1. Nye ciya vovisimĩlo viove eci o sokolola catiamẽla ku Yehova?

 ANGA hẽ wa sokoluile ale ndomo Yehova a tuwa? Eci o sapela laye vohutililo nye ciya vovisimĩlo viove? Ndaño okuti ka tu pondola oku mola Yehova, pole, Embimbiliya liu tukula volonjila viñi viñi. Yehova o tukuiwa okuti “ekumbi haeye ociyepelo” kuenda “ondalu yi nyõla elisi.” (Osa. 84:11; Va Hev. 12:29) Vocinjonde cimue Esekiele a mola, wa lombolola Yehova okuti o kasi ndewe liosafira, ndutale u nina kuenda ndolukongolo lunina. (Esek. 1:26-28) Alomboluilo a-a atiamẽla ku Yehova, a pondola oku tu komõhisa ale oku tu kokela usumba.

2. Nye ci pondola oku tateka vamue oku oku amela ku Yehova?

² Omo okuti ka tu pondola oku mola Yehova, pamue ci tĩla calua oku tava okuti eye o tu sole. Vamue va sima okuti Yehova lalimue eteke a ka va sola omo liovina vialua vĩvi via pita komuenyo wavo. Pamue ka va la kuata isia umue o va sole. Yehova o kuete elomboloko liekalo lietu kuenda wa kũlĩha esunga lieci ca tĩlila kokuetu oku amela kokuaye. Oco a tu kuatise, eye o situlula ocituwa caye ciwa Vondaka yaye.

3. Konepa yipi yikuavo tu limbukila ocisola ca Yehova?

³ Ondaka ya velapo yi situlula ciwa Yehova, ocisola. (1 Yoa. 4:8) Ocisola, oco ci situlula Yehova. Cosi eye a linga ca kunamẽla kocisola. Ocisola caye ca piãla enene, momo o ci lekisavo ku vana ka vo vumbi. (Mat. 5:44, 45) Vocipama cilo, tu lilongisa eci catiamẽla ku Yehova kuenda kocisola caye. Osimbu tu vokiya ukũlĩhĩso wetu watiamẽla ku Suku, ocisola cetu kokuaye ci livokiya.

 YEHOVA O TU SOLE CALUA

4. Ocisola ca Yehova ci ku vetiya oku liyeva ndati? (Talavo ociluvialuvia.)

⁴ “Yehova ukuacisola calua haeye ukuahenda.” (Tia. 5:11) Vembimbiliya eye wa sokisiwa la ina umue ukuacikembe. (Isa. 66:12, 13) Sokolola ina umue o tata omõlaye locisola. Eye u wangata locisola kuenda o vangula laye londaka yimue yi lembeleka. Eci a lila, ale a yeva evalo, ina u wĩha eci a sukila. Cimuamue haico okuti, eci tu yeva esumuo tu pondola oku kolela kocisola ca Yehova. Ukualosamo wa soneha hati: “Eci asakalalo a ndi wila, ove wa ndembeleka kuenda wa ndi tulumũla.”—Osa. 94:19.

5. Ocisola ka ci pongoloka ca Yehova ci lomboloka nye kokuove?

⁵ Yehova ukuacikembe. (Osa. 103:8) Eye ka liwekapo oku tu sola nda tua linga cimue cĩvi. Va Isareli va sumuisa Yehova olonjanja vialua, pole, eci va likekembela kovina vĩvi va linga loku ci siapo, Yehova wa lekisa ocisola caye kokuavo poku va sapuila hati: “Ove o kuete esilivilo kovaso ange, ove wa sivayiwa kuenda ame ndu ku sole.” (Isa. 43:4, 5) Ocisola ca Suku ka ca pongolokele. Olonjanja viosi tu pondola oku kolela kokuaye. Ndaño okuti tua linga ekandu limue linene Yehova lalimue eteke a ka tu yanduluka. Eci tu likekembela kuenda tu tiuka ku Yehova, tu ka limbuka okuti eye handi o tu sole. Eye wa likuminya okuti: “O ka ecela lutima wosi.” (Isa. 55:7) Embimbiliya li tukula ongecelo yaco okuti, “oloneke viekavuluko vi tunda ku Yehova.”—Ovil. 3:19.

6. Elivulu lia Sakariya 2:​8, li tu longisa nye catiamẽla ku Yehova?

⁶ Tanga Sakariya 2:8. Omo okuti Yehova o tu sole, o kuata lonjanga elomboloko liekalo lietu kuenda o kuete onjongole yoku tu teyuila. Eye o yeva evalo vutima eci tu sumuisiwa. Omo liaco, tu pondola oku likutilila lekolelo okuti: “Ndi lave ndomõliso liove.” (Osa. 17:8) Iso onepa yimue ya hongua calua haiyo yi kuete esilivilo lialua ketimba. Kuenje eci Yehova a tu sokisa ndomõliso liaye, ci kasi ndu a popia hati: ‘Wosi o kangisa ufendeli wange, o linga eci cĩvi kueci ci kuete esilivilo lialua kokuange.’

