1-2. Ovitangi vipi afendeli va Yehova vakuekolelo va pondola oku liyaka lavio?

 OVITANGI vi pondola oku pongolola omuenyo wetu vocipikipiki. Ndeci, manji umue ukuekolelo o tukuiwa Luis a wa limbukiwa luvei wo kanser. Ndotolo wo sapuila okuti o kuete lika olosãi vimue komuenyo. Manji Monika lulume waye va litumbikile kupange wa Yehova. Kuenje eteke limue manji Monika wa limbuka okuti ulume waye okuti ukulu wekongelo wambatele ovimuenyo vivali vokuenda kuayamo alua. Manji umue ufeko o tukuiwa Olivia wa kisikiwa oku siapo onjo yaye, omo liocilunga ca kala oku iya. Eci a tiuka wa sanga okuti ocilunga ca nyõla onjo yaye. Omuenyo wa vamanji va tukuiwa ndeti wa pongoloka Vocipikipiki. Ove hẽ o pondola oku sokolola kovitangi via lipita lavamanji ava? Anga hẽ wa lipitile ale locitangi cimue okuti ca pongolola omuenyo wove vocipikipiki?

² Ndaño okuti tuafendeli va Yehova vakuekolelo, tu liyakavo lovitangi kuenda oku vela ndeci ca siata komanu vosi. Tu sukilavo oku pandikisa kelambalalo liomanu vana va suvuka afendeli va Suku. Ndaño Yehova ka tateka okuti tu pita lovitangi viaco, pole, eye o tu kuatisa. (Isa. 41:10) Lekuatiso liaye, tu pondola oku kuata esanju, oku nõla olonjila viwa kuenda oku amamako oku kolela kokuaye ndaño lovitangi. Vocipama cilo, tu konomuisa olonepa vikuãla Yehova a pondola oku tu kuatisa eci tu pita lovitangi vinene komuenyo wetu. Tu konomuisavo eci tu sukila oku linga oco tu limbuke ekuatiso liaye.

 YEHOVA O KA KU LAVA

3. Eci tu lipita locitangi cimue cinene, ocina cipi ka ci leluka oku linga?

³ Ovitangi. Eci tu pita locitangi cimue cinene, ka tu tẽla oku sokolola lutate kuenda oku nõla ciwa onjila yimue. Momo lie? Momo tu pondola oku yeva esumuo lialua kuenda esakalalo. Kuenje tu liyeva ndu okuti tuanyelela kuenda ka tu kũlĩha eci tu linga. Kũlĩhĩsa ndomo vamanji vavali va tukuiwa kefetikilo va liyeva koloseteko viavo. Manji Olivia wa popia hati: “Noke liocilunga oku nyõla onjo yange, nda liyeva ndu okuti nda nyelela kuenda nda kuata esakalalo lialua.” Manji Monika poku lombolola ndomo ulume waye o pakula wa popia hati: “Ame nda liyeva ndu okuti nda tomiwa. Ca tĩlile calua oku linga ovopange eteke leteke. Sia la sima okuti eci ca ponduile oku lipita lame.” Yehova wa likuminya oku tu kuatisa ndati eci tu yeva esakalalo?

4. Ndomo ca tangiwa ku Va Filipoi 4:6, 7, nye Yehova a tu likuminya?

⁴ Ndomo Yehova a ka tu kuatisa. Eye o likuminya oku eca eci Embimbiliya li tukula hati, “ombembua ya Suku.” (Tanga va Filipoi 4:6, 7.) Ombembua yaco yi lomboloka oku kuata utima wa tula u tunda kukamba tu kuete laye. Ombembua yaco yina “ya piãla olondunge viosi;” yi komõhisa calua okuti ovina tu sima vi sule. Ndeci, ove wa li yevele ale okuti wa tula utima noke lioku likutilila ku Yehova? Wa liyeva ndoco momo Yehova wa ku ĩha ombembua yaye.

5. Ombembua ya Suku yi teyuila ndati ovisimĩlo kuenda utima wetu?

⁵ Ku va Filipoi 4:7 ku popiavo okuti, ombembua ya Suku “yi ka lava” ale oku teyuila “ovitima viene kuenda ovisimĩlo viene.” Ondaka oku lava ya tiamisiwilile kusualali kuenda ya enda oku tiamisiwila kasualali va lava olupale lumue, loku lu teyuila kovoyaki. Olonungi vina via kala volupale lumue muli olondavululi, via enda oku liyeva okuti via kolapo, momo via kũlĩhĩle okuti asualali va kala oku va teyuila. Cimuamue haico okuti, eci ombembua ya Suku yi lava ovitima vietu kuenda ovisimĩlo vietu, tu tula utima momo tu cĩ okuti tua kolapo. (Osa. 4:8) Ndeci ca li pita la Hana, ndaño ovitangi vietu ka vi piti vocipikipiki, tu pondolavo oku tula utima. (1 Sam. 1:6-18) Eci tu tula utima, ci leluka kokuetu oku sokolola lutate kuenda oku nõla onjila ya sunguluka.

