1. Esanju lietu lia tamba ndati kenyona liukũlĩhĩso wa Suku?

 ESANJU liocili halinako li pita ombamba. Omunu o pondola oku li kuata vokuenda kuomuenyo waye wosi. Ndamupi? Yesu Vohundo a lingila Komunda wa popia hati: “Va sumũlũha vana va kuete enyona liukũlĩhĩso wa Suku.” (Mat. 5:3) Yesu wa kũlĩhĩle okuti omanu va lulikiwa lonjongole yoku kũlĩha kuenda yoku fendela Ululiki wavo, Yehova Suku. Eci ci lomboloka “enyona liukũlĩhĩso wa Suku.” Omo okuti Yehova eye “Suku ukuesanju,” vana vo fendela va sukilavo oku kuata esanju.—1 Tim. 1:11.

2-3. (a) Ndeci Yesu a popia, velie vali va pondola oku kuata esanju? (b) Nye tu konomuisa vocipama cilo kuenda momo lie ci sukiliwila?

² Anga hẽ tu pondola lika oku kuata esanju nda ka tu kuete ovitangi? Sio. Yesu vohundo yaye, wa popia ocina cimue ci komõhisa. Ci kaile “vana va sumua,” omo lioku livetela evelo liakandu avo, ale omo liovitangi vialua va pita lavio, va pondola oku kuata esanju. Haicovo Yesu a popia catiamẽla ku “vana va lambalaliwa omo liesunga,” ale vana va talisiwa ohali loku ‘sepuiwa’ omo lioku kala olondonge via Kristu. (Mat. 5:4, 10, 11) Pole, ci tẽliwa ndati oku kuata esanju liocili poku liyaka lovitangi viaco?

³ Yesu wa tu sapuila okuti, esanju ka lia tambele kekalo liomuenyo wetu, pole, lia tamba koku tanga kuenda oku lilongisa ondaka ya Suku loku pamisa ukamba wetu Laye. (Tia. 4:8) Tu ci linga ndati? Vocipama cilo, tu konomuisa ananga atatu tu sukila oku eca oco tu kuate esanju liocili.

4. Lipi enanga liatete tu sukila oku eca oco tu kuate esanju liocili? (Olosamo 1:1-3)

⁴ ENANGA 1: Oco tu kuate esanju liocili, tu sukila oku tanga kuenda oku lilongisa Embimbiliya. Ci kaile omanu kuenda ovinyama, va sukila oku li tekula konepa yetimba oco va kale lomuenyo. Pole, omanu ovo lika va pondola oku tanga Ondaka ya Suku. Etu tu sukila oku ci linga. Eli olio esunga lieci Yesu a popela hati: “Omunu ka muila lika omuenyo kombolo, te kolondaka viosi vi tunda vomẽla wa Yehova.” (Mat. 4:4) Omo liaco, ka tu ka eceleli oku pita eteke limue okuti ka tu tangi Ondaka ya Suku, Embimbiliya. Ukualosamo wa popia hati: ‘Wa sumũlũha omunu una o sole calua ocihandeleko ca Yehova okuti o ci tanga utanya luteke.’—Tanga Olosamo 1:1-3.

5-6. (a) Nye tu lilongisa Vembimbiliya? (b) Oku tanga Embimbiliya ci tu kuatisa ndati?

⁵ Omo okuti Yehova o tu sole, pocakati Cembimbiliya eye wa tu lekisa eci tu sukila oku linga oco tu kuate esanju komuenyo. Tu lilongisa eci ocipango caye ci lomboloka komuenyo wetu. Tu lilongisavo ndomo tu pondola oku kuata ukamba wa pama laye kuenda eci tu sukila oku linga oco a ecele akandu etu. Handi vali, tu lilongisa eci catiamẽla kelavoko liwa a tu likuminya kovaso yoloneke. (Yer. 29:11) Ovina viocili tu lilongisa Vembimbiliya, vi tu nenela esanju lialua!

⁶ Tua kũlĩhavo okuti, Vembimbiliya mu sangiwa alungulo alua a tu kuatisa eteke leteke. Nda tu kapako alungulo aco, tu kuata esanju. Otembo yosi o yeva esumuo omo liovitangi vialua, likolisilako oku tanga Ondaka ya  Yehova kuenda oku sokolola kueci wa tanga. Yesu hati: “Va sumũlũha vana va yeva ondaka ya Suku kuenje va yi kapako!”—Luka 11:28.