7. Momo lie tu sukilila oku pamisa ekolelo lietu ko cisola ca Yehova?

⁷ Yehova o yongola okuti, tu kolela okuti  eye o sole omunu lomunu pokati ketu. Eye wa kũlĩha okuti omo liovina vĩvi pamue tu pita lavio, tu pondola oku lipula nda o tu sole muẽle. Ale pamue tu kasi oku liyaka locitangi cimue ci seteka ekolelo lietu kocisola Yehova a tu kuetele. Nye ci ka pamisa ekolelo lietu? Poku lilongisa ndomo Yehova a siata oku lekisa ocisola caye ku Yesu, kolombuavekua kuenda ku vosi yetu.

NDOMO YEHOVA A LEKISA OCISOLA CAYE

8. Momo lie Yesu a kolelele okuti Isiaye wo solele?

⁸ Yehova lomõlaye va kasi kumosi vokuenda kuanyamo alua okuti omanu vakuavo ci sule. Ovo va li kuetele ukamba wocili kuenda ocisola calua omunu lukuavo. Yehova wa situlula ocisola caye ku Yesu ndomo tu ci tanga ku Mateo 17:5. Yehova nda wa popia lika hati, ‘U eye nda sanjukila.’ Pole, eye wa yonguile okuti tu kũlĩha ndomo a sole Yesu, kuenje wo tukula hati, “U Omõlange wa soliwa, ndo sanjukila.” Yehova wa sanjukilile calua Yesu kuenda ovina a laikele oku linga. (Va Efe. 1:7) Yesu ka kuatele atatahãi okuti Isiaye wo solele. Ocisola ca Yehova ca kala cocili ku Yesu, momo wa ponduile oku ci limbuka. Eye wa pitulula olonjanja vialua lekolelo okuti Isiaye u sole.—Yoa. 3:35; 10:17; 17:24.

9. Ondaka yipi yi situlula ocisola Yehova a kuetele olombuavekua? Ci lombolola. (Va Roma 5:5)

⁹ Yehova o lekisavo ocisola caye kolombuavekua. (Tanga Va Roma 5:5.) Kũlĩhĩsa ondaka yokuti “ca sukumũhila.” Ondisionaliu yimue Yembimbiliya ya lombololola ondaka oku sukumũhila hati, “ciya kokuetu ndolui.” Ocindekaise eci, ci lekisa ocisola calua Yehova a kuetele olombuavekua! Olombuavekua via kũlĩha okuti, vi “soliwe la Suku.” (Yuda 1) Upostolo Yoano wa lombolola ndomo eye a liyeva poku soneha hati: “Limbuki ocisola calua Isia a siata oku lekisa kokuetu okuti, tu tukuiwa omãla va Suku!” (1 Yoa. 3:1) Anga hẽ Yehova o sole lika olombuavekua? Sio, Eye o lekisa ocisola caye kokuetu vosi.

10. Konepa yipi Yehova a lekisa ocisola ca velapo kokuove?

¹⁰ Elinga lipi lia velapo liocisola Yehova a lekisa? Elinga lia velapo liocisola Yehova a lekisa mulo voluali, Ocisembi. (Yoa. 3:16; Va Rom. 5:8) Yehova wa eca Omõlaye osoliwe, poku ecelela okuti o fila omanu vosi, oco akandu etu a ecelue loku kala akamba vaye. (1 Yoa. 4:10) Eci tu sokolola kueci Yehova la Yesu va tu lingila, tu pondola oku limbuka ocisola calua ovo va tu kuetele. (Va Gal. 2:20) Ocisembi ka ca eciwile omo okuti esunga lia Suku lia kisikile oku ci linga. Oco ombanjaile yimue yocisola. Yehova wa lekisa ocisola caye kokuetu poku tu ĩha ocina ca velapo kokuaye ndocilumba okuti, Yesu. Yehova wa ecelela okuti Omõlaye o tala ohali kuenda oku tu fila.

11. Nye tu lilongisila kolondaka via Yeremiya 31:3?

¹¹ Yehova ka tu kuetele lika ocisola, pole, o tu sapuila okuti o tu sole. (Tanga Yeremiya 31:3.) Yehova wa tu kokela kokuaye omo okuti o tu sole. (Sokisa Esinumuĩlo 7:7, 8.) Lacimue kuenda lomue o pondola oku tu tepa kocisola caco. (Va Rom. 8:38, 39) Ove o liyeva ndati omo liocisola caco? Poku tanga Osamo 23, limbuka ndomo Daviti a liyeva omo liocisola ca Yehova, konjila ndomo o tata kuenda ndomo ci tu vetiya vosi yetu.

