1. Ohundo yimue ya lingiwa kohongele yofeka kunyamo 1935 ya kuatisa ndati umalẽhe umue?

UMALẼHE umue ukuenje eci a papatisiwa kunyamo 1926, wa kuata 18 kanyamo. Olonjali viaye via kala Vakuakulilongisa Embimbiliya ndomo Olombangi Via Yehova via kũlĩhĩwile kotembo yaco. Ovio via kuata omãla vatatu valume kuenda vavali vakãi kuenje olonjali via va longisa oku vumba Yehova Suku kuenda oku setukula Yesu Kristu. Ndeci ca pita la Vakuakulilongisa Embimbiliya kotembo yaco, umalẽhe u ukuekolelo wa enda okulia kombolo kuenda okunyua kovinyu Kocipito Condalelo ya Ñala. Kuenje elavoko liaye liomuenyo lia pongoloka poku yeva ohundo yimue yavelapo ya tukula “Owiñi Wakahandangala.” Ohundo yaco ya lingiwa la manji Rutherford kunyamo wo 1935 volupale luo Washington D.C. kofeka yo Estados Unidos. Nye ca situluiwa kohongele yaco?

2. Ocili cipi ci komõhisa ca situlula Manji Rutherford vohundo a linga?

² Manji Rutherford vohundo yaye wa situlula vana va ponduile oku panga onepa ‘kowiñi wakahandangala,’ ndomo ca tukuiwa Kesituluilo 7:9. Pole, handi Vakuakulilongisa Embimbiliya va kala oku sima okuti, owiñi wakahandangala, ocimunga cimue comanu va laikele oku enda kilu, pole, ekolelo liavo lia kalapo vali litito oku li sokisa leli liolombuavekua. Manji Rutherford wa tukula Ovisonehua poku lombolola  okuti owiñi wakahandangala ka wa nõliwile oku kala kilu, pole, ovo Akristão violomeme vikuavo * vina vi ka “tunda kohali ya piãla” kuenda va ka kala otembo ka yi pui palo posi. (Esit. 7:14) Yesu wa popele hati: “Ñuete olomeme vikuavo okuti ka vi pangi onepa kocunda eci. Ndi vi nenavo oco vi yeve ondaka yange, kuenje vi kala vocunda cimuamue lungombo umuamue.” (Yoa. 10:16) Olomeme viaco vikuavo, Olombangi Via Yehova vakuekolelo okuti va kuete elavoko lioku ka kala otembo ka yi pui Vocumbo Celau palo posi. (Mat. 25:31-33, 46) Elomboloko eli liocili Cembimbiliya lia pongolola ovisimĩlo viafendeli valua va Yehova, oku kongelamo manji una ulume wa kuata 18 kanyamo.—Osa. 97:11; Olosap. 4:18.

3-4. Kohongele yofeka ya lingiwa kunyamo 1935, nye valua va limbuka catiamẽla kelavoko liavo kuenda momo lie?

³ Ocina cimue ca komõhisa omanu kohongele yaco yofeka, ceci manji wa linga ohundo a pinga kolonjeveleli hati: “Vosi vana va kuete elavoko lioku kala otembo ka yi pui palo posi, citava okuti va votoka?” Manji umue wa kala kohongele yaco, wa popia hati, wa mola eci ci soka 20.000 komanu va talama. Kuenje Manji Rutherford wa popia hati: “Tali! Owiñi wakahandangala!” Noke owiñi wosi lesanju wa pandula calua. Vamanji vana va votokele va limbuka okuti ka va nõliwile oku enda kilu. Ovo va kũlĩhĩle okuti ka va wavekiwile lespiritu lia Suku. Keteke lia kuamamo liohongele yofeka, ci soka 840 komanu va papatisiwa okuti, valua pokati kavo va kala olomeme vikuavo.

⁴ Noke liohundo yaco, umalẽhe wa tukuiwa kefetikilo kuenda vamanji vakuavo, va liwekapo okulia kombolo loku nyua kovinyu Kondalelo ya Ñala. Manji umue lumbombe walua wa lombolola ndeci vamanji vakuavo va lombolola poku popia hati: “Onjivaluko ya lingiwa kunyamo 1935, oyo nda sulako okulia kombolo loku nyua kovinyu. Nda limbuka okuti sia nõliwile la Yehova pocakati cespiritu sandu liaye oco ndi kuate elavoko lioku enda kilu, pole, nda kuatele elavoko lioku kala palo posi loku kuatisa kupange woku posuisa ocumbo celau.” (Va Rom. 8:16, 17; 2 Va Kor. 1:21, 22) Tunde kotembo yaco, etendelo liaco liowiñi wakahandangala u kasi oku livokiya kuenda oku talavayela kumuamue locisupe * colombuavekua.

