ONDAKA “ekãlu” ndomo ya tukuiwa Vembimbiliya Epongoluilo Lioluali Luokaliye, yi pondola oku lomboloka ovina viosi viatiamẽla koviendelo. (Ovil. 8:28, 29, 38) Pole, ci molẽha ndu okuti ulume u Etiopia wa kala oku endela vekãlu limue linene, okuti, ekãlu lina va siata oku talavaya lalio kuyaki, ale kalupesi, li sule. Kũlĩhĩsa amue pokati kasunga aco.

Ulume u Etiopia wa kala kesongo ka velapo. Eye wa kala “ulume umue wa kuatele ocikele cinene ca Kandake, nasoma ya va Etiopia, haeye wa kundikiwa ukuasi waye wosi.” (Ovil. 8:27) O Etiopia yosimbu, mua kongelele o Sudão yo koloneke vilo kuenda ombuelo yo Egito yo koloneke vilo. Ndaño okuti ulume waco pamue ka endelele vekalu liaco vokuenda kungende wosi, pole, citava okuti wambatele ovina vialua vi sukiliwa vungende. Vimue pokati koviendelo via enda oku ambata omanu kocita catete K.K. lia kala ekãlu limue lia kuatele alola akuãla. “Ekãlu liaco lia enda oku ecelela okuti liambata ovikuata vialua, loku ecelela okuti omanu va linga ungende ciwa kuenda oku linga ungende wocinãla cinene,” ndomo ca tukuiwa kelomboluilo limue lielivulu Liovilinga

Ulume u Etiopia wa kala oku tanga eci Filipu amela kokuaye. Ulandu u lekisa okuti “Filipu wa lupukilako kuenda wo yeva oku tanga lolukandi elivulu liuprofeto Isaya.” (Ovil. 8:30) Akãlu aco ka a pangiwile oco a linge ungende wonjanga. Omo okuti a enda oku enda levando, ca ecelela okuti u enuku o tanga kuenda Filipu o sanga ekãlu liaco ndaño okuti eye wa kala oku endela posi.

Ulume u Etiopia “wa pañinya Filipu oku londa loku tumãla kumue laye.” (Ovil. 8:31) Ekãlu limue lioku yoloka lio kotembo yaco, lia pangiwile lonjila yimue okuti vakuakuendisa va enda oku talama vilu. Pole, ekãlu lina lia pangiwilile oku linga ungende, lia kuatele olomangu kuna enuku la Filipu va tumalele.

Ndomo ci lekisa ulandu kelivulu Liovinga ocipama 8 kuenda ovovangi akuavo, alivulu etu a sandekiwa ndopo a lekisa alitalatu a enuku u Etiopia oku endela vekalu linene okuti ana atito oku enda kuyaki, ale koku linga alupesi a sule.