1. Momo lie Yehova a sesamẽlela efendelo lietu?

YEHOVA eye ululiki kuenda eye wa tu ĩha omuenyo. Omo liaco, eye lika o sesamẽla efendelo lietu. (Esit. 4:11) Pole, kuli ohele yimue. Ndaño okuti tu sole Yehova kuenda tuo sumbila, pamue tu ecelela okuti ovina vimue vi tu tateka oku u fendela lutima wosi. Tu sukila oku kũlĩha ndomo ci pondola oku lipita. Pole, tete tu kũlĩhĩsa eci ci lomboloka oku fendela lika Yehova.

2. Ndomo Elivulu Lietundilo 34:14 li lekisa, nye ci lomboloka oku fendela lika Yehova?

² Vembimbiliya, oku sumbila Yehova ci lomboloka oku u kuatela ocisola cocili. Oku fendela lika Yehova ci lomboloka oku tiamisila lika efendelo lietu kokuaye. Ka tu ecelela okuti omunu umue, ale ocina cimue ci tu tateka.—Tanga Etundilo 34:14.

3. Momo lie efendelo lietu ku Yehova liocili?

³ Efendelo lietu ku Yehova liocili. Momo lie? Momo olio lia kunamẽla kovina tua siata oku lilongisa viatiamẽla kokuaye. Etu tua kũlĩha kuenda tua siata oku komõha ovituwa viwa via Yehova. Tua kũlĩhavo ovina Yehova a sole levi a nyãle kuenje tu ci tendavo lonjila yimuamue. Handi vali, tua kũlĩha ocipango ca Yehova kuenda tu tava ocipango caye catiamẽla komanu. Kokuetu, esumũlũho limue linene oku kuata epuluvi lioku kala ekamba lia Suku. (Osa. 25:14) Ovina viosi  tu lilongisa viatiamẽla Kululiki wetu, vi tu vetiya oku kuata ukamba laye.—Tia. 4:8.

4. (a) Ovina vipi Eliapu lia siata oku kuama oco efendelo lietu ku Yehova li tepuluke? (b) Nye tu konomuisa vocipama cilo?

⁴ Eliapu lia viala oluali lulo. Kuenda olio likuama oluali luaco, oco li yapuise ovisimĩlo vietu kuenda olonjongole vietu. (Va Efe. 2:1-3; 1 Yoa. 5:19) Ocimãho calio oku tepa utima wetu. Nda utima wetu wa tepiwa, ka tu fendela Yehova lutima wosi. Vocipama cilo, tu konomuisa olonjila vivali ndomo Eliapu lia siata oku ci linga. Tete, olio li tu vetiya oku sola calua olombongo. Vali, olio li tu vetiya oku nõla ovitalukilo ka via sungulukile.

5. Momo lie tu sukilila oku li lava kocisola coku sola olombongo?

⁵ Ocili okuti vosi yetu tu sukila eci tu lia, tu wala kuenda ocitumãlo cimue coku kala. Pole, tu sukila oku kuata utate oco ka tu ka fetike oku sola olombongo. Omanu vana va panga onepa koluali, va linga “vakuakusola olombongo,” kuenda va sole eci olombongo vi pondola oku landa. (2 Tim. 3:2) Yesu wa kũlĩhĩle okuti olondonge viaye via ponduile oku setekiwa oku kuata ocisola caco. Omo liaco, Yesu wa popia hati: “Lomue o tẽla oku vumba vacime vavali; pamue o suvuka umue kuenda o sola ukuavo, ale o kakatela umue kuenje o pembula ukuavo. Ka vu tẽla oku vumba Suku kuenda Ovokuasi.” (Mat. 6:24) Omunu o vumba Yehova, pole, o pesila otembo yalua longusu yaye koku sanda ovokuasi voluali lulo, ci lekisa okuti eye o kasi oku vumba vacime vavali. Omunu waco, ka fendela Yehova lutima waye wosi.

