1-2. Yipi onjila yiwa yoku tanga kuenda oku lilongisa Embimbiliya? Tukula ocindekaise cimue.

 SOKOLOLA okuti o kasi oku sima oku landa onjo yimue. Anga hẽ osimbu kua yi fetele, nda ca sunguluka tete oku tala onjo yaco? Ale nda wa tala lika elitalatu lionjo? Ocili okuti nda wa enda toke konjo yaco, oku tala olonepa viosi vionjo, loku yi kũlĩhĩsa lutate. Citava okuti o yongola oku mola ocicapa ci lekisa ndomo oyo ya tungiwa. Ka kuli atatahãi okuti, ove o yongola oku konomuisa onepa lonepa yonjo yaco osimbu kua yi landele.

² Cimuamue haico tu sukila oku linga eci tu lilongisa Embimbiliya. Usonehi umue wa sokisa esapulo Liembimbiliya “losapalalo yimue yinene, okuti ya lepa calua, haiyo ya tungiwa loviseveto via pama.” Oco pũai, nye tu sukila oku linga oco tu kũlĩhe ciwa Embimbiliya? Nda wa lilongisa Embimbiliya lonjila yimue okuti ku kũlĩhisa ovina via longa, citava okuti, o lilongisa lika ovina viefetikilo “violondaka vi kola via Suku.” (Va Hev. 5:12) Cimuamue haico, o sukila oku linga okuti, osimbu kua landele onjo yimue o sukila oku yi kũlĩha ciwa. Eli olio esunga liokuti o sukila oku tanga lutate Embimbiliya oco o kuate elomboloko liwa liovina wa tanga. Onjila yimue yiwa yoku lilongisa Embimbiliya oku sokisa ndomo onepa yimue yi kuete elitokeko lolonepa vikuavo. Likolisilako okuti ku kuata lika elomboloko liocili covina wa kolela pole, o kuatavo elomboloko lieci wa kolelela kovina viaco.

3. Nye upostolo Paulu a sapuila Kakristão kuenda momo lie? (Va Efeso 3:​14-19)

³ Oco tu kũlĩhe ciwa ovina viosi vi sangiwa Vondaka ya Suku, tu sukila oku lilongisa ovina via longa viocili Cembimbiliya. Upostolo Paulo wa vetiya vamanji vo kotembo yaye, oco va lilongise  ondaka ya Suku lutate okuti, va kuata uloño woku “kũlĩha ciwa upati, lusõvi loku lepa kuenda oku longa” kuocili. Poku ci linga, oco lika va ponduile oku “pamisiwa vociseveto” cekolelo liavo. (Tanga Va Efeso 3:14-19.) Cimuamue haico tu sukila oku linga. Cilo, tu konomuisi ndomo tu lilongisa Ondaka ya Suku ondongosi oco tu kuatisiwe lovokuasi a sangiwamo.

4. Nye tu sukila oku linga oco tu vokiye ukamba wetu la Yehova? Ci lombolola.

⁴ Omo okuti Tuakristão, ka tu yongola lika oku kuata elomboloko lialongiso atete Embimbiliya. Lekuatiso liespiritu sandu lia Yehova, tu pondola oku lilongisa “ndaño muẽle ovina via longa via Suku.” (1 Va Kor. 2:9, 10) Momo lie ku fetikila esokiyo limue lielilongiso lio pokolika oco o vokiye ukamba wove la Yehova? Ndeci, o pondola oku linga ekonomuiso ndomo Yehova a lekisa ocisola kafendeli vaye vo kosimbu kuenda ndomo ci situlula ocisola a tu kuetelevo. O pondolavo oku konomuisa ndomo efendelo lia Yehova lia sokiyiwile kotembo ya va Isareli kuenda ndomo Yehova a yongola okuti tu u vumba koloneke vilo. Ale citava okuti o lilongisa ondongosi ovitumasuku Yesu a tẽlisa vokuenda kupange waye woku kunda palo posi.

5. O kuete hẽ ocina cimue o yongola oku lilongisa ondongosi?

⁵ Vamanji vamue va sole oku lilongisa Embimbiliya, va tukula ovina vimue va sole oku lilongisa ondongosi. O pondola oku mola ovina vimue ovo va lombolola pokakasia losapi hati: “ Olonumbi Vioku Lilongisa Pokolika.” O pondolavo oku talavaya lo Índice das Publicações da Torre de Vigia ale Elivulu Lioku Konomuisa Liolombangi Via Yehova. Oku linga elilongiso Liembimbiliya ondongosi ci ku kuatisa oku pamisa ekolelo liove kuenje “o ka sanga ukũlĩhĩso wa Suku.” (Olosap. 2:4, 5) Cilo, tu kũlĩhĩsa ocili cimue Cembimbiliya ca longa o pondola oku sanga.