5. Yehova o tenda ndati vana va siata oku liwekapo okulia kombolo lokunyua kovinyu Kocipito Conjivaluko?

⁵ Yehova o tenda ndati vana va liwekapo okulia kombolo loku nyua kovinyu Kocipito Condalelo noke liunyamo 1935? Kuenda nye ci popiwa nda koloneke vilo, Ombangi yimue ya Yehova okuti ya papatisiwa olia kombolo loku nyua kovinyu Kocipito Condalelo ya Ñala, pole, noke o limbuka okuti eye hombuavekuako? (1 Va Kor. 11:28) Vamue va siata okulia kombolo loku nyua kovinyu momo ka va kuete elomboloko lielavoko liavo. Pole, nda ovo va limbuka okuti va kasi oku lueya, va liwekapo okulia kombolo loku nyua kovinyu kuenda vamamako oku vumba Yehova lekolelo, loku tava okuti ovo  va panga onepa kolomeme vikuavo. Ndaño okuti va liwekapo okulia kombolo loku nyua kovinyu, ovo handi va enda Kocipito Conjivaluko momo va sanjukila calua eci Yehova la Yesu va va lingila.

6. Nye Yesu a handeleka ovangelo oku linga?

⁶ Omo ohali ya piãla yi kasi ocipepi, tu lembelekiwa calua oku tala ndomo elivulu Liesituluilo 7 li popia catiamẽla Kakristão olombuavekua kuenda kowiñi wakahandangala okuti olomeme vikuavo. Yesu wa handeleka ovangelo oco vamameko oku tutuiya olofela vikuãla vienyõleho. Ovo ka va pondola oku eca olofela viaco, osimbu Akristão olombuavekua vi kasi palo posi ka via tambuile handi ondimbukiso ya sulako ya Yehova. (Esit. 7:1-4) Vamanji a Kristu olombuavekua, va ka tambula onima yavo yoku ka kala olosoma kuenda ovitunda la Yesu kilu. (Esit. 20:6) Yehova, Yesu kuenda ovangelo va ka sanjuka calua eci va ka mola okuti 144.000 violombuavekua, va tambula onima yavo kilu.

7. Ndomo ca tangiwa Kesituluilo 7:9, 10, velie Yoano a mola vocinjonde kuenda nye va kasi oku linga? (Tala ociluvialuvia koñoño.)

⁷ Yoano noke yoku mola etendelo 144.000 va ka kala olosoma kuenda ovitunda, wa mola vali eci ci komõhisa okuti “owiñi wakahandangala” u ka puluka ko Harmagedo. Ca litepa locimunga eci catete ceci okuti, ocimunga cavali caluapo vali kuenda etendelo liaco ka lia kũlĩhĩwile. (Tanga Esituluilo 7:9, 10.) Ovo va “wala uwalo u yela wa lepa,” ci lomboloka oku “lilava keliño” lioluali lua Satana kuenje va linga vakuacili ku Suku kuenda ku Kristu. (Tia. 1:27) Ovo va ka sanjuka calua koku yovuiwa omo lieci Yehova kuenda Yesu Kameme ka Suku, va va lingila. Handi vali, ovo vambata ovianja vieva ci lekisa okuti ovo va tava Yesu Ndosoma ya nõliwa la Yehova.—Sokisa la Yoano 12:12, 13.

8. Ndomo ca tangiwa Kesituluilo 7:11, 12, ku tu sapuila nye catiamẽla kepata lia Yehova kilu?

⁸ Tanga Esituluilo 7:11, 12. Nye ci ka pita kilu eci va ka mola owiñi wakahandangala? Yoano wa mola okuti epata lia Yehova kilu lia sanjuka kuenda va sivaya Suku eci va mola owiñi waco wakahandangala. Oko kilu va ka sanjuka calua eci va ka mola oku tẽlisiwa kuocinjonde eci, okuti owiñi wakahandangala wa puluka kohali ya piãla.

9. Ndomo ca tangiwa Kesituluilo 7:13-15, nye owiñi wakahandangala u kasi oku linga cilo?

⁹ Tanga Esituluilo 7:13-15. Yoano wa soneha okuti owiñi wakahandangala va “sukula ovowalo avo kuenda va a yelisa vosonde ya Kameme.” Eci ci lomboloka okuti ovo va kuete utima wa yela kuenda vakuesunga kovaso a Yehova. (Isa. 1:18) Ovo va litumbika, kuenda va linga Akristão va papatisiwa, va kuete ekolelo lia pama kocilumba ca Yesu kuenda va kuete ukamba uwa la Yehova. (Yoa. 3:36; 1 Pet. 3:21) Ovo va tãi kovaso yocalo ca Suku oku u lingila “upange u kola utanya luteke” vonembele yaye yespiritu palo posi. Ndaño cilo, ovo vakuambili kuenda va litumbika kupange woku kunda Usoma loku longisa omanu oco va linge olondonge kuenda oku velisapo Usoma wa Suku vomuenyo wavo.—Mat. 6:33; 24:14; 28:19, 20.