6. Nye tu lilongisa kolondaka Yesu a sapuila ekongelo lio ko Laodikea?

⁶ Kesulilo liokocita catete, vamanji kekongelo lio ko Laodikea va lipanda poku popia  hati: “Ndi huasi haime ndi kuete ukuasi kuenda si sukila cimue.” Pole, kovaso a Yehova la Yesu ovo va kala ‘vakuahali, olohukũi, olomeke, haivo va kasi epõlola.’ Yesu ka ecele elungulo kokuavo omo liukuasi va kuata, pole, momo okuti ovo va velisilepo ocisola coku sola olombongo, okuti ukamba va kuatela Yehova ci sule. (Esit. 3:14-17) Nye tu linga nda tua limbuka okuti tua fetika oku sola calua olombongo? Lonjanga yalua tu sukila okupa ovisimĩlo viaco vutima wetu. (1 Tim. 6:7, 8) Nda ka tua ci lingile, utima wetu u ka tepiwa kuenje Yehova ka ka tava vali efendelo lietu. Momo eye “Suku yesepa.” (Esin. 4:24) Olombongo vi pondola oku kala ndati ocina ca velapo komuenyo wetu?

7-9. Nye ove wa lilongisa kulandu wamanji David, ukulu umue wekongelo?

⁷ Tu kũlĩhĩsi ulandu wa manji David, ukulu umue wekongelo okuti ondingupange yimue yiwa, o kasi ko Estados Unidos. Eye muẽle wa litukula okuti ukuambili koku linga upange. Kupange a kala oku talavaya vo wĩha ovikele vikuavo, loku vokiya kofeto yaye kuenje wa limbuka okuti, omanu vo tendele okuti onalavayi yimue ya velapo vofeka yaye. Manji David wa popia hati: “Kotembo yaco nda simĩle okuti epuluvi eli, esumũlũho lia Yehova.” Anga hẽ eci ocili muẽle?

⁸ Manji David noke wa limbuka okuti upange waye wa kala oku tepulula ukamba waye la Yehova. Eye wa popia hati: “Eci ñasi kohongele kuenda kupange woku kunda, ndi sokolola lika kovitangi vio kupange. Nda kala oku nganyala olombongo vialua, pole, nda kuata esakalalo lialua kuenda volohuela viange mua kala ovitangi vialua.”

 ⁹ Manji David wa sukilile oku limbuka eci ca velapo komuenyo waye. Eye hati: “Ame nda sukila oku linga apongoloko komuenyo wange.” Manji David wa linga esokiyo lioku pongolola elivala liaye liupange kuenje wa ci sapuila cime caye. Nye ceyililako? Manji David wa tundisiwa kupange waco! Nye manji David a linga? Eye hati: “Eteke lia kuamamo nda li sonehisa ndukundi wasokamo vokuenda kuotembo yalua.” Noke yotembo yimue, wa linga ukundi wotembo yosi, ukãi waye wa fetikavo upange waco. Manji David kumue lukãi waye, oco va kuate cimue coku litekula, va sanda upange woku yelisa onjo. Upange waco omanu ka va u kapeleko. Pole, ku manji David kumue lukãi waye, upange waco hawoko va velisapo, pole, va pitisa kovaso upange wa Yehova. Ndaño okuti olombongo va kala oku nganyala vitito, olosãi viosi va enda oku kuata ovina viosi va sukilile. Ovo va limbuka ndomo Yehova a tata vana va pitisa kovaso Usoma waye.—Mat. 6:31-33.

10. Tu pondola oku lava ndati utima wetu?

¹⁰ Cikale okuti tu lohuasi, ale tu lohukũi, vosi yetu tu sukila oku lava utima wetu. Tu ci linga ndati? Tu sukila oku yuvula ocisola coku sola olombongo. Kuenda ku ka ecelele okuti upange woku sanda eteku u velapo calua okuti upange wa Yehova ci sule. O limbuka ndati nda eci ci kasi oku pita love? Lipula ndoco: ‘Olonjanja viosi ndi sokolola lika hẽ ovina vio kupange eci ndi kasi kolohongele kuenda koku kunda? Ndi sakalala calua loku kuata olombongo kuenda ekalo liwa kovaso yoloneke? Ngecelela hẽ okuti olombongo kuenda ovina vikuavo vi nena ovitangi volohuela viange? Anga hẽ ndi tava oku linga upange una okuti omanu ka va u kapeleko, oco ndi kuate otembo yalua yoku linga upange wa Yehova?’ (1 Tim. 6:9-12) Poku sokolola kapulilo a-a, limbuka okuti Yehova o tu sole calua. Eye o linga ohuminyo eyi ku vana va fendela lika eye hati: “Ame lalimue eteke hu sia, ale oku ku yanduluka.” Eli olio esunga lieci upostolo Paulu a sonehela hati: “Yuvuli ocisola coku sola olombongo.”—Va Hev. 13:5, 6.

