1. Ukanda 2 Va Korindo 3:1-3, u tu kuatisa ndati oku sanjukila esumũlũho lioku longisa Embimbiliya komunu umue toke kepapatiso? (Tala ociluvialuvia koñoño.)

OLIYEVA ndati eci o mola ondonge yimue Yembimbiliya vocikanjo cekongelo liove oku papatisiwa? Ocili okuti o kuata esanju lialua. (Mat. 28:19) Nda okuti, ove wa lilongisa lomunu waco, o kuata esanju lialua eci eye a papatisiwa! (1 Va Tes. 2:19, 20) Olondonge viaco viokaliye via papatisiwa, ‘havikanda viuvangiko’ lika via vana va songola elilongiso liaco, pole liekongelo liosi.—Tanga 2 Va Korindo 3:1-3.

2. (a) Epulilo lipi li kuete esilivilo tu sukila oku konomuisa kuenda momo lie? (b) Elilongiso limue Liembimbiliya lilomboloka nye? (Tala etosi pombuelo yemẽla.)

² Ci sanjuisa poku mola okuti, vanyamo akuãla apita, cisoka 10.000.000 kalilongiso Embimbiliya, * a siata oku endisiwa olosãi viosi koluali luosi. Vokuenda kuanyamo aco, kua papatisiwa eci ci soka 280.000 unyamo lunyamo Ndolombangi Via Yehova kuenda ndolondonge viokaliye via Yesu Kristu. Tu kuatisa ndati olondonge viaco Viembimbiliya toke kepapatiso? Ndeci Yehova a lekisa epandi poku eca otembo komanu oco va linge Olombangi viaye, tu sukilavo oku likolisilako oku va kuatisa oku kula toke kepapatiso. Momo otembo ya kambako yitito calua!—1 Va Kor. 7:29a; 1 Pet. 4:7.

3. Nye tu konomuisa vocipama cilo catiamẽla koku endisa alilongiso Embimbiliya?

 ³ Omo okuti ci kuete esilivilo lialua oku linga olondonge cilo, Osungu Yolombangi Via Yehova ya pulisa kolofiliale, eci tu sukila oku linga oco tu kuatise vana tu longisa Embimbiliya oku kula toke kepapatiso. Vocipama cilo, leci cikuãimo, tu ka mola eci tu lilongisila kakundi votembo yosi, kolomisionaliu kuenda ku vana va nyula akongelo. * (Olosap. 11:14; 15:22) Ovio vi lombolola eci ukundi kuenda olondonge vi pondola oku linga oco va kuate onima yiwa poku lilongisa. Vocipama cilo, tu konomuisa ovina vitãlo olondonge vialua vi sukila oku linga oco va kule toke kepapatiso.

4. Nye tu sukila oku kũlĩha catiamẽla kelilongiso limue Liembimbiliya li endisiwa pepito?

⁴ Vamanji valua va siata oku songola alilongiso Embimbiliya pepito liomunu wa sangiwa. Ndaño okuti onjila yaco efetikilo limue liwa liecelela omunu oku kuata onjongole Kembimbiliya, pole, pamue ombangulo yaco ka ya siatele oku kala otembo yalua, haiyo ka yi lingiwa olosemana viosi. Vamanji vamue oco va vetiye onjongole yomunu, va pinga komunu waco etendelo liaye liotelefone, noke va tuma esapulo limue kokuaye liatiamẽla kocisimĩlo cimue Cembimbiliya. Olonjanja vialua ombangulo yaco yamamako olosãi vialua, pole ka ku tumbikiwa elilongiso limue Liembimbiliya. Anga hẽ omunu waco o ka kula toke koku litumbika loku papatisiwa, nda eye * ka likolisilileko oku lilongisa Ondaka ya Suku? Ocili okuti sio.

5. Nye Yesu a popia kelivulu lia Luka 14:27-33, okuti tu pondola oku ci kuama oco tu kuatise omunu tu longisa Embimbiliya?

