1. Tua kũlĩha ndati okuti upange woku longisa omanu oco va linge olondonge u popela omuenyo?

UPANGE woku longisa omanu oco va linge olondonge u popela omuenyo! Tua ci kũlĩha ndati? Eci Yesu a eca ocihandeleko ci sangiwa kelivulu lia Mateo 28:19, 20, wa popia hati: “Kuendi, ka longisi omanu . . . oco va linge olondonge, va papatisi.” Nye tua kũlĩha catiamẽla kesilivilo lioku papatisiwa? Epapatiso li kuatisa vana va yongola oku popeliwa. Una o yongola oku papatisiwa o sukila oku tava okuti, o kuata lika omuenyo ko pui omo lia Yesu oku tu fila loku pinduiwa. Eli olio esunga lieci upostolo Petulu a sapuilila Kakristão hati: ‘Epapatiso liu popeli cilo . . . omo liepinduko lia Yesu Kristu.’ (1 Pet. 3:21) Eci ondonge yimue yokaliye yi papatisiwa, yi pondola oku lavoka oku kala otembo ka yi pui.

2. Kukanda 2 Timoteo 4:1, 2, ku tu vetiya oku linga nye etu tualongisi?

² Oco tu longise omanu oco va linge olondonge, tu sukila oku kuata “uloño woku longisa.” (Tanga 2 Timoteo 4:1, 2.) Momo lie? Momo Yesu wa tu handeleka okuti: “Kuendi, ka longisi omanu.” Upostolo Paulu wa popia okuti, “pandikisa” kupange owu, “momo poku ci linga o lipopela ove muẽle kuenda vana va ku yeva.” Eli olio esunga lieci Paulu a popela hati: ‘Lava oku longisa kuove.’ (1 Tim. 4:16) Omo liaco, tu sukila oku loñoloha koku longisa omanu nda tu yongola okuti va linga olondonge.

3. Vocipama cilo tu konomuisa nye catiamẽla koku songola alilongiso Embimbiliya?

³ Etu olonjanja viosi tua siata oku longisa omanu valua ocili ci sangiwa Vembimbiliya. Pole, ndomo ca lekisiwa kocipama  ca pita, tu yongola oku kũlĩha ndomo tu va kuatisa oku kala olondonge via papatisiwa via Yesu Kristu. Vocipama cilo, tu konomuisa ovina vitãlo ulongisi a sukila oku linga, oco a kuatise ondonge yimue oku kula toke kepapatiso.

4. Momo lie ulongisi a sukilila oku yuvula oku vangula calua poku songola elilongiso Liembimbiliya? (Tala etosi pombuelo yemẽla.)

⁴ Etu tu sole ovina tu longisa Vondaka ya Suku. Kuenje pamue tu vetiyiwa oku vangula calua catiamẽla kokuayo. Ci kaile poku endisa Utala Wondavululi, Elilongiso Liembimbiliya Vekongelo, ale poku songola elilongiso limue Liembimbiliya konjo, ulongisi o sukila oku yuvula oku vangula calua. Oco tu ecelele okuti Embimbiliya lilongisa, ulongisi o sukila oku likandangiya poku vangula kuenda oku yuvula oku lombolola ovina vialua eye a kũlĩha viatiamẽla kulandu umue Wembimbiliya ale ovolandu akuavo. * (Yoa. 16:12) Sokisa ukũlĩhĩso Wembimbiliya wa kuata kotembo wa papatisiwa, lowu o kuete cilo. Citava okuti eci wa papatisiwa wa kũlĩhĩle lika alongiso amue Embimbiliya. (Va Hev. 6:1) Ove wambata anyamo oco o lilongise ovina wa kũlĩha cilo, omo liaco, ku ka seteke oku longisa ovina viosi kondonge yokaliye eci wa kũlĩha.

5. (a) Ndomo ca lekisiwa kukanda 1 Va Tesalonike 2:13, nye tu yongola okuti oco ondonge yetu yi limbuka kelilongiso liaye? (b) Tu vetiya ndati ondonge oku vangula catiamẽla kueci a lilongisa?