11. Ovitalukilo vi pondola oku koka nye komunu umue?

¹¹ Yehova o yongola okuti tu kuata esanju komuenyo. Ocina cimue ci tu kuatisa oku kuata esanju liaco, ovitalukilo. Embimbiliya li popia okuti, “ciwa komunu ceci, oku lia loku nyua loku sanjukila upange waye,  ca velapo ka kuli.” (Uku. 2:24) Pole, onepa yalua yovitalukilo vi sangiwa voluali, vi pondola oku tu yapuisa. Ovitalukilo viaco via siata oku soliwa lomanu valua ndaño okuti, Ondaka ya Suku yi pisa ovina viaco.

12. Ndomo ca tangiwa 1 Va Korindo 10:21-22, momo lie tu sukilila oku nõla lutate ovitalukilo vietu?

¹² Tu yongola lika oku fendela Yehova. Omo liaco, ka ci tava okuti vonjanja yimuamue tu lia “komesa ya Yehova” kuenda “komesa yolondele.” (Tanga 1 Va Korindo 10:21, 22.) Oku lia lomunu umue olonjanja vimue, ondimbukiso yokuti pali ukamba. Nda tua nõla ovitalukilo vina okuti mua kongela ungangala, umbanda, evĩho liukahonga, ale olonjongole vietimba kuenda ovisimĩlo vĩvi, ci ka lekisa okuti tu kasi oku litekula lokulia kua pongiyiwa lovanyãli va Suku. Eci ci pondola oku tu kokela ovitangi kuenda tu nyõlavo ukamba tu kuete la Yehova.

13-14. Ndomo ca tangiwa ku Tiago 1: 14, 15, momo lie tu sukilila oku lekisa utate koku nõla ovitalukilo? Ci lombolola.

¹³ Ovitalukilo vi pondola oku sokisiwa lokulia. Eci tu lia cimue, tu nõla eci tu yongola oku kapa vomẽla. Pole, noke yo kuina ka tu kũlĩha eci okulia ku ka linga vetimba lietu. Ovina tu lia vi iñila vetimba lietu. Okulia kuwa ku tu nenela uhayele; pole, okulia kua pongiyiwa lãvi ku tu kokela oku vela. Vepuluvi liaco pamue ka tu ci limbuka, pole, vokuenda kuotembo ci ka limbukiwa.

¹⁴ Cimuamue haico ci pita eci tu nõla ovitalukilo. Tu pondola oku kũlĩhĩsa ovina tu ecelela okuti vi iñila vovisimĩlo vietu. Pole, ovitangi vi yililako ka tu kuete ndomo tu vi tutuiya. Ovitalukilo viwa vi tu kavuluisa. Pole, ovitalukilo ka via sungulukile vi tu nyõla (Tanga Tiago 1:14, 15.) Ovitangi vi yilila kovitalukilo ka via sungulukile, pamue vepuluvi liaco ka vi limbukiwa, pole, noke vi ka limbukiwa. Eli olio esunga lieci Embimbiliya li tu lunguila hati: “Ko ka kembiwi: Suku ka tombiwa. Momo eci omunu a kũla, haico ongula; u o kũla loku sokolola oloñeyi vietimba, ungula oku nyõleha kuetimba liaye.” (Va Gal. 6:7, 8) Omo liaco, ci kuete esilivilo kokuetu oku yuvula ovitalukilo viosi vi lekisa ovina Yehova a nyãle!—Osa. 97:10.

