ULUME umue ukuakukũlĩhĩsa ekalo liotembo vomakina, o lete okuti ociluvialuvia cimue ci kasi oku livokiya. Ociluvialuvia coco ci lekisa okuti ku laika oku iya ehunguhungu limue liofela okuti lia loña kocitumãlo cimue ku sangiwa omanu valua. Omo okuti ukuakukũlĩhĩsa ekalo liotembo wa kapako ekalo liomanu, o lekisa esakalalo kuenda o linga cosi ci tava oco a ece esapulo komanu vosi osimbu ehunguhungu liaco ka lieyile.

Ndeci ci linga ukuakukũlĩhĩsa ekalo liotembo, Yehova koloneke vilo o kasi oku lungula omanu catiamẽla “kocilunga” cimue ci laika oku iya ci koka vali ohele yalua okuti, ehunguhungu liofela ci sule. Yehova o kasi oku eca ndati elungulo liaco? Kuenda tu kolela ndati okuti eye o kasi oku eca komanu otembo yalua oco va popeliwe? Osimbu ka tua tambuluile apulilo aco, tu kũlĩhĩsa alungulo amue Yehova a eca kosimbu.

Kosimbu, Yehova wa eca alungulo alua atiamẽla “kovilunga” ale kasombiso a laikele oku nena ku vana ka va yonguile oku u pokola. (Olosap. 10:25; Yer. 30:23) Pole, olonjanja viosi wa enda oku eca lonjanga esapulo liaco loku sapuila omanu eci va sukilile oku linga oco va lekise epokolo. (2 Olos. 17:12-15; Neh. 9:29, 30) Oco omanu va vetiyiwe oku tava kesapulo liaco, Yehova wa enda oku tuma afendeli vaye vakuekolelo, oco va sapule eci catiamẽla kasombiso aye. Eci ca enda oku kuatisa omanu vaco oco va kuate elomboloko liokuti va sukilile oku linga apongoloko lonjanga.—Amo. 3:7.

Umue pokati kafendeli vaco vakuekolelo, Noha. Vokuenda kuanyamo alua wa kunda lutõi komanu vakuevĩho haivo olongangala vo kotembo yaye kuenda wa va lungulavo kueci catiamẽla ketande lia laikele oku iya. (Efet. 6:9-13, 17) Eye wa va sapuila eci va sukilile oku linga oco va popeliwe. Omo liupange waco, Noha weya oku tukuiwa okuti “wa kunda esunga.”—2 Pet. 2:5.

Ndaño okuti Noha wa likolisilako calua, omanu koloneke viaye ka va tavele kesapulo liaye. Ovo ka va kolelele kelungulo Suku a ecele pocakati caye. Omo liaco, va fa eci “Etande lieya kuenje lia va nyõla vosi.” (Mat. 24:39; Va Hev. 11:7) Lomue pokati kavo wa ponduile oku popia okuti Suku ka ecele elungulo.

Vapuluvi akuavo, Yehova wa eca elungulo pana okuti pa kambele otembo yitito oco a nene esombiso liaye. Ndaño ndoco, wa eca epuluvi komanu lioku li pongiya oco va puluke “kocilunga” ca laikele oku iya. Ndeci, osimbu Yehova ka nenele Ekũi Liafengi komanu vo ko Egito yosimbu, tete wa eca elungulo. Eye wa tuma Mose la Arone oku sapuila Fareo lakuenje vaye okuti efengi liepanduvali okuti ombela yociwe, ya laikele oku iya keteke li kuamamo kuenje yi ka nyõla ovina vialua. Anga hẽ eteke limosi nda lia tava okuti omunu o sanga ocitililo oco a puluke kocilunga ca laikele oku iya? Embimbiliya li popia hati: “Oco pokati kakuenje va Fareo, wosi wa sumbila ondaka ya Yehova wa iñisa akuenje vaye lovinyama viaye volonjo. Puãi wosi ka sumbilile ondaka ya Yehova wa sia akuenje vaye lovinyama viaye vusenge.” (Etu. 9:18-21) Ocili okuti Yehova wa eca otembo yi tẽla oco Fareo lakuenje vaye va lipongiye. Vana va lipongiya lonjanga ka va kuatiwile locilunga caco.