10. Nye owiñi wakahandangala wa kolela kuenda kohuminyo yipi va ka mola oku tẽlisiwa?

¹⁰ Owiñi wakahandangala una u ka tunda kohali ya lua wa kolela okuti Suku o ka va kuatisa omo okuti, eye “Una wa tumãla kocalo o ka pongiya ombalaka oco a va teyuile.” Ovo va siata oku lavoka oku tẽlisiwa kuolondaka viokuti: “[Suku] o puenya asuelẽla osi  vovaso avo, oku fa ka ku kalako vali, ndaño oku lila loku liyula lupongo ka vi ka kalako vali.”—Esit. 21:3, 4.

11-12. (a) Ndomo ca tangiwa Kesituluilo 7:13-15, asumũlũho api owiñi wakahandangala u ka kuata? (b) Nye olomeme vikuavo vi sukila oku linga Kocipito Conjivaluko kuenda momo lie?

¹¹ Tanga Esituluilo 7:16, 17. Koloneke vilo, afendeli vamue va Yehova va kasi onjala omo ka va kuete olombongo vioku landa okulia va sukila, ale va kasi oku liyaka lovitangi viuyaki. Vamue va sangiwa vokayike omo likolelo liavo. Kuenje owiñi wakahandangala va sanjuka calua omo va kũlĩha okuti, noke yoku puluka kenyoleho lioluali lulo lũvi, ovo olonjanja viosi va ka kuata okulia ku va tekula ketimba kuenda kespiritu. Eci Yehova a ka nyõla oluali lulo lũvi lua Satana, owiñi wakahandangala u ka puluka konyeño ya Yehova yi kasi ‘ndowuya.’ Eci ohali ya piãla yi sulila, Yesu o ka songuila vana va kapuluka kohali yaco “kolono viovava omuenyo [ko pui].” Sokolola ño handi: Owiñi wakahandangala u kuete elavoko limue li komõhisa. Olohuluwa viomanu vana va ka kala komuenyo, lalimue eteke va ka fa vali!—Yoa. 11:26.

¹² Olomeme vikuavo okuti vi kuete elavoko limue li komõhisa, va eca olopandu ku Yehova kuenda Yesu! Ndaño okuti Yehova ka va nõlele oco va ka kale kilu, pole, eye o va sole ndeci a sole olombuavekua. Cikale olombuavekua, ale olomeme vikuavo, vi pondola oku eca esivayo ku Suku kuenda ku Kristu. Onjila yimue va pondola oku ci linga, poku enda Kocipito Condalelo ya Ñala.

13-14. Momo lie vosi va sukilila oku kala Kocipito Conjivaluko colofa via Kristu?

¹³ Kanyamo a pita vana va endele Kocipito Conjivaluko pokati 1.000 yomanu citava okuti omunu umosi wanyua kovinyu lokulia kombolo. Eci ci lomboloka okuti onepa yalua yakongelo a sangiwa voluali lomue onyua kovinyu lokulia kombolo. Omanu valua va kala Kocipito Conjivaluko, va kuete elavoku lioku kala palo posi. Momo lie ovo va kalila Kocipito Condalelo ya Ñala? Ovo va enda kocipito caco ndeci ci linga omunu umue enda kocipito cuvala wekamba liaye. Ovo va enda kuvala waco, momo va yongola oku lekisa ocisola kuenda ekuatiso kohueli yaco. Cimumue haico  okuti, vana va panga onepa kolomeme vikuavo va kala Kocipito Conjivaluko, momo va yongola oku lekisa ocisola loku kuatisa Kristu kuenda olombuavekua. Handi vali, ovo poku enda Kocipito caco va lekisa okuti, va sanjukila ocilumba ca Yesu cina ca va ĩha elavoko lioku kala palo posi otembo ka yi pui.

¹⁴ Esunga likuavo lieci olomeme vikuavo vi endela Kocipito Conjivaluko ceci okuti, ovo va pokola kocihandeleko ca Yesu. Eci Yesu a tumbika onjanja yatete Ondalelo ya Ñala lovapostolo vaye, wa va sapuila hati: “Ci lingaili onjivaluko yange.” (1 Va Kor. 11:23-26) Kuenje olomeme vikuavo vi kasi oku amamako oku kala Kocipito Condalelo ya Ñala osimbu handi olombuavekua vimue vi kasi lomuenyo palo posi. Omo liaco, olomeme vikuavo vi laleka omanu valua oco va kale kumosi Kocipito Conjivaluko.