6. Nye tu sukila oku linga oco tu kuatisiwe lombembua ya Suku? (Talavo ociluvialuvia.)

⁶ Ceci tu sukila oku linga. Ndeci olonungi violupale lumue vi vilikiya ondavululi oco yi va teyuile, cimuamue haico okuti tu pondola oku pinga ku Yehova oco a tu kuatise. Ndamupi? Poku likutilila toke eci tu kuata  ombembua ya Suku. (Luka 11:9; 1 Va Tes. 5:17) Manji Luis okuti wa tukuiwa ale kefetikilo, wa lombolola ndomo eye lukãi waye Ana, va liyeva eci va limbuka okuti eye wa kuatele lika olosãi vimue viomuenyo. Eye hati: “Vepuluvi ndeli, ka ca lelukile oku nõla onjila yimue yatiamẽla kuhayele kuenda kovina vikuavo. Pole, ohutililo ya siata oku tu kuatisa calua oku kuata ombembua yo vutima.” Manji Luis lukãi waye va lombolola okuti, va likutilila olonjanja vialua oku pinga ku Yehova oco a va ĩhe ombembua yovutima, kuenda olondunge, oco va nõle olonjila via sunguluka. Kuenje ovo va limbuka ekuatiso liaye. Nda okuti o kasi oku liyaka locitangi cimue, amamako oku likutilila kuenje, o ka limbuka ombembua ya Yehova oku lava utima wove kuenda ovisimĩlo viove.—Va Rom. 12:12.

YEHOVA O KA KU KUATISA

7. Tu liyeva ndati eci tu pita loseteko yimue yinene?

⁷ Ovitangi. Eci tu liyaka loseteko yimue yinene, ka tu liyevi ciwa, ale oku linga ovina ndomo tua siata oku linga. Ndeci onaviyu yimue vehunguhungu liofela yi tuñunyiwa lakimba okalunga oko loko, letuvo tu pondola oku li yeva ndu okuti tu kasi oku tuñunyiwa oko loko kovisimĩlo. Manji Ana wa tukuiwa ale, wa lombolola okuti, wa kuata ovisimĩlo vialua noke lioku fisa ulume waye Luis. Eye hati: “Olonjanja vimue nda yevaile esumuo lialua kuenda oku likuatela ohenda ame muẽle. Nda kuatailevo onyeño yalua omo a fa.” Handi vali, manji Ana wa li yevaile ulika kuenda oku yeva esumuo omo lioku linga ovina manji Luis a enda oku tẽlisa ciwa. Olonjanja vimue wa enda oku liyeva ndu okuti o kasi vehunguhungu limue liofela vo kalunga. Yehova o tu kuatisa ndati eci tu fetika oku yapuisiwa lovisimĩlo viaco?

8. Ndomo ca lekisiwa ku Isaya 33:3, nye Yehova a likuminya kokuetu?

⁸ Ndomo Yehova a ka tu kuatisa. Yehova wa li kuminya oku tu kolisa. (Tanga Isaya 33:6.) Eci o naviyu yimue yi sanga ehunguhungu liofela vo kalunga, oyo yi fetika oku tuñunyiwa lohele yalua oko loko. Oco o naviyu yi kolepo, yi sukila oku kapiwa ovikete vimue kolonele viosi oco ka yi ka tingoke. Ovikete viaco vi kuatisa o naviyu okuti ka yi tingoka calua. Kuenje omanu va endelamo va liyeva okuti va kolapo kuenda va tula utima. Pole, ovikete viaco vi talavaya ciwa eci onaviyu yi kasi loku enda. Cimuamue haico okuti, Yehova o ka tu kuatisa osimbu tu amamako oku u vumba lekolelo kotembo yovitangi.

9. Ovimalẽho vietu vioku konomuisa vi pondola oku tu kuatisa ndati oku kuata ovisimĩlo via sunguluka? (Talavo ociluvialuvia.)