⁵ Onjanja yimue, Yesu volusapo lumue wa lombolola eci omunu umue a sukilile oku linga nda o yongola oku kala ondonge yaye. Eye wa popia eci catiamẽla komunu umue o yongola oku tunga osapalalo yimue kuenda kosoma yimue yi yongola oku enda kuyaki. Yesu poku tukula catiamẽla koku tunga wa popia hati, “tumãla tete oku kũlĩhĩsa epese liaco” oco o malusule osapalalo kuenda o soma yi sukila ‘tete oku tumãla oco a kũlĩhĩse’ nda hẽ o olohoka viaye vi ka tẽlisa eci va yongola oku linga. (Tanga Luka 14:27-33.) Cimuamue haico, Yesu wa kũlĩha okuti omunu wosi o yongola oku linga ondonge yaye, o sukila oku kũlĩhĩsa lutate eci ci lomboloka oku kala  ondonge yaye. Omo liaco, tu sukila oku vetiya olondonge Viembimbiliya oku lilongisa olosemana viosi. Tu ci linga ndati?

6. Nye tu sukila oku linga oco tu kuate alilongiso Embimbiliya a kula konepa yespiritu?

⁶ Fetika poku vokiya otembo yelilongiso li lingiwa pepito. Citava okuti o tukula etosi limue Liembimbiliya kepasu lepasu o linga. Eci omunu waco a fetika oku sola epasu li kala otembo yalua, pulisa kokuaye nda pali ocitumãlo cimue vu pondola oku tumãla kuenda oku amamako lombangulo. Etambululo liaye li ka situlula nda eye wa velisapo elilongiso Liembimbiliya. Oco u kuatise oku kula konepa yespiritu pulisa kokuaye nda o yongola oku lilongisa olonjanja vivali vosemana. Ocili okuti, ci sukila oku lilongisa olonjanja vialua, okuti ka vu lilongisa lika olonjanja vivali vosemana.

7. Ulongisi o pongiya ndati olonepa viosi vielilongiso Liembimbiliya?

⁷ Ndulongisi, o sukila oku pongiya olonepa viosi vielilongiso. O pondola oku fetika, poku tanga ulandu waco loku kũlĩhĩsa ovisonehua. Kapako atosi a velapo. Sokolola eci catiamẽla kosapi yocipama, o tu losapi, kapulilo aco, oku tanga ovisonehua, oku kũlĩhĩsa oviluvialuvia kuenda nda citava pongiya ovideo yimue yi kuatisa oku lombolola ulandu waco. Noke poku kapako ondonge Yembimbiliya, sokolola ndomo o ko lomboluila ulandu waco lonjila yimue ya leluka, haiyo yi lomboloka ciwa, okuti ondonge yi kuata elomboloko lia suapo loku ci kapako.—Neh. 8:8; Olosap. 15:28a.

8. Olondaka viupostolo Paulu vi sangiwa kukanda ku Va Kolosai 1:9, 10, vi tu longisa nye catiamẽla koku likutililako vana tu longisa Embimbiliya?

⁸ Poku lipongiya, likutilila ku Yehova catiamẽla kondonge kuenda ka sukila aye. Pinga ku Yehova oco a ku kuatise oku longisa Embimbiliya lonjila yimue yi vetiya utima womunu. (Tanga Va Kolosai 1:9, 10.) Lipula ove muẽle ovina via tĩla kondonge oku kuata elomboloko, ale kueci eye ka tava. Amamako oku sokolola okuti ocimãho cove oku u kuatisa oku kula toke kepapatiso.

9. Ulongisi Wembimbiliya o kuatisa ndati ondonge oku lipongiyila elilongiso liaye? Ci lombolola.

⁹ Etu tu lavoka okuti elilongiso Liembimbiliya lilingiwa olonjanja viosi, li kuatisa ondonge  oku sanjukila ovina Yehova la Yesu va siata oku linga loku amamako oku lilongisa. (Mat. 5:3, 6) Oco a kuatisiwe kelilongiso liaco, ondonge yi sukila oku kapako ovina a kasi oku lilongisa. Oco u kuatise oku ci linga, u lomboluila esunga lieci ci kuetele esilivilo eye oku pongiya olonepa vielilongiso, poku tanga ocipama vu ka lilongisa kuenda ndomo a pondola oku kapako ulandu waco komuenyo waye. O pondola oku u kuatisa ndati oku pongiya? Pongiya ocipama cimue laye oco o lekise kokuaye ndomo ci lingiwa. * U lomboluila ndomo a sanga etambululo li teta onimbu kepulilo lialingiwa kuenda ndomo a lombolola atosi a velapo, ale atosi o kuatisa oku ivaluka etambululo. Noke pinga kokuaye oco a tambulule volondaka viaye muẽle. Poku ci linga, ove o ka kũlĩha nda eye wa kuata elomboloko liulandu. Kuli ovina vikuavo o sukila oku vetiya ondonge yove oku linga.