Fareo lakuenje vaye osimbu efengi liekũi ka lieyile, va lunguiwa. Pole, ovo va lekisa uveke kuenje ka va pokuile. (Etu. 4:22, 23) Omo liaco, ovo va mola olofa viomãla vavo olonuñulo. Ca kala ocilunga cimue cinene! (Etu. 11:4-10; 12:29) Anga hẽ ovo va ponduile oku kapako elungulo? Oco! Mose wa eca lonjanga elungulo ku va Isareli liatiamẽla  kefengi liekũi kuenda wa lombolola ndomo va ponduile oku teyuila apata avo. (Etu. 12:21-28) Omanu vañami va kapeleko elungulo liaco? Ulandu u lekisa okuti, ci pitãhala olohulua vitatu viomanu oku kongelamo va Isareli, la vana okuti a va Isareliko kuenda va Egito. Vosi ava va puluka kesombiso lia Suku kuenje va tunda vo Egito.—Etu. 12:38.

Ovolandu a-a, a lekisa okuti Yehova olonjanja viosi eca komanu otembo yi tẽla, oco va kuate epuluvi lioku kapako alungulo aye. (Esin. 32:4) Momo lie a ci lingila? Upostolo Petulu wa lombolola okuti Yehova “ka yongola okuti umue o nyõliwa, puãi o yongola okuti vosi va likekembela.” (2 Pet. 3:9) Yehova wa kapeleko omanu vaco. Eye wa yonguile okuti va likekembela kuenda va pongolola ovisimĩlo viavo osimbu esombiso ka lieyile.—Isa. 48:17, 18; Va Rom. 2:4.

Koloneke vilo, omanu vosi koluali va kasi oku tambula esapulo limue lionjanga kuenje vosi va sukila oku li kapako. Yesu eci a kala palo posi, wa lungula okuti voluali mu ka pita “ohali ya piãla” kuenda lu ka nyõliwa. (Mat. 24:21) Eye wa tukula ocitumasuku cimue ci lombolola eci olondonge viaye via ponduile oku mola kuenda ovitangi va laikele oku liyaka lavio eci otembo yaco ya laikele oku pitĩla. Vocitumasuku caco, eye wa lombolola ovina vi kasi oku pita voluali kotembo yilo.—Mat. 24:3-12; Luka 21:10-13.

Omo okuti tu kasi kotembo ocitumasuku caco ci kasi oku tẽlisiwa, Yehova o kasi oku eca elungulo komanu vosi. Eye o yongola okuti vosi va nõla oku u vumba loku u pokola omo okuti vosi va ci linga, va pondola oku kuata omuenyo uwa cilo kuenda asumũlũho alua voluali luokaliye. (2 Pet. 3:13) Yehova o yongola okuti omanu va kolela kolohuminyo viaye. Omo liaco, eye o kasi oku eca epuluvi komanu vosi lioku yeva “olondaka evi viwa Viusoma.” Yesu wa popia okuti esapulo eli li nena eyovo komanu, lia laikele oku kundilua “koluali luosi ha vi lingi uvangi kolofeka viosi.” (Mat. 24:14) Suku o kasi oku songuila afendeli vaye oku eca “uvangi” waco, okuti oku kunda esapulo lia Suku kueci ci soka 240 kolofeka. Yehova o yongola okuti etendelo lialua liomanu li yeva esapulo liaco, oco li puluke “kocilunga” cesombiso li kasi ocipepi.—Sof. 1:14, 15; 2:2, 3.

Ka tu ka simi okuti Yehova ka eci otembo yi tẽla oco omanu va yeve alungulo aye. Ndomo ca lekisiwa ale, olonjanja viosi eye eca elungulo. Epulilo li lingiwa lieli: Anga hẽ omanu va ka kapako elungulo lia Suku osimbu kuli epuluvi? Yehova wa tu ĩha esumũlũho lioku eca esapulo liatiamẽla kokuaye. Omo liaco, likolisilako oku kuatisa omanu valua, oco va ka puluke kesulilo lioluali lulo!