⁹ Ceci tu sukila oku linga. Eci o kasi oku yuliwa  lovisimĩlo ka via lelukile, li kolisilako oku amamako oku likutilila, oku endaenda kolohongele kuenda kupange woku kunda. Ocili okuti, pamue ku tẽla oku linga ovina ndeci wa lingaile tete, pole, ivaluka okuti Yehova wa sunguluka. (Sokisa Luka 21:1-4.) Sokiyavo otembo yoku linga elilongiso liove lio pokolika kuenda oku sokolola kovina wa tanga. Momo lie? Pocakati cocisoko ca Yehova, eye eca olonumbi viwa Viembimbiliya vi pondola oku tu kuatisa oku lava ovisimĩlo vietu eci tu sangiwa lovitangi. Oco o sange olonumbi o sukila, o pondola oku talavaya lovimalẽho vioku linga akonomuiso kelimi liove, ndeci vo JW Library^®, Vociseleko Calivulu vo Internet kuenda Velivulu Lioku Konomuisa Liolombangi Via Yehova. Manji Monika wa tukuiwa ale, wa popia hati wa talavaya lovimalẽho viaco eci esumuo liaye lia fetika oku livokiya calua. Ndeci, eye wa konomuisa ondaka “onyeño.” Vapuluvi akuavo wa konomuisa ondaka oku “pakuiwa” ale oku kala “ukuacili.” Kuenje wa enda oku tanga toke eci a liyeva ciwa. Eye hati: “Eci nda fetika oku linga akonomuiso nda yeva esakalalo lialua. Pole, osimbu nda kala oku amamako oku tanga, nda liyeva ndu okuti Yehova wa ñuata kapepe. Poku tanga nda limbuka okuti Yehova wa kapeleko ovisimĩlo viange kuenda wa kala oku ndi kuatisa.” Ekuatiso liaco lia Yehova li ka ku kuatisavo oku teyuila ovisimĩlo viove toke eci utima u tula.—Osa. 119:143, 144.

YEHOVA O KA KU KUATISA

10. Tu liyeva ndati eci tu lipita locitangi cimue cinene?

¹⁰ Ovitangi. Nda tu pita locitangi cimue cinene, ku kala oloneke vimue okuti, tu hongua ketimba kuenda kovisimĩlo. Tu liyeva ndukuakuyoloka wa lilemẽha okuti wa enda oku yoloka lonjanga, pole, cilo o kasi oku teñela. Pamue ci tĩla calua oku linga ovina okuti kokuetu via lelukile oku vi linga, ale ka tu kuata onjongole yoku linga ovina via enda oku tu sanjuisa. Ndeci ca li pita la Eliya, tu pondolavo oku liyeva ndu okuti etimba lietu lia hongua. Tu yongola lika oku pekela. (1 Olos. 19:5-7) Nye Yehova a likuminya oku linga eci tu liyeva okuti tua hongua?

11. Onjila yipi yikuavo Yehova a siata oku tu kuatisa layo?

¹¹ Ndomo Yehova a ka tu kuatisa. Eye wa likuminya oku tu kuatisa. (Tanga Osamo 94:18.) Ndeci ukuakuyoloka wa lemẽha a sukila ekuatiso oco a ende ciwa, tu sukilavo ekuatiso oco tu kuate ombili kupange wa Yehova. Vapuluvi aco, Yehova o tu likuminya hati: “Ame ndi Yehova Suku yove, ndi kuata  eka liove liondio, Una o popia kokuove hati: ‘Ku ka kuate usumba ndu ku kuatisa.’” (Isa. 41:13) Soma Daviti wa limbukavo ekuatiso liaco. Eci a liyaka loloseteko kuenda lovanyãli, wa sapuila Yehova hati: “Eka liove liondio li ndi kuatisa.” (Osa. 18:35) Oco hẽ, Yehova o tu kuatisa ndati?

12. Velie Yehova a pondola oku vetiya oco va tu kuatise eci tu ohongua?

¹² Yehova olonjanja vialua o tu kuatisa poku vetiya vakuetu oco va tu kuatise. Ndeci, onjanja yimue eci Daviti a sumuile calua, ekamba liaye Yonatão wo nyula oco o kuatise kuenda oku u sapuila olondaka vi lembeleka. (1 Sam. 23:16, 17) Cimuamue haico, Yehova wa nõlavo Elisia oco a kuatise Eliya. (1 Olos. 19:16, 21; 2 Olos. 2:2) Koloneke vilo, Yehova wa siatavo oku vetiya apata, akamba, ale akulu vekongelo oco va tu kuatise. Pole, eci tu sumua calua pamue ka tu kuata onjongole yoku kala la vakuetu. Tu yongola ño oku kala ulika. Ekalo liaco lia siata calua. Oco hẽ, nye tu sukila oku linga oco tu tambule ekuatiso lia Yehova?

