1. Momo lie omanu valua va kuetele atatãhai?

KULI atavo alua koloneke vilo va litukula okuti Akristão kuenda ovo va popia okuti va fendela Suku lonjila yimue yu sajuisa. Eli olio esunga lieci omanu valua va kuetele atatãhai! Ovo va pula vati: “Kuli hẽ etavo limue okuti liocili, ale atavo osi a sanjuisa Suku? Tua kolela hẽ okuti ovina tu kasi oku longisa viocili kuenda efendelo Olombangi Via Yehova vikuãi koloneke vilo li taviwa hẽ la Yehova? Anga hẽ ci tava oku kolela kuvangi waco? Tu konomuisi ovina viaco.

2. Ndomo ca lekisiwa 1 Va Tesalonike 1:5, momo lie upostolo Paulu a kolelele kocili?

² Upostolo Paulu wa kolele muẽle kocili. (Tanga 1 Va Tesalonike 1:5.) Eye ka kolelele lika kocili caco omo liesanju a kuata. Pole, Paulu lutate wa lilongisa Ondaka ya Suku. Eye wa tavele okuti “Ovisonehua viosi vi Kola, vi tunda ku Suku.” (2 Tim. 3:16) Ovina vipi eye a lilongisa? Vovisonehua, Paulu wa sanga ovovangi a lekisa okuti Yesu wa kala Mesiya wa likuminyiwa, uvangi una okuti asongui vetavo lia va Yudea va u likala. Asongui vaco vetavo va enda oku popia okuti va kala oku longisa komanu ocili catiamẽla ku Suku, pole, va lingaile ovina Suku a nyãle. (Tito 1:16) Paulu wa litepele lasongui vaco, momo eye wa tavele olonepa viosi Viondaka ya Suku. Eye wa nõlelepo oku longisa loku kapako “elungulo liosi lia Suku.”—Ovil. 20:27.

3. Anga hẽ tu sukila oku tambulula apulilo osi, oco tu tave okuti tu kuete ocili? (Talavo okakasia losapi hati: “ Ovopange a Yehova Kuenda Ovisimĩlo Viaye—‘Oku vi Lombolola Nda Vialua Calua!’”)

 ³ Vamue va sima okuti etavo liocili li tẽla oku tambulula apulilo osi, ndaño muẽle apulilo ana ka a kunamelele Vembimbiliya. Anga hẽ eci ocili? Tu konomuisi ulandu wa Paulu. Eye wa sapuila Akristão vakuavo oku ‘kũlĩhĩsa ovina viosi,’ pole, eye wa popiavo okuti kua kala ovina vialua ka kuatele elomboloko. (1 Va Tes. 5:21) Eye wa soneha hati, “Momo ukũlĩhĩso tu kuete ka wa suilepo” “ci kasi ndu okuti tu kasi oku vanja volumuĩlo wutale.” (1 Va Kor. 13:9, 12) Paulu ka kuatele elomboloko liovina viosi; cimuamue haico letu. Pole, Paulu wa kũlĩhĩle alongiso atete atiamẽla ku Yehova. Eye wa kolelele okuti ovina a kũlĩha viocili!

4. Tu pamisa ndati ekolelo lietu liokuti tua sanga ocili kuenda nye tu konomuisa catiamẽla Kakristão vocili?

⁴ Onjila yimue yoku pamisa ekolelo lietu liokuti tua sanga ocili, poku sokisa eci Yesu a lingaile leci Olombangi Via Yehova vi kasi oku linga koloneke vilo. Vocipama cilo, tu kũlĩhĩsa okuti Akristão vocili (1) va yuvula oviteka, (2) va sumbila onduko Yehova, (3) va sole ocili kuenda (4) va lisole pokati.

