (Etu. 3:10; Isa. 6:8) Esekiele wa kũlĩhĩlevo ndomo Yehova a kuatisa ovaprofeto vaco vavali oku yula ovitangi. Kuenje eci Yehova a sapuila Esekiele olonjanja vivali siti: “Ñasi oku ku tuma” eye wa kuata esunga liwa lioku kolela kekuatiso lia Yehova. Handi vali, kelivulu lia Esekiele tu sangamo olonjanja vialua olondaka viokuti: “Ondaka ya Yehova yeya kokuange.” (Esek. 3:16) Olondaka viokuti “Ondaka ya Yehova yeya vali kokuange,” via pituluiwavo olonjanja vialua. (Esek. 6:1) Ocili okuti, Esekiele wa kolelele okuti wa tumiwile la Yehova. Handi vali, omo okuti isiaye wa kala ocitunda cimue, citava okuti wo longisa ndomo Yehova a kuatisa ovaprofeto Vaye. Ku Isake, la Yakoba, kuenda ku Yeremiya, Yehova wa popele olondaka viti, “Ame ñasi love.“—Efet. 26:24; 28:15; Yer. 1:8.
4. Olondaka vipi vi kavuluisa via pamisa Esekiele?
4 Ndamupi va Isareli valua va laikele oku tenda upange woku kunda wa Esekiele? Yehova hati: “Onjo ya Isareli yi ka likala oku ku yevelela, momo ovo ka va yongola oku njevelela.” (Esek. 3:7) Omanu poku likala Esekiele, va kala oku likala Yehova. Olondaka evi via lekisa ku Esekiele okuti, oku likala kuomanu ka ci lomboloka okuti eye ka tẽlisile ciwa upange waye nduprofeto. Yehova wa li kuminyavo ku Esekiele okuti, eci esombiso a tukula li keya, omanu “va ka kũlĩha okuti uprofeto umue wa kala pokati kavo.” (Esek. 2:5; 33:33) Ocili okuti, olondaka evi vi kavuluisa, via eca utõi ku Esekiele oco a tẽlise ocikele caye coku kunda.
TUA TUMIWA LA YEHOVA KOLONEKE VILO
Ndeci ca pita la Esekiele, omanu va pondolavo oku likala esapulo tu va kundila kuenda oku liyaka lelambalalo pole, tua kũlĩha okuti Yehova o kasi letu (Tala ocinimbu 5-6)
5. Ndomo ca lekisiwa ku Isaya 44:8, pi ku tunda utõi wetu?
5 Etu tu kuetevo utõi poku kũlĩha okuti tua tumiwa la Yehova. Eye wa tu ĩha esumũlũho lioku kala olombangi viaye. (Isa. 43:10) Ocili okuti, eli esumũlũho limue linene! Ndeci Yehova a sapuila ku Esekiele hati: “Ku ka kuate usumba,” Yehova o tu sapuilavo hati: “Ko ka kuati usumba.” Momo lie ka tu sukilila oku kuatela usumba ovonyãli vetu? Ndeci ca pita la Esekiele, etu tua tumiwa la Yehova kuenda tu kuete ekuatiso liaye.—Tanga Isaya 44:8.
6. (a) Nye Yehova a tu likuminya? (b) Nye ci tu lembeleka?
6 Yehova wa tu likuminya okuti o ka tu kuatisa. Ndeci, osimbu Yehova ka popele hati: “Ene vulombangi viange,” wa popia ndoco: “Eci ove o pita vovava, ndi ka kala love, kuenda eci o yoka olondui, ovio ka vi ka ku sitika. Eci o ka pita vondalu, ku ka pia, ndaño ulienge ka u ka ku kakula.” (Isa. 43:2) Olonjanja vialua poku kunda tu liyaka lovitangi vi sokisiwa lolondui kuenda oloseteko ka via lelukile okuti, vi sokisiwa londalu. Pole, lekuatiso lia Yehova tu amamako oku kunda. (Isa. 41:13) Ndeci ca pita koloneke via Esekiele, onepa yalua yomanu koloneke vilo, va likala esapulo tu va kundila. Pole, eci ka ci lomboloka okuti ka tu kasi oku tẽlisa ciwa upange woku kunda. Tu lembelekiwa poku kũlĩha okuti Yehova o sanjuka calua eci tu amamako lekolelo poku sandeka esapulo liaye. Upostolo Paulu hati: “Omunu lomunu o ka tambula onima yaye ndeci ca sesamẽla upange waye.” (1 Va Kor. 3:8; 4:1, 2) Manji umue ukãi haeye ukundi wotembo yosi vokuenda kuanyamo alua, wa popia hati: “Ci ndi sanjuisa calua oku kũlĩha okuti Yehova o sumũlũisa alikolisilo etu.”
