ANYAMO osi, olomeme vialua vi kasi oku tiuka vekongelo Liakristão. Sokolola ‘esanju lialua li kala kilu’ eci umue a tiuka! (Luka 15:7, 10) Nda ove wa tiuka vekongelo, kolela okuti Yesu, ovangelo kuenda Yehova va sanjuka calua oku mola okuti ove wa tiuka vocili. Pole, osimbu o tumbulula ukamba wove la Yehova o pondola oku liyaka lovitangi vialua. Vipi vimue pokati kovitangi viaco kuenda nye ci pondola oku ku kuatisa?

Vamanji valua handi va liyaka lesumuo lialua noke lioku tiuka vekongelo. Citava okuti, o kuata elomboloko ndomo soma Daviti a liyeva. Ndaño muẽle noke liakandu aye oku eceliwa, eye wa popia hati: “Akandu ange a ndi yula.” (Osa. 40:12; 65:3) Vamue, noke lioku tiuka ku Yehova, ovisimĩlo vioku livetela evelo, ale osõi vi pondola oku kala anyamo alua. Manji umue Isabelle wa tundisiwile vekongelo vokuenda kueci ci soka 20 kanyamo. * Eye wa popia hati: “Ca tĩlile calua oku tava kocisimĩlo cokuti Yehova wa ponduile oku ngecela.” Nda ove o sumua, ukamba wove la Yehova u pondola vali oku hongua. (Olosap. 24:10) Ku ka ecelele okuti eci ci pita love.

Vamue va kuata usumba wokuti ka va ka tẽlisa ovina viosi via kongela voku tumbulula vali ukamba wavo la Yehova. Manji Antoine noke lioku tiuka wa popia hati: “Nda liyeva okuti nda ivala ovina viosi nda lilongisile, eci nda kala Ombangi ya Yehova.” Omo liovisimilo viaco vamue va kuata ohele yoku lieca oku linga cosi va pondola kupange wa Yehova.

Ndocindekaise, omunu una okuti onjo yaye ya posoka ya tunguluiwa locilunga cimue, o kuata ocikele coku pesela otembo kuenda upange u sukiliwa  oco a tumbulule onjo yaco. Cimuamue haico okuti, nda ukamba wa kuatele la Yehova wa nyõleha omo liekandu linene wa linga, o sukila oku likolisilako calua oco ukamba waco o u tumbulule. Pole, o kuete ekuatiso.

Yehova o tu laleka hati: “Cilo, enjui kuenda tu tetululi ovitangi vi kasi pokati ketu.” (Isa. 1:18) Ove wa likolisilako calua koku ‘tetulula ovitangi.’ Yehova oku sole calua omo lielikolisilo wa linga. Sokolola okuti: Ove wa eca ku Yehova esunga lioku eca etambululo kalundi a Satana!—Olosap. 27:11.

Omo lioku tiuka ku Yehova, ove o kasi oku amẽla kokuaye kuenje eye o likuminya okuti amelavo kokuove. (Tia. 4:8) Ndaño okuti vakuene va sanjuka oku ku mola okuti wa tiuka vali vekongelo, pole, mua kongela oku linga ovina vikuavo. Ove o sukila oku amamako oku pamisa ocisola cove ku Isiove haiye Kamba liove, Yehova. O ci linga ndati?

Seteka oku nõla ovimãho via sunguluka. Citava okuti, ove handi ivaluka alongiso atete wa lilongisa catiamẽla ku Yehova kuenda kolohuminyo viaye violuali luokaliye. Pole, o sukila oku kuata vali ovimãho viwa ndeci, oku kunda olonjanja viosi, oku endaenda kolohongele kuenda oku pita otembo la vamanji. Kũlĩhĩsa ovimãho vikuãimo.