5. Nye tu lilongisa konjila ndomo Yesu a fendela Suku kuenda tu kapako ndati ovina eye a longisa?

⁵ Yesu omo liocisola calua a kuatela Yehova, co vetiya oku u fendela lika eye, ci kale eci a kala kilu leci a kala palo posi. (Luka 4:8) Eye wa longisavo olondonge viaye oco vi fendele lika Yehova. Ci kale Yesu kuenda olondonge viaye, va yuvula efendelo lioviñumañuma. Suku ka muiwa lovaso, omo liaco omunu ka pondola oku linga lacimue okuti ocisetãhasa la Yehova! (Isa. 46:5) Pole, nye  ci popiwa koviñumañuma vina omanu va siata oku sima okuti vi kola kuenda va likutilila kokuavio? Kovihandeleko ekũi, cavali Yehova hati: “Ku ka lisongele ociñumañuma ale esetahãlo liocina cimue ci kasi kovailu . . . Ku ka vi kekamẽle.” (Etu. 20:4, 5) Omanu vana va yongola oku sivaya Suku va kuete elomboloko liokuti eye ka yongola okuti tu fendela oviñumañuma.

6. Onjila yipi yefendelo Olombangi Via Yehova vikuãi koloneke vilo?

⁶ Vakuakulilongisa asapulo va popia okuti kotembo yovapostolo, Akristão va enda oku fendela lika Suku. Ndeci elivulu limue liasapulo lia popia hati, Akristão “va suvukile ocisimĩlo coku kapa oviñumañuma kovitumãlo viefendelo.” Koloneke vilo, Olombangi Via Yehova vikuãivo ongangu Yakristão vokocita catete. Etu, ka tu tiamisila olohutililo vietu koviñumañuma “vi kola,” ale kovangelo; ndaño muẽle ku Yesu. Handi vali, ka tu lingi ovipito viofeka. Ndaño okuti umue o tu kisika oku ci linga, etu tua nõlapo oku pokola kolondaka via Yesu viokuti: “Fendela Yehova Suku yove.”—Mat. 4:10.

7. Volonjila vipi Olombangi Via Yehova via litepa latavo akuavo?

⁷ Koloneke vilo, omanu valua va sole oku yevelela asongui vavo vovonembele. Ovo va siata oku komõha calua asongui vaco kuenje va kala ndu va va fendela. Omanu valua va kuete ocituwa coku enda kolonembele, va landa alivulu avo kuenda va eca olombanjaile vialua kovitumãlo vi tumiwa lasongui vaco. Ovo va kakatela kolondaka viavo viosi. Ovo va sanjukila calua oku mola asongui vavo ndu okuti va lete Yesu! Pole, vana va fendela Suku lonjila ya sunguluka, ka va kuama omunu. Ndaño okuti tua sumbila vana va kuete omoko yoku songola, etu tu tava kelongiso lia Yesu liokuti: “Vosi yene vu vamanji.” (Mat. 23:8-10) Etu ka tu fendela omunu, ci kale nda usongui wetavo, ale usongui wo pulitika. Ka tu va kuatisa kovimãho viavo. Etu ka tu litengi vopulitika kuenda ka tu pangi onepa yoluali. Konepa eyi, tua litepa calua latavo akuavo ana a litukula okuti, Akristão.—Yoa. 18:36.

8. Tua kũlĩha ndati okuti Yehova o yongola oco onduko yaye yi muisue ulamba kuenda yi kũlĩhiwa lomanu vosi?

⁸ Onjanja yimue Yesu wa likutilila hati: “A Tate, muisa ulamba onduko yove.” Yehova wa tambulula ohutililo yaco lolukandi oku upisa kilu poku likuminya okuti, eye wa ponduile oku muisa ulamba onduko yaye. (Yoa. 12:28) Yesu kupange waye woku kunda, wa muisa ulamba onduko ya Isiaye. (Yoa. 17:26) Omo liaco, Akristão vocili va tenda okuti esumũlũho oku tukula onduko ya Suku kuenda oku yi sapuila komanu.

9. Akristão vokocita catete va lekisa ndati okuti va sumbilile onduko ya Suku?

⁹ Kocita catete K.K., noke liekongelo Liakristão oku tumbikiwa, Yehova wa “ivaluka omanu vo kolofeka vikuavo kuenda pokati kavo eye wa fetika oku nõla omanu vambata onduko yaye.” (Ovil. 15:14) Akristão vaco, va sanjukilile oku tukula onduko ya Suku kuenda oku yi sapuila komanu vakuavo. Ovo va endaile oku tukula onduko ya Suku kupange woku kunda kuenda poku soneha alivulu Embimbiliya. * Lonjila eyi, va lekisa okuti ovo lika va sandeka onduko ya Suku.—Ovil. 2:14, 21.