ESPIRITU LIA SUKU LIA ECA KU ESEKIELE ONGUSU A SUKILILE
Esekiele wa mola ocinjonde cekãlu lia Yehova, cina cokuatisa oku tava okuti Yehova wa ponduile oku u kuatisa oku tẽlisa upange waye woku kunda (Tala ocinimbu 7)
7. Esekiele wa liyeva ndati eci a sokolola kocinjonde a mola? (Tala ociluvialuvia koñoño.)
7 Esikiele wa mola ndomo espiritu lia Suku likuete unene. Eci Esekiele a mola vocinjonde, co kuatisa oku limbuka okuti Espiritu sandu lia kala oku kuatisa ovangelo vakuonene kuenda oku songuila avava ekãlu liokilu. (Esek. 1:20, 21) Esekiele wa liyeva ndati? Eye wa saneha ovina via pita. Eye hati: “Eci nda ci mola, nda petamisa ocipala cange.” Omo lioku komõha wa kekama kolongolo. (Esek. 1:28) Noke, olonjanja viosi eci Esekiele a enda oku sokolola kocinjonde caco, ca enda oku pamisa ekolelo liaye liokuti, lekuatiso liespiritu lia Suku wa ponduile oku tẽlisa ocikele caye coku kunda.
8-9. (a) Nye ca pita la Esekiele eci Yehova o handeleka oku votoka? (b) Yehova wa pamisa ndati Esekiele omo lioku kundila vocikanjo cimue ka ca lelukile?
8 Yehova wa handeleka Esekiele hati: “A mõlomunu, votoka oco ndi sapele love.” Eci Yehova a sapuila Esekiele oco a votoke, Esekiele wa kuata ongusu a sukilile. Esekiele wa soneha hati: “Espiritu lia Suku lia iñila vokuange kuenda lia ndi votola.” (Esek. 2:1, 2) Noke, vokuenda kupange waye woku kunda, eye wa songuiwa “leka” lia Suku okuti espiritu sandu lia Suku. (Esek. 3:22; 8:1; 33:22; 37:1; 40:1) Espiritu lia Suku lia pamisa Esekiele oco a tẽlise ocikele a tambula coku kundila omanu “vakualonamãlala haivo va siva.” (Esek. 3:7) Yehova wa sapuila Esekiele hati: “Nda lingisa okuti, ocipala cove ci kõla ndovipala viavo kuenda upolo wove u kõla ndovipolo viavo. Nda lingisa upolo wove ndondiamande okuti, wa kõla calua ewe li sule. Ku ka va kuatele usumba ale oku yokokela ovipala viavo.” (Esek. 3:8, 9) Ca kala ndu okuti Yehova wa kala oku sapuila Esekiele hati: ‘Ku ka ecelele okuti olonamalala viomanu vaco vi ku yokokisa. Ame ndu ku pamisa.’
9 Noke, espiritu lia Suku liambata Esekiele kocikanjo caye coku kunda. Esekiele wa soneha hati: “Eka lia Yehova lia ndi pamisa.” Cambata osemana oco Esekiele a lilongise loku kuata elomboloko lia suapo liesapulu a laikele oku kunda, oco eye a ci linge lutõi. (Esek. 3:14, 15) Kuenje Yehova wo songuila vocimbota cimue co vetapi kuna “espiritu lia Suku lia iñila [vokuaye.]” (Esek. 3:23, 24) Omo liaco, Esekiele wa liangiliya oco a fetike ocikele caye coku kunda.
ESPIRITU LIA SUKU LI TU ĨHA ONGUSU TU SUKILA KOLONEKE VILO
Ndeci ca pita la Esekiele, nye ci tu kuatisa oku tẽlisa upange woku kunda? (Tala ocinimbu 10)