6. (a) Lipi etepiso li kasi pokati kesokiyo kuenda ocipango? (b) Momo lie tu popela okuti ocipango Yehova a kuetele omanu kuenda ongongo ci kasi “tunde osimbu?” (Va Efeso 3:11)

⁶ Ndeci, kũlĩhĩsa eci Embimbiliya li popia catiamẽla kocipango ca Suku. Kuli etepiso  limue pokati kesokiyo kuenda ocipango. Sokolola okuti o yongola oku linga ungende umue. Tu pondola oku sokisa esokiyo letapalo o yongola oku pita oco o pitĩle kocitumãlo o yongola oku enda. Pole, esokiyo liove pamue ka li tẽlisiwa, momo etapalo pamue li yikiwa omo liesunga limue. Konepa yikuavo, ocipango ci sokisiwa locitumãlo ove o yongola oku pitĩla. Ove wa kũlĩha oku o yongola oku enda, pole, citava okuti o pita katapalo akuavo oco o pitĩle kocitumãlo caco. Pole, o pondola oku linga epongoloko ndomo ci likuata lekalo. Tu eca olopandu ku Yehova omo a tu situluila Vembimbiliya kamue kamue ‘ocipango caye cina a yonguile.’ (Tala Vembimbiliya lielilongiso ku Va Efeso 3:11.) Cimuamue haico okuti Yehova olonjanja viosi o tẽla oku linga eci eye a yongola poku “talavaya lovina viosi oco ocipango caye ci lingiwe.” (Olosap. 16:4) Kuenje cosi Yehova a linga ci kala otembo ka yi pui. Pole, cipi ocipango ca Yehova kuenda apongoloko api eye a linga oco ocipango caco ci tẽlisiwe?

7. Noke lia Adama la Eva oku lekisa esino, epongoloko lipi Yehova a linga kocipango caye? (Mateo 25:34)

⁷ Suku wa sapuila kohueli yatete eci ca kala ocipango caye catiamẽla kokuavo. Suku wa va sapuila hati: ‘Liciti, siati kuenda yukisi ilu lieve loku lu viala kuenda viali . . . oviluvo vi palãla kovailu, lovinyama viosi vio kilu lieve.’ (Efet. 1:28) Omo liesino lia Adama la Eva, omanu vosi va linga vakuakandu, pole, eci ka ca pongoluile ocipango ca Yehova. Eye wa pongolola lika ndomo ocipango caco ca laikele oku tẽlisiwa. Vepuluvi liaco, Yehova wa sokiya oku tumbika Usoma umue kilu, oco u tẽlise ocipango a kuatelele tete omanu kuenda ongongo. (Tanga Mateo 25:34.) Omo liocisola, Yehova wa tuma omõlaye wongunga palo posi vepuluvi lina eye a sokiyile. Lonjila eyi, Yesu wa ponduile oku longisa omanu catiamẽla Kusoma loku eca omuenyo waye ndocisembi oco a tu yovole kekandu kuenda kolofa. Noke Yehova wa pindula Yesu kolofa oco a tiukile kilu kuenda oku viala Ndosoma Yusoma wa Suku. Pole, kuli ovina vialua ove o pondola oku sokolola catiamẽla kocipango ca Suku.

8. (a) Yipi osapi Yembimbiliya? (b) Ndomo ca lekisiwa ku Va Efeso 1:​8-11, cipi ocipango ca velapo ca Yehova? (Tala ociluvialuvia koñoño)

⁸ Osapi ya velapo Yembimbiliya yeyi yokuti onduko ya Yehova yi sumbiwa. Eci ci ka lipita osimbu eye a ka tẽlisa ocipango caye catiamẽla Kongongo, pocakati Cusoma waye una u ka vialiwa la Kristu. Ocipango ca Yehova ka citava okuti ci pongoluiwa. Eye wa likuminya okuti cosi ci ka tẽlisiwa ndomo eye a sokiya. (Isa. 46:10, 11; Va Hev. 6:17, 18) Vokuenda kuotembo, ongongo yi ka pongoluiwa ocumbo ceposo kuenda ovitumbulukila via lipua via Adama la Eva vi ka sanjukila “omuenyo otembo ka yi pui.” (Osa. 22:26) Pole, eci haicoko lika Yehova a ka tẽlisa. Ocipango caye ca velapo ceci okuti, afendeli vaye vosi ci kale kilu, ale palo Posi, va li kuata omunga poku u fendela. Lonjila eyi, vosi va ka kala vakuacili kuenda va ka pokola ku Yehova Ombiali Yoluali Luosi. (Tanga Va Efeso 1:8-11.) Ka cu ku komõhisa hẽ poku mola ndomo Yehova a kasi oku tẽlisa ocipango caye?