10. Momo lie ci kuetele esilivilo oku tanga Embimbiliya eteke leteke kuenda nye tu sukila oku linga oco tupe esilivilo koku tangiwa Kuembimbiliya?

¹⁰ Oku lilongisa lika olosemana viosi ka ci tẽla, ondonge yi pondola oku kuatisiwa poku linga ovina vimue eteke leteke lika waye. Eye o sukila oku sapela la Yehova. Ndamupi? Poku yevelela Yehova loku sapela laye. Eye o yevelela Suku poku tanga Embimbiliya eteke leteke. (Yeh. 1:8; Osa. 1:1-3) Lekisa kokuaye ndomo a talavaya “Lesokiyo Lioku Tanga Embimbiliya” li sangiwa vo jw.org. * Ocili okuti, oco u kuatise oku pa esilivilo kueci a tanga Vembimbiliya, u vetiya oku sokolola eci Embimbiliya lio longisa catiamẽla ku Yehova kuenda ndomo a kapako eci a lilongisa komuenyo waye.—Ovil. 17:11; Tia. 1:25.

11. Ndamupi ondonge Yembimbiliya yi lilongisa oku likutilila eye muẽle kuenda momo lie ci kuetele esilivilo eye muẽle oku likutilila ku Yehova?

¹¹ Vetiya ondonge oku sapela la Yehova poku likutilila eteke leteke. Linga ohutililo lutima wosi poku fetika loku malusula elilongiso kuenda tukula onduko yondonge vohutililo. Poku yeva ndomo o likutilila lutima wosi, eye o ka lilongisavo oku likutilila lutima wosi loku tiamisila olohutililo viaco ku Yehova Suku vonduko ya Yesu Kristu. (Mat. 6:9; Yoa. 15:16) Sokolola ndomo oku tanga Embimbiliya eteke leteke (okuti oku yevelela Yehova) kuenda oku likutilila (okuti oku vangula la Yehova), ci ka kuatisa ondonge oku amẽla ku Suku! (Tia.  4:8) Oku kuata ovituwa viaco ci ka kuatisa ondonge oku lekisa onjongole yoku litumbika kuenda oku papatisiwa.

12. Ulongisi umue o kuatisa ndati ondonge yaye oku kuata ukamba la Yehova?

¹² Ovina ondonge yimue yi lilongisa velilongiso limue Liembimbiliya, ka sukila lika oku ci patekela, pole, o sukilavo oku ci kapa vutima. Momo lie? Momo utima wetu muna mua kongela olonjongole vietu kuenda ovisimilo, u tu vetiya oku nõla onjila yimue. Yesu wa longasaile ovina vi vetiya komanu kuenda ovo va solaile oku u yevelela. Omanu va solailevo oku u kuama momo wa enda oku vetiya ovitima viavo. (Luka 24:15, 27, 32) Ondonge yove yi sukila oku tenda Yehova ndomunu wocili, una a pondola oku linga ukamba laye, loku u tenda nda Isiaye, Suku yaye kuenda ekamba liaye. (Osa. 25:4, 5) Vokuenda kuelilongiso Liembimbiliya, tiamisila utima wondonge kovituwa vi komohisa via Suku. (Etu. 34:5, 6; 1 Pet. 5:6, 7) Olonjanja viosi vu lilongisa, tiamisila utima konjila ndomo Yehova a tuwa. Kuatisa ondonge oku sola ovituwa vi komohisa via Yehova ndeci ocisola, ohenda kuenda ocikembe. Yesu wa popia hati “ocihandeleko catete haico ca velapo” ceci “sola Yehova Suku yove.” (Mat. 22:37, 38) Likolisilako oku kuatisa ondonge yove oku sola Yehova.