15. Ndamupi omunu lomunu a pondola oku sivaya Suku kuenda Kristu Kocipito Conjivaluko?

¹⁵ Kocipito Conjivaluko, tu kuete epuluvi lioku sivaya Suku la Kristu pocakati covisungo kuenda ohutililo. Ohundo Yonjivaluko yunyamo ulo yi kuete osapi hati, “Sanjukila Ovina Suku Kuenda Kristu va Siata Oku ku Lingila!” Tu ka lekisa olopandu vietu ku Yehova la Kristu. Eci ombolo lovinyu vi ka pita, tu ka sokolola kueci ovio vi lomboloka okuti, etimba kuenda osonde ya Yesu. Ci ka tu ivaluisa ocisola Yehova a tu kuatele eci a eca Omõlaye oco a tu file okuti tu kuata omuenyo. (Mat. 20:28) Vosi vana va sole Isietu wo kilu kuenda Omõlaye, va ka sanjukila oku kala Kocipito Conjivaluko.

16. Konepa yipi olombuavekua kuenda olomeme vikuavo vamuamue?

¹⁶ Ci kale olombuavekua kuenda olomeme vikuavo vosi va soliwe la Yehova. Ovimunga viaco vivali, viosi vi kuete esilivilo kokuaye. Tua kũlĩha okuti, ci kale olombuavekua kuenda olomeme vikuavo, vosi yavo va landiwa londando yimuamue okuti osonde Yomõlaye o soliwe. Etepiso li kasi pokati kavo lieli okuti, va kuete alavoko a litepa. Pole, ovimunga viaco vivali vakuekolelo ku Suku kuenda ku Kristu. (Osa. 31:23) Tu ivaluki okuti espiritu lia Suku li tu kuatisa vosi yetu. Yehova eca espiritu sandu liaye komunu lomunu kovina eye a sukila, ci kale kolombuavekua, ale kolomeme vikuavo.

17. Ocisupe colombuavekua nye vi lavoka oku mola?

¹⁷ Akristão Olombuavekua ka via citiwile lelavoko lioku enda kilu. Suku eye wa va ĩha elavoko liavo. Ovo va sokolola kelavoko liaco, va likutilila kelavoko liaco kuenda va sanjukila oku tambula onima yavo kilu. Ka va  kũlĩhĩle ndomo etimba liavo li ka kala oko kilu. (Va Fil. 3:20, 21; 1 Yoa. 3:2) Ovo va luluvalela kesumũlũho lioku li sanga la Yehova, la Yesu, ovangelo kuenda olombuavekua vikuavo. Ovo va lavoka oku tambula ocitumãlo cavo Kusoma wokilu.

18. Ovina vipi olomeme vikuavo vi lavoka?

¹⁸ Olomeme vikuavo vi sanjukila onima yoku kala otembo ka yi pui palo posi, eyi oyo onjongole omanu vosi va kuete. (Uku. 3:11) Ovo va lavoka eteke lioku ka kuatisa koku pongolola osi yilo oco yi kale ocumbo celau. Ovo va sanjukila oku mola oku tunga olonjo viavo oku kũla oviumbo viavo kuenda oku tekula omãla vavo luhayele uwa. (Isa. 65:21-23) Ovo va yongola oku kũlĩha olonepa vialua violuali, oku tala olomunda, ovisenge, okalunga kuenda oku lilongisa ovina viosi Yehova a lulika. Handi vali, ci va sanjuisa oku kũlĩha okuti ukamba wavo la Yehova u ka amamako oku pamisiwa.

19. Otembo Yonjivaluko epuluvi lietu oku linga nye kuenda unyamo ulo Onjivaluko yi ka lingiwa eteke lipi?

¹⁹ Yehova wa eca komunu lomunu ufendeli waye elavoko limue liwa lio kovaso yoloneke. (Yer. 29:11) Ocipito Conjivaluko colofa via Kristu ci tu ĩha epuluvi ku vosi yetu lioku sivaya Suku kuenda Kristu omo liovina va tu lingila oco tu kuate omuenyo ka u pui. Ocipito Conjivaluko, ohongele yimue ya velapo Akristão vocili vakuete unyamo lunyamo. Ocipito caco ci ka lingiwa Vocasapalo keteke 27 yosãi Yelombo wo 2021 noke yoku iñila kuekumbi. Unyamo ulo, omanu valua va ka kala kohongele yaco ya velapo. Vamue va ka kalapo ndaño lelambalalo. Vakuavo va kasi vokayike citava okuti omo muẽle va yi lingila. Yehova, Yesu, ovangelo kuenda olombuavekua via pinduiwa ale, va ka luluvalela kakongelo osi, vovimunga kuenda komunu lomunu o kasi Kocipito caco ca velapo!