OCISOLA CA YEHOVA CI KU KUATISA OKU LIYEVA NDATI?

12. Ove o pondola oku lombolola ndati Osamo 23?

¹² Tanga Osamo 23:​1-6. Osamo 23 ocisungo cimue ci situlula ekolelo liocisola Yehova a tu kuetele kuenda onjila ndomo a tu tata. Daviti, okuti usonehi wosamo eyi, wa lombolola ukamba wa kala pokati kaye Lungombo  waye Yehova. Daviti wa enda oku liyeva okuti wa kolapo poku ecelela okuti Yehova u songuila kuenda eye wa kolelele calua Kokuaye. Daviti wa kũlĩhĩle okuti Yehova wa laikele oku u sola oloneke viosi. Nye co vetiya oku kuata ekolelo liaco?

13. Momo lie Daviti a kolelele okuti Yehova wa laikele oku u tata?

¹³ “Lacimue ci ñambela.” Daviti wa liyevele okuti wa kala oku tatiwa ciwa, momo Yehova wo wĩha cosi a sukilile. Daviti wa kũlĩhĩlevo okuti Yehova wa kala ekamba liaye kuenda wa taviwile laye. Eli olio esunga lieci a kolelele okuti, ndaño kovaso yoloneke wa laikele oku liyaka lovitangi, Yehova wa ponduile oku u tata loku wĩha cosi a sukilile. Omo okuti Daviti wa kolelele okuti Yehova u sole kuenda wa kala oku u tata, co kuatisa oku yuvula oku sakalala kuenje wa kuata esanju.—Osa. 16:11.

14. Yehova o pondola oku tu tata ndati locisola?

¹⁴ Yehova o tu tata locisola, ca piãla enene eci tu pita lovina vĩvi komuenyo wetu. Manji Claire a okuti wa talavaya ko Betele 20 kanyamo, ka kũlĩhĩle ndomo a ponduile oku tata epata liaye eci ovo va liyaka locitangi cimue cinene. Isiaye wa kuatiwa luvei wotrombose, umue pokati ka va manjaye wa tundisiwa vekongelo kuenda epata liaye lia kuata ekambo liolombongo, loku pumba onjo yavo. Yehova wa va tata ndati locisola? Manji Claire wa popia hati: “Yehova wa ecelela okuti epata liange li kuata ovina va sukila eteke leteke. Olonjanja vialua Yehova wa tu ĩha ovina vialua okuti, vina tua sukilile ci sule! Nda siata oku sokolola ndomo Yehova a tu kuatisa kuenje lalimue eteke ndi ka ivalako ocisola caye. Ovina  viaco via ñuatisa oku amamako oku vumba Yehova lesanju eci ndeya oku lipita vali lovitangi vikuavo komuenyo.”

15. Momo lie Daviti a yevela ekavuluko? (Talavo ociluvialuvia.)

¹⁵ “Eye o ndi kavuluisa.” Olonjanja vimue Daviti wa enda oku kuata esakalalo omo liovitangi vialua kuenda alambalalo. (Osa. 18:4-6) Pole, ocisola ca Yehova kuenda onjila yaye yoku u tata ya enda oku u kavuluisa. Yehova wambata ekamba liaye liakava “vovisenge vi talala” kuenda “kovitumãlo viepuyuko via tapeliwa ciwa.” Kuenje Daviti wa pamisiwa kuenda wa tẽla oku amamako oku vumba Yehova lesanju.—Osa. 18:28-32.

16. Ocisola ca Yehova ci ku kavuluisa ndati?

¹⁶ Cimuamue haico okuti, koloneke vilo eci tu liyaka loloseteko kuenda ovitangi komuenyo, ‘ka tu nyõliwa omo liocisola ka ci pongoloka ca Yehova.’ (Asiõ. 3:22; Va Kol. 1:11) Kũlĩhĩsa ulandu wa manji Rachel. Eye wa sumuĩle calua eci ulume waye o siapo vokuenda kuefengi lio KOVID-19. Nye Yehova o lingila? Eye hati: “Yehova wa ñuatisa oku liyeva okuti ndi soliwe. Eye wa nyĩha akamba va enda oku pita otembo lame, oku ndi nenela okulia, oku numaisa asapulo ocisola, ovisonehua vi pamisa kuenda va enda oku yola lame, loku amamako oku ndivaluisa okuti Yehova wa kala oku ñuatisa. Ame olonjanja viosi ndi pandula Yehova, omo lioku nyĩha epata eli linene lia vakuacisola.”