⁵ Etu tu yongola okuti olondonge vietu vi kuata elomboloko lieci va lilongisila Vondaka ya Suku Embimbiliya. (Tanga 1 Va Tesalonike 2:13.) Tu ci linga ndati? Vetiya ondonge oku vangula catiamẽla kovina a lilongisa. Poku tanga ovinimbu Viembimbiliya yuvula oku vi lombolola olonjanja viosi kondonge, pinga kokuaye oco a vi lombolole. Kuatisa ondonge oku limbuka ndomo Ondaka ya Suku yitiamisiwila kokuaye. U linga apulilo a pondola oku u kuatisa oku situlula ovisimilo viaye viatiamẽla kovisonehua a tanga. (Luka 10:25-28) Ndeci, pulisa kokuaye ndoco: “Ocisonehua eci ci ku kuatisa ndati oku limbuka vimue pokati kovituwa via Yehova?” “O pondola oku kuatisiwa ndati locili ci sangiwa Vembimbiliya?” “O liyevite ndati leci o kasi oku lilongisa?” (Olosap. 20:5) Ondonge ka yi sukila lika oku kũlĩha eci a kasi oku lilongisa, pole yi sukila oku sola loku ci kapako komuenyo.

6. Momo lie ci kuetele esilivilo oku enda lamanji umue wa loñoloha koku longisa kondonge yimue Yembimbiliya?

⁶ Poku endisa elilongiso limue Liembimbiliya,  wa siata hẽ oku enda lakundi vana va loñoloha koku longisa? Pinga kokuavo oco va ku sapuile ndomo wa endisa elilongiso Liembimbiliya kuenda ndomo o talavaya ciwa Lembimbiliya. O sukila oku kala embombe oco o mioñolole oku longisa kuove. (Sokisa Ovil. 18:24-26.) Noke, pinga kukundi wa loñoloha nda o sima okuti ondonge yi kasi oku kuata elomboloko lieci a kasi oku lilongisa. Pingavo kokuaye oku songola elilongiso liaco, nda o tunda vosemana yimue ale volosemana vialua. Lonjila eyi, elilongiso lika amamako kuenda ondonge yi ka limbuka esilivilo lioku lilongisa. Lalimue eteke ku ka sime okuti elilongiso liaco “liove” kuenda lomue vali o pondola oku li songola. Ocili okuti, o yongola okuti ondonge yamamako oku lilongisa ovina viatiamẽla kocili.

7. Nye ci ka kuatisa ondonge oku sola eci a kasi oku lilongisa?

⁷ Ondonge yi sukila oku limbuka esanju kuenda ekolelo o kuete liatiamẽla kocili ci sangiwa Vembimbiliya. (1 Va Tes. 1:5) Kuenje eye o ka sanjukila calua ovina a lilongisa. Nda citava u sapuila ndomo Embimbiliya lia siata oku ku kuatisa komuenyo wove. Eye o ka limbuka okuti Vembimbiliya mu sangiwa olonumbi viwa vi pondolavo oku u kuatisa.

8. Nye o pondola oku linga oco o kuatise ondonge Yembimbiliya kuenda momo lie ci kuetele esilivilo?

⁸ Vokuenda kuelilongiso Liembimbiliya, sapuila kondonge catiamẽla kovolandu a vamanji vana va liyaka lovitangi ndevi viaye kuenda ndomo va vi yula. O pondola oku tunda lukundi umue vekongelo o kuete ulandu u ka kuatisa ondonge. Ale oku sanga ovolandu a vetiya vo jw.org vovipama viokuti, “Embimbiliya li Pongolola Omuenyo Womanu.” * Ovipama viaco kuenda olovideo vi ka kuatisa ondonge yove oku limbuka esilivilo lioku kapako olonumbi Viembimbiliya komuenyo waye.