10. Ekuatiso lipi tu sukila oco tu tẽlise ocikele cetu coku kunda kuenda momo lie?
10 Ekuatiso lipi tu sukila oco tu tẽlise ocikele cetu coku kunda? Oco ku tambuluiwe epililo liaco, sokolola kueci ca pita la Esekiele. Osimbu eye ka fetikile ocikele caye coku kunda, espiritu lia Suku lio wĩha ongusu a sukilile. Koloneke vilo, ndeci ca pita la Esekiele, tu pondola oku tẽlisa lika upange woku kunda lekuatiso liespiritu lia Suku. Momo lie? Momo Satana o kasi oku linga uyaki letu oco a tateke upange woku kunda. (Esit. 12:17) Omanu valua va sima okuti Satana wa pama calua okuti ka tu pondola oku u yula. Pole, pocakati cupange woku kunda, tu kasi oku u yula! (Esit. 12:9-11) Ndamupi? Eci tu kunda tu lekisa okuti ka tu kuetele usumba oloseteko via Satana. Olonjanja viosi tu kunda, Satana o kasi oku yuliwa. Uvangi waco tu u limbukila eci tu amamako oku kunda ndaño ovanyãli vetu va tu lambalala. Kuenje tu pondola oku popia okuti, Yehova o tu ĩha ongusu pocakati cespiritu liaye kuenda tu taviwa laye.—Mat. 5:10-12; 1 Pet. 4:14.
11. Nye espiritu lia Suku li tu lingila kuenda tu amamako ndati oku li tambula?
11 Nye tu limbuka eci tu sokolola ndomo Yehova a eca ku Esekiele ongusu a sukilile oco a kunde? Espiritu lia Suku li pondola oku tu ĩha ongusu tu sukila, oco tu yule ovitangi viosi tu sanga kupange woku kunda. (2 Va Kor. 4:7-9) Oco hẽ, nye tu sukila oku linga oco tu amamako oku tambula espiritu lia Suku? Tu sukila oku amamako oku li pinga volohutililo, loku kolela okuti Yehova o yevelela olohutililo vietu. Yesu wa sapuila olondonge viaye hati: “Lipiliki oku pinga . . . lipiliki oku sandiliya . . . lipiliki oku totola.” Kuenje Yehova “o ka eca espiritu sandu ku vana vo pinga.”—Luka 11:9, 13; Ovil. 1:14; 2:4.
OLONDAKA VIA SUKU VIA PAMISA EKOLELO LIA ESEKIELE
12. Ndomo ca lekisawa ku Esekiele 2:9–3:3, pi kua tunda ociña kuenda mua sonehiwile nye?
12 Espiritu lia Suku lia eca ku Esekiele utõi a sukilile oco a kunde. Pole, hacoko lika, olondaka via Suku via pamisavo ekolelo lia Esekiele. Vocinjonde, Esekiele wa mola eka limue lia kuata ociña cimue. (Tanga Esekiele 2:9–3:3) Pi kua tunda ociña caco? Mua sonehiwile nye? Ca pamisa ndati Esekiele? Tu ci kũlĩhĩsi. Ociña ca tunda kocalo ca Suku. Citava okuti Yehova wa tuma umue pokati kovangelo vakuãla Esekiele a mola tete wa kala lociociña peka liaye. (Esek. 1:8; 10:7, 20) Vociña mua sonehiwile olondaka via Suku, okuti esapulo liesombiso Esekiele a laikele oku sapuila kolomandekua vakuesino. (Esek. 2:7) Esapulo liaco, lia sonehiwile kolonele vivali viociña.
13. Nye Yehova a sapuila ku Esekiele okuti oco a laikele oku linga lociña kuenda momo lie ca sosẽle kokuaye?
13 Yehova wa sapuila kuprofeto waye oco alie ociña kuenda “oku yukisa imo [liaye] lociña caco.” Esekiele wa pokola, kuenje wa cilia cosi. Ocinjonde caco ca lombolokele nye? Esekiele wa sukilile oku kuata elomboloko lia suapo liesapulo a laikele oku kunda. Eye wa sukilile oku tava kesapulo liaco, oco cuvetiye oku kunda. Kuenje kua pita ocina cimue ci komohĩsa. Esekiele wa limbuka okuti ociña “ca sosẽle ndowiki.” (Esek. 3:3) Momo lie? Ku Esekiele, esumũlũho lioku kala onumiwa ya Yehova ca kala ocina cimue ciwa. (Osa. 19:8-11) Eye wa sanjukile omo lioku taviwa la Yehova poku u vumba nduprofeto waye.