13. Nye tu sukila oku linga oco tu kuatisiwe la Yehova? (Talavo ociluvialuvia.)

¹³ Ceci tu sukila oku linga. Yuvula oku liamũha. Eci tu liamũha la vakuetu tu fetika oku li sokolola lika etu muẽle kuenda kovitangi tu kasi oku liyaka lavio. Ovisimĩlo viaco ,vi pondola oku tateka olonjila tu nõla. (Olosap. 18:1) Ocili okuti, vosi yetu tu sukila apuluvi amue oku kala likawetu, ca piãla enene eci tu liyaka lacitangi cimue. Pole, nda tua liamũha otembo yalua, tu ka pumba onjila Yehova a kuama yoku tu kuatisa pocakati comanu eye a nõla. Kuenje ndaño ka ca lelukile kokuove omo liocitangi o kasi oku liyaka laco, tava ekuatiso liepata liove, liakamba kuenda liakulu vekongelo. Ivaluka okuti Yehova wa vetiya omanu vaco oco va ku kuatise.—Olosap. 17:17; Isa. 32:1, 2.

YEHOVA O KA KU LEMBELEKA

14. Ovina vipi vi pondola oku tu saluisa?

¹⁴ Ovitangi. Tu pondola oku pita lapuluvi amue a tu kokela usumba. Vembimbiliya, afendeli vamue va Suku vakuekolelo va lombolola apuluvi vakuatele usumba kuenda oku yokoka omo liovanyãli vavo, ale liomanu vakuavo. (Osa. 18:4; 55:1, 5) Cimuamue haico okuti, tu pondola oku liyaka lelambalalo kosikola, kupange, vepata kuenda kolombiali. Tu pondolavo oku kuata usumba woku fa, omo liocitangi cimue cuhayele. Vapuluvi aco, tu liyeva ndu okuti ka tu kuete olohõlo ndeci  omõla utito. Yehova o tu kuatisa ndati vapuluvi aco?

15. Nye Yehova a ka tu lingila ndomo ca lekisiwa Kosamo 94:19?

¹⁵ Ndomo Yehova a ka tu kuatisa. Eye o tu lembeleka kuenda o tu kolisa. (Tanga Osamo 94:19.) Osamo eyi, yi tu sokoluisa omõla umue utito o kasi lusumba kuenda ka tẽla oku pekela omo liocikẽlu cimue cinene. Tu pondola oku sokolola isiaye oku u kuata, loku u angata peka liaye, toke eci a pekela. Ndaño okuti ovikẽlu viaco via amamako, eye o lembelekiwa loku liyeva okuti wa kolapo omo a kasi povaka a isiaye. Eci tu liyaka loloseteko vi saluisa, tu sukila okuti isietu wokilu, o tu angata vupopi wocindekaise, toke eci tu tula utima. Oco hẽ, tu tambula ndati elembeleko lia Yehova?

16. Nye tu sukila oku linga oco tu kuatisiwe lelembeleko lia Yehova? (Talavo ociluvialuvia.)

¹⁶ Ceci tu sukila oku linga. Olonjanja viosi, pita otembo la Yehova poku likutilila kokuaye kuenda oku tanga Ondaka yaye. (Osa. 77:1, 12-14) Nda wa kuata ocituwa caco, ocina catete o ka linga eci o yeva esakalalo, oku sanda ekuatiso ku Isia wo kilu. Sapuila ku Yehova ovina vi kasi oku ku kokela oku kuata usumba kuenda ovina viku sakalaisa. Noke u yevelela lutate poku tanga Ondaka yaye kuenje o ka limbuka ndomo eye a ku lembeleka. (Osa. 119:28) O pondola oku sanga Ovisonehua vimue vi ka ku lembeleka ca piãla enene eci o kasi lusumba. Ndeci, o pondola oku sanga elembeleko kelivulu lia Yovi, Kolosamo kuenda Kolosapo oku kongelamo olondaka via Yesu vi sangiwa ku Mateo ocipama 6. Eci o likutilila ku Yehova, loku tanga Ondaka yaye, o ka limbuka elembeleko liaye.

17. Ekolelo lipi tu pondola oku kuata?

¹⁷ Tu pondola oku kolela okuti Yehova olonjanja viosi o ka tu kuatisa eci tu li pita lovina vĩvi komuenyo wetu. Lalimue eteke tu ka kala ulika. (Osa. 23:4; 94:14) Yehova wa likuminya oku tu teyuila, oku tu kolisa, oku tu kuatisa, kuenda oku tu lembeleka. Catiamẽla ku Yehova, ku Isaya 26:3 hati: “Ove o ka teyuila vana va kolela lutima wosi kokuove; Ove o ka eca kokuavo ombembua ka yi pui, Momo ovo va kolela kokuove.” Omo liaco, kolela ku Yehova kuenda tava kolonjila viosi a siata oku kuama vioku ku kuatisa. Nda wa ci linga, o ka kuata vali ongusu ndaño kotembo yovitangi.