10. Tua kũlĩha ndati okuti Olombangi Via Yehova ovio lika vi sapula onduko Yehova?

 ¹⁰ Anga hẽ Olombangi Via Yehova ovio lika vi sapula onduko Yehova? Tu konomuisi uvangi waco. Koloneke vilo, asongui valua vatavo va siata oku linga ovina vialua, oco va limbike onduko ya Suku. Ovo va siata okupa onduko yaco Vambimbiliya kuenda ka va ecelela okuti onduko ya Suku yi tukuiwa volonembele viavo. * Citava okuti umue o kuata atatãhai okuti, anga hẽ Olombangi Via Yehova ovo lika va eca ulamba konduko ya Yehova loku yi sumbila? Ocili okuti, etu lika tu sandeka onduko ya Suku, atavo akuavo ka a ci lingi! Etu tu likolisilako kupange waco oco okuti ekalo lietu li li kuata londuko tuambata, okuti Olombangi Via Yehova! (Isa. 43:10-12) Etu tua siata oku panga eci ci soka 240 kolohuluwa Viembimbiliya li Kola Epongoluilo Lioluali Luokaliye, okuti mu sangiwa onduko Yehova povitumãlo vina okuti, Vambimbiliya akuavo onduko yaco yopiwamo. Tu pongololavo alivulu a kunamẽla Kembimbiliya okuti a sandekavo onduko Yehova kueci ci pitahãla 1.000 kalimi!

11. Akristão vatete va lekisa ndati okuti va solele ocili?

¹¹ Yesu wa solele ocili, okuti ocili catiamẽla ku Suku kuenda kocipango Caye. Ekalo liomuenyo wa Yesu, wa lekisile okuti, wa tavele  kocili kuenda wa sapula ocili caco ku vakuavo. (Yoa. 18:37) Olondonge via Yesu, via solalevo calua ocili. (Yoa. 4:23, 24) Kuenje upostolo Petulu wa tukula Akristão vakuekolelo ‘ndonjila yocili.’ (2 Pet. 2:2) Akristão vo kocita catete omo liocisola ca pama va kuatela ocili, ovo va likala alongiso atavo, oviholo viofeka kuenda ovisimĩlo viomanu okuti, ka vi likuata locili. (Va Kol. 2:8) Cimuamue haico koloneke vilo, Akristão vocili va likolisilako “oku endela vocili,” poku kunamẽla alongiso avo kuenda ekalo liavo Vondaka ya Yehova.—3 Yoa. 3, 4.

12. Nye ci pita, eci vamanji va songola va limbuka okuti elomboloko lietu li sukila oku mioñoluiwa kuenda momo lie va lingila apongoloko aco?

¹² Afendelli va Suku koloneke vilo, ka va popi okuti va kuete elomboloko liosi lia suapo Liembimbiliya. Pamue ovo va lueya konjila ndomo ovo va lombolola alongiso amue Embimbiliya, ale poku eca olonumbi vekongelo. Eci ka ci tu komõhisa. Embimbiliya li lombolola okuti, ukũlĩhĩso wocili u livokiya vokuenda kuotembo. (Va Kol. 1:9, 10) Yehova o situlula ocili kamue kamue kuenje tu sukila oku talamẽla lepandi toke eci tu kuata elomboloko lia suapo liocili. (Olosap. 4:18) Eci Osungu Yolombangi Via Yehova, vi limbuka okuti tu sukila oku linga apongoloko kelomboloko lietu kuenda konjila yoku linga ovina, ovo lonjanga va linga apongoloko aco. Atavo alua koloneke vilo, va pongolola onjila yavo yoku longisa, momo va yongola oku sanjuisa oloñame viavo, ale oku kuata oluhimo voluali, pole, Olombangi Via Yehova vi linga apongoloko aco, momo va yongola oku pamisa vali ukamba wavo la Suku, loku u fendela lonjila yimuamue ndeci Yesu. (Tia. 4:4) Eci tu linga apongoloko, ka tu ci lingila poku kuama ovisimĩlo viomanu voluali, pole, tu ci lingila omo okuti tua kuata elomboloko lia suapo Liembimbiliya. Etu tu sole ocili!—1 Va Tes. 2:3, 4.