7. O kuatisiwa ndati lotembo o pesila koku tanga Ondaka ya Suku?

⁷ Osimbu o tanga Ondaka ya Suku, sanda otembo yoku kuatisiwa lovina wa tanga. Ndocindekaise, citava okuti wa pitile ale lulandu u kuãimo. Omunu umue o teleka okulia kuna eye a sole calua. Pole, pamue ka kuete otembo yoku lia, ale eye o sokolola kovina vikuavo, kuenje o lia lonjanga yalua okuti, ka yevi oku pepa kuokulia kuaco. Noke yoku mala oku lia o limbuka okuti, wa lia lonjanga kuenda wa yonguile oku livala, oco a yeve oku pepa kuaco. Cimuamue haico ci pita, eci tu tanga Embimbiliya. Olonjanja vimue tu tanga lonjanga yalua okuti, ka tu upi esilivilo kueci tu kasi oku tanga. Omo liaco, sokiya otembo yoku tanga Ondaka ya Suku; sokolola kovolandu aco, kolondaka viomanu va tukuiwa vulandu waco kuenda kueci wa tanga. Nda wa ci linga, o kuata esanju.

8. “Ukuenje wa kolelua haeye wa lunguka” o kasi oku tẽlisa ndati ocikele caye? (Tala etosi.)

⁸ Yesu wa nõla “ukuenje wa kolelua haeye wa lunguka” oco a ece okulia konepa yespiritu votembo ya sokiyiwa kuenje tua siata oku tekuiwa ciwa lokulia kuaco. b (Mat. 24:45) Pokati kalivulu osi ukuenje wa kolelua a siata oku eca, Ovisonehua vi kola ovio ocina catete. (1 Va Tes. 2:13) Okulia kuaco, ku tu kuatisa oku kũlĩha ovisimĩlo via Yehova via situluiwa Vembimbiliya. Tua siata oku ci linga poku tanga olorevista ndeci, Utala Wondavululi kuenda Omasuli!, lovipama vikuavo vi sangiwa vo jw.org. Tu pondola oku pongiya olohongele vio vokati kosemana kuenda vio kesulilo liosemana. Tua siatavo oku tala ulandu wovipama vio JW Broadcasting^® vi sandekiwa osãi losãi. Nda tu likolisilako oku tanga loku lilongisa Embimbiliya, tu pondola oku tẽlisa enanga liavali, lina li tu nenela esanju liocili.

9. Lipi enanga liavali li tu nenela esanju liocili?

⁹ ENANGA 2: Oco tu kuate esanju liocili, tu sukila oku pokola kolonumbi via Yehova. Ukualosamo wa soneha ndoco: “Wa sumũlũha omunu wosi wa sumbila Yehova, una endela volonjila Viaye.” (Osa. 128:1) Oku sumbila Yehova, ci lomboloka oku pokola kokuaye kuenda oku yuvula oku linga ovina viosi viu sumuisa. (Olosap. 16:6) Omo liaco, tuamamiko oku likolisilako oku tẽlisa olonumbi via Yehova viatiamẽla kueci ciwa leci cĩvi, ndomo ci sangiwa Vembimbiliya. (2 Va Kor. 7:1) Tu pondola oku kuata esanju nda tua linga ovina Yehova a sole kuenda oku yuvula ovina eye a suvuka.—Osa. 37:27; 97:10; Va Rom. 12:9.

10. Ndomo ca tangiwa ku Va Roma 12:2, cipi ocikele cetu?

¹⁰ Tanga Va Roma 12:2. Omunu umue pamue, wa kũlĩha okuti Yehova o kuete omoko yoku nõla eci ciwa leci cĩvi, pole, omunu waco o sukilavo oku pokola olonumbi via Suku. Ndeci, omunu umue wa kũlĩha okuti ombiali yi kuete omoko yoku tumbika olongave vioku endisa oviendelo vetapalo. Pole, omunu waco pamue o sinĩla olongave viaco. Kuenje o lupuka calua okuti, ka ci likuata lolongave via tumbikiwa. Etu tu lekisa kovituwa vietu okuti, oku kuama olonumbi via Yehova, oco ocina ca velapo komuenyo wetu. (Olosap. 12:28) Daviti wa liyevavo ndoco eci  a sapuila Yehova hati: “Ove o ndi lekisa onjila yomuenyo. Kovaso yove kuli esanju lialua; peka liove liondio pali esanju otembo ka yi pui.”—Osa. 16:11.