Sapela la Yehova olonjanja viosi. Isiove wa kũlĩha okuti ovisimĩlo vioku livetela evelo vi pondola oku tateka oku likutilila kokuaye. (Va Rom. 8:26) Kuenje ‘pandikisa lolohutililo,’ loku sapuila Yehova okuti ove o yongola muẽle oku kala ekamba liaye. (Va Rom. 12:12) Manji umue o tukuiwa Andrej ivaluka hati: “Ame nda livetela evelo kuenda nda kuata osõi. Pole, eci ndi likutilila ndi liyeva ciwa. Kuenje nda enda oku yeva ombembua vutima.” Nda ku kuete olondaka vioku tukula vohutililo kũlĩhĩsa olondaka viohutililo via Soma Daviti wa likekembela vi sangiwa Kolosamo 51 kuenda 65.

Tanga Embimbiliya eteke leteke. Eci ci ka ku kuatisa oku kuata ekolelo lia pama kuenda oku vokiya ocisola o kuetele Yehova. (Osa. 19:7-11) Manji umue o tukuiwa Felipe wa popia hati: “Omo okuti sia kuatele ocituwa coku tanga Embimbiliya eteke leteke kuenda elilongiso lio pokolika, ndeya oku hongua kuenje nda sumuisa Yehova. Ame sia yonguile oku sumuisa vali Yehova, omo liaco nda nõlapo oku lingainga elilongiso liange lio pokolika oco ndi li teyuile.” Ove o pondola oku linga cimuamue. Nda o sukila ekuatiso koku nõla ocipama cimue celilongiso liove lio pokolika, pinga ekuatiso kekamba limue okuti li kuete ukamba wa pama la Yehova.

Tumbulula ukamba wove la va manji. Vamue va siata oku tiuka vekongelo va sima okuti vamanji va ka va tenda lonjila yimue ka ya sungulukile. Manji Larissa wa lombolola hati: “Ame nda kala losõi yalua. Nda liyeva ndu okuti nda sumuisa calua vamanji. Ovisimĩlo viaco nda kala lavio vokuenda kuotembo yalua.” Kolela okuti akulu vekongelo kuenda vamanji vakuavo, va yongola oku ku kuatisa oco o tumbulule vali ukamba o kuetele Yehova. (Tala okakasia losapi hati: “ Nye Akulu Vekongelo va Sukila Oku Linga?”) Akulu vekongelo va sanjukila oku ku mola okuti wa tiuka kuenda va yongola okuti ove o liyeva ciwa.—Olosap. 17:17.

Nye ci pondola oku ku kuatisa oku amẽla ku vamanji? Lieca lutima wosi kovina vamanji va kasi oku linga ndeci, oku endaenda kolohongele olonjanja viosi loku linga upange woku kunda. Ci ka ku kuatisa ndati? Manji Felix wa popia hati: “Ekongelo lia kala oku lavoka okuti ndi tiuka. Nda liyeva okuti ndi soliwe. Vosi yavo va ndi kuatisa oku liyeva okuti ndi tiamẽla vali vekongelo okuti Yehova wa ngecela kuenda ndi pondola oku amamako oku vumba Yehova.”—Tala okakasia losapi hati: “ Nye Ove o Sukila Oku Linga?”

Satana o ka amamako oku ku kokela “ovitangi,” oco a seteke oku ku yapuisa osimbu o pamisa ukamba wove la Yehova. (Luka 4:13) Pamisa ukamba wove la Yehova cilo.

Yehova wa likuminya eci ca tiamẽla kolomeme viaye hati: “Eyi ya nyelẽla ndi ka yi sandiliya, eyi ya pambuka ndi yi nena vali, eyi ya lemẽhiwa ndi yitika kuenda eyi ya hongua ndi ka yi pamisa.” (Esek. 34:16) Yehova wa kuatisa omanu valua oku tumbulula ukamba va kuatele laye. Kolela okuti eye o yongola oku ku kuatisa oco o tumbulule vali ukamba wa pama wa kuata laye.