⁹ Nda ondonge ohueli, anga hẽ ohueli yaye yi lilongisavo? Nda ka yi lilongisa u laleka oku li kongelavo kelilongiso. Vetiya una o longisa Embimbiliya oku sapuilako kepata liaye kuenda kakamba ovina a kasi oku lilongisa. (Yoa. 1:40-45) Ndamupi? U pulisa ndoco: “O lombolola ndati ocili eci kepata liove?” ale “Ocisonehua cipi nda wa lekisa kekamba liove  oco o situlule uvangi owu?” Lonjila eyi u kuatisa oco a lingevo ulongisi. Kuenje eci a ka liangiliya, citava okuti o fetika oku kunda lekongelo. Citava oku pulisa ondonge nda wa kũlĩha umue o yongola oku lilongisa Embimbiliya. Nda oco, sandiliya omunu waco kuenda lieca olumue oco o lilongise laye. Lekisa kokuaye ovideo losapi hati, Nye ci Lingiwa Velilongiso Limue Liembimbiliya? *

10. Ndomo ca lekisiwa kukanda 1 Va Tesalonike 2:7, 8, ndamupi ukundi a setukula ongangu ya Paulu?

¹⁰ Akundi va sukila oku lekisa okuti va kapako olondonge viavo. Ndopo va ka linga vamanji vekongelo. (Tanga 1 Va Tesalonike 2:7, 8.) Ka ca lelukile kokuavo oku liwekapo oku livala ukamba lomanu vo voluali kuenda oku likolisilako oku linga a pongoloko oco va vumbe Yehova. Tu sukila oku va kuatisa oku sanga akamba vocili vekongelo. Linga ekamba liondonge yove poku pita otembo laye okuti, ku ci lingi lika vokuenda kuelilongiso pole, o ci lingavo va puluvi akuavo. Oku va telefonalela, oku soneha esapulo limue, ale oku va nyula ci lekisa okuti wa va kapako.

11. Nye tu yongola okuti oco olondonge vi sanga vekongelo kuenda momo lie?

¹¹ Olusapo lumue hati: “Vosi va kasi vimbo limue va pondola oku kuatisa oku kula kuomõla umue.” Etu tu pondola oku popia okuti: “Oco ku lingiwe ondonge ci sukila ekongelo limue.” Omo liaco, eci ukundi uwa a kuatisa olondonge oku kũlĩha vamanji vakuavo vekongelo, ci ka va kuatisa oku amẽla ku Yehova. Olondonge vi pondola oku likongela lafendeli va Suku, okuti va va pamisa eci va liyaka lovitangi. Tu yongola okuti ondonge londonge yi limbuka okuti yi panga onepa vekongelo kuenda epata lietu konepa yespiritu. Tu yongolavo okuti eye amela kokuetu kuenda ku vamanji vakuacisola voluali luosi. Kuenje ci ka leluka kokuaye oku liwekapo oku livala ukamba lomanu vana ka vo kuatisa oku sola Yehova. (Olosap. 13:20) Nda omanu a enda oku livala lavo ukamba vo yuvula, o kolela okuti o ka sanga akamba vocili vocisoko ca Yehova. —Mar. 10:29, 30; 1 Pet. 4:4.

12. Momo lie tu sukilila oku vangula catiamẽla kelitumbiko Liakristão kuenda kepapatiso londonge?

¹² Vangula eci catiamẽla kelitumbiko Liakristão kuenda kepapatiso. Ocimãho cetu coku longisa Embimbiliya komunu umue, oku u  kuatisa oku vumba Yehova kuenda oku papatisiwa. Noke liondonge oku lilongisa olosãi vialua ca piãla enene eci a fetika oku endaenda kolohongele, eye o sukila oku kuata elomboloko liokuti tu yongola oku u kuatisa oku kala Ombangi yimue ya Yehova.