11-12. (a) Eci tu liyaka lasakalalo, ale lesumuo, utate upi tu sukila oku kuata? (b) Olondaka vi sangiwa ku Va Filipoi 4:8, vi tu kuatisa ndati poku nõla olomapalo?

¹¹ Eci tu liyaka lasakalalo, ale lesumuo, pamue tu kuata onjongole yoku linga omapalo yimue yi tu kuatisa oku liwekapo oku sakalala. Ndaño okuti ciwa oku ci linga, pole, tu sukila oku kuata utate, oco ka tu ka lingi ovina Yehova a suvuka.—Va Efe. 5:10-12, 15-17.

¹² Vukanda upostolo Paulu a sonehela Akristão vo ko Filipoi, wa va vetiya oku amamako oku kapako ovina “viosi via sunguluka, . . . viosi via pua etondelo, . . . viosi vi sivayiwa, [kuenda] viosi viwa.” (Tanga Va Filipoi 4:8.) Ndaño okuti Paulu ka sonehele catiamẽla kulala wovitalukilo vi lingiwa, ovina a soneha via ponduilevo oku tu vetiya oku nõla ciwa olomapalo. Seteka ndoco: Polonepa viosi pali ondaka “ovina” vi molẽha vocinimbu, vi piñainya lolondaka viokuti, “ovisikilo,” “olofilme,” “olonovela,” ale “olovideo game.” Oku ci linga, ci ku kuatisa oku limbuka ovina vi taviwa la Suku kuenda vina ka vi taviwa laye. Etu tu yongola okuti, ekalo liomuenyo wetu u likuata lolonumbi via Yehova. (Osa. 119:1-3) Omo liaco, lowanji wutima wa yela, tu konomuisa enanga li kuãimo oco tu kuate esanju liocili.—Ovil. 23:1.

13. Lipi enanga liatatu li tu kuatisa oku kuata esanju liocili? (Yoano 4:23, 24)

¹³ ENANGA 3: Lekisa okuti, wa pitisa kovaso efendelo lia Yehova komuenyo wove. Omo okuti Yehova eye Ululiki wetu, tu sukila oku u fendela. (Esit. 4:11; 14:6, 7) Kuenje ocina ca velapo tu sukila oku linga komuenyo wetu, oku fendela Yehova lonjila eye a tava okuti, “lespiritu kuenda ocili.” (Tanga Yoano 4:23, 24.) Tu yongola okuti, espiritu sandu lia Suku li songuila efendelo lietu oco li li kuate locili ci sangiwa Vondaka yaye. Tu sukila oku pitisa kovaso efendelo lietu ndaño tu kasi vofeka muna okuti, efendelo lietu li kasi oku tatekiwa, ale oku lambalaliwa. Cilo, ci pitahãla 100 ya vamanji alume lakãi va kapiwa vokayike omo lioku kala Olombangi Via Yehova. c Ndaño ndoco, ovo va likolisilako lesanju oku likutilila, oku lilongisa, oku sapuilako vakuavo catiamẽla ku Suku kuenda Kusoma waye! Eci tu lundiliwa, ale oku lambalaliwa, tu pondola oku kuata esanju omo lioku kũlĩha okuti Yehova o kasi letu kuenda o ka tu sumũlũisa.—Tia. 1:12; 1 Pet. 4:14.