15. Ombanjaile yipi Yehova a tu ĩha?

¹⁵ Afendeli valua va Yehova va sole oku tala o JW Broadcasting^®, muna mu lekisiwa ovipama viwa vi tu kuatisa. Manji umue o tukuiwa Marilyn, wa popia hati: “Ovipama vio JW Broadcasting, via siata oku ndi kuatisa oku kuata esanju kuenda ovipama viaco viosi ndi vi tala, momo viwa. Eci ñasi lika liange ale lesumuo, ndi pamisiwa calua lolohundo vi lembeleka, ale poku yevelela loku tala Efendelo liomẽle liocisonehua ceteke. Eci ci ñuatisa oku amẽla ku Yehova kuenda kocisoko caye. Ovipama viosãi vio JW Broadcasting, via pongolola omuenyo wange.” Handi vali, vo JW Broadcasting mu sanguiwavo ovipama vikuavo via ngalavaliwa, olovideo kuenda ovisikilo vi vetiya. Ove hẽ wa siata oku kuatisiwa lombanjaile eyi ya Yehova?

16-17. Momo lie tu sukilila oku kũlĩha otembo tu pesila kovitalukilo kuenda ndamupi tu ci linga?

¹⁶ Ka tu sukila lika oku nõla ovitalukilo, pole, tu sukilavo oku kũlĩhĩsa otembo tu pesila kovitalukilo viaco. Nda ka tua ci lingile, tu pondola oku pesela otembo yalua kovitalukilo, okuti kupange wa Yehova ci sule. Komanu vamue, ka ci leluka oku limbuka otembo va pesila kovitalukilo. Manji umue o tukuiwa Abigail ukuanyamo 18, wa popia  hati: “Oku tala otelevisão ci ñuatisa oku puyuisa etimba kesulilo liupange walua. Pole, nda sia kuatele utate ndi pesela otembo yalua oku tala otelevisão.” Manji umue umalẽhe o tukuiwa Samuel, wa popia hati: “Ame nda enda oku tala olovideo vimue vitito vo Internet, vokuenda kuotembo yalua. Ame ndi fetika oku tala ovideo yimosi, noke ndi limbuka okuti kua pita ale olowola vitatu ale vikuãla.”

¹⁷ Nye o sukila oku linga oco o kũlĩhe otembo o pesila kovitalukilo? Ocina catete o sukila oku linga, oku limbuka otembo o kasi ale oku pesila kocitalukilo caco. Seteka oku linga esokiyo limue vokuenda kuosemana. Soneha otembo wa pesila koku tala otelevisãu, oku iñila vo Internet kuenda oku linga omapalo votelefone yove. Nda wa limbuka okuti o kasi oku pesela otembo yalua, linga esokiyo limue. Sokiya otembo yoku linga tete ovina via velapo, noke otembo yi supapo yi kala yovitalukilo. Noke pinga ku Yehova oco a ku kuatise oku tẽlisa esokiyo wa linga. Nda wa ci linga, o ka kuata otembo kuenda ongusu yoku linga elilongiso Liembimbiliya pokolika, efendelo liepata, oku endaenda kolohongele kuenda kupange woku kunda. Handi vali, ku livetela evelo omo lioku pesela otembo lovitalukilo.

18-19. Tu lekisa ndati okuti tu kasi oku fendela lika Yehova?

¹⁸ Upostolo Petulu noke yoku popia catiamẽla koku sulila kuoluali lua Satana kuenda okuiya kuoluali luo kaliye, wamisako hati: “A vamanji wa soliwi, omo vu kasi oku lavoka ovina evi, likolisiliko okuti eci vu sangiwa laye ka vu kala latime, pamue amome, te lombembua.” (2 Pet. 3:14) Eci ci lekisa okuti, tu sukila oku likolisilako oku ambata omuenyo umue u sanjuisa Yehova. Nda oco tua linga, tu lekisa okuti tu kasi oku fendela lika Yehova.

¹⁹ Satana loluali luaye va kamamako oku tu seteka okuti tu pitisa kovaso ovina vikuavo, okuti Yehova hayeko. (Luka 4:13) Ndaño lovitangi viaco, ka tu ecelela okuti umue ale ocina cimue ci piñainya Yehova vutima wetu. Omo liaco, tu nõlipo oku eca ku Yehova eci a sesamẽla okuti, efendelo lietu liutima wosi!