13. Tukula ulandu umue u lekisa ndomo ku kuatisiwa ondonge Yembimbiliya oku lilongisa ovituwa vikomohĩsa via Yehova.

¹³ Poku sapela londonge u sapuila esunga lieci o solele Yehova. Citava okuti ci kuatisa ondonge oku limbuka okuti eye o sukila oku kala ekamba lia Yehova, loku lilongisa oku u sola. (Osa. 73:28) Ndeci, anga hẽ onepa yimue yocinimbu velivulu vu kasi oku lilongisa, ale vocisonehua cimue ci situlula eci catiamẽla ku Yehova ndeci ocisola caye, olondunge, esunga, ale unene waye ci vetiya utima wove? Ci lomboluila kondonge kuenda ecelela okuti eye o kũlĩha okuti a-a amue pokati kasunga alua ove o solele Isietu wokilu. Kuli ovina vi kuavo olondonge viosi Viembimbiliya vi sukila oku linga oco va kule toke kepapatiso.

14. Nye ukanda ku Va Heveru 10:24, 25, u tu sapuila catiamẽla kolohongele viekongelo okuti, ci kuatisa ondonge Yembimbiliya oku kula konepa yespiritu?

¹⁴ Vosi yetu tu yongola okuti olondonge vi kula toke kepapatiso. Onjila yimue yoku va kuatisa, oku va vetiya oku endaenda kolohongele. Akundi va loñoloha va popia okuti olondonge vina vi endaenda kolohongele vi kula  lonjanga konepa yespiritu. (Osa. 111:1) Akundi vamue va loñoloha va siata oku sapuila kolondonge viavo okuti, va ka lilongisa ovina vialua via tiamẽla Kembimbiliya poku endaenda kolohongele. Tanga Va Heveru 10:24, 25 londonge Yembimbiliya kuenda u lomboluila ndomo a ka kuatisiwa poku kala kolohongele. Lekisa kokuaye ovideo Nye ci Lingiwa Vonjango Yusoma? * Kuatisa ondonge oku likolisilako oku endaenda kolohongele olosemana viosi.

15. Nye tu pondola oku linga oco tu vetiye ondonge yimue Yembimbiliya oku endaenda kolohongele?

¹⁵ Nye o sukila oku linga nda ondonge ka ya la enda kohongele ale ka ye ndaenda olonjanja viosi? Lesanju lialua u lomboluila ovina vimue wa lilongisa kohongele ya pita. Eci eye a limbuka ndomo ove o liyeva catiamẽla kolohongele, o vetiyiwavo oku endaenda. Eca kokuaye Utala umue Wondavululi ale Ekalo Lietu Tuakristão Kuenda Oku Kunda—Ovipama Viohongele okuti, ovio vi ka kuamiwa kohongele. Lekisa kokuaye ovina vika konomuisiwa kohongele yi ka kuamamo kuenda u pulisa onepa yovetiya vali. Kũlĩha loku yevelela eci ondonge yove ya sola vali kohongele yaye yatete okuti, ca litepa leci eye a yevele ale ketavo likuavo. (1 Va Kor. 14:24, 25) Eye o ka sanga vakuavo vakuangangu yiwa a ka setukula kuenda umue o ko kuatisa oku kula toke kepapatiso.

16. Nye ci sukiliwa oco tu songole alilongiso Embimbiliya toke kepapatiso kuenda nye tu ka lilongisa kocipama ci kuavo?

¹⁶ Tu songola ndati alilongiso Embimbiliya toke kepapatiso? Tu pondola oku kuatisa ondonge londonge oku limbuka esilivilo lioku lilongisa, poku u vetiya oku lilongisa olosemana viosi loku pongiya olonepa vielilongiso. Tu u vetiya oku sapela la Yehova eteke leteke loku kuata ukamba Laye. Tu u vetiyavo oku endaenda kolohongele. (Tala okakasia kemẽla 12, losapi hati “ Ceci Olondonge vi Sukila Oku Linga Oco va Kule Toke Kepapatiso.”) Ocipama ci kuavo ci ka lombolola, ovina vitãlo akundi va sukila oku linga, oco va kuatise olondonge toke kepapatiso.