13. Ocituwa cipi ca velapo ca lekisiwa Lakristão vocili kocita catete kuenda Olombangi Via Yehova via siata oku ci lekisa ndati koloneke vilo?

¹³ Akristão vatete va kũlĩhĩwile omo liovituwa vialua viwa, pole, cimue ca velapo vali okuti oco va kũlĩhĩwile laco, ocisola. Yesu wa popia hati: “Poku ci linga, vosi va ka limbuka okuti vulondonge viange, nda wa lisoli pokati.” (Yoa. 13:34, 35) Koloneke vilo, Olombangi Via Yehova vi lekisa ocisola caco kuenda va likuete omunga voluali luosi. Etu tua litepa latavo osi, omo okuti tua litenda ndepata ndaño okuti, tu tunda kolofeka via litepa, ovituwa via litepa kuenda tuakuakova a litepa. Etu tu lete ocisola caco kolohongele vietu viekongelo, kolohongele vimbo kuenda viofeka. Eci ci tu ĩha vali ekolelo liokuti efendelo lietu li taviwa la Yehova.

14. Ndomo ca tangiwa ku Va Kolosai 3:12-14, kolonjila vipi via velapo tu lekisa okuti tu lisole pokati?

¹⁴ Ovisonehua vi tu sapuila okuti “lisoli pokati.” (1 Pet. 4:8) Onjila yimue yoku lekisa ocisola caco poku ecela vakuetu kuenda oku yuvula oku kapako akulueya avo. Tu kuete apuluvi oku kala vakuacali loku yekisa vosi vekongelo, oku kongelamo vana va siata oku tu lueyela. (Tanga Va Kolosai 3:12-14.) Eci tu lekisa ocisola caco, tu eca uvangi wokuti, Tuakristão vocili.

15. Olonjila vipi vikuavo tu kuama yoku fendela ndomo ca lingaile Akristão vatete?

¹⁵ Etu tu kuamavo olonjila vikuavo viefendelo ndomo ca lingaile Akristão vokocita catete. Ndeci, etu tu kuama esokiyo limuamue  ndeli Liakristão vaco okuti, tu kuete vamanji vanyula akongelo, akulu vekongelo kuenda oloñuatisi viekongelo ndeci ovo va enda oku ci linga. (Va Fil. 1:1; Tito 1:5) Onjila ndomo tu tenda oku lipekela kuenda olohuela, oku sumbila oku kola kuosonde kuenda oku teyuila ekongelo ku vana va linga ekandu okuti ka va likekembela, tu kuãi onjila yimuamue ndeyi Akristão vatete va lingaile.—Ovil. 15:28, 29; 1 Va Kor. 5:11-13; 6:9, 10; Va Hev. 13:4.

16. Nye tu pondola oku lilongisa kolondaka vi sangiwa ku Va Efeso 4:4-6?

¹⁶ Yesu wa popele okuti valua va ka litukula hati olondonge viaye, pole, havosiko va laikele oku kala vakuacili. (Mat. 7:21-23) Ovisonehua via popelevo okuti koloneke via sulako, omanu valua “va ka li lekisa ndu okuti va sumbila Suku.” (2 Tim. 3:1, 5) Pole, Embimbiliya li tu sapuila okuti kuli lika “ekolelo limosi” Suku a tava.—Tanga Va Efeso 4:4-6.

17. Velie vakuãi Yesu koloneke vilo loku kapako ekolelo liocili?

¹⁷ Velie va kasi oku kapako ekolelo liocili koloneke vilo? Etu tua siata oku mola uvangi waco. Etu tua siata oku kuama efendelo Yesu a longisa kuenda lia kuamiwavo Lakristão vokocita catete. Koloneke vilo, etambululo lieli okuti, Olombangi Via Yehova. Esumũlũho linene oku panga onepa kafendeli va Yehova loku kũlĩha ocili catiamẽla ku Yehova kuenda kolohuminyo viaye! Omo liaco, tuamamiko oku pamisa ekolelo lietu kuvangi tu kuete wa tiamẽla kocili.