17. Momo lie Daviti ka ‘yokokelele cimue’?

¹⁷ “Lacimue cĩvi ndi yokokela, momo ove o kasi lame.” Omuenyo wa Daviti olonjanja viosi wa kala kohele kuenda wa kala lovanyãli valua va pama. Pole, ocisola ca Yehova co kuatisa oku liyeva okuti wa kolapo kuenda wa teyuiwa. Daviti wa ponduile ku liyeva okuti Yehova wa kala laye kolonepa viosi kuenje co tulisa utima. Omo liaco, eye wa imba hati: “[Yehova] wa ndi yovola kusumba wange wosi.” (Osa. 34:4) Ndaño okuti Daviti olonjanja vimue wa enda oku yeva usumba, pole, ka yokokele momo wa kũlĩhĩle okuti Yehova wo solele.

18. Oku kũlĩha okuti Yehova o tu sole, ci tu pamisa ndati eci tu kasi lusumba?

¹⁸ Oku kũlĩha okuti Yehova o tu sole kuenda o tu ĩha ongusu eci tu kasi oku liyaka locitangi cimue, ci tu kuatisa ndati? Manji umue ukundi wotembo yosi o tukuiwa Susi wa lombolola ndomo eye lulume waye va liyeva eci  omõlavo a liponda, eye hati: “Eci ku pita ocina cimue cĩvi komuenyo wove okuti kua kapepleleko, o yeva evalo lialua kutima kuenda okuata usumba wokuti, cimue cĩvi ci pondola oku pita vali. Pole, ocisola ca piãla ca Yehova ca tu pamisa loku tu teyuila.” Manji Rachel wa tukuiwa ale, ivaluka okuti: “Vuteke umue eci nda kala oku yeva esumuo lialua kuenda nda sakalalele calua loku kuata usumba, ame nda likutilila lolukandi ku Yehova. Vepuluvi liaco, nda liyeva okuti eye wa tulumũla utima wange kuenda wa ndi lemba ndeci ina umue a linga loñaña yaye kuenje noke nda pekela. Lalimue eteke ndi ka ivalako eteke liaco.” Manji umue ukulu wekongelo o tukuiwa Tasos, wa kala anyamo akuãla vokayike omo lioku likala oku panga onepa kusualali. Eye wa limbuka ndati ocisola kuenda ekuatiso lia Yehova? Eye wa popia hati: “Yehova wa nyĩha cosi nda sukilile. Eci ca pamisa ekolelo liange liokuti ndi pondola oku u kolela lutima wosi. Handi vali, Yehova pocakati cespiritu liaye, wa nyĩha esanju ndaño okuti okayike ocitumãlo cimue ci sumuisa. Eci ca ñuatisa oku limbuka okuti eci ndi vokiya ekolelo liange ku Yehova, ndi limbukavo ocisola calua eye a ñuetele. Kuenje osimbu nda kala vokayike nda fetika oku talavaya ndukundi wotembo yosi.”

AMELA KU SUKU YOVE UKUACISOLA

19. (a) Oku kũlĩha okuti Suku o tu sole ci tu vetiya oku likutilila ndati? (b) Ocina cipi catiamẽla kocisola ca Yehova wa limbuka komuenyo wove? (Tala okakasia losapi hati “ Olondaka vi tu kuatisa oku limbuka ocisola calua ca Yehova.”)

¹⁹ Ovolandu tua konomuisa ndeti, a lekisa okuti Yehova, “Suku yocisola,” o kasi letu! (2 Va Kor. 13:11) Eye wa tu kapako omunu lomunu. Tua kolela okuti tu kasi oku “teyuiwa locisola Caye ka ci pongoloka.” (Osa. 32:10) Osimbu tu sokolola ndomo Yehova a lekisa ocisola caye kokuetu, tu ka limbuka vali calua ndomo eye a tu kapako kuenje ci ka tu vetiya oku amela kokuaye. Tu pondola oku likutilila kokuaye lelianjo kuenda oku u sapuila okuti tu yongola ocisola caye. Tu pondolavo oku u sapuila asakalalo etu osi, loku kolela okuti eye o kuete elomboloko liasakalalo aco kuenda o yongola oku tu kuatisa.—Osa. 145:18, 19.

20. Ocisola ca Yehova ci tu vetiya ndati oku amela kokuaye?

²⁰ Ndeci tu vetiyiwa londalu ya tokota eci ku linga ombambi, tu vetiyiwavo locisola calua ca Yehova. Ocisola ca Yehova calua enene kuenda o kuetevo ocikembe. Kuenje, sanjukila ocisola Yehova a ku kuetele. Omo liaco, vosi yetu tu sanjukili ocisola caye poku popia hati: “Ndi sole Yehova.”—Osa. 116:1.