9. Oku lilongisa Embimbiliya ci tu kuatisa oku kuata elomboloko lipi lieci ca laikele oku pita?

⁹ Kũlĩhĩsa ocitumasuku Yehova a tukula vocumbo Cedene ndomo ca tukuiwa Kefetikilo 3:15. b Ocitumasuku caco, ci tukula ovina via  laikele oku tẽlisa ocipango ca Suku, pole, ca laikele lika oku fetika noke lioku pita anyamo alua. Ndeci, Yehova wa sapuila ku Avirahama okuti umue pokati kovitumbulukila viaye wa laikele oku kala Kristu. (Efet. 22:15-18) Kuenje, kunyamo 33, Yesu wa lumaniwa kocisendemãhi ndomo ocitumasuku ca popele. (Ovilinga 3:13-15) Onepa ya sulako yocitumasuku eci, yi lekisa okuti utue wa Satana u ka sosũiwa lika kesulilo liohulukãi yanyamo yuviali wa Kristu. (Esit. 20:7-10) Embimbiliya li lombolola vali catiamẽla kovina vi ka lipita osimbu ukuse waco u kamamako pokati ka Satana kuenda ocisoko ca Yehova.

10. (a) Nye ci ka pita ndopo? (b) Tu pongiya ndati ovisimĩlo kuenda utima wetu? (Tala etosi.)

¹⁰ Sokolola kovina vi komõhisa Embimbiliya lia lombolola. Catete, olofeka vi ka popia viti “tu kuete ombembua kuenda tua kolapo!” (1 Va Tes. 5:2, 3) ‘Vocipikipiki’ ohali ya piãla yi ka fetika eci olofeka vi ñualilapo atavo osi esanda. (Esit. 17:16) Noke liovina viaco, “eci Mõlomunu eyilila vulamba waye,” citava okuti tu ka mola olondimbukiso viaco. (Mat. 24:30) Kuenje Yesu o ka sombisa omanu poku va tepisa ndolomeme kuenda olohombo. (Mat. 25:31-33, 46) Ndaño ndoco, Satana ka ka liwekapo. Lesuvo lialua, eye o ka vetiya ocimunga cimue colofeka, Embimbiliya li tukula okuti, Goge yofeka ya Magoge, oco ci ka katukile afendeli va Yehova. (Esek. 38:2, 10, 11) Olombuavekua vi ka kala handi palo posi va ka ambatiwa kilu. Kumosi la Yesu kuenda olohoka viaye, va ka linga uyaki wo Harmagedo okuti, onepa ya sulako yohali ya piãla. c (Mat. 24:31; Esit. 16:14, 16) Noke liovina viaco, uviali wa Kristu wohulukãi yanyamo, u ka fetika palo posi.—Esit. 20:6.

11. O liyeva ndati eci o sokolola okuti o ka kala otembo ka yi pui? (Talavo ociluvialuvia.)

¹¹ Kaliye, sokolola lutate ndomo ci ka kala noke liohulukãi yanyamo. Embimbililiya li popia okuti Ululiki wetu “wa kapa onjongole yoku kala otembo ka yi pui vutima [wetu.]” (Uku. 3:11) Wa sokoluile ale eci ci lomboloka kokuove kuenda kukamba o kuete la Yehova? Elivulu Kuata Ukamba Wocili la Yehova kemẽla 319  li vetiya utima wetu poku popia hati: “Noke yoku kala ovita violohũlũkãi, ale olohuluwa violohuluwa vianyamo, etu tuka kũlĩha vali calua catiamẽla ku Yehova Suku okuti eci tua kũlĩha ale cilo ci sule. Pole, tu ka liyeva okuti handi kuli ovina vialua vi komõhisa vioku lilongisa. . . . Omuenyo ko pui u ka kuata elomboloko kuenda u ka litepa muiñi muiñi kuenje oku kuata vali ukamba la Yehova otembo yosi oyo yi ka kala onepa yesumũlũho lia velapo.” Osimbu otembo yaco ka ya pitĩlile, nye tu sukila vali oku limbuka poku lilongisa Embimbiliya?