13. Ananga api ondonge yimue Yembimbiliya yeca oco a papatisiwe?

¹³ Kamue kamue ondonge yimue Yembimbiliya ukuotima wa sunguluka o pondola oku kuata ocimãho coku papatisiwa! Tete, ondonge o kũlĩha loku sola Yehova kuenda oku kolela kokuaye. (Yoa. 3:16; 17:3) Ondonge yi linga ekamba lia Yehova kuenda lia vamanji vekongelo. (Va Hev. 10:24, 25; Tia. 4:8) Eye o yuvula ovilinga ka via sungulukile kuenda oku likekembela akandu aye. (Ovil. 3:19) Handi vali, o sapuila vakuavo ovina a kolela. (2 Va Kor. 4:13) Noke o tumbika omuenyo waye ku Yehova kuenda o lekisa elitumbiko liaye poku papatisiwa. (1 Pet. 3:21; 4:2) Olio, eteke limue liesanju kuvosi! Osimbu ondonge yeca enanga lenanga liatiamẽla kocimãho caye, u pandiya lutima wosi kuenda u vetiya oku amamako oku ci linga.

14. Ukundi umue o limbuka ndati oku kula kuondonge konepa yespiritu?

¹⁴ Tu sukila oku kuata epandi poku kuatisa ondonge yimue oku litumbika kuenda oku papatisiwa. Tu sukilavo oku limbuka nda eye o yongola oku vumba Yehova Suku. Anga hẽ ondonge yi lekisa okuti yi pokola kovihandeleko via Yesu? Ale o yongola lika oku lilongisa ovolandu Embimbiliya?

15. Ananga api oku kula kuondonge ulongisi a sukila oku limbuka?

¹⁵ Kũlĩhĩsa olonjanja viosi ananga ondonge yi kasi oku eca. Ndeci, eye o situlula ovisimĩlo viaye ku Yehova? Eye o likutilila hẽ ku Yehova? (Osa. 116:1, 2) Anga hẽ o sanjukila oku tanga Embimbiliya? (Osa. 119:97) Eye endaenda kolohongele? (Osa. 22:22) O linga apongoloko a sukiliwa oco a lekisa okuti wa kapako ovina a kasi oku lilongisa? (Osa. 119:112) Wa siata hẽ oku sapuilako ovina a lilongisa kepata liaye kuenda kakamba vaye? (Osa. 9:1) Handi vali ocina ca velapo, o yongola hẽ oku kala Ombangi ya Yehova? (Osa. 40:8) Nda ondonge ka yeci ananga aco, lutate seteka  oku limbuka esunga liaco, noke vangula laye lumbombe catiamẽla kocitangi caco kuenda ci linga lutõi. *

16. Vepuluvi lipi o pondola oku liwekapo oku lilongisa la umue?

¹⁶ Otembo lotembo lipula ove muẽle nda wamamako oku lilongisa la umue. Lipula ndoco: ‘Anga hẽ ondonge ka yi pongiya elilongiso liaye? Eye ka yongola hẽ oku endaenda kolohongele? O kuete hẽ ovituwa vĩvi? Wa tiamẽla hẽ ketavo liesanda?’ Nda etambululo oco, oku amamako oku lilongisa laye ci kasi ndoku seteka oku longisa umue oku liteva, pole, ka yongola oku yula! Nda ondonge ka yi kapiko eci yi kasi oku lilongisa kuenda ka yi yongola oku linga a pongoloko, momo lie ku liwekelapo oku u longisa?

17. Ndomo ca lekisiwa kukanda 1 Timoteo 4:16, nye akundi vosi va sukila oku linga?

¹⁷ Tu kuete ocikele cinene coku longisa omanu oco va linge olondonge kuenda tu yongola oku kuatisa olondonge Viembimbiliya oku kula toke kepapatiso. Eli olio esunga lieci tu ecelela okuti Embimbiliya olio lilongisa kuenda tu longisa lesanju kuenda lekolelo. Tu vetiya ondonge oku linga akamba vekongelo. Tu lombolola ocimãho coku litumbika loku papatisiwa kuenda oku kũlĩhĩsa oku kula kuondonge otembo lotembo. (Tala okakasia kemẽla 13 “ Ceci Alongisi Vembimbiliya va Sukila Oku Linga, Oco va Kuatise Olondonge Toke Kepapatiso.”) Tu kuete esanju omo lioku panga onepa kupange u popela omuenyo! Omo liaco, tu yongola oku likolisilako oku kuatisa olondonge Viembimbiliya oku kula toke kepapatiso.