14. Nye ca pita la manji umue ukuenje kofeka yo Tajikistão kuenda momo lie?

¹⁴ Vamanji vamue va liyaka lovitangi vialua, va siata oku kuata esanju liocili omo lioku kuama ananga atatu tua konomuisa. Kũlĩhĩsa eci ca pita la manji Jovidon Bobojonov o kuete 19 kanyamo wo ko Tajikistão, wa likala upange wusualali. Keteke 4 ya Mbalavipembe wunyamo 2019, wopiwa vonjo yaye, wa kapiwa vokayike vokuenda kuolosãi kuenda wa tatiwa ndongangala. Ekambo liaco liesunga, lia sandekiwa lovingungu viasapulo vio kolofeka vialua. Kua sapuiwa okuti, wa tipuiwa poku u kisika oku linga ohuminyo yoku kala esualali loku wala uwalo waco. Noke wa pisiwa loku tumiwa kocila coku kangisiwila, toke eci ombiali yofeka yo wecela kuenda oku tuma oku upa vokayike. Vokuenda kuotembo  yaco yosi, manji Jovidon wamamako oku pandikisa lekolelo kuenda lesanju. Wa ci linga ndati? Poku amamako oku litekula lukũlĩhĩso Wondaka ya Suku.

15. Manji Jovidon wa litekula ndati lukũlĩhĩso Wondaka ya Suku osimbu a kala vokayike?

¹⁵ Manji Jovidon osimbu a kala vokayike, wamamako oku lilongisa catiamẽla ku Yehova, ndaño ceci ka kuatele Embimbiliya limue, ale alivulu etu. Eci ca tẽliwa ndati? Vamanji poku ko tualela okulia, va enda oku soneha ocisonehua ceteke volonjeke vambatela okulia. Kuenje oloneke viosi, co wecelela oku tanga Embimbiliya, loku sokolola ovina a tanga. Eci a tunda vokayike, wa eca elungulo ku vana ka va pitile handi vekangiso liaco hati: “Ci kuete esilivilo oku talavaya lelianjo liene, oco vu vokiyi ukũlĩhĩso wene watiamẽla ku Yehova poku tanga Ondaka yaye, lalivulu etu.”

16. Kovina vipi manji Jovidon a tiamisilile ovisimĩlo viaye?

¹⁶ Manjetu wambatele omuenyo u likuata lolonumbi via Yehova. Eye wa yuvula oku sokolola kovina vĩvi, pole, wa tiamisilile utima waye ku Yehova kuenda kovina Eye a tenda okuti via velapo. Manji Jovidon wa enda oku sokiya otembo yoku luluvalela koviluvo vi komõhisa via Suku. Oloneke viosi komẽle eci a pasuka o yevelela olonjila oku sika ovilua  kuenda oku imba. Kuteke o luluvalela kosãi kuenda kolombungululu. Eye wa popia hati: “Olombanjaile viaco via Yehova vi ndi sanjuisa kuenda vi ndi pamisa.” Nda tu sanjukila ovina viosi viespiritu levi vio ketimba Yehova a tu ĩha, tu ka kuata esanju kuenda esanju liaco li ka tu kuatisa oku pandikisa.

17. Ndamupi olondaka vi sangiwa 1 Petulu 1:6, 7, vi pondola oku kuatisa omunu umue o sangiwa vekalo limuamue ndeli lia manji Jovidon?

¹⁷ Manji Jovidon wa pitisilevo kovaso efendelo lia Yehova. Eye wa kũlĩhĩlevo esilivilo lioku amamako oku kolela ku Suku yocili. Yesu wa popele hati: “Fendela Yehova, Suku yove, eye lika o vumba.” (Luka 4:8) Asongui vasualali kuenda olosipayu, via yonguile okuti manji Jovidon o liwekapo oku kala Ombangi ya Yehova. Pole, eye wa enda oku likutilila olonjanja viosi, poku pinga ku Yehova oco o kuatise okuti ka liwekapo kuenda oco ka ka konyohe kekolelo. Ndaño manji Jovidon wa tatiwa lekambo liesunga, eye wamamako lekolelo. Cilo, o kuete esanju lialua okuti kosimbu ci sule, momo ekolelo liaye lia setekiwa.—Tanga 1 Petulu 1:6, 7.

18. Tu pondola oku amamako ndati lesanju lietu?

¹⁸ Yehova wa kũlĩha okuti tu sukila oku kuata esanju liocili. Nda wa kuama ananga atatu a ku kuatisa oku kuata esanju liocili, o pondola oku amamako lesanju ndaño lovitangi. Kuenje o ka tẽla oku popia hati: “Va sumũlũha omanu vana okuti, Suku yavo Yehova!”—Osa. 144:15.