12. Tu vanja ndati kilu? Tukula ocindekaise cimue.

¹² Embimbiliya li tu lomboluila eci catiamẽla koku kala kovaso a Yehova “kocitumãlo ca lepa.” (Isa. 33:5) Embimbiliya li situlula ovina vi komõhisa viatiamẽla ku Yehova kuenda kocisoko caye kilu. (Isa. 6:1-4; Dan. 7:9, 10; Esit. 4:1-6) Ndeci, tu pondola oku tanga eci catiamẽla kovina vi komõhisa uprofeto Esekiele a mola eci ‘ovailu a yuluka kuenda eye wa fetika oku mola ovinjonde via tunda ku Suku.’—Esek. 1:1.

13. O liyeva ndati poku kũlĩha eci Yesu a kasi oku linga oku upisa kilu? (Va Heveru 4:14-16)

¹³ Sokololavo catiamẽla kueci Yesu a kasi oku linga kilu, ndosoma yetu kuenda ocitunda cinene okuti wa kapako ndomo tu liyevite. Pocakati caye etu tu pondola oku ‘amela kocalo cohenda’ ya Suku vohutililo loku pinga ongecelo yakandu etu kuenda ekuatiso “eci tu sukila.” (Tanga Va Heveru 4:14-16.) Ka tu ka piti ndaño eteke limosi okuti ka tu sokolola kovina viosi Yehova la Yesu va tu lingila kuenda va kasi oku tu lingila, oco va tu kuatise oku upisa kilu. Ocisola ovo va tu kuetele, ci sukila oku vetiya utima wetu kuenda oku tu vetiya oku likolisilako kupange wa Yehova.—2 Va Kor. 5:14, 15.

14. Onjila yipi ya velapo tu pondola oku lekisa olopandu vietu ku Yehova la Yesu kueci va kasi oku tu lingila? (Talavo ociluvialuvia.)

 ¹⁴ Onjila yimue ya velapo yoku lekisa olopandu vietu kueci Yehova la Yesu va siata oku tu lingila, poku likolisilako oku kuatisa omanu vakuavo oco va linge Olombangi Via Yehova kuenda olondonge via Yesu. (Mat. 28:19, 20) Eci oco upostolo Paulu a linga, oco a lekise olopandu viaye ku Yehova kuenda ku Yesu. Eye wa kũlĩhĩle okuti ocipango ca Yehova ceci okuti, “omanu vosi va popeliwa kuenda va kuata ukũlĩhĩso wa suapo wocili.” (1 Tim. 2:3, 4) Eye wa likolisilako calua kupange woku kunda oco a kuatise omanu valua ‘okuti o popela vamue.’—1 Va Kor. 9:22, 23.

15. Ndomo ca tangiwa Kosamo 1:2, nye ci pondola oku tu kokela esanju?

¹⁵ Ukualosamo wa lombolola ciwa omunu umue o lilongisa Ondaka ya Suku. Eye wa popia okuti omunu waco o kuete esanju momo “o sole calua ocihandeleko ca Yehova” kuenda ‘eye o sokolola ocihandeleko Caye utanya luteke.’ (Osa. 1:1-3) Poku lombolola catiamẽla kocisonehua eci, umue ukuakupongolola Embimbiliya o tukuiwa Joseph Rotherham wa soneha velivulu liaye li tukuiwa okuti Elilongiso Liolosamo kelimi Liongelesi hati, omunu umue o “sukila oku sanjukila calua olonumbi via Suku poku vi sandiliya, oku vi lilongisa kuenda oku amamako oku vi sokolola.” Eye wamisako hati: “Omunu wosi o pita eteke okuti ka tangi Embimbiliya wa pumba ukũlĩhĩso weteke liaco.” Ove o pondola oku sanga esanju poku tanga Embimbiliya nda wa lekisa onjongole kalomboluilo a kuete esilivilo a sangiwamo loku limbuka ndomo ovio vi kuete elitokeko. Oku lilongisa ondongosi Ondaka ya Suku ocina cimue ci nena esanju lialua!

16. Nye tu ka konomuisa vocipama ci kuãimo?

¹⁶ Ocili ca velapo Yehova a tu longisa Vondaka yaye, ka ca tĩlile calua oco tu kuate elomboloko liaco. Vocipama ci kuãimo tu ka konomuisa cimue pokati kocili caco condongosi okuti, onembele yinene ya Yehova konepa yespiritu yina upostolo Paulu a lombolola vukanda a sonehela Akristão va Heveru. O ka sola calua oku lilongisa ulandu waco.