14. Nye ca kuatisa Esekiele oku tava ocikele a tambuile?
14 Noke Yehova wa sapuila Esekiele hati: “Yevelela kuenda kapa vutima wove olondaka viosi ndi kasi oku ku sapuila.” (Esek. 3:10) Lolonumbi evi, Yehova wa sapuila Esekiele oco a patekele olondaka via sonehiwa vociña loku sokolola kokuavio. Eci Esekiele a ci linga, ekolelo liaye lieya oku pama. Handi vali, Yehova wo handeleka oku eca esapulo limue komanu oco va popeliwe. (Esek. 3:11) Kuenje eci Esekiele a kuata elomboloko lia suapo loku tava kesapulo lia Suku, wa liangiliyila oku fetika oku kunda loku amamako toke eci upange waco u sulila.—Sokisa Olosamo 19:14.
ONDAKA YA SUKU YI PAMISA EKOLELO LIETU KOLONEKE VILO
15. Oco tu pandikise nye tu sukila oku “kapa vutima”?
15 Oco tu pandikise kupange woku kunda, tu sukilavo oku ecelela okuti ondaka ya Suku yamamako oku pamisa ekolelo lietu. Tu sukila oku kapa vutima cosi Yehova a tu sapuila. Koloneke vilo, Yehova o sapela letu pocakati Condaka yaye ya sonehiwa Embimbiliya. Tu lekisa ndati okuti Ondaka ya Suku yi kasi oku amamako oku vetiya ovisimĩlo, lolonjongole vietu?
16. Nye tu sukila oku linga Londaka ya Suku kuenda tu yi kapako ndati vutima wetu?
16 Eci tu lia loku litekula ciwa, etimba lietu li pama. Cimamue haico okuti, nda tu lilongisa Ondaka ya Suku loku sokolola kokuayo ekolelo lietu li pama. Eci oco Yehova a yongola okuti tu ci kapako. Yehova a yongola okuti “tu yukisa imo [lietu]” Londaka yaye, ale oku kuata elomboloko liayo. Tu ci linga poku likutilila, poku tanga kuenda poku sokolola ovina tua tanga. Catete, tu likutilila poku pongiya utima wetu oco u tambule ovisimĩlo via Suku. Kuenje, tu tanga ocipama cimue Cembimbiliya. Noke, tu talamapo kamue oco tu sokolole lutate kueci tua tanga. Onima yipi tu kuata? Tu ka kuata elomboloko lia suapo Liondaka ya Suku kuenda oku pamisa ekolelo lietu.
17. Momo lie ci kuetele esilivilo oku sokolola kueci tua tanga Vembimbiliya?
17 Momo lie ci kuetele esilivilo oku tanga Embimbiliya kuenda oku sokolola kueci tua tanga? Oku ci linga, ci tu ĩha ongusu tu sukila, oco tu kunde esapulo Liusoma cilo kuenda esapulo liesombiso liokovaso yoloneke. Handi vali, eci tu sokolola kovituwa vi komohĩsa via Yehova ukamba wetu laye u livokiya loku pama. Ndonima, tu kuata ombembua yovutima kuenda esanju.—Osa. 119:103.
OKU VETIYIWA OKU PANDIKISA
18. Nye omanu vocikanjo cetu va sukila oku limbuka kuenda momo lie?
18 Etu tua litepa luprofeto Esekiele, momo ka tu imbila owanji komanu. Pole, tua nõlapo oku amamako oku kunda esapulo lia Yehova, toke eci upange woku kunda u sulila. Eci otembo yesombiso yiya, omanu vo vocikanjo cetu ka va ka kuata esunga lioku popia hati, ka va tambuile elungulo, ale Suku wa va likala. (Esek. 3:19; 18:23) Pole, va sukila oku limbuka okuti esapulo tua va kundila li tunda ku Suku.
19. Nye ci ka tu kuatisa oco tu tẽlise ocikele cetu coku kunda?
19 Nye ci ka tu kuatisa oco tu tẽlise ocikele cetu coku kunda? Poku kapako ovina vitatu via pamisa Esekiele. Tu amamako oku kunda momo tua kũlĩha okuti tua tumiwa la Yehova, tu kuatisiwa lespiritu sandu lia Suku kuenda tu pamisiwa Londaka ya Suku. Omo liaco, lekuatiso lia Yehova, tu vetiyiwa oku tẽlisa ocikele cetu coku kunda kuenda oku pandikisa toke “kesulilo.”—Mat. 24:13.
OCISUNGO 65 Amamiko!
a Vocipama cilo, tu konomuisa ovina vitatu via kuatisa uprofeto Esekiele oku tẽlisa ocikele caye coku kunda. Onjila ndomo Yehova a kuatisa uprofeto waye, yi ka pamisa ekolelo lietu liokuti, Yehova o ka tu kuatisavo oku tẽlisa upange woku kunda.